صفحة 1 من 4 1 2 3 4 الأخيرةالأخيرة
النتائج 1 إلى 20 من 64

الموضوع: و أخيراً البداية استقالة

  1. #1
    تاريخ التسجيل
    Nov 2002
    الدولة
    قاهرة المعز
    المشاركات
    1,066
    مقالات المدونة
    3
    معدل تقييم المستوى
    16

    افتراضي و أخيراً البداية استقالة

    و اخيراً الحمد لله ... استقلت من وزارة الصحة
    لأبدأ الطريق


    الخطوات:
    1. صلاة الاستخارة
    2. طلب إلغاء تكليف في الإدارة العامة للتكليف بالوزارة
    3. تروح مرة في خلال أسبوع علشان تتأكد إن جوابك ماتركنش
    4. الدور الخامس في المبنى الطويل ... هوا كده ... الطويل .. اللي بتدخل من بابه الوزارة ...بعد أسبوع من الطلب تروح تستلم قرار الإلغاء من مدام سهير و جواب تعمل بيه إخلاء طرف من المديرية و تختمهم من عند أستاذ مجدي .... هاتقوللك تاني مكتب يمين ... ماتنخدعش ... أستاذ مجدي في المكتب الي في وشها
    5. الموافقه على إخلاء الطرف من مدير الشئون الوقائية بالمديرية و مدير المديرية
    6. لو وراك حاجه في الشئون القانونية روح خلصها
    7. جواب إخلاء طرف من الإدارة للوحدة
    8. إخلاء طرف من الوحدة
    9. إخلاء طرف من الإدارة
    10. إخلاء طرف من المديرية
    11. تاخد استمارة 7 لسنة 72 من المديرية و إخلاء الطرف إلى الوزارة
    12. سيب بطاقتك مع مدام سهير علشان هاتديلك الطلبات و أصل قرار إلغاء التكليف
    13. تصور 5 طلبات ل5 شهادات طبيب حر + طلب إنك عاوز الشهادات دي
    14. تشتري بـ 10 جنيه دمغه
    15. تستلم 5 شهادات و قرار إلغاء تكليفك المختوم صورة طبق الأصل
    16. تنزل الدور الرابع تسلم الطلبات في مكتب الشهادات ممكن تجيلهم بعد ساعتين و تقوللهم يغيروا طلب النقابه بـ لمن يهمه الأمر
    17. تاخد قرار إلغاء التكليف للنقابه أو الشهاده المقدمة لها و تنزل السجلات في بدروم النقابه ... ماتخافش ... البدروم مكيف...
    18. تاخد إذن دفع من إدارة السجلات
    19. تروح مكتب 8 يطلع بياناتك من الكمبيوتر
    20. تروح مكتب 7 تدفع حداشر جنيه خمسه و سبعين قرش
    21. تروح مكتب سته بالإيصال و القرار يعمللك شهادة إلغاء التكليف
    22. تمضيها من مكتب السجلات
    23. تمضيها و تختمها من مكتب 9
    24. ماتنساش تعمل صورة طبق الأصل ... ممكن تبقى تحتاجها
    25. مبروك بقيت من الأحرار يابو علي
    أشحطوط بالورى .... جاب الليالي السود .... فتبهدلا

  2. #2
    تاريخ التسجيل
    Jul 2007
    الدولة
    كوكب المدينة الجامعية
    المشاركات
    1,861
    معدل تقييم المستوى
    11

    افتراضي

    هههههههههههههههههههههههههههههههههههههه
    هههههههههههههههههههههههههههههههههههههههههههههههههه
    هههههههههههههههههههههههههههههههههههههههههههههههههه هههههههههه
    لا حول ولا قوة الا بالله
    انا لله وانا اليه راجعون
    الطف بعبيدك يارب
    كل ده عشان استقيل
    دا اجبار على التكليف بحداقة
    لا حول ولا قوة الا بالله
    *
    بس الف الف الف الف الف مبروك لو كنت استقلت فعلا
    بس بالشكل ده اشك مليون في الميه
    مستني تعقيبك
    دا حصل فعلا يا فيرون؟؟؟؟؟؟
    HAMED

  3. #3
    تاريخ التسجيل
    Aug 2005
    الدولة
    القاهرة
    المشاركات
    686
    معدل تقييم المستوى
    10

    افتراضي

    زمانك كنت حضرت الماجستير
    علي العموم مبروك يا دكتور
    اكيد الخطوة دي انت فكرت فيها كويس جدا
    السؤال البديهي ماذا بعد؟؟؟

  4. #4
    تاريخ التسجيل
    Jun 2007
    الدولة
    مصر
    المشاركات
    268
    معدل تقييم المستوى
    10

