تعريف

[مش مهم مين]

السلام عليكم ورحمة الله
انا ماشي يا اخوانا ومش هدخل هنا المنتدى تانى ان شاء الله تعالى
وهانسحب كذلك من كل المنتديات ويمكن الفيس بوك وتويتر كمان
يعنى نوع من الاقلاع عن النت الاجتماعى لفترة طويلة ويمكن يكون للابد

انا عماد قطب

طبعا في ناس عارفة من البداية وفي ناس متوقعة
وفي ناس بعتتلى عالخاص تسألنى انا هو ولا لأ
اظن كان واضح انه انا من اول مرة
ايه دخلنى باسم تانى وايه خلانى اقول دلوقتى؟
قلت دلوقتى كنوع من حرق السفن علشان مارجعش تانى وعلشان علة تغيير الاسم انتهت
وغيرت اسمى ليه في الاول
لاسباب كتير منها زي ما قلت - وان لم يكن اهمها - انى اتكلم بكلام مش مهم مين بيقوله يعنى محاولة لالغاء تأثير الشخصية سواء كان بالسلب او بالاجاب على منفعةالكلام
المهم ايه الكلام وايه الفكرة ومش مهم دى افكار مين

حصل منى في المنتدى هنا خروقات كتير لقواعد الالتحام واطلاق النار
تعديت حدودى مع ناس ومع بعض الافكار هنا وبره المنتدى
عموما
نستغفر الله العظيم رب العرش العظيم

انا دخلت المنتدى هنا بنية صالحة وكان عندى هدف معين وهمشي علشان مهمتى - الى انا حطيتها لنفس - انتهت
نجحت ولا فشلت في تحقيق هدفى ؟
دا لسة هيخضع للدراسة ومعرفش
بس انا سعيد بالتجربة على الاقل وحاسس انى سعيد

في ناس اثرت فيا جدا هنا واتعلمت منهم كتير
وناس اظن انى اثرت فيهم - عالاقل باصداري الاول باسم عماد قطب - وناس تانية كنت بفرح لما يعلقوا او يتكلموا او حتى الاقيهم بيقروا موضوع معين من الموضوعات .. انا يمكن اكتر واحد كان بيطالع قسم مين بيعمل ايه الى تحت خالص دا

خلونى الاول اشكركم كلكم
واعتذر للناس الى بعتت لى عالخاص علشان الجليطة وقلة الذوق وعدم الرد عليهم .. ويعذرونى في كدة

وبعد كدة خلونى اميزبعض الناس شوية بشويةكلام يمكن يكون مالوش قيمة عند بعض الزملاء

انا دخلت المنتدى هنا بسبب بحثى عن هاريسون بتاع الباطنة وكان اول حاجة شفتها مشاركة لعضواسمه ابراهيم ... مشفتوش بعدها

وبعدين نويت اكون عضو هنا وحرصت اكون عضو غير طبي في المقام الاول

اكتر واحد انا حبيته هنا اس اي نود
يمكن علشان الوحيد الى قابلته في العالم الحقيقى في محطة مصر
وحسيت قد ايه انه محترم وابن ناس
واكتر واحد بحس انى قريب منه مصباح ومتوقع انى احبه زي اس اي نود لو قابلته
وليه عندى عزومة في فرحات او الشبراوي بتاع الكوربة او في اي حتة يقول عليها لوقابلته
والانسان اسير الاحسان

بحترم جدا دكتورة ميديسن من ايام ما كان اسمها الحمد لله
بحس انها بتبنى في صبر وثبات وهدوء وساعات بحس انى فخور ان موضوع ليا كان السبب انها تدخل المنتدى زي ما قالت هي

بحب برايت جالاكسي وابوالمعاطى من ايام ما كان اسمه سامح
(ويريت يسامحنى انى مطلعتش اسمه ايه دا بتاع طب عين شمس )

ونتاوى وذو عين واحدة بحس ان في رابط اقوى شوية من الحب معاهم واتمنى لهم التوفيق وعدم المرور باية ازمات من اي نوع

