النتائج 1 إلى 9 من 9

الموضوع: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

  1. #1
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    Lightbulb دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    بسم الله الرحمن الرحيم


    أهلا بكل طلاب و طالبات سنة أولى طب القصر العيني
    أهلا بيكم في أكبر صرح تعليمي طبي في مصر
    و أهلا بيكم في المنتدى


    أول حاجة أحب أعرفكم بالكلية و نظامها في عجالة
    سنين الدراسة في الكلية 6 سنين
    أول 3 سنين بيكونوا نظري أو آخر 3 سنين بيكونوا عملي
    الكلية مفيهاش نظام الترم .. و إن كان يوجد إمتحانات نصف العام


    الدراسة في الكلية عبارة عن محاضرات هيتم تقسيمكم فيها على خمس مجموعات
    و سكاشن هيتم تقسيمكم فيها على عشر مجموعات

    أولا بالنسبة للمحاضرات

    طبعا بتكون طول الاسبوع بمعدل 3 محاضرات في اليوم من الساعة 12 للساعة 3
    و المحاضرات مش بيكون فيها غياب .. و لكن في حاجة اسمها امتحانات مفاجئة ليس لها أي اعتبار
    تقدر تحضر للدكتور اللي تحبه في أي مدرج من الخمسة المخصصين لسنة أولى
    في الغالب هيكون في مدرج أو اتنين ماشيين بنفس الجدول بتاع مدرجك و دول ممكن تحضر فيهم بكل سهولة
    و الدكاترة مش بيكونوا ثابتين في أي مدرج .. و لكن بيكون في تبديل مستمر كل فترة
    هتحتاج في المحاضرة ان يكون معاك كتاب القسم أو كتاب الدكتور اللي بيشرح
    و كشكول عشان لو حبيت تسجل حاجة


    ثانيا بالنسبة للسكاشن

    السكاشن بتكون في الغالب 4 أيام من الخمسة و معادها " الرسمي " من 8 لـ 11 و في الغالب بيكون في سكشن بعد المحاضرات من الساعة 3 عصرا إلى الساعة 6
    طبعا السكاشن فيها غياب .. و لازم نسبة غيابك لا تتعدى الـ 25% ..أو حسب النسبة اللي يحددها رئيس القسم و إلا هتحرم من امتحان اخر السنة
    و السكاشن بتبقى إما عملي أو نظري
    و اللي هيشرحلك في السكاشن هما معيدين كل قسم
    هتحتاج في السكشن البالطو و الجوانتي و كتاب العملي


    طيب مفيش حاجة غير المحاضرات و السكاشن ؟؟

    لأ في .. الدروس
    و دي بتبقى خارج الكلية طبعا و ليها مواعيد كتير
    بس لازم تعرفوا ان الدروس من شرط للنجاح أو التفوق
    و لكن وسيلة مساعدة ضمن وسائل كتير

    مصادر المذاكرة



    مصادر المذاكرة في الكلية عندنا متنوعة
    يعني في كتب القسم .. و في ملازم الدكاترة .. و في محاضرات مسجلة من السنين السابقة على شرايط أو سيديهات
    و في وسائل أخرى زي الأطالس و مواقع الإنترنت
    و أهم حاجة في المذاكرة في الكلية عندنا هي المواظبة
    يعني لازم تذاكر أول بأول
    مش لازم تفهم أو تحفظ من أول مرة .. بس المهم إنك تبقى عارف كل حاجة ماشية إزاي .. على الأقل أول شهر
    و الكلية عندنا بتعتمد على الحفظ ثم الحفظ ثم الحفظ ثم الفهم
    و في طلبة بيتخلوا عن الفهم أصلا


    دي كانت نظرة سريعة على نظام الكلية
    و لمزيد من المعرفة أنصحكم تشوفوا الموضوع ده



    لأي استفسار يا ريت تدخلوا على الموضوع ده

    Can't imagine the forum without U .. Kalamntena


  2. #2
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    Arrow رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    دلوقتي هنتكلم عن الدراسة و المواد

