صفحة 1 من 2 1 2 الأخيرةالأخيرة
النتائج 1 إلى 20 من 28

الموضوع: درس فقه

  1. #1
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي درس فقه

    و نبدأ من تانى؟
    درس فقه

    هنقول فقه
    بطريقة سهلة باذن الله
    واحدة واحدة
    و اللى مش فاهم يقول
    بسم الله
    ازاى الاولاد ؟

    وانا كمان ;)

  2. #2
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي احكام الجنائز

    نبدأ باحكام الجنائز و بعدين ندخل على الطهارة باذن الله


    احكام الجنائز

    بسم الله

    طبعا مفيش داعي نقول ان كلنا مصيرنا في يوم من الايام قريب او بعيد بكرة او بعد سنين كلنا بلا استثناء مصيرنا للموت
    و الموت بالمناسبة يا شباب مش حاجة وحشة زي مالناس متهيألها
    سيدنا محمد كان مشتاق جدا لما بعد الموت

    المشكلة بس مش في لحظة الوفاه
    المشكلة فيما بعد الوفاه

    طب سيدنا محمد صلى الله عليه وعلى اله و سلم اشرف الخلق و داخل الفردوس باذن الله تعالى و رحمته

    احنا بقى ؟؟؟؟
    ربنا يرزقنا حسن الخاتمة

    الموضوع ده للمسلمين كلهم واخص قوي اطباء الامتياز
    لان بجد والله
    موقف عمري ما هنساه
    احنا في امتياز بنشوف حالات وفاه كتير
    و مبنحطش في دماغنا

    ومرة في الطوارئ جاتلنا حالة رجل في حادثة وبدأ يحتضر واحنا بدأنا انعاش قلب ورئة
    زميلتى اللى واقفة بتعمله امبو باج
    بدأ تبكى و تلقنه الشهادة
    طبعا محدش فينا جه على باله كده ابدا

    المهم
    دى معلومات الواحد لازم يعرفها

    تعالوا نعرفها سوا عشان نعرف نتصرف في المواقف دي


    بسم الله
    بيقولك يسن لو شفت مريض عليه علامات الموت ( اللى الدكاترة وغيرهم عارفينها ) انك تلقنه الشهادة اللى هي لا اله الا الله محمد رسول
    لان الحديث الصحيح عن ابي سعيد الخدري ان رسول الله صلى الله عليه وسلم قال " لقنوا موتاكم لا اله الا الله "

    طيب هل اي واحد يلقن؟
    طب افرض واحد بيتكلم وينطق هو بالشهادة و ربنا راضي عنه قاللك لا داعي للتلقين هنا
    انت تلقن الذى لا يقدر على النطق

    طيب و كمان من السنن انك توجهه جهة القبلة
    ازااااااااااااااااااااى بقى ؟
    عشان الناس فاهمة الحتة دي نص نص

    النص الصح هو انك تخلى جنبه اليمين ووجهه الى القبلة كما فعلت السيدة فاطمة
    وفي الحديث
    عن ابي قتادة ان النبي صلى الله عليه وسلم لما قدم المدينة سأل عن البراء بن معرور فقالوا له لقد توفى و قد اوصى بان يوجه الى القبلة حين احتضر فقال صلى الله عليه وسلم " اصاب الفطرة "

    النص التانى بقى
    لو المتحتضر مش قادر او احنا مش قادرين نوجهه زي ما سبق يبقى يوضع على ظهره و رجلاه الى جهة القبلة ونرفع راسه شويه عشان وجهه يبقى باصص على القبلة

    تمام كده يا بلو؟


    كمان من السنن قراءة سورة يس بصوت واطى للحديث
    "يس قلب القران لا يقرؤها رجل يريد الله و الدار الاخرة الا غفر له و اقرءوها على موتاكم"

    كمان من السنن تغميض عينى المتوفى و تغطيته وستره

    الستر يا دكاترة عشان نلاقى اللى يسترنا
    و اننا نسرع بتكفينه و تجهيزه للغسل والدفن


    خلوا بالكو من الحديث الصحيح ده
    دخل الرسول على ابي سلمة عندما حضرته الوفاه فوجده قد فتح عينه فاغمضهما ثم قال " ان الروح اذا قبض تبعه البصر"



    طيب ازاى نغسل الميت يا نتاوي؟


    الواجب ان جسم الميت كله يعمم بالميه و المستحب انه يكون فوق مكان مرتفع و تخلع عنه الهدوم و يتحط عليه اللى يستر عورته _ الستر يا دكاترة الله يكرمكوا _
    ومش اي حد يدخل بس اللى وجوده مهم

    و طبعا لازم يكون المغسل محل ثقة ومعروف عنه الامانة والصلاح الحديث الصحيح بيقول ايه؟ " ليغسل موتاكم المأمونون "

    طيب الكيفية بقى ازاي؟

    *الاول نضغط على البطن بالراحة عشان لو فيه اي حاجة ممكن تخرج تخرج _ لان السفنكترز مش عارفة بالعربي دلوقتى مش شغالة_
    *و لو فيه نجاسة نشيلها زي الدم كده او غيرها
    *و الغاسل يلف على ايده قماشه لمسح العورة لانه لا يجوز لمس العورة
    *و بعدين يوضيه وضوء الصلاة بس من غير مضمضة ولا استنشاق و يغسله بالماية 3 مرات ويستحب ان يكون مع الميه حاجة ليها ريحة حلوة
    *والعسل بيبدأ بالناحية اليمين وبعدها الشمال و بعدين الجسم كله 3 مرات
    *و بعد كده ننشف الجسم و نحط الطيب و نحطه في كفنه و الافضل يكون الكفن ابيض نظيف ساتر و انه يكون 3 لفائف للرجل و5 للمرأة

    شايف يا ريكوبا عظمة الاسلام حتى في الموت ربنا ساتر المرأة ومحافظ عليها اكتر من الرجل
    لما يبقى الستر كده وهى ميتة مش الاولى الستر وهى عايشة وللا ايه يا بنات؟


    طيب افرض مفيش ميه
    نعمل اييييييييييييييييييييييه؟

    عليك نور يا اي كي ام
    نيمم الميت صح كده



    س سؤال
    ما حكم تغسيل الرجل للمرأة والعكي

    اااااااااااااه
    قاللك لا يجوز الا الزوجين فقط بس خلى بالك الاحناف قالوا لا يجوز واذا مكنش فيه حد غيره ييممها فقط


    طيب الصلاة على الميت
    دى يا ترى حكمها ايه؟
    الشاطر يقول


    شطورة يا الحمد لله
    فرض كفاية

    يعنى لو مجموعة من الناس عملوها سقطت عن الباقي

    طب و الدليل بقى؟
    ان سيدنا محمد صلى الله عليه وسلم صلى على اصحابه و ما سابش ميت الا وصلى عليه اقصد بده بعلمه
    يعنى عليه الصلاة والسلام
    اول ما يعرف ان فيه ميت لازم يصلى عليه


    الحكمة من فرضها ان الواحد يدعى للميت و يكرمه و يكون وفي ليه و يعتبر بقى انه قريب هيكون مكانه

    طيب ايه اركانها؟
    اول حاجة النية
    و بعدها 4 تكبيرات بما فيها تكبيرة الاحرام
    يعنى الله اكبر تكبيرة الاحرام وبعدها 3
    و الدعاء

    و تتصلى ازاي؟

    تمام يا دى ام دى

    التكبيرة الاولى
    سورة الفاتحة
    التكبيرة التانية
    الصلاة على النبي زي ما بنقول في التشهد
    التكبيرة التالتة
    الدعاء للميت
    التكبيرة الرابعة
    الدعاء للنفس و للمسلمين
    السلام

    المستحب اننا ندعى بالرحمة والمغفرة لان خلاص هو مالوش غير كده
    الله وهو فيه حاجة تانية ممكن الناس تدعى بيها
    ايوه ممكن يقوللك وطول ذكره في الدنيا
    وبارك في اولاده

    يا جماعة الراجل توفى
    ادعوله هو بالمغفرة والرحمة بلا اسم بلا ولاد
    مش وقته خالص

    الدعاء المأثور في الحالة دى
    " اللهم اغفر له وارحمه و عافه واعف عنه و اكرم نزاه ووسع مدخله و اغسله بالماء والثلج والبرد و نقه من خطاياه كما ينقى الثوب الابيض من الدنس و ابدله دارا خيرا من داره و اهلا خيرا من اهله و ادخله الجنه و اعذه من عذاب القبر ومن عذاب النار"

    ولو كان طفل " اللهم اجعله لنا فرطا اللهم اجعله لنا ذخرا و اجرا اللهم اجعله لنا شافعا و مشفعا"

    طيب سنن صلاة الجنازة؟

    الامام يقف عند صدر الميت
    و يثنى على الله بعد التكبيرة الاولى " سبحانك اللهم وبحمدك وتبارك اسمك و تعالى جدك و لا اله غيرك "
    و يستحب ان الصفوف على الميت تكون 3
    و ان الامام يقول قبل السلام اللهم لا تحرمنا اجره و لا تفتنا بعده


    مين اللى يتولى الامامة؟؟؟؟؟؟؟

    الشافعية قالوا : اقرب الناس ليه والده او ابنه او اخوه

    الاحناف قالوا : ولى الامر او امام الحى او ولى الميت

    المالكية قالوا : الشخص اللى وصى الميت انه يصلى عليه

    الحنابلة قالوا : اللى موصى بيه وبعدين السلطان وبعدين النائب وبعدين اقرب الناس

    طيب اذا كان فيه اكتر من متوفى

    يا اما تصلى على كل واحد لوحده
    او تجمع


    طب افرض دخلت الجامع وفاتك تكبيرتين تعمل ايه؟

    ناس قالوا يقضى التكبيرات اللى فاتته بعد سلام الامام
    و ناس قالوا يسلم وماعليهوش حاجة


    طيب نصلى على مين؟
    على المسلم الذكر والانثى والصبي
    و كمان لو حصل اجهاض بعد 4 شهور والجنين نزل واتحرك

    انما لو قبل كده لا يغسل ولا يصلى عليه

    ولو بعد 4 شهور و ماتحركش فيه ناس قالوا يتصلى عليه وناس قالوا لا ( الاحناف والمالكية )

    و قاللك صاحب كتاب نو الايضاح " ولا يصلى على باغ وقاطع طريق قتل حالة المحاربة وكل ظالم فاجر و قلتل احد ابويه عمدا اما من قتل نفسه فيغسل ويصلى عليه"
    طب حكم زياره القبور؟
    مستحبة للرجال
    و بالنسبة للنساء لا بأس اذا خرجت بهدوم شرعية و مادامت قصدها العبرة و مادامت مش هتؤدى لفتنه
    بس الشافعية والحنابلة قالوا مكروه ولو كان فيه فتنة يبقى حرام

    المفروض المسلم يكثر من الدعاء
    و يقرا قران
    وانه يقول السلام عليكم دار قوم مؤمنين وانا ان شاء الله بكم لاحقون انتم لنا سلف و نحن لكم خلف نسأل الله لنا و لكم العافيه


    طيب حكم الشهيد بقى اللى مات و هو بيدافع عن دينه او عرضه او ماله او ارضه

    الشهيد لا يغسل ولا يصلى عليه و يكفن بدمه و ثايبه زي ماهو و ده تكريم وتشريف ليه
    زي شهداء احد كده

    بالمناسبة فيه بعض الروايات قالت ان الرسول صلى على شهداء احد
    فالفقهاء قالوا لا مانع من الصلاة


    و يدخل تحت بند الشهيد
    اللى قتله اهل البغي او قطاع الطرق و المظلوم اللى قتل من غير ذنب

    و الشيخ عبد الرحمن الجزيري في كتاب الفقه على المذاهب الاربعة قسم الشهداء الى
    شهيد كامل
    و هو شهيد الدنيا والاخرة
    اللى مات و هو بيدافع عن دينه او ايه؟ او عرضه وايه تانى؟ وماله وارضه
    و النوع ده من الشهداء لا يغسل الا لو فيه نجاسة جت عليه غير دمه و يكفن في هدومه
    و الاحناف بس هم اللى قالوا لا مانع من الصلاة عليه



    و النوع التانى شهيد الدنيا
    اللى كان بيحارب للغنيمة او اللى بيحارب رياءا
    النوع ده برضه من الشهداء لا يغسل ويكفن في هدومه وما يتصلاش عليه لان انت ماتعرفش اللى جوا نفسه


    و النوع التالت شهيد الاخرة بس
    اللى مات بالطاعون او الغريق او الحريق او الاحداث المؤلمة المشابهة و الامراض الشديدة
    و دى نقطة مهمة جدا
    يعنى فيه فقهاء اعتبروا اموات الحوادث وانهيار البيوت شهداء

    لكن الاموات هنا بقى يغسلوا عادى ويكفنوا ويتصلى عليهم عادى جدا


    الواجب بقى النهاردة ندعى لموتانا وموتى المسلمين بالرحمة والمغفرة

    اللهم ارزقنا حسن الخاتمة

    سبحانك اللهم وبحمدك نشهد الا اله الا انت نستغفرك ونتوب اليك















    ازاى الاولاد ؟

    وانا كمان ;)

  3. #3
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    الفقه بقى محتاج صحصحة

    الناس النايمة تروح تغسل وشها وتييجي

    الاول بس الفقه هو علم احكام العبادات
    و بينى وبينكو
    كان نفسي اقرا فيه من زمان لانه مهم جدا

    و الحمد لله ربنا حطلى دي ام دي في طريقى عشان ياخد ثواب و اخد انا كمان علم واتمنى انه يكون علم وثواب

    الفقهاء لما بيبدأوا يتكلموا بيتكلموا عن اول حاجة الطهارة
    و دي مهمة جدا جدا جدا

    بسم الله الرحمن الرحيم

    الطهارة في اللغة هي النظافة
    وفي الشرع هي رفع الحدث و ازالة الخبث


    اااااااااه دخلنا في الكلام الجامد بقى
    ايه رفع الحدث وازالة الخبث ده؟

    قاللك رفع الحدث هو ازالة ما من شأنه ان يمنع من اداء العبادات
    الله؟
    زي ايه طيب؟
    زي البول والغائط ( البراز ) او الجنابة ( خروج المنى لجماع او شهوة)

    تمام كده؟
    قاللك كمان ان اللى يوجب الوضوء اسمه الحدث الاصغر
    و اللى يوجب الغسل ( الاستحمام بالشروط اللى هنقولها ان شاء الله ) اسمه ايه يا ستروما؟

    تمام الحدث الاكبر


    طيب ده الحدث ايه بقى ازالة الخبث؟
    قاللك ازالة الخبث هو انك تشيل اي نجاسة على الهدوم او الجسم او غيرها من الحاجات اللى المفروض تبقى طاهرة


    طيب فضل الطهارة: بيقوللك ربنا سبحانه وتعالى مدح المتطهرين مدحا عظيما *( ان الله يحب التوابين ويحب المتطهرين )* البقرة 222


    طيب حكمة مشروعيتها؟
    شرع الله الطهارة وفرضها على عباده




    طيب نييجي للمهم بقى
    وسائل الطهارة؟
    ازاي الواحد يتطهر؟
    قاللك يتطهر يا اما بالوضوء يا اما بالغسل يا اما بالتيمم في مواضع معينة

    طب ايه اللى ممكن تتطهر بيه

    الاصل الماء المطلق اللى هو اصلا طاهر ومطهر
    يعنى ايييييييييييييييييه؟


    يعنى ميه نظيفة طاهرة
    واما تتوضى بيها متوسخكش
    طب ده نجيبه منين؟
    اكيد من الحنفية يعنى
    وايه تانى يا ازايجوس؟



