المساعد الشخصي الرقمي

مشاهدة النسخة كاملة : خطبة الجمعه مرتجلة أم من ورقة



Ahmed saeed
20-06-2007, 09:50 PM
السلام عليكم ورحمة الله



بداية

عاوز أسالكم ... أيهما تؤيد ولماذا



خطبة مرتجله من الامام يتفاعل معها بصوته و انت أيضا

أم أخرى يقرأها من ورقه أعدها مسبقا





معرفش عنكم ... بس أنا كان رأيي في الاول ان أحسن يكون الخطيب يكون بيقولها من دماغه و تحس انك بتسمعها و متفاعل معاه بس انا لقيت ان دا كلام مينفعش خالص و عدد كبير من الخطباء معندوش البلاغة الكافية انه يقولها - باللغة الفصحى المصرية الغريبة دي- دا غير كونها مش مثبته عليه ممكن يطلع عن حدوده يقول كلام مش مظبوط و محدش عارف حاجة و اللي عارف مش هيأدر يثبت عليه حاجة



في العمرة في مكة شفت امام الحرم بيقرا من ورقة استغربت جدا ايه ده .... يعني امام الحرم المكي ميعرفش يقول خطبه من غير ورقه على كده بقى احنا عندنا خطباء عباقرة



اعدت في السعودية تقريبا سنتين و نص اتعلمت هناك مواد دينية كتير

بعد ما رجعت مصر و ورحت أصلي أول صلاة جمعه و متشوق بقى لخطبة من خطب الامام بتاعنا .... ايه دا اتفاجئت ايه الكلام ده كلام ملوش معني كله اعاده متطلعش من الخطبة بموضوع واحد انت فهمته جديد كلها اعادات

دا غير حاجات تأليف كتير لأنه غصب عنه مش عارف .. بيقول أي كلام عاوز يخلص الساعة اتنين الا تلت و مفيش كلام



أما بالنسبة للشيخ اللي بيقرا من ورقه فدا مش ممكن يغلط أو يخرج عن حدود الخطبة بأي شكل من الأشكال لأنه ملزم بيها ويقدر يكتب فيها اللي هو عاوزه من غير ما ينسي او يغلط ودا انا متفق معاه تمام



طبعا انا متوقع ان أول رد هيكون واحد بيهاجمني ازاي و مش ازاي

هدي نفسك أولا طبعا مش كل الشيوخ

ثانيا في شيوخ في مصر بتقرا من ورقة عادي

Nettawy
20-06-2007, 10:37 PM
ليه بس أنا ولا حاهجمك ولا حاجه بس أحب أوضح بعض النقاط

أولا: مش معنى ان خطيب الحرم المكى يقلرأ من ورقه يبقى هو مايمتلكش ملكه الالقاء

بس أغلب الظن و الله أعلم ان ده النظام هناك فى المملكه

ثانيا: ان حكايه الرتجال دى انا معترض عليها لان مفيش حد بيرتجل فى خطب الجمعه- إلا من رحم الله- بس

كل اللى بيحصل انه برضو بيكوون محضرلها و حافظ معظم جوانبها

أما الارتجال ده بقى حاجه تانيه خالص لأن الارتجال معناه انك تقول الخطبه مثلا دون تحضير

بمعنى انها حاجه وليدة اللحظه

وأظن ده لا يتمشى مع خطبه الجمعه لان الخطيب يكون أقرب من الغلط زى مانتا قلت قبل كده

بس فى رأيى ان الاتنين واحد

تذكر: إلقاء و ليس إرتجال

نسأل الله العافيه

emadkotb
21-06-2007, 01:03 AM
السلام عليكم يا اخوانا
حبيت اشارك برأي لعله يكون مفيد الى حد ما في الموضوع