    افتراضي

    مبروك يا د.فيرون بس خطوة جريئة منك بالتوفيق ان شاء الله انا فكرت فيها من فترة لما عرفت ان النيابات الاستثنائيه اتلغت بس الصراحه ملقيتش عندى الشجاعة الكافيه
    طالما استخرت ربنا يبقي اكيد ده الاختيار الصحيح ان شاء الله
    ربنا يوفقك

  5. #5
    تاريخ التسجيل
    Sep 2006
    الدولة
    استروس الزنجبيل
    المشاركات
    1,409
    معدل تقييم المستوى
    12

    افتراضي

    اية الاسباب و اية هو الطريق ؟

  6. #6
    تاريخ التسجيل
    Oct 2006
    الدولة
    الادارة الطبية _جامعة المنصورة
    المشاركات
    5,104
    معدل تقييم المستوى
    16

    افتراضي

    انا نويت ان شاء الله أشوف اى حاجة غير وزارة الصحة اى وزارة تانية
    يعنى لو العملة رست على وزارة الصحة مش هستلم واكمل فى شركات الادوية
    هل ده صح يا زوى الخبرة ولا تسرع؟؟؟؟؟؟؟؟؟؟؟؟؟؟؟؟؟؟؟؟؟؟؟

  7. #7
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,716
    معدل تقييم المستوى
    10

    افتراضي

    كفارة يا فيرون

    بس انا لفتت نظري حاجة
    1. تاخد استمارة 7 لسنة 72 من المديرية و إخلاء الطرف إلى الوزارة


هي مش كانت 6
ازاى الاولاد ؟

وانا كمان ;)
رد مع اقتباس رد مع اقتباس

  • #8

    افتراضي

    السلام عليكم و رحمة الله و بركاته

    مبروك عليك حريتك
    و الله الواحد بيفكر يعمل زيك كده بس مستني شويتين
    شوية لما اشوف هاعمل ايه في الجيش
    و شوية لما اجيب جاز على الاخر

    يبقوا كده شويتين صح و لا ايه
    فَلا تَرْجِعُوهُنَّ إِلَى الْكُفَّارِ
    http://www.kamiliashehata.com/

  • #9
    تاريخ التسجيل
    Nov 2002
    الدولة
    Egypt
    المشاركات
    4,261
    معدل تقييم المستوى
    10

    افتراضي

    أنا كنت مشيت فعلاً في الخطوات دي و أخدت موافقة دكتور سيد مدير ادارة التكليف و كنت مستني الجواب اللي هاروح بيه المديرية ..
    لكن رجعت في كلامي و أجلت موضوع الاستقالة دا لبعدين

    بس مش عارف ليه حاسس انه مسألة وقت
    ======================

    مبروك عليك حريتك فيرون
    بالتوفيق ان شاء الله
    أن توقد شمعة ... خير من أن تلعن الظلام ألف مرة


  • #10
    تاريخ التسجيل
    Jan 2007
    الدولة
    el warak-giza
    المشاركات
    215
    معدل تقييم المستوى
    10

    Question

    هو التعيين فى وزارة الصحة وحش اوى كدة

    امال احنا هنموت ع التكليف ليه؟؟؟؟

    واية افضل من وزارة الصحة؟
    المستشفيات الخاصة مثلا؟
    رب اغفر و ارحم وانت خير الراحمين

  • #11
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,716
    معدل تقييم المستوى
    10

    افتراضي

    زورونا تجدوا ما يسركم
    عالم ميزو
    هنعمل ايه
    ازاى الاولاد ؟

    وانا كمان ;)

  • #12
    تاريخ التسجيل
    Nov 2002
    الدولة
    قاهرة المعز
    المشاركات
    1,066
    مقالات المدونة
    3
    معدل تقييم المستوى
    16

    افتراضي Virtual Carrots

    نقطة: بتحب الجزر ... انطلق إلى اخر سطر مباشرة
    -------------------------------------------

    الموضوع كله مشاوير أربع أيام على مدار 10 أيام
    1 و 2 في يوم
    3و 4 بعدها بأسبوع
    من 5 لـ 10 في يوم تالت -لو لحقت طبعا-
    من 11 لـ 24 في يوم رابع
    ده طبعا لو خطوة رقم 1 موفقه يبقى الموضوع مش هاياخد منك أكتر من 10 أيام

