Usmle / mrc [الأرشيف] - قصر العيني | متعة التعليم الطبي

المساعد الشخصي الرقمي

مشاهدة النسخة كاملة : Usmle / mrc

kalamntena

12-07-2009, 02:46 PM

عندي سؤال ايه الفرق بين ال
usmle
mrc............ اي حاجة

ولو حد حابب يشتغل باطنة
انهي افضله

مصباح

25-07-2009, 08:10 AM

دا مش سؤال .. دا جر شكل
اديني سؤال محدد عن المعادلة الأمريكية

alzheimer

25-07-2009, 12:17 PM

أول فرق جوهري :

MRC is a postgraduate degree

USMLE is a License to practice medicine in USA (not a postgraduate degree)1

يبقى السؤال انا عايز اخد درجة علمية وأبقى إستشاري قبل ما زملائي حتى ما يخدو الدوكتراه ... ولا عايز أتعلم باطنة صح ... لو الإجابة الثانية يبقى usmle على شرط إني هاخد نيابة في مكان كويس في امريكا (وهاعيش هناك من 5-10 سنين) وهاتعلم باطنة سنين النيابة لغاية ما بقى Board Certified ودي Degree

في ناس بتقول أعمل USMLE عشان أخد fellowship لمدة سنتين وأبقى عملت Degree ... في الحياة الواقعية ما شفتش حد عمل كده (وبالتالي لا اعرف مدى صحة هذا الكلام) ولكن لو الهدف Degree طب مايعمل mrc مرة واحدة؟؟؟؟

Alasmar

25-07-2009, 02:31 PM

اولا مجرد التفكير فى اى حاجة من الاتنين دا هايل
و مجرد المذاكرة و الحصول على اى من الاتنين دا جميل جدا
بس كل دا مالوش اى معنى بدون ممارسة صحيحة و تدريب جيد
هو اصلا الحصول على الدرجات العلمية دى بدون الممارسة فى مكان محترم و تحت اشراف حد كبير بيكون صعب بس مش مستحيل
لأن امتحانات الناس دى بتعتمد على الخبرة و الممارسة اكتر بكتير من المذاكرة
لكن بتعدى علينا فترات فراغ بيكون فيها الواحد فاضى او مش قادر يمارس الطب
زى فترة التكليف او فترة الجيش
ايه الحل؟؟
الحل فى قضاء سنه امتياز قوية فى مكان كويس و تحت اشراف ناس كويسين
الواحد هيتعب قوى عشان يحقق دا و ممكن يحس انه مستفادش قوى
لكن صدقونى بتفرق كتير و بتفيد كتير جدا
و بعدين استغلال فترات الفراغ دى فى المذاكرة و الاتصال و التواصل مع الناس اللى بيعملو الشهادات دى و تبادل الخبرات و الافكار
بكدا الى حد كبير ممكن يتحقق النجاح فى الشهادات دى
على الاقل فى الجزء النظرى
و دا اللى الحمد لله عملته فى mrcs
الحمد لله الخطة نجحت
و فى انتظار استلام النيابة ان شاء الله للتجهيز للجزء الاكلينيكى كمان حوالى سنه ان شاء الله
و هو دا الجزء التانى من الخطة
و هو قضاء فترة نيابة فى مكان كويس يتيح للواحد انه يدخل الجزء الكلينيكال من الشهادة و معاه خبرة كويسه و متدرب كويس
و بكدا يبقى مجرد الاستفادة من الشهادة كورقة على الحيط اتحول لأستفادة حقيقية
اتمنى ان الجزء التانى من الخطة ينجح ان شاء الله معايا زى ما نجح الاولانى

و بالتوفيق لكل الناس

مصباح

25-07-2009, 03:01 PM

كلام جميل جدا
و لمن يهمه الأمر : ممكن استقبل استفسارات عن اليوسمل ..و أتمنى ان الموضوعات القديمة اللي اتفتحت عن اليوسمل تكون لسة موجودة برضه .