    تمام

    اول حاجة المية اللى جاية من السما
    ماء المطر
    و ماء الثلج
    وماء البرد

    طب ايه الفرق بين التلج والبرد

    قاللك التلج بينزل طري ويجمد على الارض

    و البرد اللى ينزل جامد ويسيح على الارض


    اللهم اغسلنى من خطاياي بالثلج والماء والبرد



    تانى حاجة ماء البحر
    و ماء النهر

    عن ابى هريرة قال سأ ال رجل رسول الله صلى الله عليه وسلم فقال يا رسول الله انا نركب البحر و نحمل معنا القليل من الماء فان توضأنا به عطشنا افنتوضأ بماء البحر؟ فقال صلى الله عليه وسلم : هو الطهور ماؤه الحل ميتته

    تالت حاجة مياه العيون

    رابع حاجة بقى
    افرض في صحرا ومفيش ميه

    افرض في جامع والميه قاطعة ومفيش ميه متخزنة ولا حاجة

    تعمل ايه؟

    *(فلم تجدوا ماءا فتيمموا صعيدا طيبا فامسحوا بوجوهكم و ايديكم منه)*المائدة 6


    الصعيد الطيب ده ايه؟
    التراب الطاهر
    او الرمل او الحجر




    طيب افرض عندك ميه ومش عارف ينفع تتوضى بيها او لا

    الميه ممكن تكون طاهرة مطهرة اللى هي المية اللى مافيهاش لا لون ولا طعم و لا ريحة
    وده يستخدم في كل حاجة





    النوع التانى
    ميه طاهرة خالطها شئ طاهر غير حاجة من صفاتها
    ايه اللخبطة دي؟

    يعنى مثلا ميه بصابون او ميه بكلور او ميه بزعفران او ميه بلبن

    كل ده طاهر غير مطهر
    يعنى مينفعش في الغسل وللا الوضوء
    و اشترط الحنابلة و الشافعية ان يكون التغيير كثير


    فيه نقطة بقى
    الماء المستعمل في الطهارة مثلا؟ زي لو حد بيتوضى و بيجمع المية في جردل
    الميه دي طاهرة ومطهرة وللا ايه؟


    ناس كتير اجمعوا انها طاهرة غير مطهرة زي الاحناف
    و الشافعية قالوا لو في فرض طهارة يبقى غير مطهر انما لو في نفل طهارة يبقى طهور
    و الحنابلة قالوا روايتان واحد مطهر والتانية غير مطهر


    النوع التالت من انواع المية
    اللى اختلط بنجاسة

    لو كانت النجاسة كتير واثرت على احدى صفاته يبقى نجس ومينفعش في الطهارة


    اما اذا كانت النجاسة قليلة ومفيش تغيير فيجوز











    طيب المية اللى فاضلة من الشرب
    لو بنى ادم يبقى طاهر مطهر
    لو كلب اوخنزير تبقى نجسة
    لو بغل او حمار مشكوك في امرهم عند المالكية و الشافعية طاهر و عند الحنابلة روايتان
    لو من حاجة تؤكل لحمها ( زي الفراخ كده ) طاهر
    لو قطة مكروه مع وجود غيره من الماء عند الاحناف وطاهر عند المالكية و الشافعية




    نلخص الامور المهمة بقى

    1 ميه السما طاهرة مطهرة
    2 ميه البحر و النهر يجوز التطهر بيها
    3 المية بالصابون او المية بلبن لا تصح الطهار بيهم
    4 المية المتبقية من الوضوء لا يجوز الوضوء بيها
    5 الماء المتبقى من شرب الانسان والهره وما يؤكل لحمه جاز التطهر به
    6 الماء المتبقى من ما حرم اكله لا يجوز التطهر به






    ازاى الاولاد ؟

    وانا كمان ;)

  4. #4
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    طيب بسرعة بسرعة
    ايه هي النجاسة؟

    بيقوللك النجاسة هي اي حاجة مستقذرة ( احنا شايفنها قذرة يعنى ) المفروض اننا نبعد عنها و نزيل اللى يصيبنا منها

    و هي نوعين بالمناسبة
    نجاسة حكمية : زي الحدث الاصغر والاكبر

    نجاسة حقيقية : دي لما يكون فيه مادة نجسة على الجسم او الهدوم

    طبعا وجب على المسلم التطهر منها
    قال تعالى *( و ثيابك فطهر )* المثر 4

    طيب ادينى امثلة على النجاسات كده
    او الحاجات النجسة اللى ممكن تنجس الجسم او الهدوم؟


    قاللك
    1 الحيوان الميت ( اللى مش مذبوح ذبحا شرعيا )
    و عليه اي جزء يقطع من الحيوان وهو صاحي ده برضه يعتبر ميت
    ماعدا طبعا السمك والجراد
    قال صلى الله عليه وسلم ( احلت لكم ميتتان ودمان اما الميتتا فالحوت والجراد واما الدمان فالكبد والطحال )
    و برضه المخلوقات اللى مفيهاش دم سايل زي النمل و النحل والذباب لو وقعت في حاجة وماتت متنجسهاش



    2 الدم من جرح او من حيوان مذبوح او دم حيض او نفاس او استحاضة كل ده لازم يتطهر منه


    3 لحم الخنزير


    4 الكلب



    5 قيء البنى ادم وبوله ورجيعه
    و من المعروف ان بول الصبي الذي لم يأكل ( اللى لسه بيرضع يعنى ) يا ما يرش بالماء او يغسل اما بول البنت لازم يتطهر منه



    6 الودى والمنى والمذى

    الودى ماء ابيض ثخين بعد البول
    المذى ماء ابيض لزج يخرج عند المداعبة او التفكر في الجماع و يجب الوضوء عند حدوثهما دون غسل
    اما المنى هو ماء غليظ عند الجماع




    7 بول وروث ما لا يؤكل لحمه زي الحمار والحصان



    8 الجلالة و هي اللى بتاكل القاذورات من الحيوانات



    9 الخمر



    طيب ازاي نتطهر؟
    *الاول لازم نشيل النجاسة اذا كانت مرئية


    *و اذا كانت مش مرئية زي البول مثلا تتغشل كويس 3 مرات ونعصر بعد كل مرة اذا كانت الحاجة قابلة للعصر


    *و اذا كانت على الارض تطهر بصب الماء عليها لحد ما تروح او انها تنشف من الشمس و ان النجاسة دي تختفى تماما



    *طب اذا جت في اكل؟
    في صحيح البخاري ورد ان رسول الله صلى الله عليه وسلم عن فأرة سقطت في سمن فقال القوها و ما حولها فاطرحوه و كلوا السمن


    *طب افرض كان سمن سايح
    لا كده خلاص بقى كله نجس
    ابقى غطى البرطمانات يا حياه




    *جلد الميتة يطهر بالدباغ



    *و اي حاجة مصقولة تطهر بالمسح

    *و الجزمة تطهر بالحك في الارض لحد ما تزول النجاسة اذا كانت مرئية اما اذا كانت بول مثلا لازم يتغسل

    طب نقطة مهمة جدا بقى الاستنجاء
    معناه ايه؟
    معناه ازالة ما خرج من السبيلين بماء طهور او بما يقوم مقامه من حجر طاهر


    طيب اداب دخول الخلاء
    1 الا يدخل الخلاء ومعه ما فيه اسم الله او ايه من القران

    2 البعد والاستتار عن النار

    3 الدخول بالرجل اليسرى و الخروج باليمنى

    4 الدعاء بسم الله اللهم انى اعوذ بك من الخبث والخبائث و لما يخرج يقول الحمد لله الذى عافانى و اذهب عنى الاذى


    5 ترك الكلام مطلقا


    6 عدم استقبال القبلة ولا استدبارها


    7 يحرم قضاء الحاجة في الماء الراكد او الجاري


    8 يحرم قضاء الحاجة في اماكن جلوس الناس


    9 يجب الاستنجاء و يعذب الانسان في القبر بسبب عدم الاستنجاء

    10 عدم الاستنجاء باليد اليمنى




    كده تمام خلصنا الطهارة كمفهوم ووسائلها والنجاسة وانواعها

    باذن الله تعالى المرة الجاية
    نتكلم عن الوضوء والغسل ان كان لينا عمر



    المصدر
    الفقه الميسر مكتبة الازهر
    الفقة على المذاهب الاربعة
    ازاى الاولاد ؟

    وانا كمان ;)

  5. #5
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    لنهاردة ان شاء الله درس صغنطوط وسهل وقابل للتطبيق الفوري

    هنتكلم عن اييييييييييييييييييه؟

    الوضوء

    بيقولك الوضوء من الوضاءة يعنى البهاء كده والنور

    وهو طهارة مائية
    حلوة دي
    ماحنا قلنا في كذا طريقة و كذا وجه للطهارة
    الماء واحد منها
    المهم انه طهارة مائية تتعلق بايه؟
    باللبس؟
    بالاكل؟
    بالمكان؟
    ولا حاجة من دي
    تتعلق باعضاء مخصوصة من الجسم منها بيتغسل ومنها بيتمسح


    الوضوء اخباره ايه بقى؟
    فرض وللا سنة وللا ايه بالظبط يا الحمد لله؟

    الوضوء فرض لصحة الصلاة
    في الحديث اللى رواه البخاري " لا يقبل الله صلاة احدكم اذا احدث ختى يتوضأ"


    طب هو فرض وعرفناها

    احنا بقى كبنى ادمين نستفيد منه بحاجة؟
    فضله يعنى

    قاللك
    عن ابى هريرة ان رسول الله صلى الله عليه وسلم قال " الا ادلكم على ما يمحو به الخطايا و يرفع به الدرجات؟" قالوا بلى يا رسول الله
    قال " اسباغ الوضوء على المكاره و كثرة الخطا الى المساجد و انتظار الصلاة بعد الصلاة فذلكم الرباط فذلكم الرباط فذلكم الرباط " قالها صلى الله عليه وسلم 3 مرات

    طيب تعالوا نشوف اركان الوضوء او فرائضه
    يعنى اللى ما يعملش حاجة منهم يبطل وضوءه

    الفرض الاول :
    النية يعنى ما تكونش داخل تأخد دش و تطلع تصلى لازم تكون عاقد النية انا هاتوضأ

    الفرض التانى :
    غسل كل الوجه بالماء الايه يا حياة؟ الطهور شطورة مرة واحدة
    لو كررت بعد اول مرة تبقى سنة مش فرض
    طيب عشان الكروتة و في الشتا بقى بتلاقي حاجات غرييييييبة بتحصل وتلاقي نظام الفلسعة اشتغل
    اللى يمسح اول حاجة تقابله _ وغالبا المناخير _ و يقول غسلت
    واللى ياخد الحتة اللى في النص
    و اللى ينسى حوالين عينيه وتلاقي وشه بقى عامل زي الباندا

    الوجه من اول الجبهة _ يعنى من حد الشعر _ لحد تحت الذقن وما بين شحمتى الودان
    كل ده


    الفرض التالت :
    غسل اليدين مع المرفقين مرة واحدة وخلى بالك من مع دي _مع مش الى_ المرفق اللى هو ايه؟ اللى هو الكوع
    و البنات تشيل المونوكييييييير

    الفرض الرابع
    مسح الرأس مرة واحدة
    المسح ان ايدك المبلولة بس بالميه تمشيها على راسك
    الرسول كان بيبدأ باول الرأ من قدام ويرجع لورا ويقوم راجع تانى لقدام

    الفرض الخامس
    غسل الرجلين مع الكعبين وخلى بالك من الكعبين دى
    و خلى بالك اكتر من غسل
    الكعب يتغسل مش يتمسح
    ركز عشان لو ما بتغسل رجللك تحت الحنفيه وبتاخد شوية ميه في ايدك تغسل بيهم
    دول بيخلصوا عقبال ما توصل للكعب
    وتبقى انت كده بتمسح مش بتغسل
    ويل للاعقاب من النار


    كل واحد بقى في بيته يعمل حنفيه الغسالة واطية في الارض
    عشان تبقوا تغسلوا رجليكوا فيها بقى
    انتو عارفين حكم السن


    الفرض السادس
    الترتيب زي ما جه في القرآن
    فاغسلوا وجوهكم
    ايديكم الى المرافق
    وامسحوا برؤسكم
    و ارجلكم الى الكعبين

    الفرض السابع
    الموالاه يعنى المتابعة
    يعنى حضرتك ماتش الاهلى والزمالك شغال بلاش الاهلى والزمالك مانشستر و ليفربول _ هم ايه علاقتهم ببعض اصلا؟ _ ما علينا
    المهم شغال والاذان ادن قمت تتوضى
    وودنك مع التليفزيون جوووووووون تقوم سايب المية مفتوحة وتجري تشوف و ترجع تكمل
    يا راااااااجل بقى ده اسمه كلام؟

    ما ينفعش

    الاحناف قالوا الاركان اربعة بس اللى هم اللى وردوا في الاية
    و المالكية قالوا سبعة و اضافوا التدليك يعنى تغسل بجد مش يادوب تغمر بالمية
    الشافعية قالوا ستة و شالوا الموالاة
    و الحنابلة قالوا ستة و زودوا الترتيب والموالاة و النية شرط لطهارة الاحداث كلها


    طيب ايه شروط وجوب الوضوء يعنى مين يجب عليه الوضوء يا رشروش؟

    العاقل
    البالغ
    القدرة على استعمال الماء الطهور الكافي
    ضيق الوقت يعنى ايه يعنى اذن المؤذن وجب الوضوء
    وجود الحدث انما لو كان متوضى اصلا مش واجب عليه انه يعيده



    طيب نعرف منين ان الوضوء ده صحيح يا تيرمينيتور؟

    اول حاجة ميبقاش فيه حائل او مانع للبشرة زي الشمع والدهن و العجين وكده
    ان اثناء الوضوع ما يحصلش حاجة تبطل الوضوء
    ان المية تكون طهور

    وفيه فيه شروط وجوب وصحة مع بعض اللى هي
    الاسلام
    عدم النوم او الغفلة
    نقاء المرأة من الحيض او النفاس



    طيب سنن الوضوء؟
    1 التسمية في اول الوضوء

    2 السواك

    3 غسل اليدين الى الرسغين

    4 المضمضة 3 مرات

    5 الاستنشاق و الاستنثار 3 مرات يعنى تسحب ميه جوه الانف وتطردها براه

    6 تخليل اللحية

    7 تخليل الاصابع

    8 تثليث الغسل يعنى تعمل الحاجة 3 مرات جاء اعرابي الى رسول الله صلى الله عليه وسلم يسأله عن الوضوء فاراه ثلاثا ثلاثا ثم قال له " هذا الوضوء فمن زاد على هذا فقد اساء و تعدى وظلم "

    9 التيامن اليمين الاول

    10 مسح الاذنينمن جوه ومن بره
    على فكرة الحنابلة قالوا الودان فرض عشان اخلة في حد الراس

    11 اطالة الغرة و التحجيل يعنى اييييييييييه؟
    عارفين الحصان العربي الاصيل
    بيبقى عنده حتة بيضاء في راسه من قدام وفوق قدم رجله كده
    اهو احنا عايزين نبقى عاملين كده بس الابيض ده يبقى نور
    ده ييجي ازاي؟
    باننا نغسل جزء اكتر من المفروض في الراس و المرافق والكعوب

    12 الاقتصاد في الماء

    13 الدعاء اثناء وبعد الوضوء

    فيه فقهاء اضافوا فضائل
    مسح الرقبة و استقبال القبلة و عدم التكلم الا بذكر الله و الدعاء


    مكروهات الوضوء؟
    يكره انه يسيب السنن يعنى انت مستغنى عن الثواب؟
    يكره الاسراف في الماء
    يكره الزيادة عن 3 مرات في الغسل ومرة في الممسوح


    اااااااااه ايه اللى ينقض الوضوء بقى مهمة دى يا ايه كي ام
    1 كل ما خرج من السبيلين
    بول وغائط ومنى و مذى وودي و ريح

    2 ذهاب العقل
    يا بالجنون يا بالنوم يا بالسكر يا بالمخدر ( مخدرات او تخدير بقى )
    3 النوم الثقيل المستغرق يعنى تنام وتحلم كمان او ما تحلمش عارفين مش مراحل النوم 2 اهي التانية بقى تبطل الوضوء
    قالوا لو نايم مضجعا او متكئا ده ينقض انما لو نايم جالس ده لا ينقض


