ميزو مشاوير [الأرشيف] - قصر العيني

kalamntena

28-02-2007, 09:34 PM

السلام عليكم و رحمة الله وبركاته

بفرض استمرار النظام العقيم اللى كنا ماشيين بيه لمدة 12 شهر

اليكم ميزو مشاوير

بس في الاول فيه كلمة مهمة
اوعى تكون مشورجي
اعتبر المشوار ده
خدمة للمريض مقابل تعليمك
و احتسب الاجر واستحضر النية

نبدأ؟

بسم الله

مشوار الاشاعات
المكان: قسم الاشاعات عند شؤون الاطباء ( عند سبيشيال الريديو) فيه اوضه كبيرة اسمها السكريتارية المجمعة
الزمان قبل الساعة 11 صباحا
الاوراق المطلوبة : اذن القبول
وظائف الكلى
الريكويست
الاشاعات السابقة
الخطوات: امضاء المدرس المساعد وبعدين حجز ميعاد على الكمبيوتر

الايرجنت

المكان : اوضة الاشعة المقطعية في الطوارئ
الزمان في اي وقت
الاوراق المطلوبة: اذن القبول
الريكويست
تقرير الاشعة السابقة
تحليل وظائف الكلى اذا كان هيعمل بصبغة
الخطوات : امضاء نائب الايرجنت
و تسليم الريكويست للفني
والسؤال عن موعد حضور المريض

الايكو
المكان: الدور التالت اخر الطرقة يمين هتلاقيه في الوش عارفين الحيطة السد دي ؟ ايوه هناك
الزمان لحد الساعة 12
الاوراق المطلوبة: التذكرة كلها عشان فيه ورق هتملاه هناك مع ريكويست الايكو
الخطوات هتملى ريكوست تاني غير اللى النايب كاتبه فى التذكرة
و تاخد معاد عند الموظفة المسؤولة

بنك الدم
المكان :بنك الدم ورا مسجد الكلية الدور التالت
الزمان:لحد الساعة واحدة لو دم علاج
و لحد الساعة 11 لو دم لستة
و في اي وقت لو دم طوارئ ( من اي حتة غير الاسعافات وكشك الجراحة وعمليات الحوادث و عمليان مخ واعصاب لان دول بيتصرفوا من بنك دم الطوارئ)
الاوراق المطلوبة: الريكويست _ من بنك الدم نفسه_
اذن القبول
صورة الدم
تحليل السيولة( لو هتحجز بلازما)
عينة بنك دم
الخطوات : املى الريكويست
مضى النائبة
اعمل الفيلة
سيب العينة بالريكويست وتعالى بعد ساعة و ونص استلم الدم

الباثولوجي
المكان : قسم الباثولوجي
الزمان لحد الساعة 11
الاوراق المطلوبة: ريكويست الباثولوجي
و العينة
الخطوات:سجلها عند الموظف بعد ما تمضي النايب عليها وخد رقمها

متروحش من غير عامل لو العينة كبيرة

دول اهم حاجات
هابقى اكتبلكو الباقى ان شاء الله لما ارجع بكرة ان شاء الله

بالتوفيق

rabab gamal

28-02-2007, 09:45 PM

بجد الله يكرمك يا د- كلمنتينا ويجعله في ميزان حساناتك ان شاء الله

الامتياز خلاص بكره والواحد حاسس بمشاعر مخطلته يعنى فرحانه على قلقانه على خايفه على متحمسه ساعات بحس انى هتعلم كل حاجه وسعات تانيه بحس ان انا هبقى ساذجه كده ومبعرفش اعمل اى حاجه
وعندى سؤال هو احنا هيكون معادنا كل يو الساعه 8

kalamntena

28-02-2007, 10:14 PM

جزانا واياكم يا فندم

مؤقتا من 8 ل 8 وربع
معلش ربنا يوفقكوا
الامتياز سنة جميلة انا زعلانة انها خلصت بسرعة كده
مش هاطول عليكم
عشان الحق اروح الشيفت بتاعي
دعواتكم الدنيا تكون هادية النهاردة