اسلام :اي كية ام
انسان معتدل جدا ويتميز بقدر لا باس به من الانصاف والاعتدال
وعاقل وبحس انه متصالح مع نفسه
يعنى متوقعلك مستقبل ما ان شاء الله يحصل قريبا جدا
واعفينى من ذكره ايه هو
بس خير ان شاء الله

ازيجوس من الاشخاص الى بحب وجودهم على المنتدى لاطول فترة ممكنة
واتمنى انه يكون فعلا ازيجوس مش هيمى ازيجوس

ام اي ام
بيفكرنى بمصطفى محمود
ربنا يحفظه ويبارك في جهوده في بناء المنتدى تانى وتانى وتانى

الادمن
من يوم ما دخلت نفسي اعرفه
الرجل رقم صفر بتاع الشياطن ال13؟
هل هوابن الحصري ولا دا ادمن ودا ادمن
والاسمر الى هو الادمن واسلام برضو ادمن
مش عارف
بس الاحتكاك بالناس دى كان قليل بحكم موقعهم الاداري
فبالتالى مقدرش اقول عنهم حاجة

دكتورة زد معرفش عندها كام سنة ولا هيا في سنة كام بس بحس انها اختى
بتفكرنى فعلا باختى
ومتأكد ان لو اختى دخلت عالمنتدى هتعمل وتقول نفس الشئ
ممكن تكون مكمل مهم لمديسن وممكن يتعاونوا مع بعض يقلبولنا حال المنتدى للافضل طبعا مش عاوزين مشاكل

دكتورة كلمنتينا ..صديقة المدام
اقدر اقول حاجة؟
قدرات كبيرة جدا نقدر نقول ضخمة
مهمة جدا لبقاء المنتدى على ما اظن
شفتلها مشاركة من 2004 بتتكلم عن رحلة لقريةريفية اثناء دراستها للكوميونيتى
ياااااه
الفرق كبير قوى بين رحلة في اتوبيس الكلية للجيزة او القليوبية وبين رحلة لوارسو في يناير
ترجع بالسلامة ان شاء الله

اكيد مش هقدر استوعب كل النس
ار بي جى ومصري (الصعيدى ) وحامد اونلاين وايه وان مان
ورونى الى يوسف لسة حتى الان بيتفرج في خيرها ومكتبة الكارتون الى جابتهالنا

فارس الوهم عنيدة جدا وبحس انها دايما بتزعقلى في الردود بتاعتها
بس كفاية انها اسكندرانية وبتحب احمد خالد توفيق

مدنجى مش عارف افهمه واكتر واحد بيخلينى اقرا كلامه اكتر من مرة
بس بحس انه عصبى جدا والنقاش معاه غير مريح بالمرة
بس ساعات بحس ان وجوده مهم برضو في المنتدى

الزهايمر محتكتش بيه الا في الفترة الاخيرة ومكانتش تجربة سارة ليا
بس اتمنى ان ربنا يغفر ما كان بينا
وعلى فكرة هو الوحيد مع نتاوي الى دعتلهم في مكة وانا محرم من فترة قصيرة جدا

فاضل حد تانى ...

اروناس الصعيدى الجدع ( مع ان معايا ياخى ناس من المنيا ربنا اعلم بيهم ) بس دا بحس انه صعيدى بجد
بتلاقى معاه فكريا في حاجات كتيرة جدا
وبحس احيانا انه بيتكلم بلسانى
واول واحد اتصل بيا بالميل من اعضاء المنتدى
وضمن خمسة نفسى اقابلهم في الحقيقة
مش معقول انى نسيت وينر
اديب المنتدى
دا فعلا اكتر واحد انا ممكن اديله لقب مثقف على المنتدى هنا
سماح للتقصير

لو حد تانى يسامحنى بس والله انا ماشلت ضغينة ولا كرهت اي حد من المنتدى حتى الان

عاوزاقول حاجة ..لا اكتر من حاجة
انا من اكبر الاعمار هنا في المنتدى على ما اظن
معرفش ليه يمكن الناس لما بيكبروا بينشغلوا بحاجاتتانية او يمكن سبب تانى
قريت كتير جدا تقدروا تقولوا مثقف بالمعنى المتداول دلوقتى
كنت وانا في ابتدائى بقعد مربع جنب اخويا الاكبر -استاذ جامعى دلوقتى - ويقرالى. ولسةحتى الان بقرا كل حاجةتيجى تحت ايدى او اخلى حد يقراهالى.