    4 مس الفرج و الدبر بدون حائل


    5 لمس المرأة الاجنبية و قال الدكتور وهبة الزحيلي فى كتاب الفقه الاسلامى وادلته ان لمس العارض او الطارئ او الذى لا لذة فيه ولا شهوة لا ينقض الوضوء


    طيب وايه اللى ما ينقضش الوضوء؟

    1 الشك في الحدث
    يعنى اللى يقول حصل وللا لا؟

    روى الامام مسلم و ابو داوود والترمذى عن ابي هريرة عن النبي صلى الله عليه وسلم انه قال " اذا وجد احدكم في بطنه شيئا فاشكل عليه اخرج منه شيء او لا فلا يخرج من المسجد حتى يسمع صوتا او يجد ريحا"

    2 اكل لحم الابل عند الجمهمر ماعدا الحنابلة

    3 القهقهة في الصلاة عند الجمهمر ماعدا الاحناف اللى قالوا تبطل الصلاة وتنقض الوضوء عشان فاعلها يرتدع

    4 تغسيل الميت عند الجمهور ماعدا الحنابلة




    طيب س سؤال واحد عنده عذر
    زي ايه؟
    عنده مرض ماتخليهوش يحافظ على وضوءه
    زي سلس البول او خروج ريح بكرة او خروج دم الاستحاضة بكثرة

    قاللك دول يتوضوا لكل صلاة و ماعليهومش حاجة باذن الله


    لو انا مش متوضيه ممنوع اعمل شوية حاجات حد عارفهم؟

    1 الصلاة
    2 الطواف بالكعبة
    3 مس المصحف


    و الوضوء يستحب وانت بتعمل شوية حاجات ايه هي؟

    عند الذكر
    عند النوم
    الجنب اللى عايز ياكل او يشرب اذا تعذر الاغتسال بسرعة
    قبل الغسل
    عند حمل الميت
    عند الغضب _ ودي متجربة يا دي ام دي _
    تجديد الوضوء لكل صلاة
    ازاى الاولاد ؟

    وانا كمان ;)

  6. #6
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    تعالوا بقى نشوف الغسل بقى بسرعة

    الغسل و الضمة على الغين
    هو انك تشمل الجسم كله بالماء الطهور

    وهو واجب
    قال تعالى " وان كنتم جنبا فاطهروا " المائدة 6


    امتى الواحد يغتسل؟
    1 عند خروج المنى بشهوة سواء في النوم او اليقظة
    2 التقاء الختانين
    3 عند انتهاء دم الحيض و النفاس
    4 الموت
    5 دخول الاسلام


    طيب اركانه؟

    النيه
    تعميم الجسد كله بالماء
    بما فيها فروة الراس وجلد اللحيه
    ومش شرط ان المرأة تفك ضفايرها اذا وصلت الميه لاصل الشعر ( فروة الراس يعنى )
    الاحناف قالوا و كمان عليهم المضمضة والاستنشاق
    و المالكية قالوا عليهم الموالاةو التدليك و تخليل الشعر

    طيب سنن الغسل
    التسمية
    غسل اليدين 3 مرات
    غسل ما به اذى ( يعنى الحتة المتوسخة تتغسل زي رجل سيادكت اللى لونها اسود من لعب الكورة )
    الوضوء
    البدء بغس الرأس
    الدلك
    التيامن
    الموالاة
    تثليث الغسل
    الاقتصاد في الماء
    تخليل الشعر



    فيه اغسال مستحبة
    يعنى مش فرض بس مستحبة

    يوم الجمعة
    العيدين ( حوماية العيد بس اعملها بنية عشان تاخد ثواب )
    غسل من غسل ميتا
    غسل الاحرام بحج او عمره _ والكلام لازايجوس مخصوص _
    غسل دخول مكة
    عند دخول المدينة
    غسل الوقوف بعرفة _ يا رب اوعدنا _
    عند الاستسقاء ( صلاة طلب المطر ) و الكسوف والخسوف و كل اجتماع خيري بالناس


    طيب ايه اللى حرام الجنب و الحائض والنفساء يعملوه

    1 الصلاة
    2 الطواف بالكعبة
    3 مس المصحف وحمله وقراءته
    4 المكث في المسجد
    5 الصيام للحائض و النفساء


    المصدر
    الفقه الميسر

    سبحانك اللهم وبحمدك اشهد الا اله انت استغفرك واتوب اليك
    ازاى الاولاد ؟

    وانا كمان ;)

  7. #7
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    ونكمل مع التيمم
    ومش عارفة هاقدر اكتب المرة دي وللا دي ام دي هينقلهالكم

    على العموم
    عايزين نخلص كل ما يتعلق بقى بالطهارة والوضوء والتيمم عشان نبدأ في الصلاة بقى
    عشان نلحق اي حاجة في رمضان
    انا واحدة من الناس عايزة اذاكر الصلاة صح


    المهم عشان ما نطولش
    تعالوا نشوف التيمم
    كلمة تيمم في اللغة يهنى التوجه
    ؟؟؟؟
    ايه العلاقة؟

    بيقوللك في الشرع بقى معناها التوجه للصعيد الطيب ( التراب الطاهر واشباهه من احجار و غيرها ) بقصد استباحة الصلاة

    طبعا هو زي ما قلنا قبل كده واجب امتى؟؟؟؟؟
    لما ميكونش فيه ماء طاهر او فيه بس مش كفاية

    قال تعالى في سورة المائدة الاية 6 (وان كنتم مرضى او على سفر او جاء احد منكم من الغائط او لامستم النساء فلم تجدوا ماء فتيمموا صعيدا طيبا فامسحوا بوجوهكم و ايديكم منه )


    و بص بقى الحديث الجميل ده
    والله حديث حلو قوي

    روى الامام احمد في مسنده عن ابي امامة ان رسول الله صلى الله عليه وسلم قال ( جعلت الارض كلها لي ولامتى مسجدا وطهورا فاينما ادركت رجلا من امتى الصلاة فعنده طهوره و عنده مسجده)
    لو انا في فقرة التفسير مكنتش سيبت الحديث ده اصله جميل قوي
    جعلت ادى واحد

    كلها
    ادى اتنين

    لي ولامتى
    ادى تلاتى

    عنده طهوره وعدنه مسجده
    ادى اربعة
    جميل طيب نكمل
    هو ربنا شرعه ليه؟
    اصل ربنا سبحانه وتعالى فرض الصلاة وفرض الطهر عشان تصح
    و احب الاعمال الى الله منها الصلاة على وقتها
    طب افرض دخل الوقت ومفيش ميه تقعد انت _ كمؤمن يعنى _ مهموم لانك مش عارف تصلى
    فربنا عز وجل حب يسهلها عليك


    طيب ايه اللى المواضع اللى يسمح فيها بالتيمم
    ؟
    ماحنا قلنا ان مفيش ميه طهور واو فيه ومتكفيش

    ماشي في حاجة تانية

    الجدع اللى يقول
    ها؟

    مين؟
    ايوه كده يا شيكو تمام

    ان فيه ميه بس مش قادر يستخدمها
    زي اللى عامل عملية ومينفعش يقرب منها ميه
    او زي اللى عنده مرض جلدى فطري مثلا مينفعش معاه الجلد يتبل
    او زي اللى الميه قريبة منه بس لو راح هيصيبه او اهله خطر
    او ان المية بارده جدا جدا زي بتوع الاسكيمو كده ( اي واحد مسافر الاسكيمو ياخد معاه حجر من هنا )


    بصوا الحتة اللى جاية دي
    ده اللى باقول عليه
    الواحد يعرف الحكم المطلق انما في حالات معينة لاااااااااااااااااازم يرجع لاهل العلم لانها بتبقى فتاوى



    بصي يا حياة انتى وبلو الحديث ده كده

    روى ابو داوود عن جابر قال ( خرجنا في سفر فاصاب رجل منا حجر فشجه في رأسه ثم احتلم هذا الرجل فسأل اصحابه : هل تجدون لي رخصة في التيمم فقالوا لا نجد لك رخصة وانت تقدر على الماء فاغتسل فمات فلما قدمنا على رسول الله صلى الله عليه وسلم اخبر بذلك فقال قتلوه قتلهم الله هلا سألوا اذا لم يعلموا فانما شفاء العي السؤال انما كان يكفيه ان يتيمم و يعصب على حرجه خرقة ثم يمسح عليه ويغسل سائر جسده)

    عشان يقبل التيمم لازم يكون المسلم بالغ وعاقل
    و عشان يبقى صحيح فيه شوية شروط


    دخول الوقت
    مانت ماتسوقش فيها بقى لازم دخول الوقت ماهو عقبال ما يدخل الوقت ممكن تلاقي ميه

    النية

    طلب الماء عند فقده
    بمعنى انت عارف ان المية قاطعة من الصبح و يأذن الظهر تقوم متيمم ونازل
    طب افتح الحنفية الاول شوف جت وللا لا
    يعنى قبل ما تتيمم تتأكد ان مفيش ميه

    عدم وجود حائل على اعضاء التيمم


    عجز الشخص عن استعمال الميه


    وان التيمم يكون بحاجة طاهرة من الارض ( مينفعش بشجر مثلا )


    طيب اركان التيمم

    -النية

    -الصعيد الطاهر ( فاكرين لما بيقول صعيد جبل عرفات يعنى سطح جبل عرفات بما عليه من تراب ورمل واحجار )

    -مسح الوجه كله و اليدين الى المرفقين بضربتين
    يعنى ايييييييييييييه؟

    يعنى يفرد كفه
    و يضرب على الارض ضربةو ينفخ فيها و يمسح وجهه
    و بعدين يفرد كفه تانى ويضرب على الارض تانى و ينفخ فيها ويمسح ايده لحد المرفق

    على فكرة المالكية والحنابلة بيتيمموا بضربة واحدة

    سنن التيمم بقى

    التسمية ( الحنابلة بيقولوا واجب)
    الترتيب ( الشافعية و الحنابلة بيقولوا فرض )
    تخليل الاصابع
    نفخ اليد بعد الضرب على الارض
    السواك


    كلمتين تلخيص بقى
    التيمم بدل من الوضوؤ والغسل عند عدم وجود الماء او عند العجز عن استعماله
    وعلى كده يباح بيه ما يباح بالوضوء و ينقضه ما ينقض الوضوء
    ازاى الاولاد ؟

    وانا كمان ;)

  8. #8
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    المسح على الخفين يا جماعة
    الشتا داخل وتلاقي رجلين الناس دخلت البيات الشتوى
    دخلت في اللكلوك و ماتطلعش منه غير على اغنية ست الحبايب يا حبيبة في الربيع بقى و عليكو خير
    وتلاقي بقى الجزم مقاسين مقاس 45 في الشتا و مقاس 40 في الصيف

    تعالوا نعرف ايه اصل الحكاية

    الخف معروف ايه هو؟
    ملبوس القدم

    تمام

    حكم المسح عليه بقى؟
    الجواز
    طيب والدليل انه جائز
    روى البخاري عن سعد ابن ابي وقاص ان النبي صلى الله عليه وسلم مسح على الخفين
    طب و ليه ربنا اجازه

    عشان برضه ربنا بيحبنا وعايز ييسر علينا

    طيب الشروط بقى يا شباب و الكل يركز خصوصا ار بي جي

    ان يمكن تتابع المشي فيهما ( يعنى قويين ويستحملوا المشي ) يعنى الشرابات الفيليه متنفعش يا بنات
    ان يكونا ساترين القدم والكعب
    ان يكونا طاهرين
    ان يلبسهما المسلم على طهارة مائية تامة ( يعنى ما ينفعش تمسح عليهم بعد تيمم ( الشافعية بس قالوا يجوز بعذر غير فقد الماء )
    انه ميكونش على مكان المسح المفروض حائل

    طب ازاي تمسح عشان انا كنت باعملها غلط

    قاللك ايدك اليمين على مقدمة رجلك اليمين ( الخف اليمين ) و ايدك الشمال على مقدمة رجلك الشمال ( الخف الشمال )و تفرج بين صوابعك شوية وتطلع لحد الساق فوق الكعبين
    معايا؟

    جربها كده يا وينر


    بص بقى يا تيرمينيتور اللى جاي ده مهم بما انك رجل صاحب اسفار يعنى

    مده المسح قد ايييييييييه؟

    يوم بليلته للمقيم
    و 3 ايام بلياليهم للمسافر
    يعنى مش 3 او 4 شهور وللا من الحوماية للحوماية
    هم اخرهم وانت في بيتك يوم وليلة


    طيب ايه نواقض او مبطلات المسح على الخفين ؟
    نفس نواقض الوضوء
    زائد ان تعدى المدة المسموحة
    و كمان انه يحصل حاجة توجب الغسل
    و كمان لو قلعت الخف او اتقطع يعنى لو رجلك خرجت للعالم الخارجى لازم تتوضى تانى

    طيب لو واحد متجبس يعمل ايييييييييييييييييييييييييييييييييييييييه؟

    تمام برضه يمسح على الجبيرة و هنا بقى ما يفكهاش كل يوم
    لان فيه ضرر عليه

    طب افرض فيه جنابة؟
    برضه يمسح عليها


    طب افرض اتفكت منه غلط
    يركبها من غير وضوء ويمسح عليها برضه


    هو فيه سماحة زي دي في حتة في الدنيا وللا في دين في الدنيا غير الاسلام؟
    ازاى الاولاد ؟

    وانا كمان ;)

  9. #9
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    طيب اخر موضوع عشان نستعد للصلاة

    الحيض و النفاس والاستحاضة

    الحيض : معروف متهيألى اللى هو دم ينزل من رحم المرأة متقطع على حسب العادة الشهرية منذ البلوغ الى سن اليأس

    لونه اسود او احمر و ما بين الابيض و الاسود ( الكدرة )

    مدته فيها اختلافات
    و خلوا بالكوا احنا بنتكلم دلوقتى شرعا بعيد عن الطب كتب الطب بتقول خمسة

    الشرع بيقول
    الاحناف اقلها 3 و اوسطها 5 و اكثرها 10
    المالكية قالوا لا حد لاقلها واكثرها 15
    الشافعية والحنابلة قالوا اقلها يوم وليلة و اكثرها 15 وغالبه 6 او 7

    و قالوا العلماء على اختلاف برضه ان اقل مده بين كل حيضة والتانية 15 او 13 يوم

    تلخيص الموضوع يعنى
    اكثرها 15 و ما بين كل واحدة والتانية 15



    دم النفاس؟
    هو دم ما بعد الولادة او السقط
    اقلها لحظة يعنى ممكن تولد و بعد ما المشيمة ما تخرج ما يكونش فيه دم يبقى كده خلاص
    و اكثرها 40 يوه


    طيب
    ايه اللى يحرم على الحائض و النفساء؟
    _ الصلاة والصوم و تقضى الصوم لا تقضى الصلاة
    _ مس المصحف و دخول المسجد و الطواف و الاعتكاف و الجماع



    الاستحاضة طيب تطلع ايه؟
    دم في غير وقت الحيض او النفاس
    عارفين ال dysfunctional uterine bleeding
    اهو ده

    طيب

    دلوقتى بيحصل لبس عند كتير من البنات والسيدات
    تعرف منين ده استحاضة وللا حيض؟



    1-انها تكون عارفة مده الحيض عندها قد ايه و عليها اي نزيف بعدها تبقى استحاضة
    2- او انها تكون عارفة ومميزة دم الحيض و تعرف انه مش حيض
    3-طب ولا عارفة مده ولا عارفة تميز يبقى حيضها 6 او 7 ايام والباقي استحاضة


    الاستحاضة ليها احكام
    _ لا يجب عليها الغسل الا مرة واحدة عند انقطاع المدة اللى احتسبتها او انه يكون فيه سبب تانى زي الجنابة
    _يجب عليها الوضوء لكل صلاة
    _ يستحب ات تتوضأ بعد دخول الوقت
    _ يجوز الجماع