    الفرص:
    في اليوم الـ 11 ممكن تقدم ماجستير ... لو لحقت ميعاده طبعاً ... من غير موافقة وزارة الصحة
    في اليوم الـ 12 ممكن تقدم طبيب زائر ... من غير موافقة وزارة الصحة
    بعد كده ممكن تسافر بره .... من غير موافقة وزارة الصحة
    هاتتعلم ... من غير موافقة وزارة الصحة
    مش هاتبقى تحت رحمة وزارة الصحة بقية حياتك
    هاتقوللي معاش و تأمينات ... دول انتى ممكن تعملهم لوحدك مع النقابة ... و إن شاء الله أول ما يجيلك عته أو أي مرض مزمن هتاخد معاشك و تأميناتك عادي ... ده لو خايف على المواضيع دي .. أو حد حاول يخوفك منها
    هيا الفكرة الواحد محتاج يتعلم كويس لحد ما ياخد الماجستير إن شاء الله و بعد كده أبواب العمل بإيد ربنا هاتبقى أحسن .. ممكن تفتح عياده أسرع ... ممكن تسافر بره ...
    اصبر بس السنتين ونص دول ... خللي نفسك أطول ... صبرت سبع سنين ... اصبر تلاته كمان ... علشان تبقى متخصص ... اضغط على اسنانك واصبر ..
    زائد في حياتي نقاط طريق أخرى معتمدة على الماجستير .. و مش عاوز أأخر النقاط دي علشان دي نقاط مشتركة بيني و بين إنسانة تانيه
    المشكلة في الوزارة انهم عاوزينك تبقى موظف ... و تتعلم اللي هما عاوزينك تتعلمه ... في الوقت اللي هما عاوزينه ... ولأني مش عاوز الجزرة بتاعتهم اللي عاوزين كل الدكاتره الجداد يريلو عليها ... الصراحة هما ابتكروا جزرتين افتراضيتين...
    Virtual Carrots
    الزمالة في تخصصات محدده و النيابة العاجله في نفس التخصصات
    يأتي الدور على الطرف الاخر ... عنده هدف و طريق ليه ... والا هايقبل دور الأرنب ...
    هاتقولولي و ماستقلتش من بدري ليه ... أو كنت ماستلمتش أصلاَ ..
    هاقوللكم أولا كنت محتاج وقت لجمع المعلومات ... زائد قرار الاستقالة كان محتاج يبقى أكتر صلابة و أنا برضه !!
    و في خضم الموضوع اكتشفت اني ممكن أسجل ماجستير بأجازة بدون مرتب لمدة سنة ...
    وان مش لازم تستنى ست شهور علشان تعمل إجازة ...
    و إن الإجازة من المديرية ... عاوزين يافقوا عليها يوافقوا .. مش عاوزين ... يبعتوك ست شهور ..
    و إنك ممكن تقدم نائب زائر من تاني يوم لإخلاء طرفك من القصر العيني بعد الامتياز ... و تستلم قبل النائب الأساسي
    و تحضر كنائب زائر بموافقة رئيس القسم بس لحد ماتخلص باقي موافقاتك ... موافقة رئيس القسم بتخلص في خلال ربع ساعه .. مجرد إبداء فروض الطاعة و الولاء لسيادته و تقديرك في التخصص يبقى مشجع
    معلومة ... تكلفة الاستقالة بدون مصاريف الانتقال 10 جنيه دمغه في الوزارة بمعدل جنيه على كل طلب و جنيه على كل شهاده و 11 و ربع جنيه في النقابة يبقى كلهم 21 وربع لو مافيش عليك حاجه في الشئون القانونية .. كنت غايب في أيام قبضت عنها مرتب
    Hint:
    للمرة المليون ... ماتفكرشي في الشغل قبل الماجستير ... يبقى كل الكلام اللي فات مالوش لازمة
    التعديل الأخير تم بواسطة فيرون ; 19-08-2007 الساعة 08:37 PM
    أشحطوط بالورى .... جاب الليالي السود .... فتبهدلا

  • #13
    تاريخ التسجيل
    Jun 2006
    الدولة
    ملكش دعوة
    المشاركات
    3,192
    معدل تقييم المستوى
    10

    افتراضي

    ربنا يكرمك يا فيرون
    (رَبِّ أَوْزِعْنِي أَنْ أَشْكُرَ نِعْمَتَكَ الَّتِي أَنْعَمْتَ عَلَيَّ وَعَلَى وَالِدَيَّ وَأَنْ أَعْمَلَ صَالِحاً تَرْضَاهُ وَأَدْخِلْنِي بِرَحْمَتِكَ فِي عِبَادِكَ الصَّالِحِينَ)

  • #14
    تاريخ التسجيل
    Nov 2002
    الدولة
    قدام القبة
    المشاركات
    962
    معدل تقييم المستوى
    15