انا مريت بالتجربة دي -ولازلت امر بها -كثيرا

الخطبة مش حاجة سهلة ابدا وكل مرة بتطلع فيها على المنبر بتحس انك داخل امتحان الجراحة بتاع سنة ساته وعلشان كدة لازم تكون الخطبة متحضرة كويس جدا ناهيك طبعا انها امانة وانت كدة بتتكلم عن دين ربنا وكلامك محسوب بطريقة او بأخرى على الاسلام
وكل مرة اتذكر عنوان كتاب لابن القيم اسمه اعلان الموقعين عن رب العالمين
يعني الي بيتكلم دة كأنه بيمضي نيابه عن ربنا سبحانه وتعالي فوجب الحذر جدا والاحتياط

ولكن في حاجة تانية:
الخطبة مش ممكن تكون خطبة ابدا الا لو كانت نابعة من القلب محملة بالاحساس واظن دا صعب جدا لما تكون مكتوبة في ورقة اه لازم تكون الخطبة فيها فكرة كلية مقسمة لافكار وعناصر جزئية ولازم تكون بلغة واحساس قريب من المستمع بس موضوع الورقة دا بيلخبط كل النظام دا فالخطيب يكتب الخطبة ويطلع يقرا الي كتبه والي قاعد مستني الخطيب يخلص ويقلب الورقة علشان يروح ويتفك من القاعدة دي ودي بصراحة مش صلاة

الخطيب المفروض يكون محضر موضوع الخطبه وعناصرها وترتيب الكلام وفكرة عامة وجيدة عن الادلة والاستشهادات الي هيقولها ومفيش مانع ابدا لو رتب افكاره على ورقه علشان ميكررش ومينساس

والسنة في الخطبه انها تكون قصيرة وليست طويلة (انا شايف اتنين الا تلت كتيير شوية ) والمهم الفكرة توصل واضحة وبعمق وخلاص ان شالله في عشر دقايق

اما موضوع خطباء المملكة وخاصة خطباء الحرم فدا نظام رقابي من جانب الجهات الامنية هناك علشان الخطباء ميحودوش كدا ولا كدا فيحرجوا ( ولاة الامور ) ولا حاجة وعلى فكرة الشيخ الحذيفي (القاريء المشهور سجن اكثر من عامين لسبب كهذا

والله المستعان

Nettawy
21-06-2007, 03:30 AM
جزاك الله خير على التوضيح

arownas
21-06-2007, 12:49 PM
السلام عليكم و رحمة الله و بركاته

قبل ما نتكلم عن الخطبة تكون متحضرة في ورقة و لا لأ
المفروض نشوف مين هو الخطيب
بمعنى ان مش اي حد يطلع يخطب لأ
ده لازم يكون لية شروط
مايبقاش واحدمش عارف يقرا القرءان بالاحكام صح "يمكن يبقرا التشكيل غلط كمان" و يطلع يخطب و بعدين نقوله حضر في ورقة من الاول لأ اللي زي الخطيب ده مايصلحش اصلا
و طبعا انا بتكلم عن خطباء مصر

ekm86
11-07-2007, 03:09 PM
حكاية الورقة اللي في السعودية دي ... ده نظام المملكة

يعني مش الإمام هو اللي محضرها..لأ، بتكون الحكومة هي اللي مجهزة الخطبة دي ومدياهاله عشان يقرا منها

(كل ده عشان محدش يشطح كده ولا كده (يخبط في الحكومة يعني

وبسبب الحكاية دي معظم الخطب اللي حضرتها هناك كانت بلا روح، لأن الخطيب مجرد بيقرا عليك كلام من ورقة مش هو اللي مجهزها

اللهم إلا خطيب واحد كان في الرياض كان يقرأ جزء م الورقة ويبدأ يوضح فيها بسرعة بكلام بسيط، ويكمل من الورقة ويوضح

ده كانت خطبته بيبقى ليها طعم ومعنى عن الخطب التانية

------

أما في مصر فاللي بيقرأ من ورقة بيبقى هو اللي مجهزها عشان ما ينساهاش

لكن أنا شفت واحد عامل حركة حلوة قوي، إنه كاتب في الورقة النقط الأساسية اللي هيتكلم فيها عشان يبقى ماشي بالترتيب