brightgalaxy5

28-02-2007, 10:55 PM

جزاكم الله خيرا
يا ريت لو عايزة تنصحينا بأي حاجة يا دكتورة كلمنتينا
اصل احنا برده مخدناش على الصورة

zahraatoty

01-03-2007, 06:52 AM

جزاك الله خيرا يا كوكو يا حبيبتي
بجد بجد حياتي من غيرك...سلطه
النهارده اليوم الأول ودايما اليوم الأول بيكون يوم الرعب العالمي
وطبعا أنا مع برايت أي نصيحه عايزه تنصحيها لنا كلنا آذان صاغية
ربنا يكرمك ياقمر ..أشوفك في الكلية قريب أن شاء الله

kalamntena

01-03-2007, 08:34 PM

ربنا يخليكي ليا يا توتي
اسألوا وانا هاجاوب

اصلي النهاردة دماغي مشغولة بحاجة واحدة بس
دفعتي هتوحشني قوي

فنصيحتي ليكو
اشبعوا من بعض في الامتياز
و محدش يزعل حد

brightgalaxy5

02-03-2007, 08:50 AM

هو معليش سؤال صغير

في الشيفت كدة ممكن يجيلي كام مشوار
وهل البنات بتروح مشاوير برده ولا كله على راسنا؟؟

مصباح

02-03-2007, 02:30 PM

دفعتي هتوحشني قوي

فنصيحتي ليكو
اشبعوا من بعض في الامتياز
و محدش يزعل حد
__________________أنا مؤيد تماماً

kalamntena

03-03-2007, 01:23 AM

والله على حسب الوحدة والوقت
بوست حوادث الباطنة
مرة اخدت 13 مشوار اوتر( يعني بره الوحدة)

متتخضوش انا اللى كنت باحب اخد مشاوير الاوتر

وممكن في النسا متلاقيش ولا مشوار

المشاوير كلها تقريبا بتكون في شيفت الصبح
والبنات لازم تروح مشاوير طبعا امال ايه؟

بس طبعا عيب قوي لما بنت تروح مشوار بنك دم بالليل
ده لان الدنيا هناك ضلمة
يا ما حد يروح معاها
يا ما تدور على واحد زميلها في وحدة تانية يروح هو المشوار

zahraatoty

04-03-2007, 07:24 AM

السلام عليكم ورحمه الله وبركاته
أنا بدأت بااااااااااااطنه
وحدة د.أحمد ضرغامhttp://www.kasralainy.edu.eg/english/students/forum/images/smilies/nf02.gifhttp://www.kasralainy.edu.eg/english/students/forum/images/smilies/smiley19.gifhttp://www.kasralainy.edu.eg/english/students/forum/images/smilies/smiley19.gifhttp://www.kasralainy.edu.eg/english/students/forum/images/smilies/smiley19.gif
دور السابع
المأساه الحقيقيه هي طلوع السلم لو الأسانسير مش فاضي
النواب كويسين جدا والتمريض زي السكر

في الشيفت كدة ممكن يجيلي كام مشوار
وهل البنات بتروح مشاوير برده ولا كله على راسنا؟؟أيوه يا دكتور أنا عايزه أقولك أن البنات هما اللي شايلين القسم :smiley7.:والشباب مريحين في حجرة النايبhttp://www.kasralainy.edu.eg/english/students/forum/images/smilies/pissed.gif

وعلى رأي كلمنتينا البنات لازم تروح مشاوير
أدعولي عندنا حوادث النهارده
هقوم علشان مدام فاطمه ماتبهدلنيش
سلام

kalamntena

04-03-2007, 12:43 PM

انا لسة سائلة عليكي امبارح يا توتي

و اطمنت عليكي الحمد لله
الدور السابع كويس قوي
ومتطلعيش من غير اسانسير
اديني باقولك اهوه
والله لو عرفت انك عملتيها تاني وطلعتي على السلم
انتي حرة

