المساعد الشخصي الرقمي

مشاهدة النسخة كاملة : إستفسار هام للغاية



Dr.Physician
23-08-2009, 02:41 AM
السلام عليكم
إزيكم يا طلاب القصر العيني و كل عام و أنتم بخير
أنا عندي بعض الإستفسارات بخصوص كليتكم الجميلة
الموضوع بيتلخص في إني بأفكر جديا في التحويل لطب القصر العيني
أنا حاليا داخل الفرقة الرابعة و على حد علمي دي أخر فرصة للتحويل لعندكم يا ريت لو المعلومة دي غلط و ممكن أحول بعد سنة الرابعة حد يوضح لي.

إنما مش دي المشكلة الرئيسية الحاجة اللي بتثير مخاوفي هي إني لو حولت ممكن التقدير بتاعي يضيع في وسط كمية التقديرات العالية الكتيرة اللي عندكم

أنا في البداية دخلت إحدى كليات الطب الإقليمية مش القصر العيني ولا عين شمس بناء على نصيحة من دكتور أكبر مني هو قالي إني هأقدر أحقق نتيجة أفضل في وسط عدد طلاب أقل و بالتالي فممكن جدا أحصل على مكان في الجامعة بمجهود أقل بكتير منه في القصر العيني لإن الدفعة عندكم أكتر من1700 طالب و التنافس شديد جدا و فعلا كلامه طلع صحيح جدا
و الحمد لله أنا محافظ على مكان كويس في كليتي

فأنا عاوز أستفسر عن فرص التعيين في كلية طب القصر العيني يعني الكلية بتعين كام واحد كل سنة
و تقديراتهم بتبقى إزاي
و نقطة تانية مهمة إني عاوز رأيكم في حالتي الخاصة يعني أحول و لا لأ أنا هنا محافظ على تقدير ممتاز و ترتيب كويس بحيث إني ألاقي مكان في الكلية إنما مش راضي إطلاقا على مستوى و جودة التعليم
و طبعا عندكم التقديرات ما شاء الله بتبقى عالية جدا و الدكاترة مبحبحين إيديهم معاكم على الأخر

فلما أقارن نفسي مع بقية الزملاء عندكم هلاقي إن التقدير واحد إنما في فرق في النسبة المئوية
لصالح طلبة اللي بدأواالدراسة من الأول في القصر العيني ده غير بقى الكوسة و الواسطة و المجاملات

فعاوز أعرف الواحد وسط الناس دي هيبقى وضعه إزاي

و بما إني داخل على سنين الكلينيكال و دي هي اللي هتفرق الدكتور الكويس من اللي مش كويس فأنا عاوز أخد تعليم طبي كويس و غالبا ده عندكم أفضل
و في كليتي دلوقتي الكلينيكال مش قد كده و الحلات برده قليلة يعني من الأخر أنا مش مقتنع قوي بيهم هنا
يمكن التلات سنين الأكاديمي كانوا كويسين إنما الكلينيكال لأ

فالعملية محيرة جدا و خصوصا إني أصلا من القاهرة فا معنديش مشكلة في التحويل و السكن
لكن عاوز حد يساعدني في تحديد القرار

يعني أحول و أحصل على دراسة أفضل بس تقديرات مقارنة مع بقية الطلاب هتبقى أقل شوية و مش هلاقي ترتيب كويس
أو أستمر في مكاني و أسيبني من حكاية التعليم الكويس دي على أساس إن كل التعليم في مصر زي الزفت

يا ريت يا شباب تردوا علي في أقرب فرصة لإني بجد محتار جدا و مش عاوز أخد قرار و أندم عليه


و إنتوا أكيد حاسيين إن ده هيكون قرار مصيري



تحياتي

kalamntena
23-08-2009, 02:47 AM
اللى نصحك تدخل اقاليم
سلملي عليه كتير جدا
و قوله ربنا يجازيك عنى خير

