عايز حقى

[Alasmar]

عايز حقى
صباح كل يوم تطالعنا الصحف بأخبار عن مدى تدهور الوضع الطبى فى مصر
و مدى تدهور احوال الاطباء
و مدى تفشى ظاهرة الاهمال الطبى





مسلسل اخطاء الاطباء .. وفاة 3مواطنين و اصابة 3 بالغيبوبة من جرعات البنج الزائدة (الوفد 2-7-2007)


مستشفى المطرية التعليمى ترك طفلا ينزف حتى الموت و حبس اسرته فى ساحة الانتظار (المصرى اليوم 2-7-2007)


النيابة تخلى سبيل الطبيبة فى واقعة الامبولات الملوثة بفيروس سى و تستدعى الاطباء و طاقم التمريض (المصرى اليوم 2-7-2007)


شقيقة محمد قتيل الاهمال الطبى تواجه الوحدة والحبس فى المنزل.. الضحية كان يعتزم بيع اشعاره و تدبير نفقات عملية تجميل لها (المصرى اليوم 2-7-2007)


نيابه بنها تعرض الطفل احمد على الطب الشرعى (المصرى اليوم 2-7-2007)


دخلنا مستشفى الطلبة للعلاج من السكر و فوجئنا بأصابتنا بفيروس سى (الاخبار 1-7-2007)


مأساة الطفلة دينا: اصيبت بنزيف بعد استئصال اللوزتين..فطردها الطبيب من المستشفى (الجمهورية 1-7-2007)


بلاغ الى وزير الصحة: رضا دخل المستشفى لعمل منظار فخرج بعد اجراء اربع عمليات و لم تتحسن حالته (الاحرار 1-7-2007)


و باب كامل فى المصرى اليوم بتاريخ 1-7-2007 تحت عنوان "الاهمال الطبى يتواصل"


دا عينة اخبار انا حبيت انقلها ليكو و كانت على مدار يومين بس
فى مختلف الصحف
حكومة
معارضة
مستقلة


كلها بتنقل عن مصايب و كوارث
اسبابها الاطباء المتخلفون المهملون
الى من غير قلب
الجاهلون
فى المستشفيات التى تحولت الى مقالب زبالة و غرز لضرب البانجو و الحشيش


دا الى هيحسه اى حد هيقرا الاخبار دى
حملة شديدة من الصحافة على الاطباء


لدرجة ان جريدة زى المصرى اليوم افردت باب خاص ليها عن الاهمال الطبى و الدكاترة المتخلفين
و كل يوم و التانى ييجو القصر العينى و يدخلو زى الحرامية (معلش مقدرش اوصف طريقة دخولهم الا كدا)
و يصورو اى حاجة و يكتبو اى حاجة
و يعتدو على حرمات المرضى و يصوروهم فى السراير و فى الرعايات


و هم لهم فى تسللهم فى المستشفيات طرق كتير فمثلا
يدخلو للنواب و يقولو لهم احنا ناس عايزين نتبرع للقصر العينى ايه ناقصكو نجيبهولكو؟؟
يرد النواب (بحسن نية طبعاً)
و تانى يوم فى الجريدة
القصر العينى بدون.....
و بدون....
و بدون....
و واكتب و انشر و بيع


انا شخصياً اصدقاء مقربين ليا حكولى على قصص من دى كتير
و انا اثق فيهم طبعا ثقة كبيرة و مش ممكن يقولو كلام كدا من الهوا زى الصحفيين دول


واحد جاله
DIC
تانى يوم يتكتب فى الجرايد : "مأساة الطفل مش عارف مين الاطباء تركوه ينزف حتى الموت"


ناس اهل مريض توفى دخلو كسرو الرعاية و كسرولهم تلاتة اربعة فنتيلاتور بقيمة كدا ييجى نص مليون جنيه و كانو هيموتو


الدكاترة (دا بجد مش هزار)
و تانى يوم فى الجرايد : "حبس اسرة المريض مش عارف مين فى ساحة الانتظار"
مش عارف امال عاوزينهم يقعدو فين فى غرفة العمليات...!!!!