أما اللي مابيقروش من ورقة فدول حاجة من تلاتة

واحد بيقول من دماغه وهو أساسا ما عندوش فن الإلقاء، وغالبا بيبقى ضعيف في الأحاديث وقراءة القرآن ... ودول للأسف كتير

والتاني بيقول من دماغه لكن هو عارف هو هيقول إيه من قبل ما ييجي، وإلقائه كويس، غير درايته بالأحاديث والروايات... فتلاقي خطبته منظمة وكويسة، دول مش كتير قوي

أما النوع التالت فهو زي النوع التاني لكن على دراية كمان بالأحداث المعاصرة وبتبقى خطبته أساسا لإلقاء الضوء على حاجة من الأحداث اللي بتحصل دلوقت، ودول بيبقوا أحسن خطباء ، وبيبقوا قليلين جدا جدا

:bold: :bold: ومعظمهم ماكانوش تابعين للأزهر فوزارة الأوقاف منعتهم عن الخطابة

مدنجي
11-07-2007, 06:20 PM
ايه المانع ان الخطيب فى صلاة الجمعة يطلع المنبر باللاب توب


و يستعين فى خطبته بالانتر نت و الصور و جووجل



و يعملها على باور بوينت برزنتاشن

دى...

أبو المعاطى شمروخ
11-07-2007, 06:27 PM
<HR style="COLOR: #d1d1e1" SIZE=1><!-- / icon and title --><!-- message -->
ايه المانع ان الخطيب فى صلاة الجمعة يطلع المنبر باللاب توب


و يستعين فى خطبته بالانتر نت و الصور و جووجل

و يعملها على باور بوينت برزنتاشن

دى...







حتة اللاب توب حصلت

انما الباقى لسة





انا رايى ان لو الخطيب بيقرأ من ورقة هتخنق طب ما الواحد يجيب كتاب ويقرأ وخلاص



انما انا اسمح له بكتابة العناوين او عناصر الخطبة



طب الورقة لو ضاعت منه ودى حصلت هيبقى شكله اى كلام وهيتكلم فى اى موضوع ويكروت الخطبة





من الاخر الشعب المصرى هيكون تعليقه عل اللى بيقرأ من ورقة





يا عم سيبك منه هو جاى يضحك علينا بكلمتين مكتوبين دا مش عارف حاجة ما هو لو كان عارف كان اتكلم من دماغه

واللى يقوللك الله الله ربنا يفتح عليك يا مولانا ما انت بتعرف تقرأ أهوه ما شاء الله

arownas
11-07-2007, 09:25 PM
ايه المانع ان الخطيب فى صلاة الجمعة يطلع المنبر باللاب توب


و يستعين فى خطبته بالانتر نت و الصور و جووجل



و يعملها على باور بوينت برزنتاشن

دى...


يحضر الخطبة على الاب توب و يجمعها من النت و يعملها باور بوينت يوضح لنفسه ماشي
اما ان الامام يتقلب لاستاذ جامعة و المسجد يتقلب لقاعة محاضرات فداه مش نازلي من زور
و ماينفعش خطبة الجمعة مش هدفها الاول و الاخير هو العلم و من اهم اهدافها على حسب ظني الجانب الروحي اللي اكيد هايكون مفقود في الحالة دي و اعتقد ان الامام في صورته التقليدية (الشيخ ابو جلابية و طاقية و دقن ) و اسلوب العرض التقليدي بيدي نوع من التكامل و الروحانية للخطبة
و مستحيل تتعوض باي جديد حتى لو لاب توب و باور بوينت

kalamntena
11-07-2007, 11:53 PM
انا متفقة مع اروناس
:look up:

emadkotb
12-07-2007, 11:34 AM
ايه المانع ان الخطيب فى صلاة الجمعة يطلع المنبر باللاب توب


و يستعين فى خطبته بالانتر نت و الصور و جووجل

و يعملها على باور بوينت برزنتاشن

دى...


ليه لأ يا اروناس دا تبقي حتى حاجة روشة جدا وهتحبب الناس في الخطبة وهيعرفوا اد ايه الاسلام حلو وسمح...

