المساعد الشخصي الرقمي

مشاهدة النسخة كاملة : النائب الزائر


mady
14-09-2007, 06:39 PM
السلام عليكم و رحمة الله وبركاته
او سمحت يادكاترة
انا عاوز اعرف اى معلومات ممكنه عن النائب الزائر
كيف ان تكون نائب زائر
و ما هى مميزاته وما هى عيوب ان تكون نائب زائر
وجزاكم الله خيرا
مصباح
14-09-2007, 07:38 PM
فينك يا أدمن
؟؟؟؟؟؟؟؟؟؟؟؟؟
مدنجي
14-09-2007, 07:45 PM
مبدأيا انا هعرض لينك لموضوع ممكن يكون فيه الفائدة
و بعدين بعد الأفطار ان شاء الله هعرض عليكو رأيى فى الموضوع دا

اللينك لموضوع

و أخيراً البداية استقالة (http://www.medicine.cu.edu.eg/english/students/forum/showthread.php?t=4300)


دى..
مدنجي
14-09-2007, 11:14 PM
دى كمان شوية نتايج من البحث على جوجل

http://www.dvd4arab.com/showthread.php?p=1043885372


النايب الزائر هو كادريشبه تماما النايب العادى من حيث طبيعه العمل ..يتقدم له الطبيب الحر في اى وقت وطبيب النيابه بوزاره الصحه بعد سنه من استلامه العمل كنايب في مستشفيات وزاره الصحه
النائب الزائر طبعا بيكون في مستشفي جامعي او تعليمي ويشترط للحصول علي هذه الفرصه موافقه جهه العمل بوزاره الصحه ورئيس القسم بالمستشفي المراد التقدم لها

بالنسبه للطبيب الحر اظن انك ممكن تاخد النيابه كامله 3 سنين لكن بوزاره الصحه بتاخد سنه واحده يمكن تجديدها بموافقه الجهتين المذكورين اعلاه

النائب الزائر لا ينصح بها مطلقا في تخصصات الجراحه بانواعها وماهو شبيه بالجراحه زى الرمد والانف واذن والنسا... من الاخر كده اى حاجه فيها intervention لان النايب المعين مبيطولش يمد ايده فلا تتخيل انه هيسيبلك فرصه ده غير ان الاستاذ او المدرس حاطط في دماغه ان ده ابنه فطبعا انت مهما قعدت ان شاء الله 10 سنين فانت ضيف وماشى

ينصح بها جدا جدا في تخصصات الباطنه والتخدير والاطفالوالاشعه خصوصا بالقصر العيني حيث العمل كتير اوى وفيه مرور بتتعلم منه ونوبتجيات بتشيلها خلافه .... لكن تظل العقبه في ال interventions يعني متتخيلش مثلا في ال cardiology ان حد ممكن يسيبك تدخل الcath lab بسهوله اللهم الا لو كنت في وحده زى شريف مختار كل الناس اللي بتشيل شغل بيدخلوهم لان القسطرة عندهم شغاله 24 ساعه

هذا والله اعلم


http://www.dvd4arab.com/showthread.php?t=580155


هنا تقبل التهاني والتبريكات !!! لقد استقلت !
نعم قدمت استقالتي والله !
خلاص خلصت من أغلال وزارة الصحة الى الأبد
كلكم أكيد قرأتوا مشاركاتي و مواضيعي عن الظلم الواضح البجح اللي وقع علي طول سنين تكليفي أنا و زملائي
واللي انتهت بمهزلة النيابات الجديدة !!! اتفرج لو مش مصدق !

http://youtube.com/watch?v=sR93GTFa6RU

استقلت وخلاص هحضر في اللي أنا عاوزو
وكمان عملت نايب زاير ببلاش في القصر العيني نفسه
عاوزين دكاتره دلوقتي بشده
نصيحه الحق وقدم !!!
بس للأسف يا خسارة مش هلاقي مشاكل زي مشاكل وزارة الصحة اكتب عنها !!!!
مش مهم دلوقت وقت العمل والماجستير !
ولن أبكي على اللبن المسكوب !
ويحرق أبو الوزارة و الذل اللي شفته
خلاص!