    افتراضي فيرون سبق مدنجى

    فيرون سبق مدنجى
    ربنا يعينى و يسهلها معايا و يوفقنى للأستقالة بعدك يا فيرون

    هتقولو لى انت عاوز تستقيل ليه؟؟

    هقول لكو نفس الكلام الى قاله فيرون

    و بالاضافة اليه
    انى متعودتش اضحك على نفسى
    و الواحد بصراحة بشغلة فى الوزارة بيضحك على نفسه
    و هنا بحب اوضح ان شغل الوزارة هو الى هبل و ضحك على الدقون مش شغل الممارس العام
    الواحد لو اشتغل ممارس عام صح او حتى طبيب اسرة صح بيقى مبيضيعش وقت
    لكن للأسف انت بتشتغل موظف
    و هتتحول لغبى منه فيه بعد فترة قليلة
    و دا مش لأن الى بتتعامل معاهم كلهم اغبية
    لا مش مشكلة دا عادى و معروف و موافقين عليه
    عادى جدا ان يكون الى اقل منك فى المستوى العلمى اقل منك فى التفكير و الذكاء و دا مقبول و حتى كمان ميبقاش غباء منهم
    لكن الى مش مقبول ان رؤساءك فى الشغل اغبى من الغباء
    و ملهومش دعوة بالطب خالص
    اهم حاجة الورق و الاعمال الادارية
    دول مظبوطين خلاص تمام
    انت كدا فى المظبوط
    و حاجة تانية كمان ان مفيش حد اكبر منك تتعلم منه
    و لو فيه هيعلم الطب الحلمنتيشى المبنى على نظريات الخيال العلمى و التيكست بوك بتاع سنة 1960

    يعنى الواحد لو ملوش فى النيابات او الزمالات السريعة الى منزلاها الوزارة
    يبقى يستقيل احسن
    و هو الكسبان
    لأن الوزارة اليومين دول توجهها كلة ناحية التخصصات النادرة دى
    و التوجة الاكبر نحو طب الاسرة
    الى عامل غاغة و قلبان فى كل اروقة الوزارة

    اللى له فى الحوار دا اقول له استمر فى الوزارة
    انت مش خسران حاجة بالعكس انت الكسبان و انا حترمك و احترم وجهة نظرك

    لكن الى ملوش فى الحوار دا يبقى غلطان غلطان غلطان لو استمر لحظة واحده فى الوزارة

    حاجة تانية ممكن الواحد يستمر فى العمل فى الوزارة
    لو له فى الطب الحلمنتيشى بتاع المستوصفات
    ممكن يتعين فى قرية
    و يعمل فيها اسم
    و يروّح كل بوم ب 100 جنية
    لكن عمرة فى حياته الممتدة بأذن الله ما هيروح بأكتر من المبلغ دا
    و هيفضل طول عمرة عايش حلمنتيشى
    بس هيتجوز
    و هيجيب العربية كمان




    سؤال مهم جدا

    انا ليه لسا مقدمتش استقالتى؟؟؟؟

    بالرغم انى ناوى و مقتنع بالحكاية دى تماماً...!!!!
    الاجابة ممكن تكون مبرر ملوش محل من الاعراب
    يعنى برده ممكن تكون حاجة بضحك بيها على نفسى
    بس هى برده منطقية الى حد كبير
    و ناقشت فيها ناس اكبر منى
    و سبقونى بالخبرة و بالفترة الى بمر بيها دى
    و الى هيا فترة من اصعب الفترات الى ممكن تمر بيها فى حياتك
    لأنك مش عارف رايح فين ولا جى منين
    و ناقشت فيها برده استاذى
    و ناقشت فيها والدى و والدتى
    الى هيكون عليهم عبء تحمل تكاليف دراستى فى الماجستير لو ربنا موفقنيش للعمل بأى عمل جانبى
    (ملحوظة لازم دايما تعمل حساب الاسوأ)
    (ملحوظة تانية انت كدا كدا اهلك هيفضلو يصرفو عليك فى الوزارة و غير الوزارة لو ملقتش شغل جانبى لأن ال250 جنية ميجيبوش تمن المواصلات من البيت للوحدة الصحية و من الوحدة الصحية للبيت)
    و الى اتفقت معاهم على تأجيل التفكير فى موضوع الارتباط تماماً و الى اجل غير مسمى لغاية لما اعرف انا رايح فين وجاى منين
    و على فكرة انا ناقشت فيها فيرون و بقية اصدقائى كمان
    لأن الموضوع مش سهل و لا بسيط
    زى ما هو باين كدا
    (ملحوظة الموضوع سهل و بسيط !! و لو مستقالتش تبقى عبيط)

    ايه بقى الاجابة؟؟؟؟؟؟؟؟؟

    الاجابة هى

    الجيش

    الجيش و الخدمة الوطنية ايها السادة

    هتعمل ايه لو استقالت و قدمت فى الماستر
    و بعد كدا لاقدر الله لا قدر الله
    الواحد لبس له تلات سنين ضابط احتياط
    ودا شيء وارد
    هيعمل ايه؟؟
    هو هياخد الماستر و هيطلع اخصائى من الجيش
    لكن هل هيتعلم حاجة
    ممكن يتعلم