بس
يعني مينفعش المصلين يبقوا قاعدين على الارض لان القاعدة دي متعبة وبعدين مش هيشوفوا البرزنتاشن كويس فنجهز المساجد بكراسي ويريت تكون جلد علشان تيقى مريحة
وبعدين طبعا لازم الاضاءة تكون خافتة علشان كله يركز في البرزنتاشن

ولو كل مصلي يكون معاه نوت بوك صغير كدة وقلم شيك عليه شعار الشركة المنظمة (للخطبة ) علشان الفيد باك يكون شيء كويس خالص ولو مايك انيق كدة علشان المداخلات والاستفسارات طبعا هتساعد جدا

ومحتاجين كمان شوية (مضيفات )علشان المشروب في البريك الي بين (الخطبتين ) بس لازم يكونوا محجبات اه دا مسجد مش نادي

والاخوات مينفعش يكونوا في مصلى تاني او ورا الصفوف -البيئة دلوقت اتغيرت واتلوثت - لازم يكونوا في صفوف موازيه يعني الاخوة على اليمين والاخوات على الشمال او العكس علشان برضو يعرفوا يستفيدوا من (الخطبة )كويس ويتفاعلوا مع (الخطيب)

ولو الداتا شو مبيشتغلش اتوماتيك او بالريموت يكون في واحد من المصلين جنب الجهاز علشان (الخطيب ) لما يقول نكست بليز يغير السليد

طبعا مننساش البوينتر يكون ليزر -هي حاجة صغيرة صحيح بس مهمه ومفيدة

البرزنتاشن نفسه بقى لازم يكون حاجة كدة يعني انسبايرنج زي ما بيقولوا علشان الناس متسرحش في الخطبة
يعني لما نتكلم عن الجنة مثلا يكون في صور لحدائق ومروج وفي الخلفية موسيقى كلاسيك لموتزارت مثلا او اغنية لخوليو اجلاسياس علشان السلام الروحي وكدة يعني
وفي الاول يكون مكتوب برزنتد باي وبعدين اسم (الخطيب ) واختصار الشهدات الي حصل عليها
وفي اخر البرزنتاشن يكون في ورد وبعدين ثانك يو
والمصلين بدال ما يأمنوا على الدعاء يصفقوا لل(خطيب )

طبعا بكدة نقدر نثبت ان الاسلام دين معاصر وصالح لكل زمان ومكان وانه متحضر ويقبل الاخر وسمح وحلو ونقدر نقطع الطريق على العلمانين الي عاوزين يشوهوا صورة الاسلام

http://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gifhttp://www.medicine.cu.edu.eg/english/students/forum/images/smilies/smiley20.gif
احيك

أبو المعاطى شمروخ
12-07-2007, 11:59 AM
ههههههههههههههههههههههههههههه
رد رائع دكتور عماد

كله رائع والاكثر روعة
بتاع نكست بليز

emadkotb
12-07-2007, 02:58 PM
ههههههههههههههههههههههههههههه
رد رائع دكتور عماد

كله رائع والاكثر روعة
بتاع نكست بليز
ربنا يجبر بخاطرك يا سامح ويجزيك خير

arownas
12-07-2007, 02:59 PM
تصدق يا أخي انا ماتخيلتش انها ممكن تكون خطبة حلوة بالشكل ده
ابقى خليني انا جنب الكي بورد لما تقول نكست بليز
:tamtam:
:tamtam:
:tamtam:
:tamtam:

مصباح
12-07-2007, 06:12 PM
يا سلام عليك يا دكتور عماد يا روش
خطبتك المتخيلة دي قطعة فنية مسخرة .. والمصلي هايبقا قاعد مستكانياص ع الآخر

مدنجي
12-07-2007, 06:54 PM
اعتقد ان
الأصل في الأشياء الإباحة

و اعتقد انهم اول ما دخلو اختراع الميكروفون الجامع
الناس ردت بحاجات زى الى رديتو عليا بيها دى
و اعتقد ان كل شيء جديد كان بيقابل بنفس ردة الفعل دى