http://bayto4.blogspot.com/2006/10/3.html



الزائر ... والعدوى ... وفرعون الذي طغى ولكي ينقذ حمامة مايمكن انقاذه , يسعى خلال فترة تسجيله للدراسات العليا الى الحصول على فترة كطبيب زائر بمستشفيات الجامعة ( أي يحصل على نيابة بالجامعة يدفع من أجلها وطبعا دون الحصول على راتب ) ... فالجامعة هي المكان الوحيد الذي يتعلم فيه النواب بالجزمة ... دعك من مزايا النائب الزائر المحتك بالاساتذة المشرفين على امتحاناته ورسالته , فيصير وجهه مألوفا لديهم ... سيحصل حمامة بالمال على فرصته الكاملة في التعلم ونيل الشهادة الكبيرة التي طالما دعت له والدته الحاجّة لنيلها يحتك حمامة داخل أروقة الجامعة بالنائب الكبير (أو النائب السنيور بلغة الدكاترة) ... ويصبح حمامة هنا نائبا جنيور (بنفس اللغة البائسة) ... أي مرمطون القسم المنحني للجميع ... كله يهون في سبيل الشهادة الكبيرة... مباشرة العيادة الخارجية, تسجيل دخول الحالات , مرور على الأقسام , تعنيف متوسط اللهجة من السنيور ,كتابة التذاكر , مناكفة الممرضات اللبط , ثم نصف ساعة فسحة يقضيها في الحمام للتدخين والعياط , مرور مرة اخرى لأن زيادة الخير خيرين , صراع مع زملائه الجنيور الاخرين على الحالات (وغالبا يخسر هذا الصراع لأنه ليس ابن المكان .. انما هو زائر معفن) , حوار مع دكاترة الامتياز المتطلعين له بانبهار ممتع مؤقت ينسفه النائب السنيور بكلمة غليظة مؤنبة يضحك لها حمامة بعصبية مداريا احراجه المبلل بالعرق , مرور مرة ثالثة لأن زيادة الخير بلا حدود,و...,و... 0 وهنا .. يدخل رئيس القسم الاسطوري ويقتحم الكادر ... يتجمد الزمن مؤقتا وتظهر حروف يابانية أسفل الشاشة كمشهد ظهور الوحش في مسلسل جرندايزر ... ثم تعود الحركة ببطء للرجل المهم المتهادي باستهتار والذي لايرى النواب الأبرياء .. مع أن النواب أحباب الله ... لكنه في القسم , الرجل الأعلى صوتا والأطول لسانا , انه يستمتع باهانة الجميع واحراجهم ... يجلس بمكتبه المكيف ويريح كتلته الهائلة على الكرسي المنتفخ العظيم ويشخط في نائب دخل خلفه يبغي الحصول على اجازة ... ثم يغلق عينيه كأنما يرتاح من رحلة كفاح طويلة .... يتخيل ماضيه الملون بالأبيض والاسود (كناية عن الفلاش باك ) منذ كان طالبا بالكلية يسكن احراش البلاد ويرتدي الملابس الرخيصة التي لاتتغير , يسير كفتاة مراهقة خجول ناظرا للأرض تفاديا للاحراج ... اصوات زملائه ولاد الناس المرتاحين , كلكسات سياراتهم الروشة , ضحكات زميلاته الفاتنات كثيرات الماكياج والعطر تصم اذنيه , يستشعر الضحكات الساخرة موجهة اليه , ويشعر ببرودة عجيبة تجتاحه وألم غامض في كتفه كلما امتلأت نفسه حزنا وأحس بالرثاء لنفسه ... كان يعيش دور الشاب المكافح المنطوي حتى النخاح ... دائم الحضور .. مرهق العينين ... حامل الملخصات والمحاضرات ... تقدمه العلمي ملحوظ ... لكن نقطة سوداء بدأت تنمو على استحياء في قلبه وتتضخم تدريجيا وهو يستشعر المهانة يوميا في نظرات الزملاء ... وعندما تخرج وفاز بوظيفة في الجامعة ... كان قد خرج بعقدة نفسية متوقعة صقلها تعامله مع اساتذته الكبارو فيه كمان لينكات تانية بس دول الى اخترتهم
و فى كمان مواضيع فى المنتدى ناقشت الحكاية دى بس عن طريق النقل من المصادر الى جبتها هنا دى
و انتظرو التعليق من مدنجى

دى..
مدنجي
14-09-2007, 11:44 PM
انا هتكلم من حكم خبرتى و احتكاكى فى سنة امتيازى مع كل الطبقات من اساتذة و مدرسين و نواب اساسى و زوار و امتياز و استاف تمريض