sameh_ig

25-07-2009, 03:03 PM

Alasmar

25-07-2009, 05:11 PM

برده عاوز الناس تاخد بالها
ان فكرة السفر فكرة كويسة جدا و قد تكون كمان ضرورية للى عاوز يبقى شاطر و يتفوق
اعتقد ان الفرق بين ممارسة الطب فى حتة زى القصر العينى و حتة زى الاقاليم
ممكن تكون زى الفرق بين ممارسة الطب بره مصر و جوة مصر
محدش يقدر ينكر طبعا ان مكان زى القصر العينى ممكن الواحد يتعلم فيه الطب بصورة كويسة جدا جدا ممكن تارب لبرة كمان بس هيتعب كتير على الاقل من النظام و السيستم اللى بيحكم الشغل و من عدم توفر الامكانيات المادية انما العامل البشرى ثرى جدا جدا اذا كان من استاف او مرضى

لذلك ان الانسان يفكر انه يحصل على شهادة اجنبية دا ممكن يكون ضرورى له لما ييجى يسافر
او على الاقل ممكن يرفع اسهمه اكتر من غيره

لما الواحد بيتكلم عن السفر مش بالضرورة بيتكلم عن بريطانيا او امريكا و ان كانو هم الافضل
ولا حتى كندا و استراليا
فيه اماكن تانية كتير و ارض الله واسعة
فيه روسيا
فيه جنوب شرق آسيا
و فيه اسيا على وجه العموم مالها كوريا و لا اليابان
فيه الدول الافريقية
فيه دول امريكا الجنوبية
و فيه فى النهاية الدول العربية

العبرة فى السفر هو التنوع اولا قبل اى شيء
قبل ما ان الواحد يكون رايح بغرض انه يتعلم الطب من مكان الطب فيه احسن من مصر
التنوع شيء مطلوب و ضرورى
لأنه بيفتح مدارك الطبيب و بيوسع آفاقه

و من هنا برده جاء التفكير فى الشهادات الاجنبية
لأنها بالاضافة الى اهميتها فى السفر فهى مهمة لتوسيع المدارك و زيادة خبرة الطبيب

لذلك ان ابطلب منكو ان اللى عنده اى طريقة للسفر لأى مكان و يكون يعرف تجربة شخصية عن صاحبها انه يعرضها للناس هنا
عشان تعم الفايدة

alzheimer

25-07-2009, 05:44 PM

usmle تتعمل لو انت داخل امريكا او هتعرف تخش و تبقى عارف انت رايح فين وجى منين ... انما لو عايز تاخدة كدة يبقى ملهاش لازمة المصاريف خالص ... حتى فى امريكا و الناس اللى هناك بعد اليوسمل الموضوع صعب جداا و مقصور على نيابات معينة حسب الجنسية و الاسكور بتاعك فية .. الدنيا مبقتش بى نفس الروقان خالص

إني هاخد نيابة في مكان كويس في امريكا (وهاعيش هناك من 5-10 سنين) وهاتعلم باطنة سنين النيابة لغاية ما بقى Board Certified ودي Degree

الرجالة هناك محدش خد فيهم باطنة خالص ولا عرفوا حتى يقربوا ناحيتها ... الجراحات الباطنة النساء الاشعة الجلدية ... بقت شبة مستحيل ان جنسيات مختلفة ياخدوا الا لو معاك واسطة محترمة .... ايوة واسطة تخيل فى امريكا فية كوسة فى الكلام دة برضة

دلوقتى الناس بتهرب عن طريق ال phd.... بس محدش بياخدها و بيرجع ... اساسا يرجع لية ... هنبقى نقول الناس اللى بتعمل phd .. فى اروبا طلعوا ازاى و ماشين ازاى .... 3 من المعارف هناك اتنين فى المانيا واحد فى امريكا 72onion.... و انا قاعد مستنى ورق العنب يخلص من على النار

إجابتي كانت على الباطنة عشان الاخت كلمنتينا سألت عن باطنة ... بالنسبة للماتش الاخير (والاخ مصباح ممكن يوقلك أكتر) في ناس جالها جراحة و باطنة و Radiology كمان ... وعموما معظم الـ International Medical Graduates بيجيلهم باطنة وأطفال ,, او سايكيتري .... أيوه الامور مش سهلة يا اخ سامح بس مش مستحيلة ... وشوفنا اهه ناس جالها حراحة (which is most competitive) مش من 10 سنين و الدنيا مفتوحة لأ السنة دي و لمصريين ...