    و دا فى عده احوال
    تخصص سهل مش عاوز ممارسة كتير و ممكن يمارسة فى الجيش زى الباطنة و الرمد و الانف واذن و الجلدية او غيرة و غيرة من التخصصات الى من النوع دا
    او هو من مواليد النص التانى من العام
    يعنى مش هيدخل الجيش الا بعد مرور حوالى 10 اشهر من نهاية الامتياز
    و ضيف عليهم انه قعد شهرين فى امتيازة فى التخصص بتاعة دا
    يعنى هيدخل الجيش بخبرة سنة بالاضافة لعملة فى الجيش بتخصصة دا لو ربنا وفقة يعنى و اشتغل بتخصصة دا فى حتة فى الجيش
    و لو كان تخصصة دا من التخصصات السابق ذكرها مش عاوزة شغل بالايد كتير
    يبقى كدا تمام قوى
    خبرة اكتر من سنة و ماستر و تعليم صح و تمام ان شاء الله
    و بالتوفيق لكل من اختار الطريق دا
    و بالتوفيق يا فيرون
    ادعو له يا جماعة


    انما لو كنت من مواليد النص الاول من العام
    يعنى تجنيدك بعد نهاية امتيازك بست شهور
    و دماغك زى الجزمة و مصمم ومتربس على جراحة عامة او جراحة قلب و صدر او جراحة اى زفت او اى تخصص عاوز ممارسة يدوية كتير و خبرة
    هتعمل ايه لو لبست يا معلم؟؟
    فى الحالة دى بيظهر خيار تانى
    و هو انك تقدم فى نيابات الوزارة الى بقت بتنزل بعد سنة
    (مهو انت لسا مستقلتش و انت فى الجيش محسوب على الوزارة و كأنك فى التكليف تمام او انت مكلف و كأنك فى النيابة برده لو انت نايب)
    و لو تقديرك كويس ممكن تلحق نيابة فى احدى المستشفيات التعليمية
    و فى الحالة دى ممكن تتعلم كويس
    اكيد مش زى القصر العينى
    لكن اكيد برده مش زى مستشفى ابو جهل العام

    و لو لبست جيش سنة -جندى يعنى او عسكرى زى ما بيقولو-
    يبقى هتاخد نيابتك قبل ما تطلع من الجيش و تطلع من سنة الجيش على النيابة عدل
    و لو لبست تلات سنين -ضابط احتياط يعنى او ظابط زى ما بيقولو - لا قدر الله يبقى سنتين نيابة فى الجيش و سنتين نيابة فى الحتة الى انت جاتلك نيابة فيها

    خلى بالك كدا كدا لو قدمت فى نيابات الوزارة مش هتقدم فى الماستر الا بعد مرور سنه من النيابة يعنى متأخر سنتين عن المستقيل او نايب الجامعة الى بيقدمو مباشرة
    (سنة الجيش الى محسوبة كأنها من التكليف و السنة الى لازم تستناها فى النيابة بعد كدا تاخدها ان شاء الله)

    بص بقا لو الواحد استقال قبل ما يعرف هو هيعمل ايه فى الجيش
    و لا هيطول نيابات الوزارة
    و لا هيطول انه يتعلم
    ممكن يطول الماستر
    بس الماستر هيعمل بيه ايه من غير تعليم؟؟
    ممكن يتعلم فى الجيش
    لكن مش مضمون


    لذلك اتجهت النية ان شاء الله على الاستقالة لو ربنا اكرمنى و اتأجلت من الجيش

    (ملحوظة حتى الآن و بعد توقيع الكشف الطبى عليا فأنا لائق و مرشح ضابط احتياط و ميعاد الارجاء يوم 6-9 و دا الى هيتحدد فيه هتأجل ولا هلبس ادعولى بالتوفيق للخير ان شاء الله سواء التأجيل او اللبس)

    و دا هيخسرنى فرصة التقديم للماجيستير السنة دى
    لكن مش مشكلة
    حتى لو خسرت الفرصة السنة دى
    فأنا كسبان التعليم
    و كسبان سنة كمان بدرى تقديم فى الماستر عن نواب وزارة الصحة الى كدا كدا زى ما قولت ليكو بيتأخرو سنتين

    و لو لبست جيش
    يبقى الخيار زى ما اوضحت و شرحت لكم ايها السادة

    لسا برده حاسس انى بضحك على نفسى بأستمرارى فى الوزارة و عدم تقديمى للأستقالة
    لكن زى ما انتو شايفين
    انا حسبتها بالورقة و القلم
    و كلمت كل الناس
    انتو ايه رأيكو
    اروح استقيل دلوقتى
    و لا انتظر لغاية 6-9