انا عارف ان الموقف غريب شوية
و الفكرة كمان عجيبة
انا عن نفسى مش متخيلها قوى
و زى ما بيقولو
الناس أعداء ما جهلوا

مش عارف ايه المانع اننا نستخدم التكنولوجيا الحديثة
و الادوات الجديدة الى هدانا الله لأختراعها فى تطوير حاجة زى خطبة الجمعة
هل غلط اننا نستخدم الوسائل و الاختراعات الى ربنا هدانا لبتكارها و اختراعها فى حاجة زى دى؟؟؟
و لا عشان احنا اتعودنا ان الى بيستخدم الحاجات دى يأما استاذ فى الكلية (و فى الحالة دى الحاجة دى بتبقى مرتبطة بأحساس مش ولا بد) او مع واحد قاعد يتفرج على افلام و يسمع اغانى و يدخل نت و يعك و يخبص و بتاع (و فى الحالة دى برده الحاجة دى بتبقى مرتبطة بأحساس مش ولا بد)

و لا عشان احنا اعداء اى شيء جديد و خلاص
سلفيين الفكر يعنى من بتوع هذا ما وجدنا عليه آباءنا
و مش قصدى السلفيين الى زى الاخ عماد انا قصدى سلفيين الفكر محدش يفهمنى غلط (ممكن يكون فى اوجه تشابه بين الاتنين بس مش دا الى انا قاصده هنا)

و كل دا طبعا مع الوضع فى الاعتبار عدم الخروج على القواعد المتفق عليها بين الفقهاء لخطبة الجمعة


و لا دى بدعة و كل بدعة ضلالة و كل ضلالة فى النار

انا طبعاً معرفش اذا كانت الفكرة دى صح و لا لأ
دى فكرة خطرت على بالى و انا بقرأ الموضوع دا
و طبعاً محتاجة للمتخصصين عشان يردو عليها

و مش هفتى فيها

ملحوظة تانية عاوز اقولها
و هى جملة عرفتها من حكم دراستى لاساليب العرض و الكمبيوتر و التدريس و خبرتى فى الحاجات دى
و هى
content is the king
يعنى المحتوى دايما فى اى خطبة او محاضرة بيبقى الاهم

و بعدين بتيجى الوسائل المساعدة الاخرى و طرق العرض
و هى من الحاجات المهمة طبعا
لكن احب اكرر ان
content is the king

و متشكر على تعليقاتكو الظريفة و اللطيفة و الخفيفة

دى..

ekm86
12-07-2007, 11:35 PM
[right]ليه لأ يا اروناس دا تبقي حتى حاجة روشة جدا وهتحبب الناس في الخطبة وهيعرفوا اد ايه الاسلام حلو وسمح...


بس
يعني مينفعش المصلين يبقوا قاعدين على الارض لان القاعدة دي متعبة وبعدين مش هيشوفوا البرزنتاشن كويس فنجهز المساجد بكراسي ويريت تكون جلد علشان تيقى مريحة
وبعدين طبعا لازم الاضاءة تكون خافتة علشان كله يركز في البرزنتاشن
[right]إلى آخر الكلام......




طبعا موضوع الكومبيوتر ده مش أنا اللي أفتي فيه

لكن أعتقد إن الخطبة العلماء قالوا إن شروطها واحد اتنين تلاتة

وما ينفعش يتعمل فيها واحد اتنين تلاتة

فأعتقد إن لو موضوع الكومبيوتر ما بيخلش بالواحد اتنين تلاتة الأولانيين، ولا هو من ضمن الواحد اتنين تلاتة التانيين... يبقى إيه المشكلة

لكن بقى ساعتها يبقى في سؤال مهم جدا جدا

اللي أنا هاعمله على اللاب توب، في باور بوينت سلايدز ده... فعلا فعلا هيفيد الناس ولا هيبقى إضافة لا هتودي ولا هتجيب؟