    و كل سنة وانتو طيبين
    المرة الجاية ان عشنا وكان لينا عمر نبدأ باذن الله تعالى الصلاة


    يا جماعة بالله عليكو اللى يقرا ويعجبه يدعيلي مش عايزة شكر الدعاء لي ولوالدي بس

    سبحانك اللهم وبحمدك اشهد الا اله انت استغفرك واتوب اليك
    و صلي اللهم على سيدنا محمد وعلى اله وصحبه اجمعين
    ازاى الاولاد ؟

    وانا كمان ;)

  10. #10
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    الصلاة

    الحلقة النهاردة طويلة شوية بس خفيفة وفيها مواقف طريفة كتير
    اللى يحب يضحك شوية ويتعلم كتير يقراها مش هيندم
    و اللى يحب يتعلم بسرعة
    يقرا الملون

    طبعا يا شباب الموضوع معليهوش خلاف ان الصلاة عماد الدين و هي اول عبادة من العبادات و او ما يحاسب عليه البنى ادم و اخر وصايا النبي

    الصلاة تجب على المسلم البالغ العاقل


    طب تعالوا نشوف ازااااااااااااااااااااااااي اتحددت مواعيد الصلاة
    يعنى ليه بنصلي المغرب عند غروب الشمس

    و الظهر عند بداية الزوال
    و كده يعنى

    عن جابر بن عبد الله ان النبي صلى الله عليه و سلم جاءه جبريل عليه السلام فقال : قم فصله فقام النبي صلى الله عليه وسلم فصلى الظهر حين زالت الشمس ثم جاءه العصر فقال قم فصله فقام فصلى العصر حين صار ظل كل شيء مثله ثم جاء المغرب فقال قم فصله فقام فصلى المغرب حين وجبت الشمس ثم جاءه العشاء فقال قم فصله فقام صلى الله عليه وسلم فصلى العشاء حين غاب الشفق ثم جاءه الفجر حين برق الفجر او حين سطع فقال له قم فصله فصلى الفجر


    و على كده بقى

    صلاه الصبح
    من طلوع الفجر الى قبيل طلوع الشمس


    صلاة الظهر
    من زوال الشمس عن وسط السماء الى ان يصير ظل كل شيء كمثله


    صلاة العصر
    لما يكون ظل الحاجة قدها لحد غروب الشمس


    صلاة المغرب
    من غروب الشمس لحد مغيب الشفق ( اللون الاحمر )


    صلاة العشاء
    من غروب الشفق الاحمر لحد الفجر


    بس خالو بالكو دى الاوقات اللى يجوز فيها الصلاة انما احب الاوقات اولها


    اللى ينسى صلاة بقى او ينام و يصحى يلاقي اللى بعدها جت
    يعمل ايه؟
    الناس بتقوللك صلي الظهر مع الظهر بتاع تانى يوم

    تقوم حضرتك ترد تقول ايه؟

    يا مؤمن هو حد ضامن عمره

    فليصلها اذا ذكرها

    وقت ما تفتكر تصلي

    طب تصلى الظهر وللا العصر
    الاتنين فاتوك جماعة

    حضرتك تصلي الظهر الاول وبعدها العصر


    فيه اوقات مكروه فيها الصلاة يا شباب
    مخالفة لعبده الشمس

    اللى هي ايه؟

    عند طلوع الشمس
    و عشان كده يقولك صلاة الضحى بعد الشروق ب 1/3 ساعة

    و عند زوالها الى جهة الغرب

    و عند غروبها

    طب حضرتك راحت عليك نومه و صحيت وفاضل 3 دقايق على المغرب تغمل ايه

    قاللك صلى الفرض وما تصليش النافلة
    غير الجنازة

    و في الموضوع ده اقوال الفقهاء كانت كده

    الشافعية اجازوا الصلاة بسبب مش مجرد تعبد
    الحنابلة والمالكية قالوا لا ماعدا العصر
    الاحناف قالوا لا ماعدا العصر و الجنازة

    ازاى الاولاد ؟

    وانا كمان ;)

  11. #11
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    طب ندخل في الجد بقى

    اركان الصلاة
    اللى لو حاجة ماتعملتش تبطل الصلاة

    1 النية
    و النية محلها القلب مش شرط التلفظ باللسان


    2 تكبيرة الاحرام
    اللى هي الله اكبر عند اول الصلاة
    و اللى ما يعرفش عربي؟
    يتعلم


    3 القيام
    يعنى تقف
    لازم تكون واقف في الفرض مادمت تستطيع
    اما السنن والنوافل ممكن تصلى قاعد بس خلى بالك الاجر بالنص
    لو قعدت وانت قادر تقف مش هتاخد الثواب كامل

    اما اللى مش قادر وهو واقف
    يصلى قاعد
    او نايم
    يا رب يصلي بحركة عينه

    طب ده معناه ايه؟
    معناه حاجتين
    الاولى ان الصلاة مهمة جدا جدا جدا
    و التانية ان ربنا رحيم جدا جدا جدا

    كان مكن عز وجل يسيبك
    وصلى لو جدع بقى
    و برضه ربنا هيكون عادل


    4 الفاتحة
    عن عبادة بن الصامت ان النبي صلى الله عليه وسلم قال لا صلاة الا بفاتحة الكتاب
    و بسم الله الرحمن الرحيم متعتبرش ايه في الفاتحة يا شباب وانما جزء من ايه في سورة النمل
    و عليه
    فالاحناف و المالكية قالوا قراءتها سرا مستحبة
    و المالكية قالوا مادامت مش مش ايه يبقى لا تقرأ


    5 الركوع
    عارفين تركع ازاي؟
    تتنى ظهرك بحيث ان الراس والظهر يبقوا على خط واحد
    و ايدك على ركبتك
    و تستقر في الوضع ده
    مش هوب ياللا اديله اللى بعده
    ما ينفعش
    انت بتنشر غسيل يا عم؟
    و تقول سبحان ربي العظيم

    عينك فين بقى؟؟؟؟؟

    محل سجودك يا استاذ


    6 الرفع من الركوع
    يعنى لو ما وقفتش بعد الركوع تبقى صلاة باطلة
    و تقف وقفة راجل كده
    لحد ما كل عضمة تستقر مكانها


    7 السجود مرتين في كل ركعة و الرفع منهما
    وانت ساجد
    خلى بالك
    7 اعضاء لازم يكونوا على الارض
    الجبهة
    و اليدين
    و الركبتين
    و الرجلين


    8 القعود الاخير و قراءة التشهد
    طيب
    حد حافظ التشهد؟؟؟
    ده واجب عشان الناس نايمة كده
    انا عايزة صيغتين للتشهد
    و اللى هيجيبهم
    ليه جايزة
    و يا ريت يبقى من القاهرة عشان اعرف اوصلهاله


    9 الصلاة على النبي بعد التشهد

    ده ركن عند الشافعية والحنابلة و سنة عند الاحناف والمالكية
    و افضل صيغة هي الصلاة الابراهيمية


    10 السلام في اخر الصلاة
    العلماء قالوا الاولى ركن والتانية سنة
    المهم انهم اتنين واحد عن اليمين وواحدة عن الشمال
    و تقول السلام عليكم ورحمة الله ( وبركاته )



    يبقى الاركان 10
    ايه هم بسرعة
    دول مهمين جدا
    لو واحد طارت باظت الصلاة

    هاه
    دي ام دي 1
    النية

    حياة 2
    تكبيرة الاحرام

    بلو 3
    القيام

    الحمد لله
    الفاتحة

    زد ام زد
    الركوع

    ستروما
    القيام من الركوع

    نتاوي
    السجود والقيام منه

    رونى
    التشهد الاخير


    ام اي ام
    الصلاة على النبي عند الشافعية و الحنابلة


    وجه القمر
    التسليم


    الله يفتح عليكو


    طيب فيه شروط للصلاة لا تصح الا بيها

    الله؟
    ماحنا قلناها

    لااااااا
    احنا قلنا الاركان
    يعنى حاجات جوا الصلاة نفسها


    انما الشروط
    دى حاجات بره حركات و افعال الصلاة نفسها
    ايه هي بقى


    الاول شروط الوجوب
    اللى احنا قلناها
    العقل
    البلوغ
    النقاء من دم الحيض و النفاس


    شروط الصحة بقى اللى لو ما عملنهاش صلاتنا تبقى مش صحيحة
    1 دخول الوقت
    يعنى حضرتك ما تصليش الضهر قبل ما يأذن

    طب افرض صليته قبل ما يأذن
    تعتبر نافلة ولازم تصلى الفرض
    ماحنا مش هنصلي بمزاجنا وللا ايه يا اون لاين
    حد يصحيه يا جماعة


    2 الطهارة من الحدث الاصغر و الاكبر



    3 طهارة الثوب و البدن و المكان


    4 ستر العورة
    للرجل بين السرة والركبة

    للمرأة كل جسدها ماعدا الوجه والكفين
    رجلين تبان ممنوع
    القصه ممنوع
    الاسدال الخفيف بتاع الصيف ممنوع


    5 استقبال القبلة
    طب افرض انت في مصيف و مش عارف القبلة فين
    و صاحب العمارة مش موجود
    و انت هتصلي في الجامع واختك عايزة تصلي تعمل ايه؟؟؟

    اجتهد في تحديد المكان
    لو انت في اسكندرية والساحل الشمالى
    خلى البحر وراك
    و القبلة تبقى جهة الشمال شوية


    لو انت في البحر الاحمر
    بص ناحية البحر



    المهم تجتهد

    و ان شاء الله صلاتك صحيحة وماتعيدهاش الا عند الشافعية

    طب افرض وانت بتصلي في الشارع
    عدى عليك واحد وقاللك القبلة على طول يا شيخ
    لف وانت في الصلاة وكمل صلاتك

    طب افرض انت تقدر تجتهد في ايجاد القبلة و كسلت
    صلاتك باطلة يا استاذ وتعيدها



    يعنى الشروط 5
    1 الوقت
    2 الطهارة من الحدثين
    3 طهارة الثوب والمكان
    4 ستر العورة
    5 القبلة






    طيب سن الصلاة؟

    1 رفع اليدين عند تكبيرة الاحرام
    بحيث انهم يبقوا مفرودين و حذا الكتاف و طراطيف صوابعك فوق الودن


    2 وضع اليد اليمنى فوق اليسرى
    تحت او فوق السرة او تحت الصدر
    المالكية بس قالوا مكروه
    اقولكوا ليه في الخباثة

    زمان سمعت او قريت مش فاكرة
    ان الامام مالك اتعذب بسبب اراؤه واتسجن
    فحصل مرض في ايده خلاه ما يقدرش يرفعها في الصلاة
    فاتباعه بقوا يعملوا قياسا على اللى شافوه من معلمهم
    و الله اعلم


    نكمل

    3 دعاء الاستفتاح
    المالكية بس هم اللى قالوا مكروه الدعاء او التسبيح بين تكبيرة الاحرام و القراءة
    خد عندك شوية ادعية احفظ اللى تحبه وقوله
    " اللهم باعد بين خطاياي كما باعدت بين المشرق و المغرب اللهم نقنى من خطاياي كما ينقى الثوب الابيض من الدنس "
    "سبحانك الهم وبحمد و تبارك اسمك و تعالى جدك و لا اله غيرك"
    "وجهت وجهى للذى فطر السموات والارض حنيفا وما انا من المشركين . ان صلاتى ونسكي ومحياي و مماتى لله رب العالمين . لا شريك له وبذلك امرت و انا من المسلمين "


    4 الاستعاذة
    سرا قبل الفاتحة في الركعة الاولى
    و المالكية برضه قالوا مكروه

    5 التأمين
    انك تقول امين بعد ما تنتهي الفاتحة
    جهرا في الصلاة الجهرية وسرا في السرية

    6 قراءة سورة او ما تيسر من القرآن يعنى بعد الفاتحة
    في اول ركعتين من كل صلاة مفروضه
    و كل ركعات الصلاة النافلة



    7 تكبيرات الانتقال
    الله اكبر لما تركع او تسجد
    او انك تقول سمع الله لمن حمده لما تقوم من الركوع لو كنت امام
    و ربنا لك الحمد لو مأموم

    8 جهر الامام بالتكبيرو التسميع والسلام
    عشان الناس يسمعوا


    9 الوقوف مع مباعدة الرجلين شوية صغيرين والنظر موضع السجود


    10 هيئة الركوع
    زي ما قلناها في الاركان
    الرسول كان بيركع كده يثنى ظهره و يسوي مستوى راسه مع ظهره وايده قابض بيها على ركبتيه عليه الصلاة والسلام


    11 التسبيح في الركوع


    12 هيئة السجود
    المفروض انه ينزل بركبته الاول و بعدين ايده و بعدين راسه
    معايا يا شباب
    عشان هتلاقوا حاجات غريبة
    و تلاقي اللى بيقوللك لااااااا الايد الاول

    عن وائل بن حجر قال رأيت رسول الله صلى الله عليه وسلم اذا سجد وضع ركبتيه قبل يديه و اذا نهض رفع يديه قبل ركبتيه


    الرجل يستحب انه يبعد ايده عن جنبه و يرفه بطنه عن فخذه
    بعكس المرأه
    لانه استر ليها

    شايفين الدين


    و يقول سبحان ربي الاعلى 3 مرات



    13 هيئة السجود بين السجدتين
    الجلوس على الرجل اليسرى
    و ينصب اليمنى و يخرجها من تحته


    و نقول
    اللهم اغفر لي و اهدنى و عافنى و ارزقنى


    14 صفة الجلوس في التشهد الاول
    زيه زي اللى بين السجدتين

    و يفرد ايده الشمال على فخذه الشمال
    اما اليمين
    يضم الخنصر و البنصر
    و يعلق الوسطى والسبابة مع بعض
    و يشاور بالسبابة

    فيه ناس الوحى بينزل عليهم وتلاقيهم شغالين بالاتنين الله ينور
    ما ينفعش يا جماعة


    15 صفة الجلوس في التشهد الاخير
    عند الاحناف زيه زي التشهد الاول

    اما المالكية والشافعية والاحناف
    فعندهم
    ينصب رجله اليمنى و يخلى باطن رجله الشمال تحت فخذه اليمين و مقعدته على الارض



    16 الاذكار بعد السلام
    الرسول صلى الله عليه ولم
    كان بيستغفر 3 مرات ويقول اللهم انت السلام ومنك السلام تباركت يا ذا الجلال والاكرام

    و كان بيقول اللهم اعنى على ذكرك وشكرك وحسن عبادتك

    عن ابى هريرة قال ان النبي صلى الله عليه وسلم قال من سبح لله عقب كل صلاة ثلاثا وثلاثين وحمد الله ثلاثا وثلاثين و كبر الله ثلاثا وثلاثين فتلك تسع وتسعون ثم قال تمام المائة لا اله الا الله وحده لا شريك له له الملك وله الحمد وهو على كل شيء قدير غفرت له خطاياه و ان كانت مثل زبد البحر

    ازاى الاولاد ؟

    وانا كمان ;)

  12. #12
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    طيب صفة صلاة النبي يا شباب

    هو حديث واحد بس
    جاء في الصحيحين عن ابي حميد الساعدى انه قال وهو في عشرة من اصحاب رسول الله صلى الله عليه وسلم " انا اعلمكم بصلاة رسول الله صلى الله عليه وسلم فقالوا ما كنت اقدم منا له صحبه و لا اكثرنا له لقاء قال : بلى قالوا : فاعرض فقال:
    كان رسول الله صلى الله عليه وسلم اذا قام الى الصلاة اعتدل قائما و رفع يديه حتى ياذي بهما منكبيه ثم يكبر فاذا اراد ان يركع رفع يديه حتى يحاذى بهما منكبيه ثم قال : الله اكبر وركع
    ثم اعتدل فلم يصوب رأسه ولم يقنع ووضع يديه على ركبتيه ثم قال سمع الله لمن حمده و رفع يديه واعتدل حتى يرجع كل عظم الى موضعه معتدلا ثم هوى الى الارض ساجدا ثم قال الله اكبر ثم ثنى رجله وقعد عليها واعتدل حتى يرجع كل عظم في موضعه ثم نهض
    ثم صنع في الركعة الثانية مثل ذلك قالوا صدقت هكذا صلى رسول الله صلى الله عليه وسلم"
    طيب مبطلات الصلاة بقى