بالنسبة للواسطة هناك او ما يطلق عليه Recommendation letter ده معروف لكل العالم ... ولكن الفرق إنهم بيدوا REcommendation letters للطلبة او الباحثين او المتدربين اللي إشتغلوا معاهم واثبتوا جدية وكفاءة .. مش بيدوا جوابات التوصية دي عشان إبن أخت جارة عم مأمور قسم السيدة، أو عشان إبن الأستاذ فلان رئيس القسم، أو إبن وكيل الكلية ... الواسطة هناك على الرغم من صعوبتها إلا أنها أغلب الظن هو نظام نزيه ورسمي وبيطلب في الاوراق رسميا أن يرفق بها جوابات توصية

أما بالنسبة للناس اللي ممكن تقول أعمل USMLE من غير ما اروح امريكا ... يبقى للأسف مش فاهم حاجة ... لا قيمة للـ USMLE خارج أمريكا ... وأبسط الامور إن
إسمها: USMLE (US Medical Lisencing Exam)1

dr / MIM

25-07-2009, 06:25 PM

و الله المناقشة دى ما بين ناس خبيرة او حتى مجربة شىء رائع

ده يشجعنى انى اسأل شوية اسئلة

1 - انا لسة فى خامسة .. هل فيه ما يمنع انى اسأل و اقرأ عن الشهادات دى او حتى استفسر ( انا مقولتش الدخول فيها او مذاكرتها ) فقط الاستفسار و تتبع الخبرات

2 - طيب لو فيه حد عاوز يدوس فى الحاجات دى ايه انسب وقت ( طبعا الامتياز ) بس ايه التحضيرات اللى قبل الامتياز . خصوصا ان فرصتى فى نيابة فى القصر العينى اصبحت قليلة شوية .. مش مستحيلة بس قليلة و التنافس صعب

3 - عند الدخول فى النقاط الواحد بيتوه .. يعنى فين يودى لايه و ازاى
و المعادلة دى كويسة فى ايه و مزاياها ايه و عيوبه فين.

اسمع ان ال usmle صعبة فهل هناك داعى للمخاطرة

طيب بعد الساكند بارت الدنيا بتبقى صعبة خصوصا فى السفر و ال residency

4 - سمعت ان الناس مبتكملش كل الاجزاء فيه ناس بيكتفوا بالجزء الثانى او الثالث و بيزودوا السى فى بتاعهم به و خلاص و بيقولوا ان السى فى كدة تقل
و يساعدهم على السفر فى الخليج مثلا او البلاد العربية او الافريقية .

شكرا لسعة صدركم .. و يا ريت حد يجاوب على استفساراتى ...

6 - سؤال اخير .. اللى ضاع منه نيابات القصر العينى يروح ينتحر ..؟؟!!!

و ايه الحل التانى ...؟؟؟!!!

هل فيه امل ..؟؟؟!!!

Dr.Medicine

25-07-2009, 07:26 PM

1 - انا لسة فى خامسة .. هل فيه ما يمنع انى اسأل و اقرأ عن الشهادات دى او حتى استفسر ( انا مقولتش الدخول فيها او مذاكرتها ) فقط الاستفسار و تتبع الخبرات

2 - طيب لو فيه حد عاوز يدوس فى الحاجات دى ايه انسب وقت ( طبعا الامتياز ) بس ايه التحضيرات اللى قبل الامتياز؟؟

انا كمان نفسي اعرف اجابات الاسئلة دي

3-كمان نفسي اعرف لو حد مش هيتعين في الجامعة ايه الفرص اللي قدامه علشان يبقي دكتور مميز ؟!!

4- لو حد عايز يتخصص hematology or oncology ايه الخطوات اللي يبتدي يعملها علشان يتخصص و يتميز في التخصصات دي ؟؟يعني ايه فرصه ؟؟

...................................

يا د/ مصطفي اعمل اللي عليك للاخر و لو لك نصيب في حاجة هتأخده
يا د/ مصطفي مش كل الناس بتروح القصر العيني علشان تتعالج ...حتي لو ما حصلش نصيب و اتعينت في الصحة ...العيانين الليبيروحوا مستشفيات الصحة هيبقوا محتاجينك اكتر من اللي بيروحوا المستشفيات الجامعية ..