النايب الزائر فى القصر العينى
اما طبيب حر مستقيل من وزارة الصحة (فى هذه الحالة يحق له تحضير الماجستير بسهولة)
او طبيب بأجازة بدون مرتب من الوزارة (فى هذه الحالى لا يحق له تحضير الماجستير)
او طبيب تابع لوزارة الصحة و جاى لزوم تقضية سنة لزوم تخليص الماجستير
او طبيب عربى جاى يدرس و يتدرب
و مش فاكر طرق تانية لعمل طبيب زاير

و الاوراق المطلوبة فى كل حالة مختلفة
الطبيب الحر مطلوب شهادة طبيب حر
و الى آخد اجازة مطلوب موافقة جهة العمل
و الى تابع للوزارة اهه تابع
و الطبيب العربى او الاجنبى مطلوب موافقة السفارة و الامن
هو فى كل الاحوال مطلوب موافقة الامن و متخافش مبتتدخلش انت فيها دى سيبهم و هما هيظبطوك
مش هتكلم كتير عن تفاصيل الاجراءات

بس على فكرة خريج القصر العينى مبيدفعش اى رسوم
و لمزيد من التفاصيل روحو شؤون الاطباء

اما عن المميزات و العيوب و الانطباعات
ففى تخصص زى الجراحة الى بعتبره من اكتر التخصصات تحديا للنواب الزوار
فالانطباع عند استاف الاساتذة و العاملين تجاه النواب الزوار فى الغالب انطباع سيء
و دا بيؤدى الى ان يكون شغلهم و التعامل معهم اقل اكيد من النايب الاساسى
و بالرغم من كدا و حتى لو كان التعامل و الشغل اقل مية مرة من الى بيحصل فى العادى
فأن النايب الزاير فى القصر العينى افضل مية مرة عن نايب وزارة الصحة
و دى حقيقة

ممكن نتكلم شوية عن سبب الانطباع دا
و السبب الاساسى فى رأيى هم النواب الزوار نفسهم
لأنهم فى اغلب الاحوال يميلون الى الأنتخة و التزويغ من الشغل و عدم تحمل المسئولية
بالذات لو هما من العرب او الاجانب الى جايين يتعلمو
و برده زيهم نواب وزارة الصحة الى اتأثرو بغباء رؤساءهم فى الوزارة و اتعلمو التخلف و الروتين و اجسامهم ثقلت على العمل و اهم جايين عشان الشهادة و خلاص تقضية واجب يعنى زى تقضية الواجب الى كانو بيعملوها فى الوحدة الصحية

فى اسباب تانية بس السبب الرئيسى هو الى انا ذكرته سالفاً
من الاسباب التانية
تلهف النواب الاساسيين على الشغل بالذات فى حاجة زى الجراحة
و الانطباع الى موجود عند كل فريق العمل ان النايب دا هيقعد له سنة و لا اتنين و ماشى و مش هيكمل كأستاف جامعة فبيقل الاحترام ليه على عكس النايب الاساسى ابن المكان الى هيفضل فيه طول عمرة و هيبقى مدرس مساعد و مدرس و استاذ و يمكن عميد كلية كمان

بالرغم من كدا ففى نماذج كتير من الزوار قدرت تثبت نفسها و تحجز لنفسها مكان كويس عند الناس لدرجة ان الناس نسيو انهم زوار او مبقوش يصدقو انهم زوار
بس برده موصلوش لمكانة النايب الاساسى
و عمرهم ما هيوصلو لها ابدا
لأن بمنتهى البساطة النايب الاساسى مش هيسمح بكدا

ففى الجراحة النايب الزاير محتاج انه يكون زى النحلة عشان يستفيد و يشتغل و ميركنش للراحة و التراخى و الاسترخاء
و فى حاجة زى الاطفال او الباطنة اعتقدانها هتبقى مفيده جدا جدا