قريت تختخ وممدوح واحمد بتاع الشياطين ال13 وكل شيء عن وسلسلة اقرا ونبيل فاروق وفاروق وصفى وشريف شوقى وقريت زهور السلسة الرومانسية الوحيدة التى لا يجد الاب والام ومعرفش ايه
وقريت ليحيى حقى والعقاد والسباعى واحسان والرافعى وغيرهم
قضيت ايام سودا مع ديستوفسكى (وكان اول واحد اقراله يتعرض للنبي عليه الصلاة والسلام بالانتقاص ) وقريت لمصطفى محمود كل مؤلفاته وقريت لانيس منصور وهيكل ولسيد قطب ومانكرش انه اثر فيا جدا بفكرة استعلاء الاسلام عن غيره من الباطل
وقريت لعلى الطنطاوي
وتلستوي ومارك توين وديكنز وباولو كويهلو وجارسيا ماركيز (الى بقى وباءودلوقتى كل الى تكلمة يقولك يقول جارسيا ماركيز ,,,)
وحبيت جدا جون جريشام واحمدخالد توفيق بالذات ومعرفش ليه

ودرست علوم شرعية من وانا في تانية ثانوي مع الاخوان وسمعت لكل الشيوخ الى موجودين دلوقتى تقريبا
بحب مصطفى حسنى وعمر عبد الكافي ونبيل العوضى وجدى غنيم وتعلقت فترة بالشيخ الراوى والشيخ الشعراوي
مقدرتش احب عمرو خالد من البداية
بالاضافة لشيوخة الطبيعين الى اتربيت على مناهجهم محمد اسماعيل وياسر برهامى وعبد المنعم الشحات وابواسحق الحوينى ومحمد حسان وسعيد عبد العظيم واحمد حطيبة

كل دا ليه بقوله؟

عاوزاقول ان الثقافة ماهياش حكر على لون معين او ناس معينة ..
وصف المثقف ليه بيصادم وصف المتدين ؟
ضيق الافق دلوقتى بقت تهمة جاهزة لاي واحد يقول حاجى غير الى انا بقولها
ثقافةالحوار بقت انك تقول امين وحاضر ونعم والا متكونش متحضر

حاجة كمان
واحد قضى عمره كلة بيلعب كورة وواحد ملعبش كورة في حياته
ينفع التانى يجى يقول للاول انا شايف كذا ورايي كذا
انت اخترت سكة اللا كورة من البداية خلاص ماتتكلمش في حاجة انت اخترت الا تعرفها من الاصل
وقيس على ذلك كل شيء
مش هطول عليكم
بس حاجة اخيرة

اي واحد عاوز يتكلم في امر شرعى دينى اوعلى صلة بالشرع والدين ممكن يقول الى هوعاوزة مع مراعاه انه ما يخالفش
القران والسنة والاجماع
حافظ على دول وقول ما تراه
لا تخالف القران ولا تخالف السنةولا تخالف الاجماع
دول خط احمر

ونصيحة كمان --- لوحد مهتم ياخد منى نصيحة
الدنيا اتلخبطت جدا دلوقتى وكله بقى بيتكلم
انا انصح بالقراءة ل:
احمد خالد توفيق
فهمى هويدى
محمد عمارة
جمال سلطان
محمود سلطان
بلال فضل
غادة عبد العال (بتاعة الشروق )
وبحذر واسف لوتحذيرى هيثير حفيظة بعض اخوانى من :
مجدى الجلاد
ابراهيم عيسي
علاء الاسوانى
محمد الباز
وكل صحفيي الصحف القومية وروزاليوسف