ربنا يوفقك و يوفق الجميع

Alasmar

25-07-2009, 08:45 PM

خلونا نتفق بس ان اللى لسا مخلصش دراسة ميفكرش فى المواضيع دى دلوقتى
بالرغم انه ممكن يدعبس فيها بداعى الفضول بس
لو محتمل يكون له نيابة يركز فى مذاكرته عشان يلحق نيابة
و لو ما لوش يحاول يستمتع بالعلم و بأساتذته و علمهم و خبرتهم و بالحضور و ميشدش اعصابه و ميحرقش دمه
اهم حاجة يستمتع على قد ما يقدر بأيامه دى لأن اللى جاى محبش اوصفه
حاجة تانية المفروض يعملها انه يصر انه يتعلم صح و ياخد العلم من مصادر موثقة معترف بيها و مش مجرد اصغر مذكرة او يذاكر من اللى الناس بيذاكرو منه
لازم يجهز نفسه للتعود للرجوع للمراجع و البحث و المذاكرة من الكتب الاجنبية

نفس الحكاية
التفكير فى التخصص غلط كبير قبل القرب من الانتهاء من سنة الامتياز
لازم الواحد يدى نفسه الفرصة انه يشتغل كل حاجة و يعرف اللايف استيل بتاعها
و لما قلبه و عقله يختار حاجة يتوكل على الله و ميتنازلش عنها ابدا
مهما كانت الاغراءات من نيابة فى الجامعة لو نيابة سريعة فى وزارة الصحة
غير كدا انصحة انه يختار اى تخصص
بس يكون متأكد انه هيفضل طول عمره يشكى من مساوئ التخصص دا
أه
مهو كل تخصص له مميزات و عيوب
بس اللى بيحب تخصص معين مبيحسش قوى بعيوبة زى اللى واخده كدا و خلاص

اتمنى اكون جاوبت على بعض تساولاتكو و لو بطريقة غير مباشرة

و ربنا يوفقكو و يوفقنا

مصباح

25-07-2009, 09:37 PM

أنا موافق تماما على كل حرف في كلام الزملاء الأسمر و سامح و ألزهايمر باستثناء حاجة واحدة محتاجة تصحيح و هي تخصص الباطنة في أمريكا :
دا التخصص اللي المصريين و العرب و كل الغير أمريكان بياخدوه لما
مبيعرفوش ياخوا الأعلى منه
لينا 4 زملاء في دفعتنا (2005) استلموا بالفعل نياباتهم
في أمريكا في يوليو 2009 .. أعرفهم معرفة شخصية طبعاً
منهم 2 باطنة و واحد أشعة تشخيصية (نادرة من النوادر)
و واحد جراحة (برضه نادرة من النوادر)
لكن القاعدة العامة الناس بتاخد باطنة أو أطفال لو عايزين
(لينا زميل نايب أطفال في نيويورك) أو تخصصات أقل (فاميلي ميديسن أو سايكايتري)
و كلمة أقل هنا معناها المنافسة عليها قليلة مش معناها تقليل من قيمتها لا سمح الله.

تدريجيا هاحاول اجاوب على ما يتيسر من اسئلة ان شاء الله ،و إن كنت لا أعدكم بالتواجد الدائم ، لكن هنشوف ...

1- اقرا و استفسر على المعادلات و الزمالات دلوقتي و انا لسة في 5 ؟
طبعاً هيا دي عايزة كلام .. كل ما تعرف بدري و تعرف اكتر كل ما يكون احسن ، ؤمال احنا لازمتنا ايه ؟

2- انسب وقت ابدأ فيه هوا الامتياز ؟
دا صحيح ... مع العلم انه ممكن يشتتك شوية عن التعليم في الامتياز (أيوة الامتياز فيه تعليم طبعاً .. و مش هتتعلمه في حتة تانية بعد كده) عشان كده انت محتاج توازن ، ووجود حد أكبر منك معاك ساعتها هيفيدك كتير (دا اللي حصل مع الأربعة الزملاء اللي انا اتكلمت عليهم فوق) ـ

