أخوكم في الجهاد

[dr_pattoot]

هاي يا دكاترة

أنا عارف إن أنا إتأخرت كتير أوي عشان أشارك معاكم في الفورم بس أنا بقالي سنة كاملة و أنا بفكر في الموضوع بجدية .. أشارك ، ماأشاركش .. أكتب ، ما أكتبش .. بس النهارده أخدت القرار ..

بصراحة أنا أصلي صابح علي امتحان بكره .. عندي شرعي.. و خلاص بقيت حاسس إني هاطلع من الكلية دي وكيل نيابة مش ولا مؤاخذة دكتور .. اه نسيت أقولكم إن أخوكم سجين في فرع بني سويف .. اه .. و الف آه .. على سجن بني سويف .. أنا بقالي معتقل 3 سنين فيه .. و دي الرابعة .. هانت !! الواحد فاضل له 3 سنين وينهي مدة العقوبة ..

اتمنى ترحبوا بفرد جديد من أفراد المقاومة و أخوكم في الجهاد ..

معلش أنا هاكتب لكم تاني بس دلوقتي هاروح أتحرى .. أقصد أذاكر شوية .. و لو إني عارف كويس جداً خالص إن الحل مش في المذاكرة لأن اللي بنذاكره حاجة و اللي بنتسأله حاجة و اللي بنألفه في ورقة الإجابة حاجة أما التقدير دا حاجة تانية خالص مالهاش دعوة بأي شئ غير ستر ربنا ..

أشوفكم بعدين .. و أتمنى إن يكون لي أصحاب جداد .

[zahraatoty]

السلام عليكم ورحمه الله وبركاته

أهلا بيك زميلا في هذا المنتدى

وأحب أطمنك هيبقالك أصحاب هنا ..لا تقلق

المهم في حاجه عايزه أقولها

أحنا فعلا في جهاد من كل النواحي

ودي المتعه عندنا في كليه الطب

أنك تذاكر وتجاهد وفي الأخر بترسى على أنك بتدخل تألف طب جديد غير اللي درسته

وهي دي قمة المتعه..

في كليه مسموح للطلبه بتوعها أنهم يألفوا طبعا لأ

على العموم لا تقلق

هتتخرج دكتور يعني هتتخرج دكتور

لأ بجد..... إحنا فعلا بنجاهد طلبة حاليا وأطباء في المستقبل

المهم النيه علشان جهادنا ده يبقالوا معنى وقيمه وثواب

[القصرعينية]

أهلا بالعضو المجاهد ونتمنى أن يثمر جهادك معنا في المنتدى

[dr_pattoot]

طبعاً قبل ما أقول أي حاجة .. أحب أشكر ربنا جداً على رجوعي سالماً
من الجبهة اليوم بعد إجتياز معركة الشرعي بدون خساااااااااااااااااااااااائر :yadmaghy:
أحب أقول شكراً لكل من شركائي في الجهاد "zahraatoty" و "القصرعينية"
عشان أنهم شاركوني و حسسوني إن جهادنا لسة بخير..:smiley20:


بصراحة أنا ماكنتش متوقع إن حد يعبرني بالسرعة دي ..
لكن أنا باكتب النهارده عشان أطلع شوية من الكبت اللي جوايا .. :waaaaawaa

قولت لكم إن كان عندي إمتحان الشرعي النهارده....
و طبعاً - كعادة أي مجاهد -كنت أول مرة بفتح الكتاب أول إمبارح ...
أصل أنا عندي مبدأ

" إن الواحد إن ماكانش يتزنق في المذاكرة مش هايحس إنه بيجاهد "
المهم....
ابتديت أذاكر شوية أحس أني في كلية علوم و شوية أحس إني في كلية حقوق
وشوية أحس إني في كلية شرطة ..

و فين و فين لما أرجع أفتكر أني في كلية طب.
المهم .. لفت نظري موضوع جه النهارده في الامتحان

و نفسي تشاركوني إحساسي و أنا بذاكر الكلام ده
الموضوع هو موضوع
" الخرطوش الناري " .. .. "firearm cartridge "

(any cartridge is formed of أي خرطوش ناري يتكون من
& A tube with a closed base مظروف مغلق القاعدة

opened top و مفتوح القمة
this tube is filled with gunpowder المظروف مملوءة بالبارود
the open top is closed فتحة القمة مغلقة

by the missile whish is impacted in it بالطلقة المحشورة داخلها
in the center of the nase of the tube و في مركز قاعدة الأنبوبة
there is a rounded hole توجد فتحة دائرية
impacted in it the percussion cap) محشورة داخلها كبسولة القدح
" أنواع الخرطوش الناري " " types of firearm cartridge"
* خرطوش بنادق الخدمة service rifle`s cartridge *
* خرطوش المسدس الآلي Automatic pistol`s cartridges *
* خرطوش المسدسات الساقية revolvar`s cartridges *
* خرطوش بنادق الرماية sporing gun`s cartridges *
* خرطوش بنادق الغفير ghaffir`s gun cartridge *

طبعاً أنا معنديش تعليق على الكلام ده غير إنه مفيد جداً لتأهيل الأطباء للجهاد.