و كلام كتير جدا لا ينم الا عن جهل الصحفيين الى بينقلو
و ملوش غرض الا الاثارة و البيع الكتير


سيبنا من الاهمال الطبى
و خلونا فى الاستهزاء الطبى
كل يوم فى الجرايد
الاطباء يقفون و قفة احتجاجية اماما مجلس الشعب مطالبين بالكادر
اجر عامل النظافة اعلى من اجر الطبيب حديث التخرج


سيرتنا بقت على كل لسان
و الى بيشحتو علينا كترو قوى
و للأسف اولهم كان النقيب بتاعنا (انا عارف هو مش قاصده ان احنا نتهان هو قصده يجيب لنا حقنا)
انا مش هنسى منظرى و انا قاعد اتفرج على نقيبنا و مجموعة من الاطباء الافاضل و هما واقفين امام مجلس الشعب و بيطالبو بالكادر
انتو مش متخيلين منظر الواحد عامل ازاى قدام البيت و قدام الناس تانى يوم الصبح
يا دى الكسوف


لكن انا كانت ليا كلمة
انا مش هشترك مع الى بيطالبو بالكادر
و مش هضرب عن العمل فى يوم
و لا هعتصم
و لا هضرب عن الطعام
و هفضل ان شاء الله اشتغل



لغاية لما المجتمع هو الى يطالب بالكادر ليه
او يضرب عن العمل
او حتى الناس تضرب عن الطعام عشا الدكاترة ياخدو حقهم


لأن ببساطة ان المجتمع و الناس هما الى محتاجين لينا
و لو المجتمع محترمش الطباء و الدكاترة و قدرهم
يشرب بقا....


انا مستنى منكم ردود
و حتى كمان مش ردود
لا انا مستنى موضوع و صيغة متكاملة ابعتها لبريد الاهرام و لبريد كل الجرائد القومية والمستقلة و المعارضة
و نوصل صوتنا للناس
و نحاول نصلح صورتنا الى غيرنا بياكل على تشوييهها عيش


مستنى ردودكو
و شكراً....

[arownas]

موضوع ذو شجون

و كلامك صحيح مية في المية
لوحصرنا اخطاء الاطباء الفعلية هنلاقيها اقل بكثير جدا من المنشور او المذاع في الاعلام
و نسبة كبيرة من مشاكل الناس مع الاطباء سببها الجهل و الفكر السايد بان الطبيب لازم يشفي المريض "ربنا هو الشافي وحده" بس تلاقي المريض جاي مش راضي يجاوب على اسئلتك ويقولك ما انت هاتكشف و تشوف حتى لو سالتو عن امراض اتعالج منه من زمان
قصدي من الكلام ده ان الناس مابتقبلش ان المريض يروح للطبيب و مايتحسنش
بردو في ناس لما تروح مستشفى عام و تحولهم على مستشفى احسن علشان نقص الامكانيات تلاقيهم يتخانقوا و يشتموا و يقولو ان الاطباء مش راضيين يشتغلوا و انهم بيزوحونا و تلاقي الكلام و الشكاوي كترت مع انك بتحولهم علشان مصلحتهم

الاعلام بيهول و يكبر و هدفه الاول و الاخير المكسب المادي اللي هايجيبوا بعدد القراء او المستمعين لاخبارة و ده مايبقاش اسمه "لا ينم الا عن جهل الصحفيين" ده اسمه غش و تدليس من ناس ماعندهاش ضمير

بالنسبة لحكاية الكادر

انا مش مستني خير من ورا الكادر ده ده لاني بطلت اثق في الحكومة و الكلام اللي ضحكوا بيه على المدرسين خير شاهد
ايوه انا مش هاقف اشحت قدام مجلس الشعب بس لازم اطالب بحقي
حقي في عيشة كريمة بدخل محترم" المثل اللي بيقول الصيت و لا الغنى راحت علية خلاص ".