3-هل المعادلة الامريكية صعبة ؟
طبعا ... مذاكرة كتير جدا ،و عقبات كتيرة ، بعضها مش متوقع (رغم الخبرات المتراكمة من زمايلك اللي سبقوك) بس هيا دي الدنيا .... و سفر و غربة و مصاريف كتير ..إلخ
بس المهم انك بتبقا شايف الهدف قدامك ، و زمايلك قبلك حققوه بالفعل ، يعني مش وهم ،و أمريكا بتعوز سنويا ما يقرب من 5000 طبيب من خارج أمريكا يشتغلوا نواب في مستشفيات امريكا ، المنافسة بتزيد كل سنة و كل سنة المجاميع بيحصلها انتفاخ ! و الشروط ممكن تزداد صعوبة .. بس برضه الامريكان عايزين العدد الرهيب دا من الدكاترة و مش هيقفلوها في وشهم لأن دا مش من مصلحتهم .

4- أعمل بعض اجزاء المعادلة الامريكية و اسافر بيها الخليج ؟
معنديش فكرة (؟) عن أي لازمة ليها في اي حتة غير امريكا (زي ما علاء قال) و اللي يعرف غير كده يقول عشان اعرف لأني فعلاً معرفش. (و مسمعتش عن حد عمل بيها حاجة غير كده) .

5- لو فات مني القصر العيني انتحر ؟ اعمل ايه عشان ابقا دكتور(ة)/مميز(ة)؟
قبل ما تجهز المسدس يتاعك أو قبل ما تطلع على سطح العمارة اللي في بالك، فكر في الخيارات التالية : المستسفيات و المعاهد التعليمية ، برامج الزمالة المصرية (بيجيلي فيد باك كويس من ناس فيها - و ممكن تروج بيها السعودية بعد كده) ، أو الشهادة الأجنبية اللي تاخدها و انت في بلدك (زمالة بريطانية يعني أو لو فيه حاجة شبهها) أو السفر للخارج (معادلة أمريكية أو كندية أو استرالية ..إلخ) و غير ذلك من الخيارات التي قد لاأعرفها أو لا أتذكرها .

6- اعمل ايه عشان اتخصص دم و أورام (hem/onc) ؟
اعتقد ان اللي يفيدك فيه تخصص بعينه بصفة خاصة هوا اهل التخصص دا، دا كلام ينطبق على اي تخصص .. مثلا : أنا قررت امشي في الزمالة المصرية و عايز آخد فيها التخصص الفلاني (طوارئ مثلا) يبقا تسأل ناس في زمالة طوارئ ، تسأل وحد و اتنين و تلاتة لغاية ما تحس انك ألميت بكل اللي عايز تعرفه من ظروف التخصص و نمط الحياة (لايف استايل) و فرص التعليم و فرص الشغل بعد التعليم ... إلخ كل تخصص لازم تعرف عنه الحاجاة دي قبل ما تدوس فيه.

و الله أعلى و أعلم

kalamntena

25-07-2009, 09:38 PM

دا مش سؤال .. دا جر شكل
اديني سؤال محدد عن المعادلة الأمريكية

حمدا لله على السلامة اولا يا مصباح

و ربنا يجازيك خير على انك شغلت الموضوع وخليت الناس ترد عليا بعد ما كان محدش معبرنى على الرغم من انى فعلا كنت عايزة اعرف شوية معلومات كتيرة كده عنهم و انهي افضل في ايه

و شكرا لكل الناس اللى ردوا

winner

25-07-2009, 10:36 PM

بسم الله الرحمن الرحيم ..

انا ما اعرفش كتير عن المعادلات دي ..

- بس اللي اعرفه ان دراستها مفيدة جدا سواء هتشتغل في مصر و لا برة .. العلم نور برضة ..

- هي مش طلاسم .. تقريبا - تقريبا - نفس اللي بندرسه بس بنظام اكتر و قواعد ادق و توضيح على اساس الفهم الصحيح للطب مش الحفظ .. و بتعتمد على انك فاهم الاساس اللي مبني عليه الكلام .. بيعتبرك واحد في طب مش لسة طالع من الدبلوم ..

