رؤية طالب لسه ما دخلش سنة خامسة وما اخدش كوميونتى

[kalamntena]

ال ايه خير اللهم اجعله خير لما بقيت فى سنة خامسة عقبال عندكم اكتشفت اه والله اكتشفت لوحدى من غير ما حد يقولى ان احنا لازم و حتما ولابد نروح فسح اجبارية- يا سلام_ تبع الكلية اخيرا الكلية بتاعتنا ورتنا وشها الحلو
بعد 4 سنين على الورق بس و الواقع انهم 52 سنة ونص بتقديرات خبراء الفلك حسب الحسابات الزمنية لكوكب بخ فى مجرة ادينى قفاك
المهم بعد 4 سنين وخلاص نقدر نروح رحلات ولا وايه (لازم )يعنى السيناريو ده مش هيتكرر
_بابا
_نعم؟!
_فيه رحلة…
_لا
_يا بابا دى يوم واحد
_لا
_مش هانتاخر
_لا
_ببلاش
-لا
_دول بيدو اللى بيروح ربع جنيه
_لا
_يا……
و طبعا النهاية المتوقعة شبشب اة جزمة _حسب الحالة الاقتصادية لكوالالمبور_ على قفايا
الله يعنى دلوقتى :
_يا بابا الكلية عاملة رحلة اجبارى
_نعم يا ختى؟!!!!!!!
_مش قصدى رحلة يعنى رحلة
_امال رحلة يعنى طبق مسقعة؟؟!!!!!!
_ يا بابا ده بحث ميدانى
_خلاص بكرة اخدك ميدان رمسيس تعملى البحث اللى انت عايزاه
_يا بابا يا حبيبى احنا لازم نروح نسال الناس شوية اسالة و نعمل زى بتوع التعداد
_اه عشان تضربى زى الراجل اللى امك رمت عليه الزبالة المرة اللى فاتت
_لا يا بابا ده احنا هنكون كثير و بعدين هنوريلهم كارنيهات الكلية ده مش بعيد يدخلونا وياكلونا ويشربونا
_لا وانت الصادقة دول هايكلوكم
_يا بابا ده لازم والا مش هادخل الامتحان
_خلاص ادا كان على البحث هاتعمليه ؛ عندك خالاتك وخلانك وعممامك و عماتك روحى اعصريهم اسئلة و بعدين تعالى هنا انت فى كلية ايه بالظبط ؟
_فى طب يا بابا
_من امتى الكلام ده ؟
_من 4 سنين
_طب يعنى المفروض اتخرجت
_يا بابا الطب 6 سنين و سنة امتياز و2 تكليف
_اه يعنى فاضلك سنتين وتخلصى
_يا بابا انا خلاص خلصت بص بقى لازم اروح يعنى لازم اروح و مفيش حل تانى
ولما صحيت فى اليوم التانى طبعا ما كنتش قادرة اتحرك من العلقة السخنة اللى بابا انهى النقاش بيها…. لكن _آه_ محسوبتكم برده لا ممكن تتنازل ابدا مهما يكون و اخيرا اخدت الموافقة
و يوم الرحلة الصبح الساعه 3 علشان احضر الأكل والشرب والبيبسى والحلويات والراكيت والكورة وكمان الكاميرا.
استعديت بترسانة المعدات السابقه ورحت نازلة على الكلية الساعة كانت 6 الصبح وانا ماشية فى الشارع حامله الشنطه على ظهري مررت برجلين كبيرين فى السن فسمعت احدهما يقول للاخر ..شباب اليوميين دول معندهمش مروة ولا ادب ازاى يزعل مراته لدرجة انها
تلم هدومها و كمان يسيبها تنزل فى وقت زى ده لا حول ولا قوه الا بالله
اقعد ابص حوليا وادور على اللى لمت هدومها دى بس مالقيتهاش
المهم وصلت الكلية الساعة 6 و نص و طبعا مين الاهبل اللى هيكون هناك فى وقت زى ده غيرى فين وفين لما الساعة بقت 9 لما حد جه الساعة 10 كنا كلنا موجودين لكن غريبة قوى محدش جايب معاه اكل او شرب ولا حتى كورة مش مهم انا معايا كل حاجة
طلعنا الاوتوبيس مع الدكتور .. مفيش صوت ومحدش بيغنى ايه الرحلة دى .. قلت للسواق ايه يا عم هو انت معندكش كاسيت .ز بصلى الدكتور قوى وقالى انت فاكرة نفسك رايحة رحلة ؟؟ طبعا انكتمت وما فتحتش بقى بعد كده خالص
وصلنا لاحدى القرى اللى ما بتتكتبش على الخريطة و قسمنا الدكتور مجموعات و القى علينا التعليمات و بعدين فركشنا
و احنا ماشيين ندور على اول بيت كنت بديت افهم انى لازم يكون معايا نوتة وقلم عشان ده شغل مش لعب .. المهم شحت ورقة وقلم .. كنا 3.. احمد ومحمد وانا
رحنا اول بيت و خبطنا .. مر ه.,. مرتين
_ميييين ؟
_احنا
_انتو مين
_احنا من كلية طب
_ معندناش حد عيان
_ يا ستى افهمى احنا جايين نسالك شوية ….
_ليه يا خويا انا محدش يسالنى غير جوزى و هو مش موجود و امشوا بقى احسن لكم .. ومحدش رد علينا بعد كده فاضطرينا نمشى 3 او 4 كيلو لحد ما بقينا قدام البيت التانى 7 ؟؟؟!!!