و كلمة اخيرة للصحفيين لو همكم بجد مصلحة الناس و ما بتصيدوش في المية العكرة و تدورا على مكسبكم انتم و بس اكتبوا طالبوا انتم من اللي باديهم الامر تحسين الخدمة الطبية للناس
طالبوا بمستشفيات نظيفة و توسيع المستشفيات و اجهزة شغاله
و ادارة صحيحة و توعية سليمة
و ساعتها الناس هي اللي هتطالب و تعتصم و تحتج لتحسين مستوى الاطباء

[مصباح]

سبحان الله
وصل الحال بالاطباء الى ان يتوزعوا على فريقين لا ثالث لهما : ـ
فريق يسأل الناس إلحافا
و فريق (زي الأسمر) يحسبهم الجاهل أغنياء من التعفف (!) ـ

يعني فقر و فقر مع اختلاف النوع
لأ أنا رأيي بقا .. لو كنا فقراء .. و مع العلم ان سؤال الناس مذلة.. ـ

إلا ان وقوع ضرر علينا .. و اشتمال هذا الضرر على سوء توزيع المال العام بما يضر بمصلحة حيوية للناس، و هي الرعاية الصحية ..
رغم ان الدولة بتبعزق جامد في الهايف .. و الكل شايف ! ـ

كل دا يخلينا نتحرك حتى لو كان منظرنا وحش
سبحان الله .. الناس مش بتتكسف تروح تشحت واسطة لهنا و لهناك (الكلام مش للاسمر اللي واسطته ربنا)..و نتكسف نطالب بحقنا
معقول ؟؟؟؟؟؟؟ ـ

[kalamntena]

كلام جميل
لو هنتكلم من ناحية


سيبنا من الاهمال الطبى
و خلونا فى الاستهزاء الطبى
و كمان لو غريمنا هو الصحافة اللى بالي بالك

لكن متجيش وتلوم على ابو او ام طفل عنده 10 سنين محجوز في قسم 2 عشان عنده فيروس سي

و للا عيناين الجراحة اللى 99 في المية منهم عندهم
postoperative wound infection
و فيه منهم
pseudomonus

و بعدين الدكتور مش على راسه ريشه
غلط يتعاقب


للاسف السيئة تعم والحسنة تخص
و معلش متزعلوش
لما اقول ان فيه دكاترة عايزين ..... .....

[arownas]

صحيح في دكاترة يستاهلو الحرق
بس ده مش مبرر للصحافة
مش مبرر ان الصحفيين يلبسوا بلاطي و يدخلوا يتجسسوا على المرضى و بعدين يكتبوا موضوع عن انعدام الامن و الاهمال داخل القصر
و معظم الصحفيين دول غير متخصصين يعني مايعرفش اي حاجة طبية و تلاقية هو الحاكم و الجلاد و كمان اللي بيبكي على الضحية المسكينة مع انه و لا يهمه غير مصلحته

[dr kity-kity]

قبل مانحاسب الاطباء الى اهملو لازم نحاسب ال اتسببو فى الاهمال ده
ابتدي من مين؟؟؟؟؟؟
اول حاجه النظام
مشكلتنا ف مصر اننا عايزين نقلد الغرب بشكل اعمى من غير مانحدد اولوياتنا
معظم المستشفيات دلوقتى بقت سيراميك ورخام ومش لاقين حتى كانيولا للمريض
الوزير امر بعمل ملفات طب اسره ف كل قري مصر والعيانين مش فاهمين ايه ال بيحصل ده ولا لازمته ايه كل ال بيتمنوه دوا ببلاش وياريتهم بيلاقوه
يجيبو اجهزه فنتيليتور ف مستشفيات مش لاقيه ال يعرف يشغلها وتتركن بالسنين ولا حد يعمل بيها حاجه