وادعوا لمصر علشان الايام الى جاية سودة

بس




now ,I should cease- fire ,disengage , retreat
and back to base.
farewell to arms

[ذو عين واحدة]

طبعا أنا عارف من أول مشاركة أنه انت
وسألتك بس للتأكد

وما يهمكش انك يا دكتور ما رديتش
بجد ما يهمكش


والله لسا امبارح كنت بفكر في نفس المشكلة اللي انت بتتكلم فيها الوقتي يا دكتور

كان ايه منشأ الصورة المتخلفة اللي احنا عايشيناه النهاردة
أن المتدين ده ما لوش في الثقافة
( اللي هي وللأسف بقت تفسر بالاطلاع وهي أوسع من ذلك بقدر لا يعمله الا الله والراسخون في العلم )


طبعا انا مش حتكلم عن نفسي ( يمكن لما اجي أعتزل ابقى اتكلم زي حضرتك كدة :) )

بس انا والله باعتبر نفسي قاريء ليس بالهين
وشوفت كتير من المتديين اللي عندهم من الثقافة ما أجزم أني لسا ما شفتش أمثالهم ف مصر

ليه بقا الوضع اللي احنا عايشينه دا
ومن مصلحة مين ان الفكر ده يبقى منتشر بينا
انا واحد من الناس اللي أحب أوصف اني متدين ومش حأقدر أقول غير قول الشافعي

أحب الصالحين ولست منهم ...
لعلي ان أنال بهم شفاعة

أنا كنت من الناس اللي بحب العلم إلى حد لا يعلمه الا الله ( طبعا حد حيسألني ويقول ودلوقتي ؟)

انا خدت درس فيزيا وكمياء عند دكتور جامعي بيدرس في كلية المعلمين
لأني كان نفسي أبقى زي أحمد زويل وأتخصص في الفيزياء بس الفيزيا النووية

لكن الواقع اللي الدولة دي معايشانا فيه
اللي هوا واقع متخلف
ما كانش نتاج إن المتدينين هما اللي ماسكين الامور ولا حاجة
بل ان كل من ولي أمر مصر في العصر الحديث ممن كونوا هذه الثقافة
كانت لهم نفس النظرة المتخلفة (أن المتدين ليس مثقف ولا يحق له التدخل في الحياة الثقافية وهو رجعي والتدين رجعية والصلاة والصوم مش كل حاجة والكلام الفارغ ده )

لما جيت للواقع ده وأن ما كنتش عايش فيه من صغري
لقيت والدي اللي عاش فيه
بيقولي بكل ما أوتي من حزم لازم تدخل كلية الطب ..... علشان وعلشان وعلشان
طبعا ده ضيع كل حاجة ( على الأقل إلى أجل ليس بالقريب )

طبعا أنا عارف ان البعض حيقولي ما تعممش تفكير والدك على الناس كلها

بس حقلوه بلاش نعيش على بعض


هوا ده الواقع بتاعنا
ثقافة متخلفة
لم ينشأها في يوم من الايام المتدينين ولا كانو حتى مشاركين في انشائها

لكن أنا بقول
وأنا كلي أسف اني مضطر اني أقول كلام زي ده

أني ما دام ان النهاردة مبقاش لازم انقل كلام واحد زي أبو اسحق الحويني هنا المنتدى لأنه معروف وهوا اللي بقت الناس كلها بتتكلم بيه

وبقى فيه أعضاء تانيين في المنتدى مضطريين انهم ينقلو حاجات تثبت أقوالهم لأنهم من وجهة نظرهم الناس بدأت تغفل عنها وبقوا خايفين إن هذه المنظومة الثقافية الرائعة اللي احنا عايشينها بدأت تتلاشى ويسود في الأجواء أجندات لأناس أخريين ( على قول أحد الأعضاء )

إذا كان هوا ده الحال انهاردة
فأنا بعتبر ده نصر للمنهج اللي انا شايفه صح

وانا بقولها لنفسي قبل ما أقولها لحد تاني

مادام الرسول قال لنا ان فيه واحد ساعة ما المسيح الدجال حيخرج
حيكون عارف ان ده المسيح الدجال وحيقول كدة ويكون عارف الوصف بالزبط