    اقول ايه؟؟
    يا بخت البنات مريحين دماغهم من كل الكلام و العك دا
    بس نصيحة
    لكل شاب و كل شابة ملهومش جيش
    و عاوزين يتعلمو
    طلقو الوزارة بالتلاتة
    انتو الكسبانين
    الا لو انتو عاوزين تضحكو على نفسكو زى مدنجى كدا
    او عاوزين تبقو موظفين و دا مش عيب و لا حرام البلد برده محتاجة موظفين و اداريين على كفاءة و الى يختار السكة دى احترمة جداً


    انا كتبت كلام كتير قوى
    بس دا على سبيل الفضفضة
    و على سبيل الافادة للأجيال القادمة ان شاء الله

    و بالتوفيق للجميع بأذن الله

    دى..
    مدينتنا حتة سكرة ..... الشمس فيها منورة

    البقاء لله.. د.مصطفى محمود

  • #15
    تاريخ التسجيل
    Nov 2002
    الدولة
    قاهرة المعز
    المشاركات
    1,066
    مقالات المدونة
    3
    معدل تقييم المستوى
    16

    افتراضي

    هيا الفكرة انتا حطيت الجيش فين في المعادله ... هل هو عنصر أم عامل حفاز أم بيئة التفاعل
    كده يبقى عندنا حالتين ..
    اللي عنده حالات تانيه يقابلنا عند دكتوره كلمنتينا في عالم ميزو
    أشحطوط بالورى .... جاب الليالي السود .... فتبهدلا

  • #16
    تاريخ التسجيل
    Nov 2002
    الدولة
    Egypt
    المشاركات
    4,261
    معدل تقييم المستوى
    10

    افتراضي

    ربنا يكرمكم يا فيرون و يا مدنجي

    استعراض رااااااااائع و الله
    بارك الله فيكم

    أنا نفسي و الله مش عارف بالظبط أنا مكمل ليه

    لما روحت قدمت استقالتي و رجعت سحبتها بعدها بتلات تيام تقريباً ... د. سيد (مدير ادارة التكليف) بص لي بصة غريبة ..كأنه بيقوللي ليه يابني ؟ !!!!! ـ
    ليه راجع للهم تاني ؟ انت مش كنت خدت القرار ؟! ـ
    و لقيته بيقوللي : ايه يا أحمد رجعت في كلامك
    و قام متنهد تنهيده كده .. و ماضي على طلب الرجوع في الاستقالة بـ"لا مانع" على مضض .. و كنت حاسس اني صعبان عليه بجد
    ===========

    هاحاول أقرص على نفسي و أطلع من راسي إلى المنتدى إجابة السؤال : أنا مستمر ليه
    أنا راجل قررت ان طريقي هو طريق الشهادات الاجنبية
    و فكرة اني أفتح بيت هيا فكرة خلاص تم السير فيها .. انا دلوقتي عاقد .. و الفرح بعد العيد الصغير ان شاء الله - و انتم معزومين مش عايزة كلام
    و الجواز محتاج مصاريف و مضطر اني اشتغل شغل جانبي
    الحمد لله وفقت في اني ألاقي شغل جانبي لا بأس به
    لكن ضيق الوقت مشكلة
    الشغل الجانبي مع مستلزمات الجواز مع مذاكرة الشهادة الأجنبية مع اليومين اللي باروحهم محافظة الفيوم الشقيقة .. كل دا مش ماشي مع بعضه كويس
    بالبلدي مش ملاحق
    و اللي بيقع عادة هوه المذاكرة .. لأن مالهاش جدول معين بتحاسب عليه
    الشغل و فيه ناس متابعيني .. و التكليف و فيه حضور و غياب .. و التجهيزات بتاعت الجواز دي التزامات عائلية
    يبقا المذاكرة هيا الضحية .. مع انها أهم حاجة

    اللي مصبرني ع التكليف انه يومين مفيش غيرهم حتى الآن .. الحمد لله .. لكن حتى رغم انهم يومين بس .. مش عاجبني الحال
    أنا باروح ليه؟

    بصراحة الأمان الاجتماعي بتاع "الاحتمالات" اني يجيلي حاجة كويسة في الوزارة .. ازاي مش عارف
    زائد خوفي من الدخول في "معركة" مع أهلي بسبب قلقهم الزائد عليا اني أكون "في الشارع" رغم ان الشارع أنضف م الوزارة لكن تقول لمين بقا
    دول السببين المنطقيين
    أضف اليهم فكرة رومانسية عن خدمة البلد في يوم من الأيام عن طريق الوزارة لو بقيت حاجة كبيرة .. بس هوه خدمة البلد ميجيش الا عن طريق الوزارة؟ مش عارف بس باحس ان القطاع الخاص بيخدم الأغنياء ... و الفقراء محتاجين حد يخدمهم
    كلام رومانسي ميأكلش عيش حاف
    أهي فضفضة برضه

    و لعل للحديث بقية ان شاء الله
    أن توقد شمعة ... خير من أن تلعن الظلام ألف مرة


  • #17
    تاريخ التسجيل
    Jul 2007
    الدولة
    كوكب المدينة الجامعية
    المشاركات
    1,861
    معدل تقييم المستوى
    11