طك طك طك ..
_مين
_احنا
_انتو مين
_احنا من كلية طب
فتحت الباب سيده فى الثلاثين من العمر
_ عايزين ايه
_عايزين نسالك شوية اسالة
_بطاياكو
_نعم
_ ايه معكوش بطايق و لا انتو حرامية
كويس واحدة متعلمة هاتساعدنا كتير
_ اتفضلى يا ستى كارنيهات الكلية
_ طيب اتفضلوا
هممنا بالدخول
_رايحيين فين اتفضلوا اسالو
آه … اسمك: تحية
تحية ايه : تحية مغاورى
عندك كام سنة يا ست تحية : لازم
ايوه _32 سنة ونص
عندك اولاد ؟ : 7 فى عين العدو
انت متجوزه من امتى
_من 5 سنين !!!!!!!!!
_ازاى يا ستى لو فرضنا ان كل سنة بتخلفى عيل يبقى المفروض يكون عندك 5 عيال مش 7
_خمسة وخميسة فى عينكو انتو هاتقرو على العيال كمان امشو من هنا احسن لكو
_خلاص يا ستى احنا اسفين نعديها دى معاكى شهادة ايه؟
_لا يا خويا انا عقبال املتك ناوية السنة الجاية اروح فصول نحن الامية
_امال ليه اخدت الكارنيهات ؟!!!!!
_عشان اشوف صوركو يا حدق مش يمكن تكونو بتضحكو عليا
البيت التالت كنا خلاص مش قادرين ..
طك طك ولسه مخلصناش الخبطة التالتة ونلاقى دش ميه ساقعة فى عز البرد ينزل على روؤسنا ونسمع صوت ست البيت هو انتو ايه ما وراكوش حاجة غيرنا قلنا مش عايزيين مسحوق و لو جيتو تانى هاكسر رجلكم ايه يا خويا ده ( مسم)
البيت السابع كنا خلاص بنموت طك طك
_مين
_احنا من كلية طب و عايزين نسالك شوية اسالة
_يا ابو محمد
وانفتح الباب ويا ريته ما انفتح كان وراه حيطه وطالع لها شنب وماسكة بندقية
_جيتو برجليكو يا اولاد …… وطبعا احنا ما استنناش نسمع بقية الجملة فى خلال 7 ثوانى و8 اجزاء من الثانية كنا على اول طريق مصر اسكندرية الصحراوى
المهم دلوقتى انا قررت انى مش هاكمل تعليمى انا هاتجوز واقعد فى البيت و بقت بتجيلى حالة عصبية لما بسمع كلمة رحلة

[admin]

<p>واضح إن دائرة ظرفاء المنتدى زادو قوي ..... بجد بجد</p><p>:smiley32:</p><p>:smiley32:</p><p>العضو الجديد ده نشيييييييييييييييييييييييييييييييييييييييييط جداً</p><p>برافوووو</p><p>:akh:</p>

[القصرعينية]

<p align="right">والله المنتدى أحلو بيكي يا كلمتنا</p><p align="right">أقصد كلمنتينا:smiley20:</p>

[nabilprofelgen]

<p>دا لو كل الرحلات كده كان......................</p><p>:smiley20::smiley20::smiley20::smiley20::smiley20: :smiley20::smiley20::smiley20::smiley20::smiley20: :smiley20::smiley20::smiley20::smiley20::smiley20: :smiley20:</p><p>اهلا بيكى يا كلمنتينا</p><p>و يجعله عامر</p>