    1 التكلم بكلام اجنبي عنها
    سواء جاهل وعالم ناسي او فاكر قاصد او مش قاصد
    الشافعيه قالوا لو تكلم ناسي او جاهل كلام يسير صحت صلاته
    و المالكية قالوا لا تبطل الصلاة بالكلام سهوا اذا كان يسيرا

    في صحيح مسلم
    عن معاوية بن الحكم السلمي قال بينما انا اصلي مع رسول الله اذ عطس رجل من القوم فقلت يرحمك الله فرمانى القوم بابصارهم فقلت ما شأنكم تنظرون الى ؟ فلما رأيتهم يصمتوننى سكت فلما انتهى الرسول صلى الله عليه وسلم من صلاته فبأبي و امى ما رأيت معلما قبله و لا بعده و لا احسن تعليما منه فوالله ما كهرنى و لا ضربنى ولا شتمنى و لكنه قال " ان هذه الصلاة لا يصلح فيها شيء من كلام الناس انما هي التسبيح و التكبير و قراءة القرآن"


    زي الاربعة اللى بيصلوا وواحد عطس فقال الحمد لله التانى قاله يرحمكم الله التالت على فكرة ما ينفعش تتكلموا في الصلاة الرابع قال كلكوا هتروحوا النار



    2 العمل الكثير
    اللى مش من الصلاة

    تلاقي حبكت يهرش ويتاوب ويبص على الساعة و يبص على الشباك ويعدل الكاب و يسرح شعره وشويه وهيطلع الموبايل يلعب فيه

    اهدى يا عم مالك


    3 الاكل و الشرب عمدا
    يعنى واحد في صلاة التراويح و الامام طول
    راح سايب الصف خاطفله سندوتش و بقين عصير ورجع يكمل
    يا رااااااااااااااااااااجل
    طب و جاي على نفسك ليه


    4 التحول عن القبلة بصدره بغير عذر


    5 وجود ناقض للوضوء خلال الصلاة

    6 انكشاف العورة

    7 انك تسبق الامام عمدا

    هو سبق يا حاج؟




    8 حدوث نجاسة
    قطة معدية ربنا فتحها عليها
    كلب معدى عجبته ريحتك قعد يشمشم فيك
    اتخبط في تعويرة فنزفت كتير وهدومك اتوسخت من الدم



    9 الضحك في الصلاة بصوت
    بتضحك على ايه انا عايزة افهم
    يا بنات الله يكرمكو
    لما تخلفوا عيال بالله عليكو وقت الصلاة ما تجيبهومش المسجد
    بتبوظوا صلاة اللى حواليكو وبتتحملوا وزرهم


    10 اذا كنت متيمم و لقيت ميه




    طيب مكروهات الصلاة










    1 ترك سنة من سنن الصلاة 2 العبث بالثوب والبدن 3 النظر الى غير موضوع السجود 4 ان يغمض عينه لو ده هيخل بالخشوع 5 انه يلبس هدوم ما تليقش بالصلاة حتى لو كانت ساترة للعورة 6 الصلاة وهو يدافع الاخبثين مباحات الصلاة





    1 البكاء عند قراءة القرآن 2 ان يقول المأموم للامام اذا سها " سبحان الله" او انه يفكره 3 ذا عطس انه يقول في السر الحمد لله صلاة المريض

    المريض يصلي على اي حال يقدر عليها
    مش على اي حال عايزها
    فيه فرق

    يعنى فيه مريض رجله بتوجعه بس بيقف في طابور العيش بالنص ساعة
    ما يجيش على الصلاة ويقول لا تعبان ربنا اجازلى اصلى وانا قاعد
    اتق الله

    و اللى هيصلى وهو نايم رجله تكون للقبلة



    صلاة الخوف

    الاية 102 من سورة النساء بتشرح الموضوع ده
    صلاة الخوف بايجاز
    ان لو كان المسلمين في قتال
    و عايزين يصلوا جماعة
    فالناس تتقسم قسمين
    النص الاول يصلي معاك نص الصلاة ويروحوا لاماكنهم ييتموا الصلاة هناك
    و النص التانى اللى كان بيحرس يصلوا النص التانى من الصلاة ويكملوها بعد التسليم


    و ممكن تتقسم قسمين كل قسم بامام يصلوا ورا بعض
    النص الاول يحرس والتانى يصلي و بعدين يعكسوا

    طب اذا ما قدروش على صلاة الجماعة؟
    يصلوا منفردين
    سواء ماشيين او راكبين
    " فصلوا رجالا او ركبانا " البقرة 239



    الصلاة في السفينه والقطر و العربية والطيارة
    اجتهد في تحديد القبلة وصلي ناحيتها ولو وسيلة النقل لفت لف انت ناحية القبلة


    الصلاة على الدابة
    لو الواحد مسافر على دابة و خاف على اهله او ماله او نفسه جاز له يصلى عليها
    اذا مكنش فيه حاجة تخوفه
    لا ينول ويصلي على الارض عادى
    ده بالنسبة لصلاة الفرض
    اما النافلة فتجوز


    الصلاة في الكعبة
    سيدنا محمد صلي داخل الكعبة نفسها



    الصلاة الفائة
    تقضى
    و بس كده
    مفيش كلام تانى
    اللى فوت صلاة يصليها
    اللى مكنش بيصلي يصلي على قد ما يقدر عشان يعوض
    ماهو هيصلي هيصلي
    يصلي في الدنيا وللا يصلي في الاخرة؟

    ازاى الاولاد ؟

    وانا كمان ;)

  13. #13
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    الاذان والاقامة

    الاذان هو الاعلام بدخول وقت الصلاة

    في صحيح البخاري عن ابى هريرة قال ان رسول الله صلى الله عليه وسلم قال " لو يعلم الناس ما في الاذان و ما في الوقوف في الصف الاول في الصلاة من فضائل و من ثواب عظيم لحكموا القرعة فيما بينهم ثم لم يجدوا الا ان يستهموا عليه لاستهموا " يعنى عملوا قرعة يعنى

    احكيلكوا قصة حلوة

    لما النبي هاجر للمدينة كان عب الناس يعرفوا مواعيد الصلاة
    اللى قال نعمل جرس زي النصارى
    و اللى قال نعمل بوق زي اليهود
    لكن عمر قال نبعت راجل ينادى بالصلاة
    فالرسول قال قم يا بلال فناد بالصلاة
    عبد الله بن زيد شاف ملك بيعلمه الاذان و الاقامة فراح رايح للرسول و قاله فالنبي قال انها لرؤيا حق ان شاء الله فقم فالق عليه ما رأيت فليؤذن به فانه اندى منك صوتا

    و اذن بلال بالاذان

    الواجب التانى النهاردة
    عايزة صيغة الاذان وصيعة الاقامة
    على فكرة يا شباب الاذان سنة مؤكده ولازم المؤذن يكون ذكر بالغ عاقل
    و بعض الفقهاء قالوا يجوز ان الصبي يؤذن لو مش هيعك زي اللى بيحصل دلوقتى

    و يستحب ان يكون صوته جميل
    والله والله فيه ناس يقولوا الله اكبر تتخض


    واحد مش فاكرة مين بالظبط
    بيقول ميكروفون المسجد عند شقته
    فكان نايم اول ما الاذان اذن قام مفزوع بيقول اعوذ بالله من الشيطان الرجيم


    يستحب كمان انه يبص ناحية اليمين لما يقول حى على الصلاة و يبص شمال لما يقول حى على الفلاح

    و يستحب للى يسمع الاذان يروح المسجد على طول وما يخرجش الا بعذر
    و يردد زي ما بيقول المؤذن الا لما يقول حي على الفلاح او حي على الصلاة يقول لا حول ولا قوة الا بالله

    و لما يقول الصلاة خير من النوم يقول صدق رسول الله ( اصل سيدنا محمد هو اللى زود دي على اذان الفجر )

    و بعد الاذان يصلي على سيدنا محمد و يدعو له بالوسيلة و يدعي لنفسه بقى


    المفروض يبقى فيه فاصل بين الاذان والاقامة عشان الناس تتوضى و تصلي ركعتين
    فيه مساجد بتقيم قبل الاذان وتلاقي هوب هوب بسرعة اللى يلحق
    بالرااااااااااااااااااااحة
    بالرااااااااااااااااااااحة


    طيب اذان واقمة النساء
    السيدة عائشة كانت بتؤذن وتقيم تؤم النساء


    انما اذان واقامة وامامة و فيه رجال
    خير بقى ان شاء الله؟
    لا طبعا ماينفعش


    و خلاويص كده
    سبحانك اللهم وبحمدك نشهد الا اله الا انت نستغفرك ونتوب اليك
    ازاى الاولاد ؟

    وانا كمان ;)

  14. #14
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    صلاة التطوع


    يعنى ايه صلاة تطوع؟

    يعنى الصلاة اللى بيعملها المسلم غير الصلوات المفروضة

    طب اصلا بنصليها ليه؟

    عارفين ليه؟
    لا مش عشان ناخد ثواب

    اصل احنا مابنصليش الفروض كاملة ميه ميه
    بنصليها على الحركرك يا دوب جيد بالزق
    عشان تبقى امتياز تتكمل من صلاة التطوع

    اصل الفروض عاملة زي ورقة التحريري لازم تعديها لو معدتهاش تبقى مشكلة

    فالنوافل عشان تجبر اي تقصير في الفروض


    صلاة التطوع فيه منها المسنون و فيه منها المؤكد وغير المؤكد

    قاللك الصلوات المسنونة ( من السنة يعنى )
    ركعتين قبل الصبح
    اربعة قبل الضهر و اتنين بعده
    ركعتين بعد المغرب
    و ركعتين بعد العشاء


    الشافعية قسموها لمؤكده وغير مؤكده
    المؤكد منها ركعتين الفجر
    ركعتين قبل الضهر و ركعتين بعده
    ركعتين بعد العصر
    ركعتين بعد العشاء
    ركعة وتر


    و الغير مؤكده
    ركعتين قبل الضهرو ركعتين بعده غير اللى قلناهم
    اربعة قبل العصر
    اتنين قبل المغلاب
    اتنين بعد العشاء غير اللى قلناهم


    صلاة الوتر

    من السنن المؤكدة يعنى الرسول سيدنا محمد صلى الله عليه وسلم كان بيحافظ عليها

    و قتها من بعد العشاء لحد الفجر
    اللى يحب يصليها قبل النوم يصليها واللى يحب يأجلها لاخر الليل يأجلها
    بشرط ان ميبقاش غير وتر واحد في الليلة

    عددها
    اقلها واحدة واكترها 13

    و يشرع القنوت فيها في كل ايام السنة
    يعنى ايه قنوت
    يعنى الدعاء اللى قبل او بعد الركوع في الركعة الاخيرة



    صلاة التراويح
    قيام رمضان بعد صلاة العشاء
    و دي سنة للرجال والنساء

    سموها تراويح عشان الراحة بعد كل 4 ركعات

    عدد ركعاتها
    8 ده عن النبي صلى الله عليه وسلم
    20 عن عمر بن الخطاب رضي الله عنه


    بيقوللك جملة كده
    الافضل ان تصلى التراويح في المسجد لان كل ما شرعت فيه الجماعة فصلاته بالمسجد افضل


    صلاة الضحى
    عدد ركعاتها
    من 2 لحد 8 ركعات

    و قتها من بعد طلوع الشمس بنصف ساعة لحد قرب الضهر كده

    و اسمها التانى صلاة الاوابين

    صلاة الكسوف و الخسوف
    اللى هي الصلاة عند حدوث الظواهر دي

    و دي سنن مؤكده للرجال والنساء

    ازاي تتصلى؟

    ركعتين كل ركعة بركوعين وقيامين


    و قتها من بداية الكسوف او الخسوف لحد نهايته
    و برضه يستحب لو حصل حاجة من زلازل او صواعق او كده يعنى



    صلاة الاستسقاء
    صلاة طلب المطر

    ركعتين زي صلاة العيد اللى هنقولها قريب باذن الله




    سبحانك اللهم وبحمد نشهد الا اله الا انت نستغفرك ونتوب اليك




    ازاى الاولاد ؟

    وانا كمان ;)

  15. #15
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    صلاة الجماعة

    طبعا لو سألت اي حد ماعدا ابو المعاطى عشان مش هاكلمه تانى بعد اللى عمله
    لو سألت اي حد تعرف ايه عن صلاة الجماعة
    هيقولى دى احسن من صلاة الفرد ب سبعة وعشرييييييييييييييييييين درجة

    طب ما بتصليش ليه يا عم الحاج ؟

    اصلي مش فاضي

    يا راااااااااااااااجل؟ والله العظيم


    ما علينا

    الجماعة سنة مؤكده و الحنابلة قالوا واجبة وجوبا عينيا لان ورد في الصحيحين
    " والذى نفسي بيده لقد هممت ان امر بحطب فيحتطب ثم امر بالصلاة فيؤذن لها ثم امر رجلا فيؤم الناس ثم اخالفه الى رجال يتخلفون عن صلاة الجماعة فأحرق عليهم بيوتهم"

    اهلا
    ده على كده مصر كلها هتولع
    مصر ايه
    ده الدنيا كلها هتولع
    انتو شايفين نسبة صلاة الجماعة عندنا قد ايه؟

    طيب

    يعنى ايه جماعة ؟
    كام واحد يعنى؟

    قاللك لو واحد مع الامام تبقى جماعة
    بس الحنابلة قالوا لو كان صبي لا تعتبر جماعة في االفرض وتعتبر جماعة في النافلة
    و المالكية قالوا لو صبي الامام يعيد الصلاة تانى في جماعة لانها لم تتحقق

    واخدين بالكوا
    اهو صلى اهوه بس لانهم معتقدين ان الصبي ليس طرف في الجماعة يعيدوا الصلاة
    شايفين قد ايه الجماعة مهمة


    الحديث اللى جاي ده جميييييييييييييييييييييييييل
    عن ابي سعيد الخدري ان رجلا دخل المسجد و كان الرسول صلى الله عليه وسلم قد صلى باصحابه فقال رسول الله صلى الله عليه وسلم من يتصدق على هذا فيصلى معه؟ فقام رجل من القوم فصلى معه



    طيب لدكتور عمرو جولد

    مين تصح امامتهم؟
    لازم شروط معينه
    لازم يكون

    مسلم
    بالغ
    عاقل
    ذكرا في الصلاة اللى فيها رجال ونساء ولا تصح امامة النساء للرجال
    ان يكون الامام من حافظ القرآن ما تصح به الصلاة
    ان يكون سليم من الاعذار
    ان يكون مستوفي شروط صحة الصلاة

    طيب مين الاحق بالامامة؟

    احفظ الناس للقرآن
    و اعلمهم بالسنة
    و افقههم بالاحكام الشرعية
    و احسنهم تلاوة
    و اكبرهم سنا

    بالترتيب كده
    يعنى لو وجد اكتر من واحد وتساووا ننقل على النقطة اللى بعدها

    طيب دي ام دي بيصلي لوحده
    ودخل نتاوي وازايجوس
    نتاوي دخل في الصلاة على طول
    و ازايجوس راح يتوضى


    يقفوا ازاااااااااااااااااااااااااى؟

    نتاوي هيروح يقف ورا كتف دي ام دي اليمين
    ولما ييجي ازايجوس يقفوا الاتنين ورا محمود في صف جديد

    عن جابر بن عبد الله قال قام النبي صلى الله عليه وسلم يصلي المغرب فجئت فقمت عن يساره فنهانى فجعلنى عن يمينه ثم جاء صاحب لي فصفنا خلفه"