أنا عايزه أقولك

اللازمة بتاعتك دي بحبها قوي يا توتي

مقلتليش انتو كام واحد في الوحدة
و كام في الشيفت
وكده يعني

وباقي الشباب بدأتوا ايه؟؟

kalamntena

04-03-2007, 12:56 PM

مشوار الدوبلر

المكان : الدور التامن باطنة او عيادة السكر
الزمان: قبل 11 عشان الاستاذ ميمشيش
الاوراق المطلوبة : التذكرة كاملة
الخطوات: لازم النايب يكلم الاستاذ الاول ويتفق معاه
او يحجز في اللستة و دي عمري ما عملتها
و بعد كده تاخد العيان وتروح وطبعا لازم تكون عارف حالته ايه

مشوار القرار

المكان : الطب النووي
الزمان : قبل 12
الاوراق المطلوبة : التذكرة كاملة
الخطوات : كتييييييير تبدأ بالكشك القزاز اللى في الدور الاول
روح انت هناك وهم هيقولولك

مشوار لفة الرعايات

المكان : رعاية قسم 5
رعاية صدر الدور التاني فوق الاستقبال
و بعدين د.شريف مختار الاول
و الدور التاني
و بعد كده رعاية د. حسام موافي
الزمان: اي وقت
الاوراق المطلوبة : ورقة لفة الرعايا مكتوب فيها تاريخ المريض وايه اللى اتعمله
الخطوات: نصيحة لوجه الله
لفها الاول بالتليفون
لو لقيت مكان فاضي روح على طول على الرعاية دي
طبعا من غير العيان
لو مالقيتش
هتضطر للاسف تلفها
النايب اللى معندوش مكان بيكتب
sorry no availble beds
و اللى عنده مبيكتبش حاجة
لو لقيت مكان متكملش اللفة

سهل على نفسك الامور
و اتصل بالتليفون
رقم السويتش : 0
هو هيوصلك باي مكان انت عاوزه

فيه ايه تاني؟؟؟

لو حد عنده اي مشوار عايز يعرفه يقول لحسن انا مش في دماغي دلوقتي

brightgalaxy5

04-03-2007, 01:07 PM

انا بدأت اطفال في وحدة محمد صبري ابو علم
مش بعمل حاجة تقريبا

kalamntena

04-03-2007, 01:23 PM

جديدة الوحدة دي

مكنتش على ايامنا

brightgalaxy5

05-03-2007, 05:35 PM

هزولت
اصل احنا اللي سايبنهم يعملو كدة فينا
النهاردة الست الممرضة بتسالني انت معانا هنا
قلتلها ايوة
قالتلي طيب خد العينة دي اعملها ABG
!!!!!!!!!!!!!!!!!!!!!!!!!!!!!!!
شوفتو المسخرة
عايزاني اطلعلها فوق
انا مسكت نفسي وقلتلها انا مش اون النهارده
كان ممكن اعرفها مكانها
بس الطيب احسن.
.
.
.
وبحاول اتعلم حاجة من النواب ومش عارف
انا بروح مشاوير كتير وشايل كويس
ورغم كدة بحاول اسأل النواب على حجات
بيجاوبوني من تحت سنانهم
مش عارف ايه اللي بيحصل ده
بجد مافيش حد عارف الاحباط اللي انا فيه
انا قعدت حوالي 4 ايام في استقبال احمد ماهر
بعديها كنت انا وحوالي 2 امتياز جديد معايا اللي شايلين الاستقبال والنواب طلعوا واستأمنونا
وهو ده اللي مخليني متنرفز
يعني احنا شغالين عمال وهما شغالين دكاترة
حسبي الله ونعم الوكيل
بجد لو حد عارف مكان الواحد يتعلم منه يقولي
انا مش هقضي السنادي شيال بس