مش عارف مفيش كلام اكتر من كدا
حد غيرى يكمل و يقول تجربته


دى..
mady
15-09-2007, 12:12 AM
جزاك الله خيرا يادكتور
انا متشكر جدا على كل المعلومات دى
اللى تقريبا ماكنتش عارف منها حاجة خالص
مصباح
15-09-2007, 12:15 AM
أفادكم الله
معنديش اضافة على الكلام ده
brightgalaxy5
14-10-2007, 11:44 PM
شكرا ليك يا مدنجي
حبيت استفسر عن حاجة برده واخد رأيك فيها
انا ان شاء الله كلها اقل من خمس اشهر واخلص امتيازي
والاسمر قالي ان حكاية نقل التكليف لمستشفى تعليمي اتلغى
والتقديم بيبقى في حركات النيابات(ياريت تقولي في شهر كام وكام )
المهم
هل الكلام ده هيستمر
يعني لازم ينسوني الطب في سنة التكليف قبل ما اروح المستشفى التعليمي

ايه كمان
اه
تسجيل الماستر بعد سنة ولا سنتين من الامتياز في وزارة الصحة؟؟

سؤال تاني
موضوع النائب الزائر ده
هل محتاج واسطة
ولو قدمت في الجراحة
هتعلم قليل يعني
ولا عشان الحالات كتير بشتغل زي التعليمي
انا ترتيبي 498
ممكن الحق حاجة تعليمي كويسة
ولا اتوكل على الله وابقى زاير
وهل فيه نائب زاير في المسالك او الاورثو؟؟
رأيك ايه؟؟
مدنجي
15-10-2007, 12:27 AM
اولا خد الرابط دا



و أخيراً البداية استقالة (http://www.medicine.cu.edu.eg/english/students/forum/showthread.php?t=4300)

دا كنت قولت عليه فى رد سابق
مفيد جداً
و لازم تقرا الى فيه كله
دا حت كمان ممكن تلاقى فيه اجابه على اسئلتك الى انت سألتها هنا

المهم مدنجى هيبدأ يجاوب



والتقديم بيبقى في حركات النيابات(ياريت تقولي في شهر كام وكام )

فيه حركتين كل سنة
حركة اسمها حركة شهر سبعة
وحركة اسمها حركة شهر حداشر

الى اسمها حركة شهر سبعة بالنسبة للأطباء الى لسا متخرجين
بيحق ليهم التقدم فيها بس فى بعض التخصصات النادرة زى طب الاسرة و الطوارئ و الاشعة و التخدير و النفسية
و مبتشترطش قضاء اى فترة معينة بالتكليف
يعنى ممكن متستلمش تكليفك اصلا الا بعد ما تنزل الحركة و بعدين تقدم فيها
و دا الى فيه ناس عملته السنادى
بيقولو ان التقديم على الماجيستير فيها بيبقى بعد قضاء ست شهور فى النيابة
و على فكرة نتيجتها لسا باينى من اسبوع تقريبا
يعنى باينة فى اول عشرة
و حتى الآن مفيش حد لسا استلم النيابة بتاعته اصلاً

يعنى الناس مخلصة فى شهر تلاتة و لسا مستلموش نيابتهم حتى لحظة كتابة هذه الكلمات
و لى ناس اصدقائى كتير قدمو فيها و جالهم تقريبا الى هما عاوزينه
و جالهم كمان حاجات فى المستشفيات التعليمية
و كان ترتيبهم فى حدود الربعميات و الخمسميات
بس المشكلة كانت فى الاشعة الى اخدت مجموع كبير و تقريبا معرفش حد لحقها

الحركة التانية الى فى شهر حداشر
اسمها الحركة التكميلية
و اسمها بيدل عليها
بس معرفش بصراحة معلومات عنها لأنها لسا منزلتش



هل الكلام ده هيستمر
يعني لازم ينسوني الطب في سنة التكليف قبل ما اروح المستشفى التعليمي

الله اعلم هيستمر ولا لأ
انا بقول لك على الى بيحصل السنة دى



تسجيل الماستر بعد سنة ولا سنتين من الامتياز في وزارة الصحة؟؟

التسجيل فى التخصصات النادرة بيبقى زى ما قولت لك
يعنى تقريبا بعد سنة
لكن فى باقى التخصصات
بتستنى نيابتك سنة
و بعدين بتستنى التقديم على الماستر سنة كمان بعد استلامك النيابة
يعنى تقريبا سنتين
عشان تبدأ تقدم على الماستر
و انا بصراحة متخوف من كونهم يبقو سنتين بس
انا اعتقد انهم اكتر من كدا
لأنالوزارة احبالها طويلة و بالهم طويل جدا
شوف النتياج بتاعة النيابات بتبان امتى
و الله اعلم ممكن يكون مر عليك اقل من سنة فى النيابة فى اللحظة الى الجامعات فيها بتقفل باب التسجيل
و ربنا يستر و الموضوع ميوصلش لتلات سنين