- هتحتاجها فعلا لو هتسافر لانهم مش هيقبلوك برة الا بيها .. و هناك هتعملك قيمة ..

- مش مرحلة واحدة و انما حاجة زي usmle دي تقريبا 3 مراحل .. و المرحلة التالتة بتمتحنها في امريكا .. و ما ينفعش تقف عند مرحلة و تبطل .. و الا كل اللي قبل كدة يبقى ضاع ..

- و طبعا بيتصرف على الكلام ده فلوس تمام .. فلو مش معاك كفاية يبقى تريح دماغك احسن ..

- عندك المقدرة على امتحاناتها (لانها مش سهلة) و فيه وقت لمذاكرتها (لانها كتير) و معاك فلوس تصرف عليها (لانها مكلفة) و هتقدر تسافر مكان و تلاقي ليك شغل (لان مكانها برة مش هنا) يبقى على خيرة الله ..

مصباح

25-07-2009, 11:13 PM

العفو يا كلمنتينا ، أسأل المولى عز و جل يجعله في ميزان حسنات اللي بدأ و كل اللي شارك.
و دا واجب عليا تجاه الزملاء إني أساعد في موضوع المعادلة الأمريكية بالذات
على فكرة أنا امتحنت step 2 CK امبارح
و أنا النهاردة في أجازة من المذاكرة ، و بكرة و بعده و بعده / المشاغل بعد كده ان شاء الله حاجات تانية غير المذاكرة ، على الأقل في الأسابيع القليلة القادمة .
و الله المستعان

dr / MIM

25-07-2009, 11:15 PM

شكرا يا مصباح و نتمنالك كل التوفيق

_____

و شكرا يا اسمر معلومات قيمة جداا

kalamntena

25-07-2009, 11:19 PM

العفو يا كلمنتينا ، أسأل المولى عز و جل يجعله في ميزان حسنات اللي بدأ و كل اللي شارك.
و دا واجب عليا تجاه الزملاء إني أساعد في موضوع المعادلة الأمريكية بالذات
على فكرة أنا امتحنت step 2 ck امبارح
و أنا النهاردة في أجازة من المذاكرة ، و بكرة و بعده و بعده / المشاغل بعد كده ان شاء الله حاجات تانية غير المذاكرة ، على الأقل في الأسابيع القليلة القادمة .
و الله المستعان

ربنا معاك يا مصباح
و بالتوفيق ان شاء الله

aaasmartaaa

27-07-2009, 10:06 PM

طيب سؤال بخصوص الزمالات

لو واحد كان بيفكر فى الباطنة وفى ناس خوفوه منها

وبعدين محتار بينها وبين الجلدية
وعايز يبدأ زمالة

هل يبدأ mrcp

على ما يختار التخصص ؟

سؤال غريب شوية :S

sameh_ig

29-07-2009, 10:20 PM

بعيدا عن الزمالات شوية ...

الناس دلوقتى بقت بتلعب لعبة جميلة جداا و هى ان يسافر بدون زمالة بدون معادلة ولا حتى ماجستير ولا دبلومة مجرد بس بى شهادة الطب بتاعتنا اية الورقة الكرتون دى اللى هنلفها سجاير قريب ...

عايزة من سعتك شوية مجهود فقط على النت ... هقوللك مثلا موقفى ...

تدور على اى موضوع فى تخصصك اى كان و تبحث فية و تقدم زى مشروع صغير او خطة انك عايز تدرس دة عندهم فى مجال البحث ... و تدور على كام دكتور تبداء تبعتلهم من الناس اللى برة و بتشوف مقالاتهم فى مجلات اجنبية طبيبة او اى جامعة كويسة او حتى مش كويسة ....

الناس برة عندهم اسلوب تانى غيرنا .. فية دكتور باحث دة ملوش علاقة بعيانين و دة اللى انت هتطلع علية او ممكن برضة دكتور العلاجى .... بس الباحث بيكون اسهل كتير

فى معظم الدول عندهم قانون ان الدكاترة دى لازم تعلم عدد معين من الدكاترة الشباب منهم اتنين من خارج البلد ومن اى مكان فى العالم ...

دى اللى طلع عليها ناس من صحابى برضة المانيا و انجلترا ...