ده بفرض انك فعلا ماشي زي ما قاللك
و حافظ لنفسك مكان

القصر طبعا هيصة
و كوسة ووسايط و موواويل

معاك ان فيه تعليم مش في اي حتة تانية

لو تعرف تفضل عندك و تحضر هنا
تبقى عملت حاجة كويسة جدا

لكن لو مجموعك مش قوي كفاية انك تتعين في الكلية
يبقى لا تشوف قصة التحويل _ اللى انا ماعرفش تفاصيلها _ عشان ميبقاش لا تعليم ولا تعيين
على الاقل تبقى استفدت بحاجة

و ربنا يوفقك للخير

Nettawy
23-08-2009, 02:48 AM
يعني أحول و أحصل على دراسة أفضل بس تقديرات مقارنة مع بقية الطلاب هتبقى أقل شوية و مش هلاقي ترتيب كويس
أو أستمر في مكاني و أسيبني من حكاية التعليم الكويس دي على أساس إن كل التعليم في مصر زي الزفت

أهلاً بيك معانا في المنتدي
أنا أحمد داخل رابعه ان شاء الله
رأيي الشخصي تحول القصر العيني ومش شرط ماترتبش ولا انك ماتلاقيش مكان كويس
انت اعمل اللي عليك والباقي على ربنا

بالتوفيق ان شاء الله في اختيار قرارك :)

Dr.Physician
23-08-2009, 03:11 AM
شكرا يا شباب على ردودكم وآراءكم لكن رجاءاَ تكون محددة أكتر

و برده تجاوبوا لي على الأقل على النقط المهمة دي جزاكم الله خيراَ



*أنا حاليا داخل الفرقة الرابعة و على حد علمي دي أخر فرصة للتحويل لعندكم


*فأنا عاوز أستفسر عن فرص التعيين في كلية طب القصر العيني يعني الكلية بتعين كام واحد كل سنة
و تقديراتهم بتبقى إزاي



*و نقطة تانية مهمة إني عاوز رأيكم في حالتي الخاصة يعني أحول و لا لأ أنا هنا


* ده غير بقى الكوسة و الواسطة و المجاملات فعاوز أعرف الواحد وسط الناس دي هيبقى وضعه إزاي


* يعني أحول و أحصل على دراسة أفضل بس تقديرات مقارنة مع بقية الطلاب هتبقى أقل شوية و مش هلاقي ترتيب كويس
أو أستمر في مكاني و أسيبني من حكاية التعليم الكويس دي على أساس إن كل التعليم في مصر زي الزفت

kalamntena
23-08-2009, 03:19 AM
اقتباس:
*أنا حاليا داخل الفرقة الرابعة و على حد علمي دي أخر فرصة للتحويل لعندكم

ماعرفش دي


اقتباس:
*فأنا عاوز أستفسر عن فرص التعيين في كلية طب القصر العيني يعني الكلية بتعين كام واحد كل سنة
و تقديراتهم بتبقى إزاي
تقديراتهم امتيازات مع مرتبة الشرف
و التعيين حاجة و النيابة حاجة تانية
ممكن بعد ما تقضي نيابة 5 سنين يقولولك مفيش وظايف
خصوصا وان الرؤيا مش واضحة مع النظام الجديد
النيابات عددها اجمالى بمعهد الاورام حوالى 110 الى 120 كده في المتوسط

اقتباس:
*و نقطة تانية مهمة إني عاوز رأيكم في حالتي الخاصة يعني أحول و لا لأ أنا هنا

لو مجموعك و ترتيبك يجيب
شد حيلك اكتر و خليك عندك
لو ميجيبش حول

اقتباس:
* ده غير بقى الكوسة و الواسطة و المجاملات فعاوز أعرف الواحد وسط الناس دي هيبقى وضعه إزاي

هيبقى بزرميط طبعا
متزعلش بس هتبذل مجهود جامد جدا و هتستهلك جزء من اعصابك قل او كثر على حسب شخصيتك


اقتباس:
* يعني أحول و أحصل على دراسة أفضل بس تقديرات مقارنة مع بقية الطلاب هتبقى أقل شوية و مش هلاقي ترتيب كويس
أو أستمر في مكاني و أسيبني من حكاية التعليم الكويس دي على أساس إن كل التعليم في مصر زي الزفت