المشكله التانيه التعليم
للاسف قبل وبعد التخرج
قبل التخرج بيعلمونا ازاى نحفظ المنهج ونكبه ف الامتحان ونطلع ناسيين كل حاجه، بعد ما نتخرج مبتلاقيش ال يشجعك وفين وفين لما حد يرضي يعرفك معلومه لازم انت تتعب وتضحى عشان تتعلم صح وقليل ال يعمل كده دلوقتى
اخيرا وليس اخرا موت الضمير
للاسف رغم ان مهنه الطب دي اسمى مهنه على وجه الارض وان فعلا اسعد لحظه ف حياه اى دكتور لما يسمع المريض بيدعيلوه لكن معرفش ليه فيه بعض الاطباء بيتعاملو مع المرضي كانهم جماد وكأن ليس لهم اي قيمه
ومش مهم باه يعيش او يموت مش فارقه

"ان الله لا يغير ما بقوم حتى يغيروا ما بانفسهم"

نسيت كمان اقول ان معظم اخطاء الاطباء ال بتتنشر ف الجرايد سببها الاساسي التمريض يعنى معتقدش ان الدكتوره هى ال هتدي حقن الانسولين بنفسها


اما بالنسبه للصحفيين فيه منهم كويسين هدفهم هو مصلحه المواطن الغلبان ودول منقدرش نقولهم حاجه انا لو منهم هعمل كده بس ياريت يكون عندهم الشجاعه دى مع الناس التانيين :smiley2: مش احنا وبس ال بيقدرو علينا
وفيه منهم باه ال عايزين يبيعو وخلاص وبيكتبو باه عن فضايح الممثلين وبلطجه لاعبى الكورة وبالمرة اخطاء الدكاتره
بس الحاجه المشتركه بين النوعين دول هى الجهل تلاقيهم مش فاهمين حاجه ف اي حاجه بيفتكرو ان لو الدكتور نسي فوطه ف بطن العيان انه جاب فوطه الوش بتاعته من البيت وحطها ف بطن العيان وقفل عليها
ياريت باه يا اسمر تقول للجرنال اقتراحي وهو ان لازم ال بيكتب عن اخطاء الدكاتره يكون طبيب وصحفي ف نفس الوقت عشان يكتب عن فهم ووعى
اخر حاجه باه حكايه الكادر ولو انى بسترخم الكلمه دي انا رايي ان د. حمدى ميتعبش نفسه مع الحكومه دي ويريح دماغه عشان هيذلونا كام سنه وبعدين تلاقي المرتب زاد 50 جنيه بالكتير والله الغنى عنهم وعن كادرهم :yadmaghy:

[بنت سيرين]

والله ياجماعة فيه أطباء فعلا مهملين وتعاملهم اسوأ ما يكون مع الكل

ده انا اخويا عمل حادثة ودخل الدمرداش لان الدكتور اللي خبطه بالعربية كان استاذ في الدمرداش وعالمرمطة والتعامل السئ
وكلدهومش عارفين نخرجه عشان ميروحش ياخد تقرير من مستشفى تانية عشان الدكتور اللي خبطه

لحد ما اخويا اتخنق وقعد يكسر لهم في الحاجة واصر انه يخرج مهما حصل
ولما خرج اول حاجة عملناها انه راح لاستشاري واول الكارثة انه العملية اللي عملها اي كلام
والدكتور اللي عملهاله مش متخصص وطبعا راح عملها بره تاني

بس فعلا التعامل كان وحش جدا
والله من ساعتها كرهت المستشفيات العامة وقلت لنفسي عمري ما هدخل حد اعرفه فيها

المريض برضوا معذور لان سلسلة الناس اللي بيشتغلوا في المستشفيات العامة من اول عادمل الامن لحد مدير المستشفى بيعاملوه على انه شحات مع ان ديه الضرايب اللي بيدفعها الشعب يعني من الاخر بناخد اجرنا من الناس ديه من الغلابة بتوع الشعب وفي الاخر يتعاملواكده طيب ليييييييييييييييييييييييه؟

[STROMA]