اتنين منهم فى فريق بحث طبى فى المانيا و الاخر فى انجلترا و رجع سافر امريكيا بى نفس الاسلوب ...

ميزة فريق البحث انك انت كمان عندك فرصة انك تقدم رسالة محترمة هم بيقيومها تمنحك درجة الدكتوراة .... المهم يكون بحث محترم و بجد ويفيد الناس و معاك مشرفين على كدة طول منتا هناك بدون بقى لا تمهيدى ولا سكند ولا خرفشة الدماغ اللى هنا

انت راجل شغال معاهم يبقى تشتغل و هتشتغل غصب عنك

و بصراحة انا معرفش حد واخدها و رجع تانى كلة بيكمل هناك فى مجال يا اما بحث الامراض او بحوث الادوية فى الشركات الكبيرة و دى طبعا نقلة تانية

المشكلة الوحيدة الصغيورة الفلوس ..... عايزة فلوس من بدايتها لانك مش هتعرف تشتغتل او صعب تشتغتل فا عايزة واحد يكون معاة 20 قرش مش قرشين و يتوكل على الله

Dr.Medicine

29-07-2009, 11:36 PM

لو الفكرة دي كده فعلا ...تبقي فكرة كويسة جدااااااااااااااااااا بس برضو محتاجة واحد مخه نظيف و بيحب البحث العلمي

مصباح

31-07-2009, 02:04 AM

طيب سؤال بخصوص الزمالات

لو واحد كان بيفكر فى الباطنة وفى ناس خوفوه منها

وبعدين محتار بينها وبين الجلدية
وعايز يبدأ زمالة

هل يبدأ mrcp

على ما يختار التخصص ؟

سؤال غريب شوية :s
أنا بس باسجل عدم علمي بإجابة السؤال ده
فكرتي المتواضعة ان الزمالات البريطانية طريق الناس اللي عارفة هيا عايزة انهي تخصص
و اطلب من الزملاء اللي عنده اجابة مفيدة لا يبخل علينا بها

مصباح

31-07-2009, 02:06 AM

دكتور سامح لو عندك تفاصيل أكتر هات
و لو تعرف حد ماشي في الموضوع ده و يقدر يدينا شرح مبسط هات ايميله أو وصلني بيه بأي شكل يناسبه
و جزاك الله خيراً

sameh_ig

31-07-2009, 04:54 PM

كلهم سافروا بس هحاول اجيبللك ايميل اى حد فيهم

SA node

16-08-2009, 03:42 AM

كنت بادور على موضوع Starting USMLE للدكتور مصباح لكن للأسف ملقيتوش ..

نويت والحمد لله السير فى هذا الطريق وأسأل الله التوفيق .. الامتحان فى شهر فبراير القادم إن شاء الله

بس على rate المذاكرة بتاعى الضعيف ده يبقى عايزلى حوالى سنتين

دعواتكم بالتوفيق

وأرجو أن لا يبخل علينا د. مصباح بنصائحه فى Step 1

dr / MIM

16-08-2009, 03:53 AM

ياااااااااااااااه

اخيرا شرفنا sanode بالزيارة

ربنا يوفقك يا دكتور

و شد حيلك تخلص بجرى بقى

عايزين يبقى لينا ضهر فى امريكا ..

:))

kalamntena

16-08-2009, 01:35 PM

كنت بادور على موضوع starting usmle للدكتور مصباح لكن للأسف ملقيتوش ..

نويت والحمد لله السير فى هذا الطريق وأسأل الله التوفيق .. الامتحان فى شهر فبراير القادم إن شاء الله

بس على rate المذاكرة بتاعى الضعيف ده يبقى عايزلى حوالى سنتين

دعواتكم بالتوفيق

وأرجو أن لا يبخل علينا د. مصباح بنصائحه فى step 1

انت فين يا دكتور

لما انت لسه ما امتحنتش ونسيتنا كده
اومال لما تسافر هتعمل ايه
على العموم بالتوفيق

Nettawy

18-08-2009, 08:14 AM

كنت بادور على موضوع Starting USMLE للدكتور مصباح لكن للأسف ملقيتوش ..

http://kasralainy.com/forum/showthread.php?p=132347#post132347