لو تعرف تفضل عندك و تحضر هنا
تبقى عملت حاجة كويسة جدا

Dr.Physician
23-08-2009, 03:26 AM
ربنا يكرمك و يجازيك خير يا دكتور kalamntena

بس هو ممكن أكمل هنا و أحضر عندكم يعني أقصد ده ينفع أصلا ؟؟

و معلش يا ريت توضح زيادة شوية حكاية النيابة و التعيين دي

kalamntena
23-08-2009, 03:34 AM
ممكن طبعا ليه لا
الراوندات مفتوحة على البحري
محدش بيقول حاجة دول بيفرحوا لما يلاقوا عدد كبير
و المحاضرات شغالة
يمكن يدققوا شوية في الشرعي _ بس ده مفيهوش حاجة يعنى_

النيابات و التعيين ده موضوع يطول شرحة
و انا نفسي انام شوية قبل السحور

استأذنك نكمل بكرة ان شاء الله؟

معلش انا عارفة انى رخمة
بس انا فعلا بدأت ما اجمعش
onion1

مصباح
23-08-2009, 03:39 AM
رغم اني معنديش كل الاجابات
بس انا مش متحمس لتحويلك للقصر - الدنيا عندنا بظرميط فعلا
و التعليم الاكلينيكي مش بالاسم و السمعة - انما بالاستاذ اللي عنده العلم و عنده الاهتمام بالطالب ، زائد النظام التعليمي (زفت في القصر و غيره )
انا رايي انك تتعلم عندك و ان شاء الله مش هتندم
كتير بيجيلي الاحساس اني لو رجع بيا الزمن لورا هادخل طب قناة السويس - دا لو دخلت طب تاني
و الله اعلم

Dr.Physician
23-08-2009, 03:47 AM
شكراَ جزيلا يا شباب على تعاونكم

شكرا جزيلا للدكتور نتاوى و الدكتور مصباح و الدكتورة كلمنتينا

ربنا يجازيكم خير




استأذنك نكمل بكرة ان شاء الله؟

ربنا يخلليكي يا دكتورة في إنتظار بقية رد حضرتك في الوقت اللي يناسب حضرتك

kalamntena
23-08-2009, 04:59 PM
جزانا واياكم يا فندم

دلوقتى مسألة النيابة في القصر العيني بقيت صعبة جدا
بقيت 5 سنين اول سنتين منهم على حسب يا باطنة عامة يا جراحة عامة
نايب نسا ينزل طوارئ جراحة ليه؟

و النهاردة سمعت حتة خبر يفطس من الضحك الله اعلم بمدى صحته
ان الكلام ده ينطبق على الاكاديمي كمان
هيخلوهم ياخدوا باطنة عامة
الله اعلم الكلام ده صح وللا غلط

بعد ما النايب يخلص نيابته
بيستنى مدة تطول او تقصر على بال ما ينزل عدد الوظايف اللى بيرشحها القسم
عدد قليل من النواب اللى استبعدوا من الاول
لكن الارجح ان اللى بيحصل بينزلوا عدد ترشيحات على قد الدفعة لكن فيه ناس من دفعات اكبر بينزلوا عليهم فبيخرجوا بره الترشيحات

و بعد كده بيستنوا فترة تانية قصرت او طالت برضه على بال ما يخلصوا الاجراءات لا هم نواب ولا هم مدرسين مساعدين ( و طبعا مبيقبضوش ولا مسجلين في الكلية اصلا)

دى حكاية النيابات

Dr.Physician
24-08-2009, 06:47 AM
تمام يا دكتورة

طيب بالنسبة للأكاديمي ؟ و غالبا بيبقوا كام واحد؟

kalamntena
24-08-2009, 05:18 PM
الاكاديمي ممكن بالكتير يبقوا حاجة وعشرين

Dr.Physician
31-08-2009, 11:26 AM
شكرا يا دكتورة كلمنتينا و شكرا لكل الناس اللي ردوا