انا رايى فى الموضوع ده

ان فيه اطباء مهملين كتير

ولكن لا نستطيع ان نحمل الاطباء كل المسئوليه

لان الاهمال راجع فى الاساس الى تدهور مستوى الاهتمام بالصحة عامة

وتدهور المستشفيات العامة وقله الامكانات اللى الاطباء مالهمش دخل فى نقصها

ونقص الميزانيه للاهتمام بالصحة غير الفساد الموجود فى الوزارات وكلنا عارفين

ولكن مع ذلك هناك اطباء لا يعرفون معنى الطب وهذا راجع ايضا الى فشل النظام التعليمى فى كليات الطب

بس بالرغم من كل هذة الاسباب

لابد للاطباء ان يعملوا بجد فى ظل الامكانات المتاحة حتى يرضوا ضميرهم

وما يسيبوش العيانين اللى بينزف واللى بيموت ويروحوا يتفرجوا على مطش الاهلى والزمالك فى نهائى الكاس

ذى المقال اللى قراته فى المصرى اليوم

ومن الاخر عايزين الحال يتصلح

يبقى لابد من الاصلح فى المنظومة الصحيه وتنظيمها وكذلك التعليم

والا مفيش فايدة من كل اللى بيتقال واللى بيتعمل....

[مصباح]

أستاذ باطنة عندنا في القصر العيني كان بيتكلم مرة في الحكاية دي عن ظروف طبيب التكليف و ازاي انه بيتعامل معاملة غير انسانية و بعضهم - على حد قوله - مش لاقي يشتري .. احم ... ملابس داخلية (!) ..ـ
تتوقع من واحد زي دا يبتسم في وجه المريض ؟ و يديله حنان و رعاية ؟ و يتابع باستمرار الجديد في الطب ؟ و يحسن من مستواه الفني و التدريبي إلخ ... ؟ ـ

سبحان الله .. يدي ازاي الناس معاملة انسانية و هوه عايش في وضع غير انساني ؟
فاقد الشيء لا يعطيه

[أبو المعاطى شمروخ]

تصدق بالله يا عم مصباح
قول لا اله الا الله


انا بستمتع بالردود بتاعتك

[sameh_ig]

لما تقدر الصحافة تخش قسم بوليس او سجن وتفتش و تنقلنا اللى بيحصل يبقى يا مرحب بيها


احنا مالنا عاملين زى العيل الصغير اللى ماشى يتخانق مع كل اللى يقابلة و اول ما يشوف عكوة ابن الجزار يروح موطى و بايس ايدة



ملناش حقوق عند حد





انا عايز اللى يحاسبنى يجى ياخد مرتبى و يعيش بية شهر و يشتغل شغلنتى و يورينى المثاليلات اللى بيقولها هتتنفذ ولا لا


و بعدين متسيبو الصحافة تكتب و اية يعنى متكتب هو فية حاجة بتتغير يا راجل سبها تكتب اهو برضة على شان نقول اننا بلد ديمقراطى

[مدنجي]

الموضوع دا بيفكرنى بكلمة لأستاذنا الدكتور حسام موافى
كان بيقول ان لما الجرايد و الاعلام يشدو حيلهم شوية على الدكاترة
و يشغلو الناس بالأخطاء الطبية
بيبقى فى الغالب غرضها صرف نظرهم عن مصيبة بتدبرها ليهم
للناس يعنى

و بمناسبة ان فيه اخوة اعضاء بيقولو ان ان فيه دكاترة برده معندهاش قلب
احب اقول
ان اى مهنة و اى طائفة من الناس فيهم الحلو و الوحش
و انا شايف ان مهنة الطب من اكتر المهن احتراما
و اقل مهنة فيها ناس وحشة

و بعدين ماشى فيه حاجات وحشة

ياريت الى يظهر الحاجات الوحشة فى الصحف
يظهر كمان جنبها الحاجات الحلوة
يعنى زى ما بنبرز العيوب نبرز كمان المميزات و الحاجات الكويسة

و كان الله فى عونا
احنا مهمتنا كبيرة قوى
و هى فى رأيى هى فى مجال محو امية الناس الطبية
و دا فى رأيى اهم من علاجهم
بالذات و الواحد لسا فى مرحلة التكليف