لو مش هيودي ولا هيجيب يبقى مالوش لزمة أحسن... يعني مثلا مش أعمل سلايدز فيها أهم نقط في الخطبة.. لأن كده كده اللي هيسمع الخطبة هيعرفها من غير بريزنتاشن على اللاب توب

واللي هيكون من اخواننا اللي بييجوا يناموا يبقى كده كده مش هيستفيد بيها

لكن فرضا -وده مجرد فرض لأني مش لاقي سبب مقنع لحد دلوقت- إن كان في سبب مقنع إننا نستخدم اللابتوب يبقى إيه المشكلة؟؟

وده طبعا على فرض برضه إنه طلع مافيهوش مشكلة دينيا، إنه يكون حرام أو مخل بشروط الخطبة

والله أعلم

emadkotb
12-07-2007, 11:59 PM
شوية كلام جد بقى علشان نوصل حاجة مفيدة

طبعا الاصل في الاشياء الحل ولكن الاصل في العبادات التوقيف مش الحل

وخطبة الجمعة دي عبادة يبقى لازم نأديها كما كان يفعلها رسول الله صلى الله عليه وسلم ما وسعنا ذلك لقوله : صلوا كما رأيتموني اصلي
وهي داخله في الصلاة قطعا



امر ثاني مهم في ضبط المسألة وهو القاعدة الاصولية مالا يتم الواجب الا به فهو واجب
يعني اذا لم يتم سماع الخطبة الا باستخدام الميكروفون بسبب اتساع المسجد جدا او كثرة المصليةن او بعدهم عن الخطيب يصبح استخدام الميكروفون واجبا في هذه الحالةلانه لا يتم الواجب الا به وبدونه لا يتم

فاذا كان الامر الواجب يتم بدون شيء ما ويؤدى تماما كما كان يفعله رسول الله صلى الله عليه وسلم ولا حاجة حقيقية لاضافة او ادخال شيء اخر يصبح ادخال هذا الشيء من باب البدع المنهي عنها
ويكون مصادما للايمان بان خير الهدي هدي محمد صلى الله عليه وسلم

فاذا ما كان ادخال هذا الامر لا لشيء الا تقليدا للغرب (المتحضر ) وانهزاما نفسيا وثقافيا ومحاولة للتجاوب مع شعور بالدونية والنقص وكان من باب الفكر التقدمي الحداثي :( هذا ما وجدنا عليه اسيادنا في الغرب ) كان الامر اشد واقبح من مجرد الابتداع في الدين

والله المستعان

Nettawy
13-07-2007, 02:47 AM
شوية كلام جد بقى علشان نوصل حاجة مفيدة






طبعا الاصل في الاشياء الحل ولكن الاصل في العبادات التوقيف مش الحل






جزاك الله خير أظن مفيش حاجه توضح أكتر من كده

ekm86
13-07-2007, 03:59 AM
فاذا كان الامر الواجب يتم بدون شيء ما ويؤدى تماما كما كان يفعله رسول الله صلى الله عليه وسلم ولا حاجة حقيقية لاضافة او ادخال شيء اخر يصبح ادخال هذا الشيء من باب البدع المنهي عنها

ويكون مصادما للايمان بان خير الهدي هدي محمد صلى الله عليه وسلم

الكلام اللي انت كاتبه ده..تقريبا هو اللي أنا كنت باحاول أوصله في الجملة دي





لكن فرضا -وده مجرد فرض لأني مش لاقي سبب مقنع لحد دلوقت- إن كان في سبب مقنع إننا نستخدم اللابتوب يبقى إيه المشكلة؟؟







وده طبعا على فرض برضه إنه طلع مافيهوش مشكلة دينيا، إنه يكون حرام أو مخل بشروط الخطبة

مدنجي
13-07-2007, 01:12 PM
متشكرين على الفتوى الى على الطاير دى
بالفعل لا يفتى و الشيخ عماد قطب فى المنتدى
و لا حتى كمان مفتى الديار يقدر يفتى و الشيخ عماد منورنا فى المنتدى