    و لو فيه امرأة

    مثلا لو زوج وزوجة
    هي تقف وراه مش ورا كتفه اليمين


    طيب شروط صلاة الجماعة

    1 نية المأموم الاقتداء بالامام
    2 ان لا يتقدم المأموم على الامام يعنى ما يقفش قدامه يجوز في حالة واحدة بس ايه هي؟؟؟؟
    الجدع اللى يقول

    3 ان يكون المأموم متمكنا من ضبط افعال الامام عن طريق الرؤية او السماع حتى ولو بعدت المسافة
    زي الحرم كده
    الناس بتصلي في الشارع
    بس سامعة وشايفه حركات باقي المصلين
    4 ان لا يسبق المأموم الامام
    5 ان لا يكون المأموم اعلى حالا من الامام في الصلاة من حيث الشروط و الاركان بل يلزم ان يكون مثله او اقل منه
    ممممممممممم دى بقى نقطة خطيرة
    وانا عن نفسي محتاجة اقرا فيها كتير
    6 ان لا تكون صلاة المأموم غير متحدة مع صلاة الامام
    يعنى ايه؟
    يعنى مش تبقى جماعة العصر شغالة وانت تصلي معاهم جماعة الظهر اللى فاتك
    مادامت وجبت الجماعة يبقى تصلى الفرض اللى دخل وقته الاول
    لكن اذا كنت هتصلي لوحدك او لسه ما اقاموش يبقى الترتيب

    فيه نقطة مهمة جدا جدا جدا

    مصري بيصلي سنة الظهر
    و دخل المسجد فاسكونيا
    راح واقف ورا كتفه اليمين وراح مصلي معاه جماعة بنيه الظهر

    قالوا لا يصح ان يكون الامام بيصلي نفل والمأموم فريضة
    و يجوز العكس

    بس الشافعية قالوا يجوز ومفيهاش حاجة و قالوا يصح الاقتداء بكل من صحت صلاته فتصح صلاة الظهر مثلا ورا اللى بيصلي العصر و اللى بيصلي فرض ورا سنة
    يستحب الامر بتسوية الصفوف وسد الخلل
    عن انس ان النبي صلى الله عليه وسلم كان يقبل علينا بوحهه قبل ان يكبر فيقول " تراصوا و اعتدلوا و سووا صفوفكم فان تسوية الصف من تمام الصلاة "

    طيب هل تسقط صلاة الجماعة؟
    طبعا الكل مستنى الحتة دي

    تسقط صلاة الجماعة في الاتى
    البرد الشديد _ بتوع الاسكيمو كده _
    المطر الغزير _ الفياضانات _
    الريح العاصفة _ الاعاصير _
    الوحل الذى يتأذى من المشي فيه _ مش بتاع جزمتى اتوسخت _
    المرض الشديد
    الخوف من عدو ظالم


    صلاة الجماعة يا شباب
    حد لاقي حسنات


    ازاى الاولاد ؟

    وانا كمان ;)

  16. #16
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    صلاة المسافر


    تعرف ايه عن صلاة المسافر يا احمد منصور
    اعرف ان اللى بيسافر بيقصر في الصلاة

    قاللك شرط القصر في الصلاة ان المسافة بين الموطن الاصلي والمكان الجديد 80 كيلو على الاقل


    طيب
    قصر الصلاة الرباعية
    تقصر الصلاة الى ركعتين ودى سنة مؤكده
    على فكرة شرع قصر الصلاة في السنة الرابعة للهجرة

    طيب افرض تقدر تصلي الاربع ركعات تعمل ايه؟

    عن عمر لما سأل الرسول عن الموضوع ده قاله صلى الله عليه وسلم " صدقة تصدق الله بها عليكم فاقبلوا صدقته "

    خلوا بالكو الصلاة الرباعية بس هي اللى تقصر
    لا المغرب ولا الفجر يقصروا
    هيقصروا اكتر من كده ايه؟

    و يجوز الجمع بين الصلوات عشان يديلك فرصة اطول من الوقت
    زي اللى بيسافروا مسافات طويلة جدا بالاوتوبيسات
    وبينزلوا استراحات محدودة
    هنا يصلوا الظهر و العصر جمعا وقصرا
    و الاستراحة اللى جاية لما يأذن المغرب يصلوا المغرب والعشا جمعا وقصرا


    شروط القصر

    1 المسافة تكون 80 كيلو على الاقل
    2 ان يكون السفر مباحا يعنى مش رايح تعمل منكر
    و الاحناف قالوا يجب القصر على كل مسافر بغض النظر عن نية السفر و يأثم طبعا على افعاله بس دي حاجة ودي حاجة
    3 ان لا يقصر الا لما يكون خرج بالفعل من المكان اللى هيسافر منه
    4 مينفعش يبقى امام في حالة القصر
    5 لو انت نويت تقضي في البلد الجديد 4 ايام فاكثر ما تقصرش بقى اما اذا كان اقل من 4 يجوز القصر حتى مع اقامتك


    ازاى الاولاد ؟

    وانا كمان ;)

  17. #17
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    سجود السهو


    ان الواحد لما ينسى حاجة في الصلاة يسجد عنها سجود سهو
    و تبقى سنة لو بتصلى لوحدك وواجبة لو امامك سجد سجود سهو حتى لو انت ما لخبطتش


    طب بص بقى يا ار بي جي بما انك مش مركز اليومين دول وبتسرح كتير

    ممكن الواحد ينسى
    فرض : و خلى بالك ينسى مش يسيب لو سابه عمدا تبطل الصلاة على طول ولو نسيه لاااازم يعمله و يسجد سجود سهو
    طب افرض مافتكرش غير بعد فترة طويلة هنا لازم يعيد الصلاة

    تانى حاجة ممكن تتنسى:
    سنة زي التشهد الاول و القنوت في صلاة الصبح و هنا يسجد سجود سهو

    تالت حاجة
    الهيئات : يعنى التسبيح مثلا مش التكبير خلى بالك دى لا يسجد عنها سجود سهو


    ولو كنت شاكك في عدد الركعات كمل صلاتك على الشك الاقل وصلي الباقي

    طيب

    ازاي وفين؟
    هم سجدتين قبل السلام او بعده



    سجود التلاوة

    محدش يستهون بيه يا شباب
    اقروا الحديث ده كده
    في صحيح مسلم
    عن ابي هريرة قال قال الرسول صلى الله عليه وسلم " اذا قرأ بن ادم السجدة فسجد اعتزل الشيطان يبكي ويقول يا ويله امر بالسجود فسجد فله الجنة وامرت بالسجود فعصيت فلي النار"


    طيب هو سنة و شروطه زي شروط الصلاة من حيث الطهارة والقبلة و ستر العورة وباقي الشروط

    طيب ازاي السجدة

    هي سجدة واحدة
    الله اكبر ويسجد والله اكبر وخلاص


    و يستحب تدعى زي مانت عايز من الدعوات




    صلاة الجمعة

    صلاة الجمعة فرض عين و ليست بدل الظهر بس لو فاتت يصلى المسلم 4 ركعات صلاة ظهر

    طيب واجبة على مين صلاة الجمعة ؟.

    المسلم العاقل البالغ الحر المقيم القادر

    ولا تجب على مين؟
    الصبي
    غير المسلم
    المجنون
    العبد
    المرأة
    المسافر
    اصحاب الاعذار

    ودول اللى يصلح منهم للصلاة _ مش المجنون يعنى _ يصلوا الظهر مش يستحلوها

    وقتها هو وقت صلاة الظهر


    الاحناف قالوا لازم العدد 3 غير الامام
    و المالكية 12 غير الامام
    و الشافعية والحنابلة 40 بالامام

    طبعا تصح صلاة الجمعة في المساجد والمدن و القرى واي مكان

    خطبة الجمعة واجبة وتعتبر من اركان صلاة الجمعة ولا تصح الصلاة الا بيها
    هم الحقيقة خطبتين قبل الصلاة
    المفروض فيها الاركان اللى جاية

    حمد الله
    الصلاة على النبي
    الوصية بالتقوى
    قراءة اية من القرآن في واحدة منهم
    الدعاء

    ده كلام الشافعية والحنابلة

    اما الاحناف فقالوا هو ركن واحد وهو الذكر الشامل
    و المالكية قالوا ركن واحد انها تكون مشتملة على تبشير وتنذير

    شروط الخطبة؟








    عن جابر ان النبي صلى الله عليه وسلم كان اذا صعد المنبر سلم

    من السنة انه يخطب وهو واقف و يستحب انه يجلس الخطيب جلسة خفيفة كده بين الخطبتين


    الائمة اوجوبوا الانصات و ذهبوا الى تحريم الكلام اثناء الخطبة
    عن عباس ان رسول الله صلى الله عليه وسلم قال " من تكلم يوم الجمعة و الامام يخطب فهو كالحمار يحمل اسفارا و الذي يقول له انصت لا جمعة له "

    طيب واحد راح متأخر
    ولقى الامام صلى الركعة الاولى وفاتته الخطبة؟

    يكمل معاه الركعة التانية و يقضى الركعة الاولى
    انما لو فاتته التانية يصلي ظهر


    يسن صلاة ركعتين او 4 بعد صلاة الجمعة

    ولو جه عيد يوم جمعة الافضل يصلوا الاتنين
    صلاة عيد وصلاة جمعة


    1 انهم يكونوا قبل الصلاة 2 انها تكون بالعربي 3 و تكون في وقت الصلاة 4 الجهر بالخطبة عشان الناس تسمع 5 عدم الفصل بين الخطبة والصلاة بفاصل طويل زي فواصل الاعلانات دلوقتى تنسيك انت اصلا كنت بنشوف ايه طيب صلاة العيد


    شرعت في السنة الاولى من الهجرة
    وهي سنة مؤكدة

    وقتها من بعد الشروق بحوالي 20 او 30 دقيقة
    لحد وقت زوال الشمس يعنى قبل الظهر

    المفروض الواحد بقى
    يذكر ويكبر و يلبس احسن هدوم و الولاد يتطيبوا و الناس تاكل حاجة بسيطة كده قبل ما يخرجوا للصلاة في عيد الفطر و يأخروا الفطار لبعد الصلاة في عيد الاضحى و اننا نهنى اخواننا بالعيد و ان يتصدق و ان يتزاور و انه يروح من طريق ويرجع من طريق


    للمرأة الحائض انها تشهد الصلاة ولا تصلي عشان الخير اللى في الموضوع ده

    ازاي تتصلى؟

    هم ركعتين
    كالاتى
    تكبيرة الاحرام
    و بعدها

    الفاتحة
    ما تيسر من القرآن
    و يركع
    ويقوم
    ويسجد سجدتين ويقوم
    ويكبر
    و يكبر بعدها 5 مرات
    الفاتحة
    ما تيسر من القرآن
    و يكمل صلاته

    المستحب الركعة الاولى سورة الاعلى و الركعة التانية سورة الغاشية

    صلاة العيد ليها خطبتين زي الجمعة بس بعد الصلاة و سماعها سنة
    و الافضل ان الخطبتين يكونوا عن احكام صدقة الفطر في عيد الفطر وعن احكام الاضحية في عيد الاضحى

    التكبير سنة يا شباب
    طبعا في عيد الفطر من وقت الخروج للصلاة لحد بدء الخطبة

    اما عيد الاضحى فمن اول فجر يوم عرفة لحد بعد العصر من اخر ايام التشريق اللى هو رابع يوم العيد

    طبعا يستحب الصلاة في الساحات خارج المسجد

    و مش هاقولكوا صيغة التكبير انتو تسمعوها احسن




    7 تكبيرات مع رفع اليدين عند كل تكبيرة و كده كانت دي اخر حلقة في رمضان


    ربنا يجعل اعمالنا خالصة لوجهه الكريم
    و ربنا يعيد علينا رمضان اعواما عديدة وازمنة مديدة
    و يتقبل منا ومنكم الصيام و القيام وقرآءة القرآن
    و يا رب يا رب نكون من المعتوقين السنة دي يا رب
    و يثبتنا ويحفظنا ويحمينا و يسترنا و يرضى عنا
    و يفرج كربنا
    و يرحم موتانا
    و يشفي مرضانا
    و ينجح طلابنا
    و يبارك لنا في اهلنا
    و يعزنا بالاسلام ويعز الاسلام بنا
    و يرزقنا زيارة بيته الحرام
    و يرزقنا حسن الخاتمة
    وقبل الموت توبة وعند الموت شهادة وبعد الموت رحمة ومغفرة
    و يرزقنا عيشة هنية وميتة سوية ومردا غير مخز ولا فاضح
    و يدخلنا الفردوس الاعلى بلا سابقة عذاب ولا مناقشة حساب

    امين امين امين

    وصلي اللهم على سيدنا محمد وعلى اله وصحبه وسلم تسليما كثيرا

    وكل سنة وانتو بالف الف خير

    سبحانك اللهم وبحمد اشهد الا اله الا انت استغفرك واتوب اليك

    ازاى الاولاد ؟

    وانا كمان ;)

  18. #18
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه


    الزكاه
    طبعا الزكاة معروفة هو حق الله تعالى للفقراء في مال الاغنياء
    و معروف انها من اركان الاسلام

    الزكاه اول ما فرضت كانت مطلقة
    يعنى اييييييييييييييييييييييييييه؟


    يعنى كل واحد وتقديره ملهاش نصاب محدد
    انما على الارجح في السنة التانية للهجرة اتحدد نصاب الزكاه

    بيقوللك حكم مانعها انكارا لوجوبها
    يعنى واحد قال لا مش دافع ده مش واجب ولا فرض
    ده كده يبقى في رأى العلماء كافر و خارج عن الاسلام


    اما اللى مبيخرجهاش وهو عارف انها فرض ده اثم بس مايخرجش عن الاسلام
    بس الحاكم ياخدها منه قهرا
    الحنابلة والشافعية قالوا ياخدها وياخد كمان نص ماله عقابا ليه

    و قاللك بقى لو قوم او ناس قولوا عيلة كبيرة ماخرجوش الزكاه واستعملوا الفلوس دى في انها تكون عزوة ليهم _ بيبلطجوا يعنى _ دول بقى يقاتلوا لحد ما يجيبوها
    طب دليلك؟
    روى البخاري ومسلم ان النبي صلى الله عليه وسلم قال " امرت ان اقاتل الناس حتى يشهدوا ان لا اله الا الله و ان محمدا رسول الله و يقيموا الصلاة و يؤتوا الزكاه فاذا فعلوا ذلك عصموا منى دماءهم و اموالهم الا بحق الاسلام و حسابهم على الله"


    مين يدفع الزكاه يا بسنت؟

    تمام المسلم الحر اللى معاه نصاب الزكاه
    طب وايه هو النصاب ده؟

    النصاب مش النصًِاب
    هو كمية معينة من المتاع لو تعدت حد معين نخرج بقى الزكاه
    طب الشروط بتاعته ايه او ازاي نحكم ان النصاب وجب


    اول حاجة يكون زايد عن المتطلبات الاساسية زي الاكل والشرب واللبس والسكن والات الشغل

    تانى حاجة يكون عدى عليه مع المسلم سنة هجرية كاملة

    طب افرض اول محرم كان معاك 100 جنيه مثلا وهتخرج عنهم زكاه و جيت على ذو القعده دفعت قسط البوتاجاز بقوا 70 جنيه وكده قل عن النصاب و رجعت قبضت الجمعية في اول ذو الحجة تدفع الزكاه وللا لا؟

    مين الشاطر اللى يقول؟
    لا بلاش دكتور ميد عشان هو عارف


    تمام يا انجلتى
    ما يدفعش ويحسب السنة من اول ذو الحجة
    ده على حسب كلام مين؟
    ده على حسب ما قال الامام النووي و ابن مالك و احمد ابن حنبل و جمهور العلماء


    اما الاحناف فقالوا المهم في اول واخر السنة لو كامل يبقى يطلع سواء صرف منه بقى وللا لا في خلال السنة


    الكلام ده ينفع يتطبق على الحاجات اللى مش هيجرالها حاجة غالبا زي الذهب والفضة والفلوس والحيوانات انما الزرع وقت ما يتحصد يتزكى عنه