[Eman Samir]

حلوة
بس احنا كده هانروح فى داهية ......شرعى

اهلا بيك معانا

[kalamntena]

اولا اهلا يا دكتور مجاهد
منور المنتدى
ومعلش على التأخير
ثانيا
رابعة دى احلى سنة فى الكلية
مش عارفة ليه بره المذاكرة الامور كلها بتبقى ملعبكة بس بجد
انا كنت بحب الشرعى جدا
اما موضوع التأهيل
لاطباء الجهاد
سيادتك غلطان
ما الاطباء ماليين البلد
ده لان السجون اتملت فهم عايزين جريمة كامله محدش يكشفها عشان مفيش مكان فى السجون
قال ايه مفيش اثر وراء الجانى
ولذلك ده تأهيل
عشان نطلع مجرمى المستقبل
اى خدمة يا فندم
لو حد سأل عليا انا فى قردستان الى اشعار اخر




زهراء انا باخاف من الخط الازرق الكبير
ايه الحكاية

[مصباح]

أهلاً بيك يا بطوط ..
خرجت توك من مجلة ميكي ؟؟؟
شكلك رافع شعار خلي السلاح صاحي !!!

ربنا يعينك و يعيننا على جهاد العلم ..

[دولسيكا]

منور يا دكتور بطوط
أنا داخلة المنتدى وسامعة صوت ضرب نار ايه الحكاية؟
عموما ربنا يعينك على الحرب اللى انت فيها وتقدر تعدى القناة
الفاصلة بين رابعة و خامسة وبعدين تدمر خط بارليف المكون من النسا و الاطفال
وتوصل للساتر الرملى(الباطنة و الجراحة) وبعد ما تعديه تقدر تقول انك انتصرت
بس خليك شجاع و بلاش ترفع الراية البيضا
:smiley32:

[dr_pattoot]

:aiaiai: خلي السلاح صاحي و إنت مش مهم .. تنام .. تشخر .. تحلم ..

مش لازم .. المهم السلاح صاحي و بس !!!

:yadmaghy: خلي السلاح صاحي و إنت مش مهم .. في إغماءة .. في غيبوبة .. ميت ..

مش لازم .. المهم .. إن السلاح يكون صاحي و بس !!

معلش يا مصباح .. بس حسيت إن الشعار اللي إنت قلته ناقص و كان لازم

أكمله .. طبعاً من وجهة نظري الجهادية البحتة ..:smiley6:



أما كلمنتينا أنا سألت عليكي في قردستان :black: قالولي إنك إختفيتى مع بن لادن

في الكهوف و مفيش أخبار عنها غير اللي بتكتبها من وقت للتاني في المنتدى.



و شكراً ليكي يا إيمان على ترحيبك و أحب أقولك إن إحنا " مجاهدين الطب " عمرنا ما هنروح في داهية أبداً :tom&jery:

لأن السبب بكل بساطة إن الداهية هي اللي رايحة فينا .. الداهية هي اللي ماليانا و عايشة جوانا و صعب جداً التخلص منها .. أصلها ورانا ورانا .. طبعاُ عارفة إيه هي الداهية و مش محتاج أوضح و أقول إنها " علوم الطب المتقدمة اللي بندرسها " .





و باي باي دلوقتي .

و أشوفكم على داهية ..

يوووووه .. أقصد على خير .

[she.]

ايييييييه دنيا
يعنى اسيبكوا شويه ارجع الاقيكوا كده
اوكى
ربنا يكون فى عونك يادكتور
ويخرب بيت الشرعىالى مضايقك
ولا اقولك ممكن يخرب بيته بعد يوم الخميس 17\2
بليز امتحن بس
وبعدين يتخرب بيته

وكمان علشان خاطرى يخرب بيت
ال herniaالف مره

[she.]

ياخبر
نسيت اقولك
اهلا وسهلا ونورتنا

[kalamntena]

كلمنتينا أنا سألت عليكي في قردستان قالولي إنك إختفيتى مع بن لادن


ايه يا عم انت عايز تودينا فى داهية
كل ما فى الامر
ان القرود هناك فى قردستان مش فى حتة تانية (واخد بالك )
كانت عايزة شوية موز
رحت نازلة على الصعيد جبت الموز من هناك ورحت طالعة على قردستان برضه مش حتة تانية ( مصحصح؟؟)
وصلت الطلبية _ الموز _ مش حاجة تانية (مركز؟؟)
ورحت واخدة اول عربية كارو وجيت

[nabilprofelgen]

حمد الله على السلامة


و يجعله عامر

[مصراوى]

اهلا بيك معانا
معلش انا عارف انها متاخرة بس معلش
المهم انها و صلت
اهلا بيك تاني مرة