rabab gamal

05-03-2007, 06:47 PM

انا فى وحده د-صلاح الغزالى
روحت العياده واستفدت شويه
الدكتوره قعدت توقلى يالا اكشفى على العيانين واكتيبلهم الدواء لوحدك
اه والله ده الى حصل بس انا كنت بسئلها قبل ما اكتب اى حاجه
بالنسبه للقسم كله مشواير بس احنا متعاونين مع بعض سواء الاولاد او البنات
التمريض بصراحه ما اتعملتش معاهم اوي
بس هم متنرفزيين لوحدهم
النواب كويسين بس مرهقين جدا ومش بينامو خالص والله بيصعبو عليا

brightgalaxy5

05-03-2007, 06:51 PM

مدام بتتعلمو انا جايلك
ممكن؟؟
قوليلي شفتاتك امتى
مين معاكي ولاد؟؟؟

rabab gamal

05-03-2007, 07:02 PM

بالنسبه للشفتات هنحددها بكره ان شاء الله
عشان حصلت شويه لخبطه كده
بس القسم كله مشاوير
انا كنت بتكلم عن العياده هى الى اتعلمت منها كويس
خصوصا لو د- رسميه او د- احمد اليمانى هو الى كان موجود
وبالنسبه للاولاد الى معانا
مش فاكره اساميهم

kalamntena

05-03-2007, 07:36 PM

ااااااااااااااااااه اول اصطدام بالواقع

عايز تتعلم في الاطفال احضر عيادات متخصصة
و انزل الاستقبال( مش الحوادث)

و كلاكيت تاني مرة

اسمع
اتكلم
و بعدين اسأل

فاهمني

عيادات الباطنة كويسة
الطوارئ هايلة
عمليات الحوادث

برايت ماتخدش اوامر من التمريض
بس كده

brightgalaxy5

05-03-2007, 07:40 PM

عيادات في المنيرة زي النزلات كدة
ولا عندنا في اليباني في المكان اللي زحمة ده في الدور التاني؟؟
انا النهارده كنت في الطوارئ ومكانش فيه وقت النواب يجاوبوني على حاجة

brightgalaxy5

05-03-2007, 07:41 PM

وهو الحوادث دي هي الطوارئ؟؟؟؟؟ عشان احضر عملياتها

فين يعني
معليش انا متقل عليكي شويتين

kalamntena

05-03-2007, 07:48 PM

و لا يهمك يا فندم

عمليات الحوادث مكانها قدام رعاية د. شريف مختار الدور الارضي
دي اللى بتتعمل فيها الزوايد و الاستكشاف والحاجات دي
و هي شغالة 24 ساعة

kalamntena

05-03-2007, 07:51 PM

معلش ما شوفتش الرد الاول

العيادات في المنيرة وعيادة الكبد في الياباني يومين في الاسبوع

و بعدين احنا قلنا اسمع الاول
وبعدين اتكلم وبعد كده اسأل

مينفعش تسأل من اول مرة
غالبا لو حد رد هيكون مضايق
الناس دايما بتحب تكلم واحد عارف

kalamntena

05-03-2007, 07:52 PM

النزلات
ياااااااااه اكتر مكان اتعلمت فيه في الاطفال
و بعده الغدد

zahraatoty

07-03-2007, 10:21 AM

السلام عليكم ورحمه الله وبركاته

من موقع الأنهيار الكبير

وأول يوم ليoff

من مستشفي الباطنه

إحنا 23ميزو في الوحده

أربعه خرجو إنتدات

والباقي موجود في الوحده

يمكن الرقم يظهر أنه كبير بس الشغل أكثر من كده بكتيييير

فعلا الوحدات محتاجه

أكتر يوم أتعلمت فيه هو يوم الحوادث

أتعلمت من النايب د.محمد سيد ومن التمريض

فعلا كل ما كان عدد الإ متياز كبير كل ما كان الشغل قليل وفرصه التعليم أكبر

التمريض معانا زي السكر وكمان النواب ربنا يكرمهم

والمجموعه بتاعتي كلها كويسه ومتعاونه"ماشاء الله ربنا يكرمهم" سواء كانوا شباب أوبنات