الناس محتاجة تعرف العادات الصحية الصحيحة
و محتاجة تفهم طبيعة المرض
و اهمية و خطر العلاج
و النظام الطبى كمان او على الاقل فكرة عامة عنه (يعنى مثلاً نظام الــ
referal)
و محتاجين يفهمو ان الشافى هو الله
و احنا مش اكتر من اسباب
و محتاجين يفهمو اننا ممكن نجرب اكتر من علاج لغاية لما نوصل للعلاج الانسب لأن مش كل الناس زى بعض ممكن العلاج الى ينفع مع حد مينفعش مع التانى

و حاجات كتير قوى
حاجات الواحد بيحاول يوصلها لعامة الناس البسطاء و الجهلاء

ارجو انكو تحاولو توصلوها للصحفيين



دى..

[kalamntena]

يا مدنجي
يا سيدي الفاضل
يا اخي العزيز الذي اكن له حقيقة كل الاحترام


اى مهنة و اى طائفة من الناس فيهم الحلو و الوحش
و انا شايف ان مهنة الطب من اكتر المهن احتراما
و اقل مهنة فيها ناس وحشة

اكتر المهن احتراما ماشي
و فيها الحلو والوحش ماشي
بس في مهنة الطب مش المفروض يبقى فيه وحش
احنا مبنتعاملش مع بنايات وللا اجهزة وللا محاصيل زراعية بنتعامل مع بنى ادمين والادهى انهم مرضى
يعني الفشل او الاهمال ليس اختيار
و المفروض يتشال الكلمتين دول من قاموس المهنة
طبيب فاشل او مهمل مالوش مكان بيننا

طبيب مش قادر يستحمل
ياخد تخصص مالوش علاقة بالمرضى
اشعة بقى تحاليل
لكن ميبقاش طالع عينه ومش طايق نفسه وقاعد في الاستقبال عشان يشتم في العيانين ويطلع زهقه عليهم
مادام رضيت تبقى طبيب
يبقى لازم تعرف انك ماتملكش لنفسك اكتر من اللى الناس ليهم فيك






ياريت الى يظهر الحاجات الوحشة فى الصحف
يظهر كمان جنبها الحاجات الحلوة
الى اخر الكلام

معاك مليونين الميه

[Alasmar]

متشكرين جداً يا جماعة على الاستجابة
و اسمحولى اطمع فى استجابة اقوى و اكتر
لأنى هدفى من الموضوع دا زى ما قولت عمل او كتابة رسالة عشان نبعتها للجرايد
او لبريد الاهرام
او حتى اعتقد اننا ممكن نوسع مفهوم توصيل الرسالة دا
و نعمل مع بعض حاجة كدا زى خريطة طريق
لتوصيل الفكر الصحيح و المعنى الصحيح و حقيقة مهنة الطب
و حقيقة الافتراءات الى بتقع على الاطباء
لعامة الناس و كافة الطوائف الى بنتعامل معاها
و برده نخلى كلامنا هنا دافع لينا لتحسين كفاءاتنا و تحسين شغلنا و تحسين اخلاقنا عشان نبعد عن الانتقادات دى
و عشان نوصل رسالتنا صح
و عشان نرضى ربنا

و بالنسبة لموضوع


إلا ان وقوع ضرر علينا .. و اشتمال هذا الضرر على سوء توزيع المال العام بما يضر بمصلحة حيوية للناس، و هي الرعاية الصحية ..
رغم ان الدولة بتبعزق جامد في الهايف .. و الكل شايف ! ـ
موضوع الفلوس دا انا اعتقد و مؤمن تماما بفصل المسائل المادية عن الطب
يعنى انا مثلا فى الوحدة الصحية برفض تماما انى آخد فلوس كشف من اى حد
و بطلب من الممرضة انها هى الى تاخد الكشف

انا شايف ان المفروض على المجتمع انه يضمن للطبيب حياة كريمة و خلاص
و مش مع تسعير الخدمات الطبية بالنسبة للدكاترة فى القطاع الخاص او البرايفت زى ما بيقولو
يعنى مثلا
الطهارة 100 جنية
الفتاق 1000 جنية
الزايدة 1000 جنية
عملية الوبل بتاعة سرطان البنكرياس 20 الف جنيه