ممكن تراجع الحسابات الى موجوده فى الموضوع دا
رقم الحظ (http://www.medicine.cu.edu.eg/english/students/forum/showthread.php?t=4755)



سؤال تاني
موضوع النائب الزائر ده
هل محتاج واسطة

لأ
انت محتاج رئيس القم يوافق على طلبك
بس
ممكن تحتاجلة واسطة الله اعلم
بس هو لو عاوز ناس هيرحب بيك
يعنى هى مسألة شخصية
هتقابل واحد و تتطلب منه طلب و على حسب الواحد دا او المقابلة دى هو هيوافق ولا لأ
و اعتقد ان مفيش حد بيمانع



ولو قدمت في الجراحة
هتعلم قليل يعني
ولا عشان الحالات كتير بشتغل زي التعليمي

هتعلم فى سنة الى ممكن تتعلمة فى مستشفيات الوزارة فى ست سنين
لكن اكيد هتشتغل اقل من النايب الأساسى
و اقل من النايب الى فى مستشفيات الوزارة
بس العبرة فى انك انت هتشتغل ايه و ازاى؟؟
اوزنها مع نفسك..



انا ترتيبي 498
ممكن الحق حاجة تعليمي كويسة
ولا اتوكل على الله وابقى زاير

الله اعلم
بس فيه امل طبعا
ممكن انا اعرف ناس كانت نفس ترتيبك و جالها مخ و اعصاب فى مستشفى تعليمى
بس على فكرة دى تبقى نيابة مش و لا بد
نيابة مخ و اعصاب فى مستشفى مفيهاش اشعة مقطعية؟؟!!
يعنى الاسبشيالات فى الوزارة لو حتى فى حتة تعليمى الجنرال احسن منها بكتير
و محدش بيبص عليها و لا بيجرى عليها
انت ليك الخيار
انا عارف هو صعب
بس انت اقرا كل الكلام دا و الكلام الى فى المواضيع الى انا دليتك عليها فى اول الموضوع
و قرر و احكم بنفسك
و على فكرة انا قايل وجهة نظرى الخاصة فى المواضيع دى و فى موضوع الاستقالة بالذات



وهل فيه نائب زاير في المسالك او الاورثو؟؟
رأيك ايه؟؟

أه فيه
و دى حاجة جديدة
بس سامع انها كويسة
و بيشتغلو
لأن الشغل بطبيعته فى الأقسام دى كتير جدا
بس اعتقد ان عبء الديرتى وورك هيبقى زايد عليهم جدا
روح شوف بنفسك
و اسأل فى الأقسام دى
و قول لنا



و بالتوفيق
و ربنا يعينك



دى...
brightgalaxy5
15-10-2007, 12:28 AM
يااااااااااه
كل ده عشاني
متشكر اوي وجزاك الله خيرا




دي
:)
brightgalaxy5
15-10-2007, 01:07 AM
معليش متعبك معايا يا دكتور مدنجي
سؤال تاني

اقدم استقالتي الاول ولا استنى اما اخد موافقة رئيس القسم؟؟
عشان لو استقلت ورئيس القسم ماوافقش ابقى اشتغل سواق ميكروباص بقى

سؤال تاني
النائب الزائر اللي كان طبيب حر العقد اللي بيعملو لمدة قد ايه سنة قابلة للتجديد ولا 3 سنين خبط كدة

وهل تسجيل الماستر علاطول من اول سنة؟؟


سؤال كمان

استنى لما اعرف هلبس ظابط ولا عسكري قبل ما استقيل
ولا استقيل وبعدين الجيش ياخدني من النيابة

وشكرا
:)
مدنجي
15-10-2007, 02:10 AM
اقدم استقالتي الاول ولا استنى اما اخد موافقة رئيس القسم؟؟
عشان لو استقلت ورئيس القسم ماوافقش ابقى اشتغل سواق ميكروباص بقى

فى الغالب انت بتمشى فى الاتنين مع بعض
بس طبعا موافقة رئيس القسم هى الاول
و بعدين بتقدم ورقك و بتبدأ فى اجراءات الموافقة عليه
و بيكون ناقص شهادة الطبيب الحر الى بتكون بدأت فى اجراءاتها و بتكتب تعهد على انك هتجيبها