كوكو عايزه أقولك

أني حبك في الله

kalamntena

07-03-2007, 11:01 AM

احبك الذي احببتني فيه يا توتي

23
ماشاء الله لا قوة الا بالله

احنا كنا من اكتر الوحدات عددا وكنا
ان
ان
ان
ان

11

افتكر وحدة د.حلمي كانوا بادئين 4

العيال ماكنوش بيروحوا يا عيني

ياللا
خير
بالتوفيق ان شاء الله
اشتريتي جوانتيات وللا لسه يا توتي؟؟

nabilprofelgen

07-03-2007, 02:30 PM

فين ايام زمان
دكتور حسين خيرى قال
توقع الاسوء
عشان لما لما تطلع بكلمة يبقى دا مكنش فى توقعك
فتقوم تفرح و تحس انك قضيت كام ثانية فى حاجة مفيدة

اعتقد المشاويير هتفضل زى ما هيا
و الجو العام برده هيفضل زى ما هو
المهم مفيش حاجة مستهلة
بس لازم يعرفوا امكانياتك برده

يعنى لو قمت بمشوار انت حاسس انه موش مفيد بالنسبة ليك و برده مش هيقدم و لا يأخر حاجة للعيان ابئى اديلله حقه و زيادة
مشوار غازات الدم ده كنت بعمله فى ساعتين او ساعتين و نص
و يسلام لو مشوار اشعة تقريبا كنت بعمله فى الشيفت كله
المهم خللى فى جيبيك اى حاجة تقراها
عدى على زمايللك اللى بيأمبجوا اعرف بيأمبجوا ليه
روح نام حبتين و ارجع
روح كل
لو عندك شغلانة روح خللصها

متعقدش الدنيا و قول ياباسط

و يجعله عامر

kalamntena

07-03-2007, 08:48 PM

ميه ميه يا نبيل

بس مشوار الغازات ده كان اول مشوار بيخلص
غالبا عيانيني بيكونوا مستنينه على غسيل او بايكاربونات

مصباح

07-03-2007, 09:57 PM

كلام من دهب يا بو نبيل

zahraatoty

08-03-2007, 07:14 AM

كوكو أشتريت علبة جوانتيات وخلصتها أصل حكايه سحب عينات الدم عجباني
لسه عينه غازات الدم اللي مش راضيه تنجح معايا بس وراها وراها لازم إن شاء الله تنجح مره

بصراحه دكتور حسين عمل فرق معايا في حاجات كتير خصوصا معامله العيانين
بالنسبه لبرايت أنت متوقع تتعلم أيه في الأطفال؟؟
حط نقط للي عايزه تتعلمه ومش عايز تخلص الدوره إلا لما تتعلمها
وأحضر في وقت غير شيفتك وخليك غلس وقوي الملاحظه بس
أنا بحاول أعمل كده
نبيل شكرا جدا على النصيحه حلوة بجد

brightgalaxy5

08-03-2007, 11:59 AM

انا غلس طبيعتي كدة
بس هغلس اكتر ماشي

rabab gamal

08-03-2007, 09:57 PM

المشوار الوحيد الى بحب اروحه هو بتاع بنك الدم
مش عارفه ليه معا انه بعيد اوى
وكمان الدكتور الى هناك بيوافق على الطلب بعد صعوبه ويعد يسالنى اسئله غريبه ذى مايكون انا الى هاخد كيس الدم مش المريض

nabilprofelgen

08-03-2007, 11:48 PM

هى هى هى هى
افتكر و انا فى التروبيكال كان معايا دفتر هيموجلوبين و دفتر بى تى و بى سى فاضيين
كنت بروح للنايب و كل ورقة معايا مضرووبة
و سبحان الله
مكنش بيسئل ولا سؤال