فأنا متأكد انه حيبقى لسا فيه ساعتها ناس زي
أحمد ابن حنبل والبخاري والترمذي وابن حجر والسيوطي والالباني و أبو اسحق الحويني
علشان يفضل الكلم ده لسا محفوظ


اذن
" قل كل يعمل على شاكلته فربكم أعلم بمن هو أهدى سبيلا "

وقرارك ده يا دكتور عماد ولو انه زعلني
إلا إني أحترمه جدا

وأنا شايف ان مش بس الكل بقى بيتكلم
لا وبقى يعيب على غيره انه بيتكلم بعلم

إنا لله وإنا اليه راجعون

[Dr.Medicine]

و عليكم السلام و رحمة الله و بركاته

اكيد قرار حضرتك ده هيزعلنا كلنا ...بس انا ما اقدرش الومك عليه ..لاني انا شخصيا كنت بفكر اعمل كده بقالي فترة و علشان ادماني للنت قررت اني هقلل دخولي بالتدريج الا ان يتلاشي

.....

اتمني اكون عند حسن ظن حضرتك ....
اللهم استخدمنا و لا تستبدلنا

.........

بما ان حضرتك هتنسحب و يا مين عالم حضرتك هتقرأ ردي ده و لا لا ..بس هقوله

د/ عماد من الشخصيات اللي كنت لما بقرأ ردها ببقي واثقة في الكلام اللي بقرؤه و بحترم وجهة نظره جدا
اعتقد ان د/ عماد في بداية مشاركته زماااااان في المنتدي ...غير د/ عماد لما رجع تاني في الفترة اللي كنت انا اشتركت في المنتدي ...غير د/ عماد اللي هو (مش مهم مين )
اعتقد ان التغير ده للاحسن و الاحسن

طلب هطلبه من حضرتك :

يمكن حالنا دلوقتي كمسلمين بقي حال مؤسف و مغزي
من خلال مشاركاتك في المنتدي و وجهات نظرك ..حاسة ان حضرتك ممكن تبقي مسلم بجد ...مسلم قوي
زي اللي كلنا بنحلم ان المسلمين كلهم يبقوا زيهم
مسلم دكتور
يا ريت حضرتك تحاول تكون متدين و مثقف و دكتور ناجح مثال للمسلمين قدام الغرب ...يعني مسلم بجد

اعتقد ان لو في مسلم بنفس الصفات دي هيصلح اللي حوليه و هيأثر عليهم و يغيرهم للاحسن

فرجاء يا دكتور تحاول تحقق المعادلة دي ...حاول تكون مسلم قوي
حاول تحبب الناس في الدين ...لان للاسف في ناس كتير اوي بقوا تايهين

و اعتقد ان حضرتك عندك اغلب مقومات المسلم القوي ....

..........

ربنا يعينك و يوفقك يا فندم

[مدنجي]

مش حاجة تبسط خالص الانسحاب دا
بالرغم ان الواحد لا بد ان يحترمه
اتمنى انه ميطولش و ترجع لنا تانى
كلنا فكرنا فى الانسحاب او الابتعاد لفترة على الاقل
يمكن عشان بنيجى فى لحظة و نيأس من الجدال و نقتنع ان العمل هو الحل
لكن تمر الايام و بنرجع هنا تانى

و انا قولت قبل كدا و هقولها تانى
انى استفدت و بستفيد و هستفيد جدا من الشخصيات اللى زيك يا دكتور عماد

و الاستفادة مش من مجرد الاختلاف فى وجهات النظر
لأ انت شخصية مثقفة محدش يقدر ينكر دا و لها وجهة نظر برده محدش يقدر ينكر دا
و الاستفادة من المعلومات و من وجهات النظر دى اكبر من مجرد الاختلاف اللى بيبرز المعنى و يوضحه
دا غير دفعك ليا للبحث و التفكير فى حاجات كتير كان ممكن مدنجى يبقى مشغول عنها
و توليدك لرغبه فى نفس مدنجى للتعمق اكتر فى علوم الدين
و دى حاجة اعتقد انها تكفى كفايدة ليك من مشاركتك معانا هنا و ربنا يجازيك عنها كل خير