معلش عاوز برده أستفسر عن الكورسات عندكم

لإني في كليتي مش معتمد على الكلية كتير

و كنت بأخد كورسات في 3 مواد من الأربعة و أسعارهم في السنة كانت بتتراوح من 700 لأقل واحد ل 1200 و ده أغلى واحد

فا مش عارف الوضع عندكم إزاي و يا ترى الواحد ممكن يستغنى عن الكورسات على أساس إن الكلية ممكن تقدم خدمة أفضل

و لو هتاج كورسات فأحب أعرف الأسعار الكورسات يا ترى هي نفسها أو أقل أو أعلى

معلش يا جماعة بأتقل عليكم

dr / MIM
31-08-2009, 05:23 PM
بالنسبة للكورسات ..

ده يعتمد عليك و على نشاطك ..

يعنى لو انت عايز تتعلم و عندك استعداد تنزل تسمع فى الكلية و عندك استعداد تتابع ..

هتلاقى الكلية متيحة ليك تقريبا كل اللى انت عايزه ..

طبعا ده للى عايز يبقى نشيط و يحضر هنا و يتابع هنا و يسمع من ده و يسأل و يستفسر ..

_______

لو انت عايز تعتمد على الدروس و حاسس انك هتؤدى بشكل افضل من خلالها ..

غالبا الدرس فى رابعة فى السنة ..

1500 جنيه من غير العملى و اى حاجة اضافية ..

dr / MIM
31-08-2009, 05:24 PM
و فيه بعض الدكاترة بتبقى اعلى قليلا ..

ده طبعا للمجاميع البابليك ..

البرايفت بتبقى اغلى كتير طيعا ..

Dr.Medicine
01-09-2009, 02:38 AM
كتير بيجيلي الاحساس اني لو رجع بيا الزمن لورا هادخل طب قناة السويس - دا لو دخلت طب تاني
و الله اعلم


لا يا دكتور يبقي لو رجع بك الزمان ما تدخلش طب اصلا

بالرغم ان طب قناة السويس مش واخد حقه لكن النظام التعليمي فيه ممتاز ...بس صعب ...

........................

انا رأيي كمان اللي عايز يبقي فعلا دكتور هو اللي هيعلم نفسه علشان يبقي دكتور في اي نظام و اي جامعة...
اهم حاجة انه يبقي عايز يكون فعلا دكتور

dr\Mona
01-09-2009, 04:57 AM
والله يا دكتور الكليات الاقليميه مش حلوه فى نظام التعليم بس انا رايى ان الواحد لو عنده القدره على التعلم ممكن يستفيد من كل الناس بجد فى ناس صغيرين نواب يعنى بس شرحهم تحفه وبيحبوا يعلموا الناس الصغيرين انا رحت مستشفى الجامعه عندنا وبجد كان فى ناس متعاونين جدا مع انا احنا مكناش عارفين حاجه
وحضرتك ينفع تحول سكاشنك او محاضرتك والرواندات هناك بس الامتحانات تكون فى جامعتك الاصليه وده هيوفرلك راحه ساعة الامتحانت وتعيينك برده هيكون فى جامعتك يعنى حضرتك تكون استفدت بكل حاجه الكلينكال فى القصر العينى وحافظت على ترتيبك فى كليتك

Dr.Physician
02-09-2009, 10:25 PM
شكرا جزيلا يا شباب و الله أنا مش عارف من غيركم كنت هأعمل إيه بجد ربنا يجازيكم خير

أنا خلاص هتأخذ القرار النهائي بكره إن شاء الله بعد ما هأكون عملت إستخارة و وزنت الموضوع من كل الجوانب تقريبا و برده قبل ما مواعيد التحويل تنتهي

ربنا يقدم ما فيه الخير

و سواء كان لي نصيب أكون معاكم السنة دي أو أكمل في مكاني فإن شاء الله أنا متابع معاكم على المنتدى هنا

يا ريت يا جماعة لو حد تفاصيل عن موضوع إن الواحد يكون في مكان و يحضر الروندات في مكان تاني دي ما يبخلش علينا

ربنا يوفقنا كلنا

kalamntena
03-09-2009, 02:18 AM
يا سلام تنورنا طبعا يا فندم