شايفين الفرق
مش شايفين ان عيان السرطان دا الاصح انه يدفع المبلغ الاقل
يعنى هو يبقى موت و خراب ديار
دا حتى كمان المفروض ميدفعش

و كمان دا بيقلل من هيبه الطبيب و من احترام المرض ليه
و بيحسس المريض بالظلم

فأنا مبحبذش قوى العمل الخاص للأطباء
و بحب العمل العام فى المستشفيات
و الحكومة بقا او التأمين الصحى هو الى يوزع الفلوس عليهم كله على قد شغله و مكانته
يعنى الى هيعمل عملية السرطان دى هياخد برده 20 الف جنيه
بس مش من عيان السرطان
لذلك انا مقتنع تماما بنظام التأمين الصحى عامةً
و ربنا يسهل و يتنفذ صح فى مصر و ميفشلش زى حاجات تانية كتير

و متشكر تانى على الاستجابة
و منتظر المزيد

[roseangle]

لما تقدر الصحافة تخش قسم بوليس او سجن وتفتش و تنقلنا اللى بيحصل يبقى يا مرحب بيها


احنا مالنا عاملين زى العيل الصغير اللى ماشى يتخانق مع كل اللى يقابلة و اول ما يشوف عكوة ابن الجزار يروح موطى و بايس ايدة



ملناش حقوق عند حد





انا عايز اللى يحاسبنى يجى ياخد مرتبى و يعيش بية شهر و يشتغل شغلنتى و يورينى المثاليلات اللى بيقولها هتتنفذ ولا لا


و بعدين متسيبو الصحافة تكتب و اية يعنى متكتب هو فية حاجة بتتغير يا راجل سبها تكتب اهو برضة على شان نقول اننا بلد ديمقراطى



اول مره تعجبني طريقك يا دكتور سامح
بس انتا المره ديه عندك فعلا حق
مش كل حاجه بتتكتب في الجرنان بتكون صح
او ذات اهميه
يعني هي الشتيمه بتلزأ

[مصباح]

الاسمر انا معاك اننا ناخد اللي يعيشنا عيشة كريمة مش بالتسعيرة
و معاك تمام في موضوع التأمين الصحي و وجهة نظري و حلمي لبلدي ان محدش يدفع فلوس في علاج أصلاً
إلا اشتراكات التأمين الصحي و بس باستثناءات بسيطة

[dr kity-kity]

بس ياريت يا دكتور يحسنو التامين الصحي بجد انت شفت الادويه ال بتتصرف هناك اردئ انواع الادويه وكمان لو حد اتحجز هناك معظم التحاليل بتبقي على حسابه والادويه الغاليه هو برده ال بيجيبها وعلى فكرة ده بيحصل ف المستشفيات الجامعيه برضه يعنى حتى الان لا يوجد علاج مجانى ف مصر
ياريتنا نكون زي معظم الدول الاوربيه يتعمم العلاج المجانى لكل الناس وباحسن خدمه صحيه وبرضه الدكاتره تاخد حقها
بس احنا مشكلتنا اننا فاكرين مصر دوله فقيره ومحدوده الامكانيات والحقيقه انه فيه سوء توزيع وسوء اخلاق والفساد مستشري ف كل مكان فيها

[Alasmar]

مرة تانية الهجمة على الاطباء تعود
برنامج واحد من الناس
بالرغم ان غرض الراجل شريف
و هو جمع تبرعات للقصر العينى و ابو الريش
بس اسلوب الحوار و تناول الموضوع فى حالات كتير بيكون بعيد عن الاحترام

دا حتى شوبير فى برامج كرة القدم لسا شايفة بيتكلم عن الدكاترة
مش عارف هنلاقيها منين و لا منين؟؟

[مدنجي]

عاوزين حد جامد يعمل لنا جروب على الفيس بوك نطالب فيها بحقوقنا الادبية
طبعا انا ضد المطالبة بالحقوق المادية لأنى شايف انها قلة قيمة