و كنت دعوتك دعوة و انا عارف ان تنفيذها صعب
اصحاب وجهات النظر و الرسالات محتاجين لأسلوب ذكى جدا و صعب جدا عشان يقنعو بقية الناس بكلامهم
و دا واجب عليهم مش مجرد انهم عندهم العلم دا يكفى لأ
لابد ان يجاهدو فى نشره
عشان تعم الفائدة و ربنا يكرمهم بعلمهم و يجازيهم عنه خير
فمتيأسش من الناس و من المعارضة و الاختلاف
ممكن تبعد شوية تستريح و تفكر و تتامل بس اوعى تهرب
طالما انت راجل صاحب فكر لازم تحارب علشانه

بالرغم من اى حاجة
انا متاكد انك لو تعرفت عليا كشخص حقيقى فى الحياة الحقيقية كنا هنبقا اصدقاء جدا بالرغم من الاختلافات فى وجهات النظر
دا مش اطراء و لا مجاملة و لا كلام فض مجالس
دى حاجة مدنجى متأكد منها و الى يعرف مدنجى كويس هيبقى متاكد من كدا
و اتمنى بأختلافى معاك اكون عرفت اكسبك قدرات و مهارات احسن على الاقناع و توصيل رسالتك و خبرات للتعامل مع مختلف العقليات من البشر
بمعنى انى اتمنى اكون افدتك زى ما انت كنت مفيد بالنسبة لمدنجى

و اسمحلى مرة تانية اعبر عن حزنى للقرار دا
لأنك بالفعل غيرت و بتغير و هتغير حاجات فى مدنجى و فى ناس هنا تانية كتير
و لك وجهة نظر و فكر مختلف -مع مدنجى على الاقل- كنت احب دايما اضطلع عليه لأن مدنجى يحب يشوف و يعرف كافة وجهات النظر و يفكر فيها و يحاول يقتنع باللى فيها - الى حد ما :)) -


اتمنى ليك و لينا و لكل الاعضاء التوفيق و الهداية
و مستنى النسخة الجديدة منك على المنتدى و مش مهم هتبقى مين :))






دى..

[arownas]

السلام عليكم

مش عارف ارد اقول ايه
بس انا شبه متأكد انك هاتقرا الردود دي حتى لو انت مش مسجل الدخول
يمكن لان المجرم دايما يرجع لمكان جريمته :)
ايا كان سبب قرارك الا انه هايزعلنا
بجد و الله لما الواحد كان بيعرف انك مشارك بفاعلية كان بيبقى مطمن جدا و متأكد ان الراي اللي عاوز اقوله اكيد اكيد هاتقول احسن منه
انا مش عاوز "اقطع عنقك" بس دي الحقيقة
و ايا كان تقديرك لمدى نجاحك في اهدافك في المنتدى الا انك كنت عضو مفيد بمعنى الكلمة و انا عن نفسي استفدت منك
يمكن انا مكنتش متابعك ك "مش مهم مين" لاني مكنتش متابع المنتدى اصلا
لكن اشهد اني راجعت شوية افكار من خلال المناقشة معاك في موضوع "كيف تكون سلفيا" و اقتنعت بيها و ده كان اول احتكاك بيني و بينك على ما أظن
انا حتى مسحت مشاركاتي اللي غيرت فيها رايي بعد كده
على العموم رجاء لو ده قرار نهائي انك تسيب حلقة وصل بينا و بينك على الاقل فيس بوك علشان خاطر الناس اللي بيحبوك و ملهمش علاقة بيك غير من النت
اما بقى المنياوية اللي مزعلينك فقولي عليهم بس و انا املصلك ودانهم . ربنا يسامحهم فضحينا في كل حتة
و ان شاء الله نتقابل في الحقيقة على خير
اني احبك في الله

[kalamntena]

shocked , sad & disappointed
i have no comment

[dr_0nline]