    طب افرض واحد مؤتمن على فلوس يتيم او مجنون مثلا هل يطلع الزكاه من مالهم وللا لا؟

    فيه هنا قولين ناس قالوا تجب الزكاه ومنهم " عمر وعلي وفاطمة و عائشة رضي اللله عنهم جميعا وارضاهم وكمان ابن مالك و الشافعى و احمد واسحاق
    و ناس قالوا لا تجب زي سفيان و ابن المبارك



    طب انا استلفت من وجه القمر 60 جنيه
    و ربنا رزقنى وجالى 120 جنيه

    كده عدت النصاب اعمل اييييييييييييييييييه؟

    قاللك ترجع اللى كنت مستلفه وتشوف الباقي لو كمل النصاب يبقى تزكي عنه
    ما كملش يبقى الدين اولى

    " لا صدقة الا عن ظهر غنى " رواه احمد

    طيب واحد توفى وهو لسه ما دفعش الزكاه
    ربنا بيقول في المواريث " من بعد وصية يوصى به او دين "
    و الزكاه دين قائم لله تعالى
    طبعا النيه شرط من شروط صحة الزكاه


    امتى بقى ؟؟


    امتى ايه؟

    امتى نخرج الزكاه
    وقتها يعنى
    امتى؟


    اول ما تكمل شروطها
    كمل النصاب وعدت سنة تطلع على طول


    على فكرة سئل الحسن عن رجل اخرج ثلاث سنين يجزيه؟ قال يجزيه


    يعنى الراجل طلع زكاه 3 سنين مرة واحدة قبل ما ييجوا

    و على الرغم من ده فيه فقهاء قالوا لا يجزئ لغايه ما يعدى عليه السنة


    واضحة الحتة دي؟


    يعنى فيه اختلاف

    فيه ناس قالوا يجوز تطلعها قبل ما تعدى السنة
    وناس قالوا زيها زي الصلاة ما ينفعش الا في وقتها



    طب افرض انت موكل بجمع الزكاه
    يستحب انك تدعى للمزكى لما تاخد منه الزكاه
    عن عبد الله بن ابي اوفى ان رسول الله صلى الله عليه وسلم اذا اتى بصدقة قال " اللهم صلى عليهم "


    طيب ايه انواع الحاجات اللى تجب فيها الصدقة ونصابها

    كلوا يركز
    زكاة الذهب
    اللى عنده ذهب النصاب عشرين دينار اول ما يتموا ناخد نصف دينار ( يعنى ربع العشر )
    20 / 10 = 2
    2 / 4 = 0.5 درهم دهب

    و كل ما يزيد عن 20 دينار دهب عليهم ناخد ربع عشر الكمية


    اتعكت؟؟؟؟



    زكاه الفضة
    النصاب 200 درهم و النصاب برضه ربع عشر الكمية
    200 / 10 = 20
    20 / 4 = 5 دراهم فضة



    اه طب افرض واحد عنده 15 درهم دهب و190 فضة يعمل ايييييييييييييييييييييييه؟
    ولا حاجة
    ما يطلعش زكاه لانهم نوعين مختلفين ويستنى لما كل نوع يكمل نصابه


    زكاه اوراق البنكنوت و السندات
    قاللك لو كمل 27 ريالا مصريا !!!
    طبعا الكلام اتغير وكل سنة بيحددوا النصاب قد ايه بسعر العصر



    زكاه حلى المرأة
    قاللك الاحجار الكريمة معليهاش زكاه الا اذا كان بيتاجر فيها
    نييجي بقى للذهب والفضة اللى بتستخدم كحلى
    فيه ناس قالوا تجب
    زي ابو حنيفة و ابن حزم

    و الائمة الثلاثة قالوا لا زكاه في حلى المرأة



    زكاة صداق المرأة
    المؤخر يعنى
    و ده دين للمرأة عن زوجها اذا وقع الطلاق
    تزكى لما تقبضه لسنه واحده


    زكاة اجرة البيوت
    واحد اجر بيت يدفع زكاه عن الايجار وللا لا
    يدفع لما يقبضه ويكون كامل النصاب وعدت عليه السنة


    زكاه التجارة
    ابو المعاطى ربنا يرجعه بالسلامة عنده محل بيبيع فيه الجلود والفخار ومعندوش فلوس سايلة
    يعمل ايه؟
    يقدر اللى في المحل من بضاعة بكام فلوس لو بلغت النصاب وعدت السنة يطلع الزكاه منه
    طب يطلع قد ايه؟

    برضه ربع العشر



    زكاة الزرع
    اي زرع والسلام؟
    قاللك لا
    على ايام الرسول الناس كانوا بيدفعوا الزكاه من
    الحنطة
    والشعير
    والتمر
    والزبيب

    وماحدش زكى بالخضراوات و لا الفواكه الا العنب و البلح


    الفقهاء بقى اختلفوا في انهى زرع يزكى عنه
    الحسن البصري و الشعبي قالوا الاربع انوا الاولى بس


    الامام ابو حنيفة قال كل ما يزرع ويقتات به

    الامام مالك قال شرط انه يكون بينشف زي القمح والرز كده يعنى ما ينفعش في التين والرمان

    الامام الشافعى كل ما يزرع و يقتات به

    الامام احمد قال كل ما اخرجه الله من الارض من الحبوب والثمار مما ييبس و يبقى و يكال ويستنبته الادميون في اراضيهم


    زكاه الزيتون ؟
    فيه خلاف هل فيه زكاه او لا
    الامام مالك و الامام ابو حنيفه وغيرهم قالوا فيه زكاه

    و غيرهم قال لا



    طيب نصاب الزرع؟

    و فيه حديث بيقول " فيما سقت السماء العشر وما سقى بنضح او غرب فنصف العشر" يعنى شر المحصول اللى مش مروي غير على ميه المطر اما اللى مسقى بآله زي الماتور المية او الطرومبة او حتى الشادوف فزكاته نص العشر يعنى 1/ 20
    و اذا اتسقى بالاتنين
    زكاته تبقى 3 / 40

    و قاللم البلح والعنب بيتقدر مش بيتوزن
    بمعنى اول ما الشجر والنخل يثمر والثمار تزدهر نجيب مقدر امين يقدر المحصول
    ونخرج الزكاه بعد الحصاد
    اشمعنى بقى؟

    لا الطبيعي ان الناس تاكل الثمر رطب
    يعنى تاكل العنب طري وتاكل البلح طري
    و بنشفه في حالات معينه
    عشان كده نقدر قبل ما يتصرف فيها صاحب الارض عايز يحصدها يحصدها عايز ينشفها هو حر
    المهم حق ربنا يبقى مضمون
    و المقدر بيقدر ويسيب ثلث او ربع المحصول
    لان ده يدخل تحت بند الاكل او طيور مثلا هتاكلهم من باب التوسعة على صاحب الارض

    ومن هنا يبقى يجوز لصاحب الزرع انه ياكل من ارضه قبل الحصاد
    ماهو مهما اكل مش هيقلل النصاب يعنى
    ماهم مش يأجوج ومأجوج

    على فكرة بقى الحالتين الوحيدتين اللى ممكن نكل النصاب باكتر من نوع
    هي الثمار والحبوب

    و برضه فيها اختلاف

    و المفروض الواحد يزكى بالحاجة الكويسة
    مش يطلع الثمار البايظة او المعطوبة
    لا يطلع احسن حاجة عنده



    زكاة الحيوان
    اجمع الائمة على وجوب الزكاه في الحيوانات اللى
    بلغت النصاب
    و مضى عليها عام
    و ان تكون سائمة
    كلمة جديدة دي
    ايه سائمة دى بقى؟
    قاللك السائمة هي اللى بتاكل من الكلأ او العشب المباح اكتر من سنة اللى اختلف مع باقى الائمة في الشرط ده الامام مالك و الليث فهما الاتنين ماشترطوش انها تكون رعت او اتعلفت

    لكن الاجماع قال ان المعلوفة معليهاش زكاه

    طيب
    الجمال
    نصابها :
    شاه ( من الخرفان يعنى ) لو اصبح عددها يكون 5 و كانت مستوفية باقي الشروط
    شاتين لو عددها بقى 10
    و كل ما تزيد خمسة تزيد شاه
    لو بقت 25 : يا اما ناقة ( انثى يعنى )عمرها سنة وداخلة في التانية( بنت مخاض ) او لو مفيش اناث تبقى جمل عنده سنتين وداخل في التالتة( ابن لبون )
    لو 36 : ناقة تمت سنتين وداخلة في التالتة ( ابنه لبون )
    لو 46 : ناقة تمت 3 سنين وداخلة في الرابعة (حقه )
    لو 61 : ناقة تمت 4 سنين وداخلة في الخامسة( جذعة )
    لو 76 : بنتا لبون
    لو 91 حقتان الى 120
    لو زادت عن 120 : كل 40 عليهم ابنة لبون و كل خمسين حقة


    طبعا الامر مش مطلق افرض مفيش في القطيع مثلا حقة
    نقوم نزكى بابنة لبون و بالباقي شاه او اتنين على حسب

    البقر
    النصاب 30 بقرة
    لو 30 : تبيع او تبيعة اللى عمره سنة يعنى
    لو 40 : مسنة اللى عندها سنتين
    لو 60 : تبيعان
    لو سبعين : مسنة وتبيع
    لو 80 : مسنتان
    لو 90 : 3 اتباع
    لو 100 : مسنة وتبيعان
    لو 110 : مسنتان وتبيع
    لو 120 : 3 مسنات او 4 اتباع
    كل ما يزيد 30 : تبيع
    وكل 40 : مسنة
    الغنم
    النصاب 40
    لو 40 : شاه
    لحد 120
    لو 121 شاتان
    لحد 200
    لو 201 : 3 شياه
    لحد 300
    وكل 100 فيها شاه



    مفيش زكاه عن الخيول والحمير والبغال الا اذا كانت للتجارة


    طيب لو القطيع عندك في وسط السنة الاناث اللى فيه ولدوا
    تعمل اييييييييييييييييييييييه؟
    تطلع على الجداد وللا القدام وللا كله
    قاللك تطلع على كله
    مادام الاصل استوفى الشروط



    فيه ناس لئيمة بقى
    تلاقيهم 3 اخوات كل واحد عنده 40 شاه كده وجبت عليهم كل واحد يطلع شاه
    فيقوموا جامعينهم سوا فيبقوا 120 و يطلعوا عليها شاه واحد
    انتو بتضحكوا على مين بالظبط؟
    طبعا ما ينفعش
    عن سويد بن غفلة قال : اتانا مصدق رسول الله صلى الله عليه وسلم فسمعته يقول "انًا لا نأخذ من راضع لبن ولا نفرق بين مجتمع ولا نجمع بين متفرق واتاه رجل بناقة كوماء فابى ان يأخذها" رواه احمد وابو داوود والنسائي

    طب افرض كانت شركة
    فلوس الشركة كلها تجب عليها الزكاه لكن نصيب كل شريك ما يكملش يعملوا ايه؟
    الاحناف قالوا : ليس عليهم زكاه

    المالكية قالوا عليهم : وتقسم بينهم بالنسبة



    زكاه الركاز والمعادن
    الركاز اللى هو بالعربي كده الاثار _ زي اثار الفراعنة كده او الناس قبل الاسلام _ زي الدهب والفضة والرصاص و الاوانى
    و عشان يبقى فيه زكاه لازم يكون فيه الشروط اللى جاية دي
    الاولى يا ازايجوس عشان انت بدأت تنام
    انه يلاقيها في ارض مش معروف لها صاحب
    او انه يلاقيها في ملكه
    او يلاقيها في ملك مسلم او ذمى و ساعتها يبقى ملك صاحب المال

    نصاب المعدن ربع العشر

    ونصاب الركاز الخمس



    زكاة الخارج من البحر
    اتفق الفقهاء ان كنوز البحر معليهاش زكاه ماعدا روايتين عن الامام احمد ابن حنبل ان فيه زكاه



    س سؤال فاكرين لما وجه القمر سلفتنى فلوس وانا هاردها
    الفلوس دى تدفع عنها زكاه وللا لا؟


    قاللك فيها 4 اقوال
    الاول ما تدفعش لغاية ما تسترده وتدفع عن اللى فات كله
    الثانى تدفع او ما يحين وقته
    الثالث ما تدفعش خالص
    الرابع تدفع لما تسترده لسنة واحدة


    طب افرض انا طلعت نصابة اخدت الفلوس ويا فكيك وهى عمالة تحاول تاخدهم منى مفيش فايدة او انا متعسرة ومعييش فلوس خالص هي تعمل ايه؟

    فيها برضه كلام

    ماتدفعش خالص
    تدفع لما تقبضه
    تدفع لما تقبضه عن سنه واحدة


    انا كده طولت عليكو قوي و شوية و الناس هتنام و هاسمع اصوات غريبة
    فان شاء الله نكمل باقى احكام الزكاة المرة الجاية وعليكو خير

    ازاى الاولاد ؟

    وانا كمان ;)

  19. #19
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه



    انا عارفة ن المرة اللى فاتت كانت تقيلة
    بس ملخص الامر كله
    ان الواحد يطلع الزكاه عن حاجات معينه اللى هي
    الدهب
    و الفضة
    و الفلوس والمستندات المالية
    و الجمال والخرفان والماشية
    و الزرع
    و التجارة
    و المعادن والاثار

    و تجب الزكاة لما تبلغ النصاب و يعدى عليها سنة ولو كانت زرع لما ييجي وقت الحصاد

    دي اهم نقط لازم كل مسلم يكون عارفها

    تعالوا نكمل بقى و اللى جاي اسهل ان شاء الله
    شوية نقط مهمة ورا بعض

    لو واحد عنده قطيع خرفان فاضل عليه واحد بس ويكمل النصاب وجت شاه ولدت قبل ما يتم الحول بيوم تجب في القطيع كله الزكاه
    وقس عليها التجارة او اي حاجة تانية
    لو فيه ربح على مال مش مكمل النصاب وكمل النصاب بالربح ده تجب فيه الزكاه


    الزكاة تجب في الذمة وليس عين المال
    بمعنى؟
    واحد بقاله سنتين مبيخرجش زكاه
    و السنة اللى هيخرج فيها ( اللى هي بداية التالتة ) خرج عن اول سنة فقل النصاب يخرج عن السنة التانية وللا لا؟
    قاللك لازم يخرج عن السنتين
    لان الزكاة تجب في ذمة المسلم مش في الفلوس


    كمان نقطة
    واحد مرة على فلوسه الحول بقاله شهر و ناوي يطلع الشهر الجاي بس قبل ما يطلع النصاب قل
    قاللك لازم يطلع مادم الحول جاء وجبت الزكاه


    طيب
    واحد فصل فلوس الزكاه و شالها لوحدها وجه حرامي هوب لطشها يعمل ايه؟
    لازم يطلع غيرها لانها في ذمته اما الحرامي ده فحسابه على الله


    تأخير الزكاه لا يسقطها يعنى لو قعدت يا رب 20 سنة ما بتطلعش برضه واجب عليك تطلعها



    لو فيه ناس مشتركين في فلوس لا تجب الزكاه عليهم الا اذا كان كل واحد تم النصاب
    ده غير موضوع الشركة في الحيوانات اللى اتكلمنا عليها


    طب افرض واحد ربنا يهديه جه ليلة ما يتم الحول وراح نزل اشترى بدلة ب 200 جنيه وقصده انه يقلل الفلوس عن النصاب
    الامام مالك والامام احمد قالوا برضه تجب عليه في اخر السنة
    اما ابو حنيفة والشافعي قالوا لا تجب بس هو كده عاصي


    طيب
    نشوف بقى الحتة المهمة
    مصارف الزكاه


    كلها موجودة في الاية
    ( انما الصدقات للفقراء و المساكين و العاملين عليها و المؤلفة قلوبهم وفي الرقاب و الغارمين و في سبيل الله و ابن السبيل فريضة من الله والله عليم حكيم)