و يجعله عامر

zahraatoty

11-03-2007, 08:16 AM

افتكر و انا فى التروبيكال كان معايا دفتر هيموجلوبين و دفتر بى تى و بى سى فاضيين
كنت بروح للنايب و كل ورقة معايا مضرووبة
عايزه أفهم حكاية الورق المضروب ده ممكن نستفيد

brightgalaxy5

11-03-2007, 08:30 AM

تنبيه هااااااااام
مافيش بنت تروح لوحدها بنك الدم بالليل
لسة واحد صحبي وهو بيرجع بالكيس لقى واحد بيثبته وكان هيطلعله المطوة لولا ان فيه عربية بوكس كانت معدية فنداها والبلطجي جري
الكلام ده حصل لواحد صحبي مابالكم لو كانت بنت بقى
عايزين نقدم بلاغ ونخلي عسكري واحد يقف على الكوبري بدل ماهم قدام الكلية بالهبل

nabilprofelgen

11-03-2007, 10:21 AM

عايزه أفهم حكاية الورق المضروب ده ممكن نستفيدالورق المضرووب ده هو كل الورق اللى معاكى
يعنى اذن قبول جديد بتاريخ النهاردة
هيموجلوبين جديد بتاريخ النهاردة
بى تى و بى سى بتاريخ النهاردة
و تعرف قصة العيان
او تجيب دم لعيان قديم على اسم عيان جديد

بيوفر مشوار المعمل والانتظار و بعدها يطلع واحد يقوللك حات عينة تانية
بيقفل كل الطرق على النايب فى بنك الدم

بتجيب الدم للعيان فى حدود ساعة او ساعتين
بس المهم يكون العين اللى عايز نقل الدم

و يجعله عامر

kalamntena

11-03-2007, 02:53 PM

مابلاش يا نبيل
:smiley24.

مافيش بنت تروح لوحدها بنك الدم بالليل

مافيش بنت تروح لوحدها بنك الدم بالليل ولا تعدي من تحت الكوبري وهي رايحة من المنيرة لابو الريش والعكس ولا حتى الولاد

نصيحة
كلموا الاسعاف
ولو حكمت امشوا لحد الباطنة وخدوا الاسعاف من هناك

ربنا يحميكو

الدنيا فعلا فيها كتير

rabab gamal

11-03-2007, 10:14 PM

شكرا للتنبيه
على العموم انا مقضتش لغايه دلوقتى غير يوم واحد بس بالليل بس كان يوم عجب
وبصراحه الولد الى كان معانا هو الى عمل كل المشاوير
اقولكو مره كنت رايحه اجيب ده والدكتور مرضيش يصرفهولى غير لما اتصل بالقسم واتاكد ان العيان بينزف دلوقتى حالا روحت اتصلت وقلت للدكتور مش العيان مغرق الحمام ده والقسم كله دلوقتى متغرق دم والعمال محتاسين وعمالين ينضفو الدنيا وانا عماله اعمل نفسى متضايقه وبتكلم بجد والنائب يضحححححححححك ويقولى كده الدكتور هيصرفلك دم بالهبل
والاخر صرفتلى الكسين بالعفيه بس كنت خايفه لحسن ياخد منى السماعه ويسمع النائب وهو عمال يضحك

مصباح

11-03-2007, 10:31 PM

سبحان الله
على ايامنا مسمعتش حاجة

بس برضه الاحتياط واجب

kalamntena

11-03-2007, 11:15 PM

ليه يا مصباح ماحنا برضه على ايامنا واحد اتثبت تحت كوبري الاطفال

مصباح

12-03-2007, 01:04 AM

مممممم

يبقى الاحتياط واجب
و نص

zahraatoty

12-03-2007, 08:19 AM

الاخر صرفتلى الكسين بالعفيه بس كنت خايفه لحسن ياخد منى

يا بنتي كويس أنه صرف لك كيسين دم ده إنجاز في حد ذاته
أنا بروح أتخانق على واحد وفي الآخر مش بعرف أجيبه ألا لما هبه صحبتي تيجي تتخانق معاهم في بنك الدم
وبعد كده يصرفوه لدرجه أن مش بروح بنك الدم الوقتي كفايه مشوار CT & pathology

brightgalaxy5

02-05-2007, 08:10 PM

يا اهل الميزو
فيه حد قبض؟؟

zahraatoty

04-05-2007, 11:18 AM

أنا لسه
إسمي ما نزلش
نص الدفعه قبضت والنص التاني الشهر الجاي

إحساسك أيه يا برايت وأنت ماسك في إيدك أول مرتب؟؟

brightgalaxy5

04-05-2007, 12:31 PM

http://www.kasralainy.edu.eg/english/students/forum/images/smilies/smiley1.gif فرحت طبعا و الموظفة بطلعلي ال 426 وسبعين قرشhttp://www.kasralainy.edu.eg/english/students/forum/images/smilies/smiley1.gif