سؤال تاني
النائب الزائر اللي كان طبيب حر العقد اللي بيعملو لمدة قد ايه سنة قابلة للتجديد ولا 3 سنين خبط كدة
اعتقد سنة قابله للتجديد
زى النايب العادى

وهل تسجيل الماستر علاطول من اول سنة؟؟
من اول يوم لو عاوز
زيك زى نايب الجامعة تمام


سؤال كمان

استنى لما اعرف هلبس ظابط ولا عسكري قبل ما استقيل
ولا استقيل وبعدين الجيش ياخدني من النيابة
انا عن نفسى استنيت
بس انت ليك الحكم و الاختيار
و الملابسات و الظروف و التفاصيل
موجودين فى المواضيع الى انا حاطط لهم روابط هنا فى الموضوع دا
بالذات موضوع الاستقالة دى


دى..
brightgalaxy5
15-10-2007, 02:12 AM
شكرااااااا
جزاك الله خيراااااا
brightgalaxy5
15-10-2007, 03:27 PM
حتى الان النائب الزائر جميل ولطيف جدا
ايه بقى عيووووووووووبه؟؟؟؟؟؟؟؟؟؟؟؟؟
ربنا يستر
:)
مدنجي
15-10-2007, 11:41 PM
اكتر حاجة ممك تضايق
هو الانطباع السيء عن النائب الزائر و الموجود عند كل الناس زى ما ذكرت قبل كدا

و الانطباع دا بيتحول لفرق فى المعاملة بينك و بين زمايلك النواب الأساسيين
و ممكن يفضلو عيك كمان النايب الأساسى الى اصغر منك بسنه و اتنين
و مش هيفضلوه فى المعاملة بس لأ فى الشغل و الفرص فى التعليم كمان

و كمان ممكن لو هو شرير يبدأ يستغل فيك و يلبسك فى الديرتى وورك كله و يأنتخ هو و يشتغل فى العمليات و انت متشتغلش و تتفرج او بالكتير تساعد و يغلس عليك
و يخلى منظرك وحش حتى قدام الامتياز و التمريض و ممكن كمان العيانين

هو بس احساس القهر و التفريق فى المعاملة
الى بيحسسك بالدونية
دا احساس مش ولا بد

لكن برده ولا يهمك
انت بشخصيتك و بشغلك و بمجهودك و بعلمك تقدر تتغلب على كل دا
و تجبر الجميع على احترامك
و على فكرة الى عملو كدا مش كتير هم قليلين جدا بس موجودين
يعنى فيه امل
بس لازم تستحمل الفترة الأولى بتاعة الاحساس بالدونية دى
لأنك ممكن تنهار
و كل حاجة تنهار لا قدر الله

و بالتوفيق




دى..
brightgalaxy5
16-10-2007, 01:44 AM
ان شاء الله خير
هحاوي اتصاحب على النواب اللي ناوي احضر معاهم في القسم
وجزاك الله خيرا كثيرا
بجد استفدت كتير
azzozix
22-10-2007, 03:27 AM
بجد الف شكر يا جماعه على الموضوع الجامد ده
الف الف شكرا يا
مدنجي
brightgalaxy
اسئله و اجابات هايله
ان شاء الله الواحد هايقدم على نايب زاير ف شريف مختار ربنا يسهل
ادعولي
و عاجبني حكايه الفرق بين الاساسي و الزاير
خمليها تبقى فيها شوية تحدي كده ومزاكره وشغل وطحن
ربنا يستر
brightgalaxy5
22-10-2007, 04:43 PM
انا سألت النهاردة عن الورق المطلوب
شهادة التخرج
شهادة الامتياز
ورقة طلب مقدمة للقسم اللي عايز تشتغل فيه ممضي من رئيس القسم وهما بيودوها لأشرف حاتم يمضيها
4 صور
خريج القصر العيني ببلاش
tabeb
22-10-2007, 04:47 PM
انت نويت تستقيل يا احمد خلاص؟
brightgalaxy5
22-10-2007, 07:30 PM
مش عارف لسة
ربنا يستر عالي جاي
medico82
23-10-2007, 12:35 AM
و العقد في شريف مختار باقدم له فين و في راتب و لا لا؟و التفاضل على اي اساس؟و الجيش ؟