    1و2 الفقراء و المساكين
    المحتاجين يعنى

    بالمناسبة يا جماعة الغني في الشرع هو اللى معاه نصاب الزكاه
    محدش يقول انا فقير او حالتى مش قوي
    مادمت معاك نصاب فانت غنى و تجب عليك الزكاة

    طيب ايه الفرق بين الفقراء و المساكين؟
    المساكين هم اللى بيستعففوا

    تديهم قد ايه؟
    ما يسد حاجته


    طيب واحد فقير بس قوي ومكتسب يعنى بيشتغل يعطى وللا لا؟
    قاللك لا يعطى



    طب افرض واحد معاه فلوس تكفي النصاب و و عنده 11 ولد و بيستهلكوا الفلوس
    يبقى ايه؟
    يبقى غنى و فقير

    يعنى يطلع زكاه ويعطى برضه؟
    طب واحد هيسأل ماهو ما يطلعش بقى وياخد دي في دي
    قاللك لاااااا
    ماهو الزكاة لا تصح للاقارب اللى عليك نفقتهم



    3 العاملون على الزكاة
    يعنى اللى بيجمعوها ويوزعوها
    كل الناس ايوه
    كلهم كلهم
    اه
    ما عدا
    سيدنا محمد و آل بيت الرسول اللى هم بنو عبد المطلب
    لان لايصح الرسول و لا آل بيته ياخدوا من فضل الناس


    4 المؤلفة قلوبهم
    بمعنى الناس اللى عايزين تألفوا قلوبهم للاسلام او تثبتها عليه او الناس اللى عايزين تكفوا شرهم عن المسلمين
    و دول اتقسموا الى مسلمين و كفار

    المسلمين 4
    1 ناس من سادات المسلمين ليهم اصحاب من الكفار لو اعطوا ممكن اصحابهم يسلموا زي مين ؟
    زي عدى ابن حاتم و ده كان مسلم وحسن الاسلام كمان


    2 زعماء ضعفاء الايمان من المسلمين بهدف تثبيتهم

    3 المسلمين على حدود بلاد الاعداء لانهم بيدافعوا عن المسلمين وارضهم

    4 قوم مسلمين محتاجينهم عشان نجمع الزكاة من اللى بيستعبطوا ومش عايزين يدفعوا
    افتكر والدى كان بيحكيلي عن واحد ربنا مديله الصحة قابله فبيقوله لو فيه اي مشكلة في الجمعية ( جمعية شرعية ) قوللى عايزين نستخدم قوتنا في سبيل الله
    وصلت؟


    الكفار بقى 2
    1 اللى يرجى ايمانه لو اعطى من الزكاة
    زي صفوان بن اميه


    2 من يخشى شره فيعطى لكف اذاه
    عن ابن عباس قال ان قوما كانوا يأتون النبي صلى الله عليه وسلم فان اعطاهم مدحوا الاسلام وقالوا هذا دين حسن وان منعهم ذموا و عابوا
    زي سفيان بن حرب


    5 و في الرقاب
    يعنى ندفع لعتق رقاب المسلمين

    سواء ان تفكها ( يعنى تساهم في عتقها ) او تنفرد انت لوحدك بعتقها



    6 الغارمون
    اللى هم اصحاب الديون اللى ماقدروش يسددوها


    7 في سبيل الله
    الطريق الموصل لمرضاته من علم او عمل
    بس الحج مش منهم لانه يجب على القادر
    و اجمع العلماء على انه الجهاد اولا
    من تجهيز المؤن والاكل والاسلحة
    وغيره وقت الحرب من
    المستشفيات العسكرية و الجمعيات الخيرية و رصف الطرق و مد خطوط السكة الحديد العسكرية و بناء الخنادق والبوارج والحصون

    و برضه تحت البند ده
    اعداد الدعاه و المدارس


    8 ابن السبيل
    المسافر اللى انقطع عن بلده و كان مسافر في طاعة غير معصية



    طيب يدي لمين ويسيب مين
    الشافعية قالوا اذا كان اللى بيوزع هو صاحب المال يوزع على السبعة الباقين ولا يترك صنف من المستحقين

    الحنابلة قالوا الاولى التقسيم و يجوز انه يديه لصنف واحد

    الاحناف هو مخير يدي للى شايفه محتاج




    مين اللى حرام عليهم الزكاة؟
    الكفرة والملاحدة
    بنو هاشم
    3 و 4 الاباء و الابناء
    5 الزوجة
    6 صرف الزكاه في وجوه القرب يعنى ما تدفعهاش لبناء مسجد او تصلح طرق
    لازم في اوجهها


    اتفق العلماء ان اصحاب المال هم اللى يفرقوها
    والا يوزعها الحاكم او نوابه وهم المسؤولين امام الله


    يستحب ان تعطى الصدقة للصالحين
    يعنى لو عارف انه هياخدها يشرب بيها مخدرات يبقى متديلوش

    طب افرض خرجت حاجة في الزكاة وحبيت تشتريها بعد كده
    نهى الرسول عن ده وقال لا ترجع في صدقتك


    طيب الزوجة تعطى من مال الزكاه للزوج؟
    ايوه لانها لا يجب عليها نفقته
    و المستحب ان الزكاة تطلع للاقارب ممكن ينطبق عليهم الشروط

    برضه من الفئة اللى يستحب اعطاؤهم مل الزكاه طلاب العلوم الشرعية لانهم مبيشتغلوش ومنشغلين بالدراسة

    لو واحد مسلف واحد فلوس و قال خد الفلوس دي خلاص مش عايزها من فلوس الزكاه يجوز؟
    الامام احمد والامام ابو حنيفه قالوا لا يجوز
    و الحسن البصري قال يجوز



    طيب ينفع ننقل فلوس الزكاه من بلد لبلد
    ينفع الزكاه تسافر فلسطين
    ايوه يجوز
    بس امتى؟
    لما يكون فقراء البلد خلاص مبقوش محتاجين

    طب لو واحد اخطأ في صرف الزكاه يعنى طلعها لواحد ما يستحقش
    قاللك الاحناف قالوا ما يطلعش تانى
    و المالكية والشافعية قالوا لازم يطلع تانى
    اما عند الحنابلة روايتان


    الزكاه اما ان تكون في الجهر او السر بس السر افضل عشان تجنب الرياء

    زكاة الفطر
    هي الزكاة اللى تجب بالفطر من رمضان
    دى واجبة على كل مسلم و مسلمة صغير وكبير ذكر او انثى حر او عبد
    و هي واجبة على كل واحد عنده صاع فوق قوته
    ايه الصاع ده

    اربع كبشات
    ايه كبشات دي؟

    يعنى تكبش بايديك الاتنين 4 مرات
    و تخرجه
    من ايه بقى؟
    قمح او شعير او زبيب او تمر او الاقط ( اللبن المجفف كامل الدسم ) او الارز او الذرة

    وقتها اخر رمضان
    لكن امتى بالظبط اختلف الائمة عليه
    بس فيهم اللى قال وقت غروب ليلة الفطر
    وفيه اللى قال وقت الفجر

    و يجوز تقديمها قبل وقتها
    لكن لا يجوز تأخير بعد وقتها

    و تتوزع على نفس مصارف الزكاه العادية
    و الفقراء اولى قال صلى الله عليه وسلم ( اغنوهم في هذا اليوم )

    طيب افرض طلعنا زكاه المال وزكاة الفطر
    كده بقى خلاص محدش له عندى حاجة؟

    كده غلطتين
    الاولى محدش له عندي؟
    عندك انت؟
    هي الفوس بتاعتك اصلا؟
    دي فلوس ربنا اداها لناس و امرهم بتوزيعها على التانيين
    و الغلطة التانية
    ليهم ونص كمان
    لو نزلت حاجة بالمسلمين لازم تطلع من اموال الله اللى معاك



    طيب عشان نقفل موضوع الانفاق
    اتكلمنا عن الزكاه و نقول بسرعة كلمتين مهمين عن الصدقة

    القاعدة بتقول كل معروف صدقة


    اولى الناس بالصدقة اولادك واهلك و اقاربك

    لا تقبل الصدقة بالحرام

    يجوز للمرأة ان تتصدق من بيت زوجها اذا علمت رضاه ويحرم عليها اذا لم تعلم

    يجوز التصدق بكل المال اذا كان المتصدق قوي مكتسب غير مديون

    الصدقة واردة على الحيوان ماحنا قلنا كل معروف صدقة

    الصدقة الجارية تمد في عمل ابن ادم بعد الموت




    كده خلصت الزكاة والصدقة

    سبحانك اللهم وبحمدك اشهد الا اله الا انت استغفرك واتوب اليك

    ازاى الاولاد ؟

    وانا كمان ;)

  20. #20
    تاريخ التسجيل
    Dec 2003
    الدولة
    لما تحب تزورنا ابقى قولى
    المشاركات
    13,756
    معدل تقييم المستوى
    10

    افتراضي رد: درس فقه

    الحج

    معنى ان الواحد يحج
    انه يقصد مكان معين او حاجة معينة
    و عندنا طبعا الحج هو قصد البيت الحرام في وقت معين بافعال معينة

    و الحج طبعا من اركان الاسلام فرض مرة واحدة بس _ وهو الركن الوحيد اللى اتفرض مرة واحدة _

    فرض على كل مسلم ومسلمة يقدر يعمله
    فلازم تتوفر شوية شروط

    الاسلام
    البلوغ
    العقل
    القدرة على القيام بالفريضة دي ماديا و بدنيا
    ان تكون المناسك في وقتها

    طب افرضوا واحد عنده فلوس و مايقدرش يروح يحج عشان مريض مرض شديد يمنعه من السفر يعمل ايه؟ او واحد توفى ولم يحج الفرض او كان واقف نذر يعمل ايه؟


    واجب عليه يبعت حد يحج مكانه بفلوسه او الورثة يرتبوا حجة بالفلوس اللى سابها


    انما لو يقدر لا يجوز ابدا انه يبعت حد مكانه

    بس بشرط اللى هيحج عنه ده لازم يكون حج عن نفسه قبل كده

    فيه بس تعليق صغير ان المالكية قالوا مفيش حاجة اسمها انابة و اللى مايقدرش فعلا يروح تسقط عنه الفريضه

    طيب زيادة بالنسبة للبنات
    ان يكون معاها محرم
    المالكية والشافعية قالوا يجوز بدون محرم اذا توافرت الصحبة الصالحة المأمونة

    طيب س سؤال

    هل يجوز لراجل انه يمنع زوجته من الحج اذا كان معاها محرم او صحبة صالحة

    قاللك لا
    لا يحق له انه يمنعها
    و لها ان تخرج بدون اذنه
    لان ده فرض

    انما حج النفل لازم تستأذنه
    طب يعنى ايه حج النفل ده؟

    قاللك الاصل الحج مرة واحدة
    لو كررها يبقى نافلة بقى مش فرض

    يبقى الاحسن يعمل ايه؟

    يدى الفلوس لحد يحج بيها حج فريضة
    و ياخد مثل ثوابه

    مش كده وللا ايه؟

    و هنا ييجي سؤال مهم

    ينفع الواحد يستلف عشان يحج؟؟؟؟

    الاصل انه ما يستلفش عشان يحج
    لان الدين يسر
    و الحج فرض على القادر ماديا

    انما لو حصل
    او حد تكفل بمصاريف حجه يبقى ايه الوضع
    يبقى جائز باذن الله و يبقى ادى الفريضه


    طيب
    دكتور عماد اخد يوسف السنة دي و راح يحج
    يوسف بقى
    ما شاء الله
    عسول في ملابس الاحرام
    وعمل كل المناسك
    هل كده نقوله يا حاج يوسف و تسقط عنه الفريضة؟؟؟؟

    قاللك لا
    لان من شروط الحج البلوغ
    طب و بعدين ؟
    يعنى ما تتحسبش؟

    لا تتحب و تضاف لميزان حسناته باذن الله كنافلة
    و لما يكبر يبقى يحج حج الفريضة ان شاء الله

    طيب حتة حلوة قوي
    المواقيت
    عارفين اسم المكان واسم الزمان

    اهو دي كده

    الميقات الزمانى اللى هو الوقت اللى الناس بتحج فيه و لو عملوا المناسك في غيره ما ينفعش
    و هي 3 شهور
    شوال و ذو القعدة واول 10 ايام من ذو الحجة


    اااااااااااااااااااااااااااااه
    وقفة جامدة هنا بقى

    انا واحدة من الناس سألت في النقطة دي ازاي يعنى الحج 3 شهور
    اللى اعرفه ان الحج بيبقى في العشر الاوائل من ذو الحجة بس
    يبقى ازاي 3 شهور بقى؟؟؟؟؟

    بص يا سيدى

    زمان السفر كان بياخد ايام وشهور

    تخيلوا واحد قايم من مصر على جمل نوى يروح الحج
    تلاقيه قايم من اول شوال عشان يادوب يوصل الكعبة على اول ذو الحجة

    من هنا جت الحج اشهر معلومات
    و انه 3 شهور

    يعنى الواحد ممكن يحرم في شوال ويستنى لحد وقت المناسك ويصح حجة
    ايوه

    طب واحد احرم في رمضان؟؟؟؟؟

    هنا فيه اختلاف فيه ناس قالوا مكروه و دول جمهور العلماء

    و ناس قالوا لا يجوز ولا يصح الحج
    و دول الشافعية


    مفهومة الحتة دي يا زد ام زد؟؟؟؟


    طيب المواقيت المكانية بقى
    هي الاماكن اللى مينفعش تعدى عليها وانت مش محرم
    ولو حصل لازم تدبح شاه كفارة


    طيب نقولهم تانى
    مع اننا كنا قالينهم في موضوع عيدكم سعيد
    بس نقول تانى عشان الناس بتنسى

    ازايجوس لما كنت في العمرة اللى فاتت
    احرمت منين؟؟؟

    خلوا بالكو ازايجوس اقام في المدينة كذا يوم

    يبقى كده اكيد احرم من ابار على ( او اسمها التانى ذا الحليفة ) دي على بعد 20 كيلو من المدينة و هاعملكوا موضوع ظريف ان شاء الله عن ابار على دي و سبب تسميتها ومين على ده
    يبقى ميقات اهل المدينة ابيار علي

    طيب اهل الشام و مصر و المغرب؟؟
    بيحرموا من الجحفة جنب مدينة رابغ
    وده اللى احرمت منه وانا رايحة اعتمر من الاردن


    اهل نجد
    ميقاتهم حتة اسمها قرن المنازل وده جبل شرق مكة بينه وبينها حوالى 100 كيلو

    اهل اليمن
    ميقاتهم يلملم و ده جبل برضه بس جنوب مكة بقى ( مش اليمن جنوب ؟ ) بينه وبينها 54 كيلو تقريبا


    طيب نقف عند الحتة دي دلوقتى
    عشان لو كان موضوع الحلقة اللى جاي الحج نخلى الكلام فيها عن الاركان باذن الله
    و اذا مكنش نكمل هنا

    سبحانك اللهم وبحمدك اشهد الا اله الا انت استغفرك واتوب اليك




    ازاى الاولاد ؟

    وانا كمان ;)

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. درس تعليمى جديد
    بواسطة sameh_ig في المنتدى ابداعات الاعضاء
    مشاركات: 4
    آخر مشاركة: 02-04-2008, 11:07 PM
  2. مما تعلمت من الشيخ محمد حسان الحفاظ على الوقت فقه الوقت
    بواسطة د/ ربيع أحمد في المنتدى إسلاميات
    مشاركات: 0
    آخر مشاركة: 25-12-2007, 03:53 PM
  3. درس في الجديه
    بواسطة co0o0L في المنتدى حوار
    مشاركات: 10
    آخر مشاركة: 23-09-2007, 03:20 AM
  4. كنت في درس سلفي
    بواسطة مصباح في المنتدى إسلاميات
    مشاركات: 4
    آخر مشاركة: 17-04-2007, 12:09 PM
  5. الدروس
    بواسطة a7mad في المنتدى حوار
    مشاركات: 34
    آخر مشاركة: 18-09-2006, 03:07 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •