بقالي كتير اوي مدخلتش علي المنتدي سنة سنتين يمكن 3
كنت كل فترة كده بدخل الاقي المشاركات قليلة والمواضيع مش جذابة
وأعترف محاولتش اعمل مشاركات او مواضيع جديدة
لغاية لما سمعت موضوع وفاة سامح مسعد الله يرحمه
شفت الخبر و فضلت حوالي ربع ساعة مش مستوعب
مش متخيل ان سامح او ابو المعاطي صاحب الصورة الشهيرة سابنا
كنت افتكر هزاره وكلامه عن الاكل ومشاكساته معانا
سبحان من له الدوام
حسيت بتقصير شديد اوي في حقه
لو كنا لسه بندخل علي المنتدي كنا اكيد عرفنا

كتير مننا بقي بيقضي معظم وقته علي النت علي الفيس بوك
ونسينا المنتدي
يمكن الفيس بوك جذاب اكتر وبنعرف عليه اخبار كتيرة وعليه كل اصحابنا سواء اللي في الدراسة او الشغل
بس يفضل المنتدي برضه المكان اللي الواحد اتعرف فيه علي ناس اثروا فيه وساهموا في تشكيل اراء ناس كتير مننا
ناس ملهمش اي مصلحة غير ان احنا حبينا بعض في الله من غير اي رياء او مصلحة
حصل خلافات كتيرة بين الناس وشد وجذب بس العفو من شيم الكرام
اتمني نرجع تاني