المساعد الشخصي الرقمي

مشاهدة النسخة كاملة : هو القصر يروحوله منين؟



winner
16-02-2010, 05:48 AM
لو الواحد فكر مثلا مثلا يعني إنه يروح عندكوا القصر العيني يروح ازاي؟

اركب تاكسي من قدام البيت و اقوله "القصر العيني يا اوسطى عبده لو سمحت!؟"

انا ماعرفش لما اركب السوبرجت من الاسماعيلية انزل منه فين في القاهرة؟

و بعد ما انزل اخد تاكسي عادي كدة يعني و اقوله "القصر العيني يا أوسطى محمد لو سمحت!؟"

طب بتكونوا موجودين فين؟؟ و امتى؟؟

طب هتعزموني على الغدا و لا أجيب أكلي معايا!؟

طب حد هيعبرني و لا هلاقي القصر العيني فاضي على حظي!؟

طب مش عاوزين أجيبلكوا حاجة معايا و انا جاي!؟


أفيدونا

Nettawy
16-02-2010, 07:02 AM
كنت عارف انك هتزورني في يوم من الأيام :))

بلاش فكرة التاكسي دي عشان هتتقطم فيها نصين _ ده مبدئياً

على حسب لو اتوبيسات الاسماعيليه بتروح عبود ( الموقف يعني)
هتركب عربيه تعبانه كده بنص جنيه (الترامكو) أزرق في أبيض
ودي هتاخدك على المظلات (خط شبرا و الجيزه) ..

من هناك هتركب المترو .. طبعا المترو فيه خطين بيتقاطعوا مع بعض في محطتين
اللي هما السادات باشا ومبارك باشا :)

لما تركب من المظلات --- أول ماتوصل للسادات أو مبارك هتغير الخط
لخط حلوان وتنزل في محطة السيده زينب ..

ومنها تقدر تاخدها مشي لمده 5 دقايق للكليه
أو تركب ميكروباص أزرق في أبيض غالبا تويوتا هينزلك قدام باب كليه اسنان
اللي في نفس الحرم مع طب بشري..

وطبعا اتبع قاعدة "اللي يسأل مايتوهش " ومع أهل القاهره بالذات مع احترامي الشديد ليهم
إسأل أكتر من واحد
لأن في ناس كتيربتحب تفتي ولا انها تطلع مش عارفه -إلا من رحم ربي- :)

********
أما بقى لو السوبرجيت بتاعكوا بيروح على التحرير (السادات) أو رمسيس (مبارك)
فغالبا تاخد من هناك تاكسي أحسن وتدفع رينج 5 جنيهات ...

========
موجودين فين وإمتى دي محتاجه تنسيق بين الناس

عزومات مممممممممم وماله مايضرش تعالى خفيف خفيف ..

مأوعدكش في دي على حسب الناس وظروفها ..

قفص المانجه يابرنس :))))))))))))))
اوعى تنساه ..
وليك عليا أشجع الإسماعيلي من هنا وراجع

winner
16-02-2010, 07:49 AM
أنا كدة تهت من قبل ما اجي

dr / MIM
16-02-2010, 10:43 AM
اخيراااااااااااااااااااااااااااا

__________

زى ما قال نتاوى

و انا معاكم ان شاء الله
:)

over_dose
16-02-2010, 07:06 PM
حضرتك تنزل في أي مكان يا باشا وانا اجي لك اجيبك بنفسي وسيبك من كل التعليمات دي

يا سلام احنا عندنا كام وينر؟

انا بعرض بجد على فكرة

dr_0nline
17-02-2010, 08:36 AM
تنور القصر ياباشا والله
*\
زي ما قال نتاوي دا لو الاتوبيس هايوديك عبود
بس انا لا اعتقد ان فيه اسماعيليه في عبود
*
انا اللي اعرفع ان مواصلات بورسعيد بتنزل في المرج
فممكن يكون معاها الاسماعيلية
ومن المرج تاخد المترو مباشرة الى السيدة زينب
او تنزل في مدينة نصر في هناك محطات لشرق الدلتا
اكيد فيها شرقية سويس اسماعليه
او في موقف بقى العبور
وسواء من هنا او هنا اركب رمسيس هتلاقيها في كل حتة
ومن رمسيس الف مين يدلك مترو او اتوبيس او ميكروباص او مشي
*
ااااااااايه دا كله
انا توهتك خالص
تعالى انت بس وماتخافش لو تهت يبقى التاكس وامرك لله