مفاجاة من العيار الثقيل بالنسبالي
بس مفاجاة حلوة صراحة
بس اللي مش حلو فيها
الموضوع بتاه العزلة ده
*
وشهادة حق يا دكتور
نحسبك على خير والله حسيبك ولا نزكي على الله احدا
وربنا يعينك ويوفقك

[ekm86]

رغم إني ما اتفاجئتش من معرفة الشخصية لأني كنت متوقعها
خصوصا إنك دكتور.. مصري.. في السعودية.. بنفس التفكير.. ومن أول يوم بتتكلم مع الأعضاء كأنك عارفهم
(ولو إني في الأول لمدة كام يوم كده كنت حاطط احتمال إنك مش دكتور عماد)

لكن اتفاجئت من قرار اعتزال النت ده
أو ممكن تقول مستغربه..
لكن ربنا يوفقك للخير إن شاء الله

يا رب أكون استحق الكلام اللي انت قلته ده
لكن يمكن اللي خلاك تحس إني "متصالح مع نفسي" إني باحاول أكون متقبل الآخر أيا كان تفكيره ما دام التفكير له فلسفة معينة أو تفسير معين "ويكون تفسير محترم طبعا.. مش أي حاجة"
عشان كده بيبقى نفسي الناس كلها تتقبل تفكير بعض (برضه ما دام له فلسفة محترمة أو أسباب محترمة حتى ولو ما تقبلوهاش)

اتمنى قرار الاعتزال ده ما يكونش بسبب النقاشات الأخيرة على المنتدى (ولو إني حاسس إنها أكيد جزء من الأسباب على الأقل)
واتمنى نشوفك في المنتدى تاني من وقت للتاني

[dr / MIM]

انا آخر من يعلم

____________

طبعا زى ما قال الاحوة هنا حزين على فقدان عقلية و شخصية زى حضرتك ..

لكن انا نفسى فكرت اعمل زيك كدة و اعتزل النت


و الاسباب تتلخص فى جملة واحدة


______________________________________________

و الله ليس كرها فى الناس

او حتى مضايقة

او غضب

او اى شىء

____________________________

الفكرة يا جماعة زى ما انا فهمتها و انا شخصيا حسيت بها هى

(( صعوبة الحياة فى عالم افتراضى ))

اجد عسر كثير فى تقبل المعطيات و التفكير كشخصية افتراضية تعيش فى عالم افتراضى

(( و يؤدى فى كثير جداااااااااااااا من الاحيان الى صعوبة التعامل او التأثير الضار على العالم الحقيقى كما خلقه الله ))

و مثال على ذلك

لو قارنا الانسان فى العصور القديمة و الحياة ابسط

الهواء انقى

الاعتماد على القوة العضلية او على البساطة و عدم التعقيد فى الاشياء و الخبرات

و بين الحياة فى العالم اللى فيه مليون وش و مليون قناع و مليون تفسير لشىء بسيط جدا و كل مسئلة معقدة ..

تخيل كدة المقارنة دى هتعرف الفرق بين العالم الافتراضى الالكترونى و بين الحياة كما نحياها

___________________________________

مثال آخر هو الفرق بين الحياة فى الارياف او الاماكن غير المدنية و بين حياة المدينة ..

_____________________________________

على العموم ده تفكيرى او فلسفتى للامور و لا احمل احد على الاعتقاد بأعتقادى .. كل منا له آرائه

لكن انا قاعد معاكم شوية كمان لسة مأخدتش القرار ده

او ممكن القرار يكون بتقليل النت ((( الاجتماعى ))) تقليل شديد

مع زيادة الانشطة الاجتماعية الحقيقية ..