    افتراضي

    كلام في الصميم
    *
    no more comment
    HAMED

  • #18
    تاريخ التسجيل
    Oct 2006
    الدولة
    الادارة الطبية _جامعة المنصورة
    المشاركات
    5,104
    معدل تقييم المستوى
    16

    افتراضي

    الموضوع ده من أحسن ما قرأت
    شكرا
    دكتور فيرون
    مدنجى
    مصباح

    والله انا ما لاقى كلام اعبر بيه عن اعجابى بحضراتكم وازاى انكوا مبتبخلوش علينا بالخبرات دى
    وجميلة اوى اوى اوى بتاع مستشفى أبو جهل العام دى

  • #19
    تاريخ التسجيل
    Nov 2002
    الدولة
    قدام القبة
    المشاركات
    962
    معدل تقييم المستوى
    15

    افتراضي Life before limb

    الفكرة انك تقدر تستقيل من الوزارة
    لكن متقدرش تستقيل من الجيش لو لبست فيه
    فهو ان جاء فهو شر لا بد منه
    انا مقصدش انه شر فى حد ذاته لا انا اقصد فى العطلة بتاعتة

    مش معقول الواحد يبقى نفسه يتهرب من الجيش و يشتم فيه و فى سنينه و فى نفس الوقت يشتم فى الحكومة و فى السياسة و فى ضعف الجيش المصرى الى هو اساسا قوى بالموارد البشرية الى فيه

    الجيش هو
    عنصر و عامل حفاز و بيئة التفاعل كل دول
    او بمعنى اصح حدث ممكن وقوعة
    و على ضوءه الواحد ممكن يتصرف
    حاجة كدا زى الالجوريزمات بتاعة الدكتور حسين خيرى بتاعة الجراحة

    يعنى لو حصل كذا تعمل كذا و لو محصلش تعمل كدا

    و العلاج بيمشى على خطة العلاج التحفظية لحين حدوث الحدث
    يعنى اعقدها لك اكتر بمثال
    I will wait and conserve upon the limb untill the gangrene demarcate
    then I will amputate the gangrenous part
    الى هو الوزارة يعنى
    او
    I will revascularise if the is no demarcation with hope of improvement of the limb
    و مش على امل تحسن الجزء الميت
    لأن دا مبيحصلش طبعا
    الجزء الميت ميت
    و لابد ان يتم بتره
    بس ممكن اقول
    على امل ان الواحد ميفقدش كل حاجة
    بدل ما يعمل بتر فوق الركبة يعملة تحت الركبة و دا افضل بكتير بعد تركيب الاجهزة التعويضية فى المشى تانى عادى بدون مشاكل

    يعنى هى وجهة نظر
    انا مستنى الــ
    demarcation
    الى هو الجيش يعنى
    هيبقى فوق الكبة ولا تحت الركبة

    و بمناسبة الحديث عن جراحة الاوعية
    خلو بالكو من خبرتى فيها
    الحكاية فى احوار كتير جدا بتنتهى بالبتر حتى بعد عمل الريفاسكولاريزاشن
    و دا بيبقى حفاظا على حياة العيان

    و على رأى الدكتور حسين خيرى
    Life before limb

    و الحدق يفهم

    ممكن طبعا كل دى تبقى حجج فارغة
    و كل دا عشان الاسباب الى ذكرها الاخ مصباح كمان
    بس خلاص فات الكتير ما عاد الا القليل

    يوم
    6-9
    ان شاء الله هشيل الدريسنج و هشوف الرجل بقت عاملة ازاى

    و بطل تقطيم فيا بقى يا فيرون
    متحسسنيش بالذنب اكتر من كدا


    انا بالفعل حاسس بالذنب بالاستمرار بالوزارة
    لأنى اقدر استقيل و اتعلم
    لكن معلش بقى انا مقدرش استقيل من الجيش
    و كمان لعل فيها خير
    يمكن ربنا يكرم الواحد بنيابة فى حتة كويسة و تكون افضل من موضوع النايب الزاير
    و يشتغل مع اساتذته تانى كمان

    أضف اليهم فكرة رومانسية عن خدمة البلد في يوم من الأيام عن طريق الوزارة لو بقيت حاجة كبيرة .. بس هوه خدمة البلد ميجيش الا عن طريق الوزارة؟ مش عارف بس باحس ان القطاع الخاص بيخدم الأغنياء ... و الفقراء محتاجين حد يخدمهم
    كلام رومانسي ميأكلش عيش حاف
    أهي فضفضة برضه