[kalamntena]

ربنا يخلينىليكو ولا يحرمكوش منى ابدا
ويا رب اكون عند حسن ظنكو بيا دايما
بس الحق يتقال انا مبسوطة من شهادة admin جدا لان من غير زعل حسيت ان مش اى حاجة تعجبك
وبالنسبة ليك يا نبيل الف مليون شكرا على زوقك
والقصر عينية دى روحى وعنيا صاحبتى وحبيبتى من زمان ويا رب يخلينا لبعض دايما
عندى بس ايضاح
والدى استاد جامعى ووالدتى رئيسة بحوث
مجموعة الكوميونتى بتاعتى مفيهاش احمد او محمد
انا مش عبيطة لدرجة انى اروح الكلية الساعة 6 ونص حتى لو كانت رحلة ولو حتى هيدونى فلوس عليها

[nabilprofelgen]

تمام يافندم

انا بصراحة بحييى الشخصية اللذيذة اللى ممكن تتطول فى الحكاية من غير موصل للملل بسرعة.

يعنى المنتدى فى قصص كتيرة - مكنتش بكمل قرائتها - بس رحلتك الوحيدة اللى كملها الى اخرها. و قعدت اضحك لغاية ما اللى جانبى استعجب .
يعنى ممكن قصة تانية لو سمحتى

و اوعدك ممكن انشر قصصك على موقع ميدفرندس.

و يجعله عامر

[مصراوى]

<p>حمد الله ع السلامة من المغامرة الجميلة دى</p><p>:smiley31:</p><p>و كل رحلة و انت طيبة</p><p>:smiley20::smiley20::smiley20:</p>

[kalamntena]

يا سلام يا نبيل بقك بينقط درر ربنا يكرمك وكل سنة وانت طيب بقى عندك كام سنة؟
ان شاء الله قريب هيكون فيه مغامرات تانية بس يا رب الطاسة تبقى مظبوطة و الفرن شغال كويس
مرسى يا مصراوى والله يسلمك

[مدنجي]

<p>مممممم...</p><p>رحلة جديدة من رحلات المنتدى..</p><p>بعد رحلة الجدى من باب رئيسى لباب اسنان -او العكس مش فاكر و مش فارقة-</p><p>و بعد رحلة مصراوى فى مدينتنا السكرة..</p><p>.</p><p>.</p><p>دى..</p>

[moatazahmed]

الحمد لله
واضح ان انا مش الوحيد اللي متاثر
الظاهر ال
disease is highly endmeic

[ذو عين واحدة]

معقولة هي دي كانت بدايات الكبيرة كلمنتينا في المنتدى

الايام بتعدي والناس بتعقل كتيييييييير

هو الكلام ده يعتبر غيبة كدة


مليش دعوة أنا بابص على المتواجدون لقت الموضوع ده قلت أقراه

لقيت ايه
خير اللهم اجعله خير
الكبيرة كلمنتينا بتعرف تقول حكايات تضحك

سلاااااااام
هي اكيد مش حتشوف الموضوع ده تاني
خليكو جدعان ومحدش يقولها

[rony]

معقولة هي دي كانت بدايات الكبيرة كلمنتينا في المنتدى

الايام بتعدي والناس بتعقل كتيييييييير

هو الكلام ده يعتبر غيبة كدة


مليش دعوة أنا بابص على المتواجدون لقت الموضوع ده قلت أقراه

لقيت ايه
خير اللهم اجعله خير
الكبيرة كلمنتينا بتعرف تقول حكايات تضحك

سلاااااااام
هي اكيد مش حتشوف الموضوع ده تاني
خليكو جدعان ومحدش يقولها
كن مطمئن.... انا عمرى عمرى عمرى ما هقولها:icon_mrgr

[kalamntena]

na3aaaaaaaaaaaaaaaaaaaaaam?
what do u mean by bt32l kteer?


so what's the problem in telling funny stories
should i be strict to be 3A2LA?

by z way this is 1 of my best topics
i love it
:")

[ekm86]

فعلا الموضوع ده جميل جدا..
وخلاني عايز أكتب عن مغامراتي مع الكوميونيتي أنا كمان
بس أكيد مش هيطلع كده
:)

[ذو عين واحدة]

هوا حضرتك مش كنتي في بولندا
:)

ايه اللي جابك الوقتي
ما انتي ما بتدخليش المنتدى بقالك أيام

ماشي ياروني ....... ماشي