وقلت صحابي طبعا لازم يفرحو معايا
فانا عازمكم على الغدا النهارده

يلا انشالا ماحد حوشhttp://www.kasralainy.edu.eg/english/students/forum/images/smilies/smiley1.gif

الخير كتير يا جماعا ماحدش يتكسفhttp://www.kasralainy.edu.eg/english/students/forum/images/smilies/zain.gif http://www.kasralainy.edu.eg/english/students/forum/images/smilies/zain.gif http://www.kasralainy.edu.eg/english/students/forum/images/smilies/zain.gif

http://www.fabfoodpix.com/images/full/fF000187.jpg

http://www.fabfoodpix.com/images/full/fF000135.jpg

http://www.fabfoodpix.com/images/full/fF000137.jpg

http://www.fabfoodpix.com/images/full/fF000866.jpg

http://www.fabfoodpix.com/images/full/fF002695.jpg

http://www.fabfoodpix.com/images/full/fF000322.jpg

http://www.fabfoodpix.com/images/full/fF001567.jpg

http://www.fabfoodpix.com/images/full/fF001840.jpg

http://www.fabfoodpix.com/images/full/fF002916.jpg

لو حد نفسه في حاجة تانية يأمرني

بالهنا والشفاhttp://www.kasralainy.edu.eg/english/students/forum/images/smilies/smiley1.gif http://www.kasralainy.edu.eg/english/students/forum/images/smilies/smiley1.gif http://www.kasralainy.edu.eg/english/students/forum/images/smilies/smiley1.gif

__________________

brightgalaxy5

04-05-2007, 12:33 PM

أنا لسه
إسمي ما نزلش
نص الدفعه قبضت والنص التاني الشهر الجاي

مين قال الكلام ده
اللي مقبضوش مقبضوش عشان ماسلموش اقرار استلام العمل
وبعد ميسلموه هيقبضو بعديها بحوالي اسبوعين
بس مافيش حاجة اسمها نص ونص

أبو المعاطى شمروخ

04-05-2007, 12:47 PM

brightgalaxy5

04-05-2007, 12:49 PM

أبو المعاطى شمروخ

04-05-2007, 12:56 PM

ده حضرتك مرتب شهرين

:akh:

فى مثل شعبى فلاحى بيقول
جات الحزينة تفرح ملقتلهاش مطرح
عليه العوض

kalamntena

04-05-2007, 02:04 PM

انا افتكر اول مرتب كان 180 باين

ولما اتجمعوا بقوا 360
مش فاكرة بالظبط

المهم بقى في المعهد هيقبضونا بعد 5 شهور
:icon_mrgr :icon_mrgr :icon_mrgr

يدينا ويديكو طول العمر

واحد زميلنا بيفكر يرجع تاني القليوبية
بيقول كان هناك هياخد 500 جنيه
:maaamaaa:

أبو المعاطى شمروخ

04-05-2007, 03:41 PM

المهم بقى في المعهد هيقبضونا بعد 5 شهور

يعنى الواحد يعمل حسابه ويحوش من دلوقتى؟

kalamntena

05-05-2007, 03:40 PM

لا انت تحوش وتعملي جمعية وتقبضهالي الاول

zahraatoty

05-05-2007, 06:40 PM

برايت
أنا أكتشفت الحقيقه المره دي
أن مستشفي الباطنه المبجله ما سلمتش إقرار إستلام العمل بتاعي
المهم أني مش لوحدي
فالحين الناس بتوع الباطنه أن يبتزوني وأنا أبتز والدي "أصل كنت مصممه أنه يديني المصروف حتي لو أخدت 1000جنيه إبتزاز بأه"ا
كلمنتينا ممكن أسلفك أن شاء الله لما أقبض بس أنت عارفه ترجعيهم الضعف طبعا