و الله ليس عن كره منى بالناس هنا لانكم شخصيات رائعة فعلا

و لكن فيه مرض اسمه النت و الانسحاب الى عالم كل شىء فيه
بضغطة زر

و ده مش طبيعى طبعااااااااااااااااااااااااااااا
ده غير انى انا فعلا من الناس اللى مبيعرفش يتكلم اصلا عبر النت او صوتى و افكارى مبيوصلوش كويس كما اريد عن طريق النت


_____________________________________________
_____________________________________________

اما بقى حكاية مصطفى محمود فربنا يخليك يا دكتور

تخيل انى مكنتش حاطط فى بالى خالص مصطفى محمود

طبعا كنت بتفرج على العلم و الايمان ايام ما كانت بتيجى فى التليفزيون لكن مكانش مصطفى محمود من كتابى المفضلين او كتاب الصف الاول كما اسميهم ..

و لكن احسبه على خير و لا اذكى على الله احدا

و ارجوا من الله ان يوفقك و يرعاك و ابقى اسأل علينا كل شهر مرة كدة

ارمى السلام بس ..

:)))))))))

[Dr.Medicine]

د/ مصطفي انك كده هتغليني ااكد نظريتي

بما ان في ناس كتير بتفكر في الانسحاب و في ناس بالفعل بدأت تنعزل و تنسحب...فالمنتدي مهدد بالانقراض ..

هيجي فترة و المنتدي ده هيتنسي ..


يااااااا رب ما يجي اليوم ده ابدا ..

[فارس الوهم]

طالما فيه ناس بتفكر زيك و زي مصطفى و زي دكتور عماد
بيجمع في سله واحده منتدانا مع المنتديات الاخرى و الفيس بوك
يبقى اكيد المنتدى هنا حينقرض بعد فتره
او حيتحول الى منتدى من المنتديات التانيه بتاعه مشكوووووووووووووووور

ما زلت ارى ان العلم و الثقافه امانه في اعناقنا و شعله يجب ان نمررها للاجيال الجديده وكل حسب طاقته و معرفته
والا حتكون ايه لازمه الكتب الكتييييييييير اللي قريناها اذا لم نشجع الشباب على قرائتها و تركناهم لعالم السطحيه
انا من رائي ان حتى الخلافات ما بينا بتفيد ناس كتير جدا لانها بتفتح لهم مجال التفكير و بتخليهم يدوروا و يكةن ليهم ارائهم الخاصه

زعلت جدا عشان قرارك يا دكتور عماد
وربنا يعلم انك من اكتر الشخصيات هنا اللي انا بحترمها
وبستفاد منها رغم كثره جدالنا
بس انا طول عمري زي ما حضرتك بتقول عنيده ولا اقبل تغيير وجهه نظري بدون الاقتناع بوجهه النظر الاخرى ومناقشه جميع جوانبها

اتصدمت جدا ان مش مهم مين طلع هو دكتور عماد
يمكن عشان الاسلوب في المناقشه اختلف كتير جدا جدا و خلاني لاخر لحظه وفي كل نقاشاتي مع الاعضاء التانيين مش مقتنعه ان مش مهم مين هو نفسه دكتور عماد
فرق كبير بين دكتور عماد اللي بيناقش عشان يعلمني و ينورلي حاجات انا مكونتش شايفاها في سعه نفسيه حقيقيه وبين مش مهم مين العدواني و المتشبث باراءه الى درجه القتل
ويمكن انا من الناس اللي اكيد كان حيفرق معايا اني اعرف ان حضرتك هو دكتور عماد من اول مشاركه

و معتقدشي ان حد هنا بيفصل بين المثقف والمتدين بالعكس هو قدوه لينا و هدف نسعى جميعا للوصول اليه
ويمكن دا وجه الاختلاف بينا و بين المنتديات التانيه
وعلى فكره برضه الحكومه بتاعتنا زي ما هي بتحارب المتدين ومش عايزاه هي برضه مش عايزه المثقف الحقيقي
بدليل نشرها لثقافه السطحيه و بقى واحد زي ماركيز بيتنشر معرفته بين الناس لمجرد ان ياتي ذكره في فيلم سينيمائي

وفي النهايه اتمنى ان حضرتك تراجع قرارك دا
و تكون ديه فتره ابتعاد صحيه و ترجع هنا تاني بس كدكتور عماد وليس مش مهم مين

[Nettawy]

بالتوفيق د عماد
ربنا ييسرلك الخير أينما كان