ekm86
23-02-2010, 07:40 PM
إنت جيت ولا لسة؟
معلش كان عندي ظروف وما كنتش بادخل المنتدى

winner
23-02-2010, 09:02 PM
لا لسة ماجتش.
بحوّش فلوس المواصلات الأول :)

أنا عندي امتحانات دلوقتي، لما أخلص يبقى ربنا يسهل.

ekm86
23-02-2010, 09:21 PM
لا لسة ماجتش.
بحوّش فلوس المواصلات الأول :)

أنا عندي امتحانات دلوقتي، لما أخلص يبقى ربنا يسهل.
ربنا معاك.. فات الكتير ما بقى إلا القليل..

فارس الوهم
24-02-2010, 12:30 AM
على فكره لو حتجيب مانجه معاك انا ممكن اجي اوصلك لغايه القصر بنفسي :))))))))))))

winner
24-02-2010, 12:35 AM
..
يا جدعان المانجة فاكهة صيفي.
هل احنا في الصيف؟؟!

المانجة السنة اللي فاتت كان انتاجها سئ جداً
جابت كام كيلو بس
مع ان السنة اللي قبلها كانت مهيصة الدنيا
كلنا ييجي طن مانجة

و بعدين كل اللي هاممكم المانجة
يعني ابعتها وماجيش انا :)

فارس الوهم
24-02-2010, 01:05 AM
لا استنى و تعالى في الصيف
حتى اكون انا عرفت القصر بيرحوله ازاي
من غير ما كلمنتينا توديني :))))))))))))

kalamntena
24-02-2010, 08:54 PM
انتى اخ يانى منك انتى

dr / MIM
25-02-2010, 06:34 PM
خلاص ابعتها الاول ..

ضمان يعنى
:)

winner
25-02-2010, 08:45 PM
..
لا يا جدعان انا مش جاي خلاص.
دا انتوا عاوزسن تستغلوني بقى!
و انا اللي قولت هلاقي الغدا و العشاء و البيات و المواصلات على حسابهم. و هيعملولي رحلة حول العالم في طيران درجة اولى. و يدوني هدية تذكارية و انا مروّح تليفزيون 28 بوصة.
فين كرم أهل القاهرة؟؟!!

مصري متعصب
26-02-2010, 08:53 PM
..
لا يا جدعان انا مش جاي خلاص.
دا انتوا عاوزسن تستغلوني بقى!
و انا اللي قولت هلاقي الغدا و العشاء و البيات و المواصلات على حسابهم. و هيعملولي رحلة حول العالم في طيران درجة اولى. و يدوني هدية تذكارية و انا مروّح تليفزيون 28 بوصة.
فين كرم أهل القاهرة؟؟!!



والله يا وينر
السابقين اللي جم القصر قبلك اخد كل واحد فيهم مصاصة وشمعدان

ekm86
26-02-2010, 09:46 PM
يا عم كويس.. حد لاقي
:))

فارس الوهم
27-02-2010, 03:09 PM
انتى اخ يانى منك انتى

يا بنتي دا بيقولك مانجه اسماعيلاوي مش اي حاجه يعني :)))



..
لا يا جدعان انا مش جاي خلاص.
دا انتوا عاوزسن تستغلوني بقى!
و انا اللي قولت هلاقي الغدا و العشاء و البيات و المواصلات على حسابهم. و هيعملولي رحلة حول العالم في طيران درجة اولى. و يدوني هدية تذكارية و انا مروّح تليفزيون 28 بوصة.
فين كرم أهل القاهرة؟؟!!




ايه دا
اول مره اسمع عن كرم اهل القاهره دا
جديده :))))

ekm86
27-02-2010, 04:32 PM
ايه دا
اول مره اسمع عن كرم اهل القاهره دا
جديده :))))
لا لا لا.. كده بقى هنخبط في الحلل

:)

Dr.Medicine
27-02-2010, 07:13 PM
Never mind ya Esalam

you are from Helwan

....

arownas
27-02-2010, 11:16 PM
تنور القصر و اهله يا وينر و لو لقيت القصر قافل فردة كعب في القطر لحد المنيا و احنا نقوم باللازم
بس هيه حكاية المانجة
انا بقالي يجي سنة و نص في الاسماعيلية و محدش عزم عليا بمنجاية يتيمة
يرضيك كده 78onion onion5

Nettawy
28-02-2010, 02:51 AM
byrmo el manga 3al ahlawya bs ya Arow =))
Kiddin

winner
03-03-2010, 07:51 PM
أنا لو فكرت اجي يوم الحد الجاي هلاقي حد في القصر؟
و لا على حظي هلاقي القصر قافل اليوم ده!

مبدأياً أنا جاي القصر يوم الحد الجاي
الصبح على الساعة 9 او 10 على حسب المواصلات بقى
لو جدت ظروف هبقى اشوف معاد تاني
لو حد موجود بقى يوم الحد ياريت يقولي عشان اشوف هروح فين و هقابل مين و الكلام ده
مش عاوز تضييع وقت عشان انتوا عارفين ان وقتي سمين!
و عندي مشوار مهم الساعة 12 عند الأزهر فهخلع بدري
يعني مسموح لكم بنص ساعة مثلاً لمقابلتي
و يا تلحقوا يا ماتلحقوش :))

ekm86
03-03-2010, 08:57 PM
أنا لو فكرت اجي يوم الحد الجاي هلاقي حد في القصر؟
و لا على حظي هلاقي القصر قافل اليوم ده!

مبدأياً أنا جاي القصر يوم الحد الجاي
الصبح على الساعة 9 او 10 على حسب المواصلات بقى
لو جدت ظروف هبقى اشوف معاد تاني
لو حد موجود بقى يوم الحد ياريت يقولي عشان اشوف هروح فين و هقابل مين و الكلام ده
مش عاوز تضييع وقت عشان انتوا عارفين ان وقتي سمين!
و عندي مشوار مهم الساعة 12 عند الأزهر فهخلع بدري
يعني مسموح لكم بنص ساعة مثلاً لمقابلتي
و يا تلحقوا يا ماتلحقوش :))

أنا باروح يوم الحد على الساعة عشرة أو على الساعة اتنين
:)

فلازم تأكد إنك جاي ولا لأ.. عشان أضمن إني أكون موجود

winner
04-03-2010, 04:09 PM
..
لو نزلت من الأتوبيس في رمسيس (مع إني معرفش دي تطلع فين) هل ممكن اخد تاكسي لحد القصر و لا فيه حدود جغرافية للتاكسيات؟
أصل عن تجربة شخصية، السواقين في القاهرة مابيرضوش يروحوا الحتت البعيدة، يمكن بيخافوا :)

و هل رمسيس أقرب و لا فيه محطة تانية ممكن تكون أقرب؟

ياريت لو حد فيكم يعرف حاجة عن القاهرة يوضحلي الأمور شوية، أنا غريب يا جدعان.

ذو عين واحدة
04-03-2010, 04:26 PM
بص يا كبير

ذو عين واحدة
04-03-2010, 04:33 PM
لسا ما بصيتش ؟؟؟؟؟؟؟؟؟؟

ماشي مش إشكال

بص بقى

أنت ياباشا حتنزل رمسيس

أمامك الاختيارت التاليه

إما أن تركب تاكسي وتنزل زي ما قولت قدام باب القصر العيني
وما تخافش المسافة مش بعيدة والتاكسيات بتروح عادي

أو
تسأل عن موقف ( أحمد حلمي ) اللي هو ورا محطة مصر

وتركب من هناك
الميكروباص
اللي رايح حلوان
وده أخر عهدي بيه كان ب 2 جنيه وتقوله هنزل عند القصر العيني
بردوا حتنزل قدام الكوبري الصغنن اللي طوله حوالي 20 متر في وش البوابة الرئيسية للقصر العيني