انا عن نفسى قلت معرفش حكم الكلام الى قولته ايه؟؟
و اترك الكلام للمتخصصين
و الشيخ عماد ربنا يكرمه رد علينا -معلش اصله بيعتبر نفسه من المتخصصين-
و الحمد لله انا قلت معرفش
و دا عملا بمقوله من قال لا اعرف فقد افتى
يعنى انا كمان فتيت فيها


دى..

emadkotb
14-07-2007, 01:02 AM
مش عيب ابدا ان الواحد يقول انا مكونتش اعرف وانا غلطان
ليه الكبر؟ قول كانت فكرة واتضح انها غلط


مرة صلاح منتصر اقترح اننا نعمل سير متحرك حول الكعبة علشان نوفر على الناس المجهود في الطواف
ولم يعترف انه اخطأ لما اترد عليه طبعا لانه تنويري والناس دي مش فاهمة روح الاسلام ومتمسكين بالقشور

وبعدين اقترح نخلي الحج موزع على الشهور التلاتة كلهم علشان منعملش زحمة في يوم عرفة والناس تموت واقترح نخلى رمي الجمرات كمان طول المدة الي يجي يطوف ويسعى ويقف عرفة ويرمي الجمرات ويطوف ويروح ايه يخليه يستني ونزحم الدنيا علفاضى
يا عم انت بتقول ايه ؟ انا شايف دا اصلح ومن رأيي دا انسب
بس النبي مكانس بيعمل كدة يا جماعة الدنيا اتغيرت ولازم نستفيد من الحداثة والعولمة
وبرضو مرضاش يقول انا غلطان ومكونتش اعرف

ليه الواحد الي مش متخصص يقعد يبتكر في الدين وهو مش عارف الابتكار دا صح ولا لا
يعني ينفع واحد يجي يقلنا انا شايف اننا نعمل المرارة بالطريقة الفلانية طب حضرتك تعرف في الطب ؟ لأ انا دبلوم صنايع قسم خراطة اه بس الموضوع كدة مش هينفع
انت ايه الي عرفك؟ هل انت عرفت الطب كله؟ ثم انا بقول المتخصصين يقولوا رأيهم في فكرتي

دا كلام

Ahmed saeed
14-07-2007, 02:13 AM
بكل بساطه ... خالف العرف

ذو عين واحدة
22-05-2010, 07:56 PM
أنا لقيت الموضوع ده في المتواجدون
فقرأته
وقولت في نفسي

أنا عايز أضيف حاجة بسيطة
معلومة بسيطة

الورقة في خطبة السعوديين
ليست مكتوبة من قبل جهة معينة
ولا المواضيع بتبقا مفروضة من جهة معينة أيضا
يمكن يكون الحرم ليه أحوال مختصة بيه وتنظيمات أمينة خاصة

بس أنا باتكلم في العموم
أنا والدي خطيب جمعة في السعودية
لا فرض عليه خطبة
ولا اتبعتله في يوم من الايام ورق يتكلم منه
وساعات بيكتب الخطبة في ورق
وساعات لا
وساعات يكتبها في ورق وما يقراش منه بس علشان ينظم أفكاره


دي بس كانت معلومة بسيطة
رأيت أنه من الامانة إني أقولها

kalamntena
22-05-2010, 08:07 PM
:)

طيب بما انك علقت يا ذا عين واحدة
برضه احب اقول في المسجد بتاعنا بيعملوا دروس بعد صلاة العشاء
بعضها علوم دينية وبعضها علوم دنيوية
والدي بصفته استاذ فارماكولوجي في المقام الاول و مساهم في انشطة المسجد في المقام التانى
بيقوم بالجانب العلمى
و بيحضر الدرس على باور بوينت بريزنتيشن و بيحط فيديوهات كمان
و بيعرضها على شاشة عرض
في المسجد

ده لا يختلف مع رأيي السابق المتفق مع اروناس
العلوم الدينية حاجة و خطبة الجمعة خاصة
و العلوم الدنيوية حاجة تانية

ولازم نميز بين طريقة العرض في كل منها