kalamntena

05-05-2007, 08:59 PM

اقولك على سر

انا اول ما قبضت بطلت اخد مصروف

ال ايه و عاملة بقى باقبض وحركات
دلوقتي باقول لبابا
انت اساسا هتفضل تصرف عليا لحد ماتجوز وكل يوم خميس وجمعة هنيجي انا وجوزي والعيال ناكل عندك
:peace:

بابا بصراحة مش مخليني عايزة حاجة
كل يومين تلاتة يدييني اللى فيه النصيب
ربنا يخليهولي ومايحرمنيش منه ابدا

nabilprofelgen

05-05-2007, 09:53 PM

ياااه
انا موش امتى اخر مرة خدت فيها مصروف من بابا

بس كويس فكرتوننى

انا هكلمه كمان حبة فى موضوع المصروف ده؟

Egyaris

11-08-2007, 12:46 AM

أيامنا كان المرتب 58 جنيه و شوية فكه.. :)

دفعة أمنحتب بئه
ربنا يديكو الصحه :)

مصري متعصب

11-08-2007, 12:55 AM

فرحت طبعا و الموظفة بطلعلي ال 426 وسبعين قرشhttp://www.kasralainy.edu.eg/english/students/forum/images/smilies/smiley1.gif

د- برايت هم بجد 426 جنيه
ولا جمعتوا المرتب بتاع الشلة؟
طمنى يا راجل مستنى الرد
وكمان راتب شهرين
دا والله ما ييجي حق الدروس اللي بندفعها...لو فضلنا نقبض الراتب دا
دا الواحد يقضيها مقبول و خلاص...طالما الحكاية كدا
خصوصا و ان القصر لاصحاب الكوسا

zahraatoty

28-08-2007, 11:54 AM

آآآآآآآآآآآآآآآآآآآآآخر إفتكاسات ميزو مشاوير:icon_eek::icon_eek:
تخيلوا ياجماعة النايب عايز يبعتني مشوار فين؟؟...علما أن أنا في رعاية قسم 5 الجديدة (أمام قسم 5 حاليا)
عايز يبعتني مشوار لقسم 17 مسالك ...ليه؟؟؟:aiaiai:
....
....
...
...

علشان أسأله على نمرة موبايل واحد صاحبه نايب هناك :smiley7.:
ده طبعا بعد ما لفيت الملك فهد الدور الرابع والسادس
ليه ؟...علشان ببساطه تمريض قسم 17 مش بيرد على التلفون:smiley7.:
أرحمني يارب من الإستغلال ده
المشكلة أني مش عارفه أعترض أو أقول لأ...وأنا متأكده أن النايب ده مش بأيده أن يعمل حاجه لو رفضت:aiaiai:

الحمد لله كلها أيام وعذاب الطوارئ ده يخلص:waaaaawaa

dr_0nline

28-08-2007, 04:34 PM

ههههههههههههههههههههههههههههههههههههههه
هئ هئ هئ هئ هئ هئ هئ هئ هئ هئ هئ
*
مش عارف اضحك ولا اعيط
بس عجبتني قوي مسرحية عالم ميز و دي
*
يالهوووووووووووووووووووي
يالهوووووووووووووووووووووي
يالهووووووووووووووووووووووووووووي
لا حول ولا قوة الا بالله
انا ركبي سابت من الماساة
الطف بعبيدك يارب
*
طب ما فيش حل للخروج من العالم ده
هاتقوللولي اتكل علة الله اشتغل سواق تاكسي
لا انا عاوز خاجة نضيفة شوية
*
انا هاروح اشتغل رقاصة
هع هع هع هع
هيييييييييييييييه دنيا
استر ياللي بتستر
ال نمرة تليفون ال
*
سلاموز