مشكلة المريض المصرى انه دايما حاسس انه مظلوم
و حاسس انه مضطهد
حاسس انه بيجيب كل الادوية من بره
مش حاسس ابدا بقيمة اللى بيتعمل له المادية و لا المعنوية و الطبية
حاسس انه بياخد نفس العلاج لكل مرة
علاج الاسهال هو علاج الصداع هو علاج المغص هو علاج السرطان
حاسس ان الدكاتر مقصرين و مطنشين و مزوغين
عاوز الدكتور قاعد جنبه 24 ساعة
عاوز ياكل و يشرب بعد العملية و مالوش دعوة ازاى و مش عاوز يليك او يفستل
و الا الدكتور يبقى حمار
دا بالاضافة الى انه مش عاوز يموت فى بعض الاحيان او يمكن كمان فى احيان كتيره

طبعا المريض المصرى يستحق منا كل الرعاية و الاهتمام
بس ياريت يدينا احنا برده شوية رعاية و اهتمام و مراعاة و فهم و وعى








دى..

[الكحكي]

تعليقا على ما تورده الجرائد من أخطاء للأطباء بغير علم

فإن الجرائد كلها قد تناولت باهتمام شديد قضية وفاة سعاد نصر .. وأستاذ التخدير الذي حُكم عليه بالسجن 3 سنوات ..

ولكن ...

هل يعلم أحدكم ما هي الحقيقة في هذه القضية ؟؟

[dr kemo]

أنا بصراحة معرفش غير إنها ماتت بسبب خطأ تخدير



يا ريت تقولنا عشان أنا حاسس فعلا إن مستحيل دكتور مبتدئ يغلط في حاجة زي دي.....

[فيرون]

تحكي زوجتي فتقول : بينما أنا جالسة و زميلتي من بني الأطباء و قد قاربت على المعاش .. إذ بمريضة قد أقبلت فراجعتها الزميلة و عندما انتهت ناولتها المريضة ورقة نقد قائلة : "الشاي بتاعك يادكتورة" فالتفتت الزميلة الكبرى إلى زوجتي و قالت "نقسم بقى"
فأنكرت زوجتي حقها في هذا الشاي مكتفية بما ارتضته لها وزارتي الصحة و التموين

[dr_0nline]

هما كمان الدكاترة بياخدو شاااااااااي !!!!
الله الله الله
هيا حصللللللت
*
معهد الاورام ماليان حالات بتموت اثناء جلسات الكيمو ثيرابي
انا عارف ان الكيمو دا رهيب
بس عدد الوفيات كتيره
كل شوية حالة تجاسب وتروح الرعاية وتتوفي
وانا حاسس انه اهمال اطباء صراحة لما رايته بعيني وسمعته باذني
اللي قاعد في المعهد نواب صغيرين لسا بيتعلمو واول ما بيكبروا بيسيبوا المعهد
ويجي غيرهم الصغيرين وفي ناس بتدفع ارواحها ثمن للخبرة دي
والاساتذة ولا هنا ولا في دماغهم اساسا
*
شفت حاله من كام اسبوع وتوفت
ووالدتها قعدت تقول هاجبلكوا برامج التلفزيون والصحافه وها قلب عليكو الدنيا
وشايف ان معاها حق

[فيرون]

و هفضل ان شاء الله اشتغل
لغاية لما المجتمع هو الى يطالب بالكادر ليه
او يضرب عن العمل
او حتى الناس تضرب عن الطعام عشا الدكاترة ياخدو حقهم

لأن ببساطة ان المجتمع و الناس هما الى محتاجين لينا
و لو المجتمع محترمش الطباء و الدكاترة و قدرهم
يشرب بقا....



شكلك ناوي تلوي دراع المجتمع ....

لأ يا بابا ...

اصحى ...

ده المجتمع مالوش دراع علشان يتلوي

[Nettawy]

ده المجتمع مالوش دراع علشان يتلوي

فعلا ده اللي حاصل