تمام كده واللا نبعتلك حد يجيبك ونخلص نفسنا

kalamntena
04-03-2010, 04:41 PM
ايه يا شباب اللى انتو بتعملوه ده؟

الفاضي فيكو طبعا يروح يستنى وينر ولو الوقت مش مناسب تظبطوا مع بعض يا اما وينر ييجي بدري شوية يا اما حد يفضي نفسه

ذو عين واحدة
04-03-2010, 04:50 PM
انتي بتحرجينا ليه بس يا دكتورة

وينر كبر ولازم يعتمد على نفسه شوية

:)

kalamntena
04-03-2010, 04:53 PM
:))))))))))))))))))))))

ماهو كل ما الواحد ما قيمته ما تكبر كل اما يستقبله ناس كتير

ذو عين واحدة
04-03-2010, 04:59 PM
دا انتي بقى عايزة توقعي بينا وبين الراجل

وينر وينر
إنت لسا ما بصيتش
باصص على ايه ياوينر ؟ !!
:)

المهم
يا باشا لوعايزنا نجتمع ونجيلك
نيجي ياباشا

arownas
04-03-2010, 07:14 PM
توهتوا الراجل حرام عليكم
بص يا وينر
السوبر جيت من الاسماعيلية هاينزلك رمسيس قدام محطة القطر ((هتلاقي ناس نازلة كتير انزل معاهم او اسال لان الاتوبيس عادة بيكمل بعد كده للترجمان)
او ما تنزل بص يمين و شمال قدامك هتلاقي علامة مترو الانفاق او اسال يا سيدي على المترو فين هتلاقي كذا منزل للمترو في رمسيس
اقطع تذكرة مترو (ماتزوغش لان الامن في مترو رمسيس مصحصح قوي :)) )
و اركب اتجاة حلواااااان
خلي بالك اتجاه حلوان لان في رمسيس اربع اتجاهات
محطة مترو رمسيس اسمها مبارك يبقى ايه انت هاتركب من مبارك هتركب 4 محطات بالعدد و تنزل الخامسة
مبارك - أحمد عرابي- جمال عبدالناصر- السادات (اللي هي التحرير- سعد زغلول و تنزل السيدة زينب
هاتخرج من محطة المترو هتلاقي مستشفى ابو الريش في وشك خليها على شمالك و امشي علطول هتلاقي شارع القصر العيني متقاطع مع الشارع اللي انت ماشي فيه عدي الشارع و بص يمين و شمال و انت بتعدي و هتلاقي القصر الفرنساوي في وشك خليه على شمالك برده و كمل مشي لحد ما تلاقي شارع الكورنيش عدي الشارع و برده تبص يمين و شمال هتلاقي نفسك على كوبري صغنطوط على الترعة عديه هتلاقي باب القصر في وشك
المشي ده كله مايجيش 10 دقايق او 8 دقايق بس
----------------------------------------------------------------------------------
لو ركبت بيجو من الاسماعيلية هاينزلك المرج الجديدة
هتلاقي المترو في وشك اركب المترو لحد محطة السيدة زينب
------------------------------------------------------------------------------------
لو ركبت القطر هاينزلك رمسيس و خد المترو زي ماقلتك الاول
--------------------------------------------------------------------------------
مانصحكش خالص خالص بالتاكسيات استبعدها تماما من حساباتك لانك هايبان عليك انك غريب
و هايتوصوا بيك و الحكاية مش مستاهل تاكسي خالص

arownas
05-03-2010, 03:01 AM
ماهو ده اللي انا بقولك عليه
السادات محطة مشتركة بين الخطين
اركب المترو من رمسيس خط حلوان هايوصلك للسادات (التحرير) بس ماتنزلش
كمل للمحطة اللي بعد اللي بعدها اللي هي السيدة زينب

dr / MIM
05-03-2010, 03:29 PM
يعنى عايز تتوه

و متضيعش وقت

ايه الغالاسة دى ...؟!!!!!!!!!!!!!!

:))))))))))))))))))))))


________________________


حد يكلمنى بقى اما وينر باشا يشرف علشان نكون فى استقباله
:)