    معلش يا عم مصباح اسمح لى ارد عليك و اقول لك
    انا فكرت فى الحكاية دى قبلك
    انت يعنى و انت بعد ما تستقيل مش تقدر تخدم الناس
    بل بالعكس انت يعنى مش هتقدر تخدمهم بصورة افضل كمان بعد لما تكون اتعلمت و اتظبطت؟؟
    انت يعنى مش لو بقيت نايب فى اى خرابة انت كدا مش برده بتخدم الغلابة و ببلاش؟؟
    حتى لو انت فى القطاع الخاص متقدرش تخدم الناس ببلاش؟؟
    و حتى لو اخدت منهم فلوس انت كدا مش بتخدمهم مرة انت بتخدمهم مرتين كمان مرة بعلمك و بعلاجك ليهم و و مرة بفلوسهم الى هتترد عليك براحة نفسية و استقرار او استفادة بعلم جديد هيترد ليهم تانى على شكل علاج افضل و علم احسن؟؟


    معلش انا جاى اهدى النفوس
    اوعى تسمع كلامى يا مصباح
    و بعد كدا ترجع تقول مدنجى الى قالى
    ساعتها ولا اعرفك

    يا ابنى عقلك فى راسك تعرف خلاصك
    انا بقول وجهة نظر و رأى
    بس


    دى..
    مدينتنا حتة سكرة ..... الشمس فيها منورة

    البقاء لله.. د.مصطفى محمود

  • #20
    تاريخ التسجيل
    Nov 2002
    الدولة
    قدام القبة
    المشاركات
    962
    معدل تقييم المستوى
    15

    افتراضي

    معلش حاجة تانية حبيت اقولها
    الواحد بيعيش حياتة دى مرة واحده بس مفيش حياة تانية
    و كل يوم بعدى عليك بيعدى عليك مرة واحده بس و مش هيرجع تانى
    و الفرصة لما بتيجى فى لحظة فهى بتيجى فيها مرة واحدة بس لأن اللحظة دى مبتتكررش
    و العمر مهما طال قصير
    و انت قدامك الخيار
    (معلش فيرون قلبها جزر و انا قلبتها خيار و دا بمناسبة ان الموضوع بقى سلاطة)
    عايز تبقى عادى ارنب زى الارانب التانية ماشى
    عايز تتمرد على الواقع و تبقى مختلف ماشى

    الموضوع يستحق المغامرة
    و مع المغامرة بتيجى المخاطر
    و مع المخاظر بتيجى المتعة
    و بعد كدا بييجى النجاح بأذن الله
    و لو جاء الفشل فأنت كسبت شرف المحاولة
    و استمتعت بمتعة المغامرة
    و كدا كدا انت مخسرتش حاجة
    لأنك كنت هتفضل زى ما انت بتجرى ورا الجزرة الى بتجريك وراها الوزارة
    عادى ارجع اجرى وراها تانى
    (ملحوظة الوزارة بتيح لك فرصة الرجوع للجرى ورا الجزرة من تانى)

    او ارفض تانى و حاول محاولة تانية
    و غامر مغامرة تانية
    اكيد هتنجح
    طالما نيتك خير
    و طالما انت مثابر و طموح
    و مش مشكلة تموت و انت بتحاول

    احسن ما تموت و انت بتجرى ورا الجزرة


    انا هموت على الست شهور الى الواحد ضيعهم فى الوزارة

    و الله اعلم ايه الى ممكن يحصل لى لما ادخل الجيش
    بس اكيد ساعتها هرضى بأمر الله

    بس ارجع و اقول كلمة قالها لى استاذى
    مش مشكلة الى فاتنى
    المهم ميفوتنيش تانى


    دى..
    مدينتنا حتة سكرة ..... الشمس فيها منورة

    البقاء لله.. د.مصطفى محمود

  • صفحة 1 من 4 1 2 3 4 الأخيرةالأخيرة

    معلومات الموضوع

    الأعضاء الذين يشاهدون هذا الموضوع

    الذين يشاهدون الموضوع الآن: 1 (0 من الأعضاء و 1 زائر)

    المواضيع المتشابهه

    1. مشاركات: 8
      آخر مشاركة: 30-04-2008, 09:48 AM
    2. استقالة كاسبرزاك من تدريب السنغال
      بواسطة mr_azygos في المنتدى ستاد القصر العينى
      مشاركات: 8
      آخر مشاركة: 29-01-2008, 01:39 AM
    3. احنا اللى سكتنا من البداية
      بواسطة مصباح في المنتدى حوار
      مشاركات: 20
      آخر مشاركة: 17-11-2007, 07:28 PM

    مواقع النشر (المفضلة)

    مواقع النشر (المفضلة)

    ضوابط المشاركة

    • لا تستطيع إضافة مواضيع جديدة
    • لا تستطيع الرد على المواضيع
    • لا تستطيع إرفاق ملفات
    • لا تستطيع تعديل مشاركاتك
    •