    أول سنتين في الكلية بتدرسوا فيهم أربع مواد .. يعني السنتين مكملين لبعض
    و المواد دي هي

    Physiology .. علم وظائف الأعضاء

    Anatomy .. التشريح

    Biochemistry .. الكيمياء الحيوية

    Histology .. عِلْم الأنسجة

    اما بالنسبة لتوزيع الدرجات

    الفسيولوجي 250 درجة .. و تعتبر أصعبهم بس بصراحة مادة لذيذة جدا و أهم حاجة انك متحطش في دماغك انها صعبة .

    الأناتومي 250 درجة . و برضه تعتبر من أصعبهم و محتاجة مذاكرة كتير و تكرار .

    البايو 150 درجة .. مادة لذيذة و مش صعبة قوي .

    الهستولوجي 150 درجة .. و دي أسهلهم .

    و هنتكلم عن كل مادة بالتفصيل إن شاء الله

    و يبقى المجموع 800 درجة

    و في كمان لغة إنجليزية و حاسب آلي بس مش داخلين في المجموع

    النجاح في الكلية من 60 % و التقديرات كالتالي

    مقبول 60 %
    جيد 65 %
    جيد جدا 75 %
    امتياز 85 %

    و لازم تعرفوا إن تقدير الشعب في الكلية هو جيد جدا و امتياز .. يعني من الآخر الكلية عايزة شغل من نار
    بس في نفس الوقت مفيهاش ظلم .. و سيبكم من أي حد بيتكلم عن الواسطة و الكوسة لأن ده لو موجود يبقى مش دلوقتي على الأقل
    ادي الكلية هتديك .. و ذاكر هتنجح .. و ذاكر اكتر هتجيب امتياز .. يعني من الآخر 1+1 = 2 و انت سيد قرارك .
    Can't imagine the forum without U .. Kalamntena


  3. #3
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    افتراضي رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    -1- الفسيولوجي Physiology



    ( مشاركة خاصة بـ HAYAH )




    اول حاجة تقدر تعرفها عن الفسيولوجي انها علم وظائف الاعضاء

    تسألوا يعني ايه؟ يعنى هتدرس وظيفه كل حاجه فى جسمك ايه واهميتها ..

    المهم:-


    مادة الفسيو بجد من اجمل المواد اللي هاتدرسها في المرحلة الاولى

    لسبب بسيط جدا..

    انك فعلا هتحس بمعلوماتها انك في كلية طب وهتستفيد منها في حياتك العادية ..

    انك هتعرف اسباب حجات كتير

    المهم انك تتعامل معاها صح من الاول عشان تكمل فيها صح..

    -اول حاجة فروع المادة:-

    هما 9 فروع لكن من كل الفروع زى بعضها فى فرع بيتشرح فى اسبوع وواحد تانى فى شهر يعنى مش كلهم زى بعض .


    1-introduction_مقدمه

    دي هتبقى اول حاجة تدرسوها في المنهج

    يستحسن انكم تقرأوه وتتابعوه من الاول عشان هتسهل عليكم فهم حجات بعد كدة

    مش مهم التركيز عليه قوي في الحفظ المهم انك تستوعبه كله..




    2-autonomic_الجهاز العصبى اللاارادى


    ده بيتكلم عن الجهاز الثمبثاوي والبارا ثمبثاوي..عندنا خلفية عنه من ايام ثانوي

    بيتكلم الفرع ده عن الاعصاب اللي طالعة من كل جهاز للاعضاء وتأثيرها على كل عضو

    كمان بيتكلم عن ازاي نزود تأثير اي جهاز منهم او نقلله او نوقفه خالص للاستخدامات الطبية المختلفة
    وهتلاقوا اسماء نواقل كميائية وشوية ادوية لما تحفظوها بجد هتفرحوا بنفسكوا
    وهتلاقوها بتجاوب على اسئلة عندكوا زي
    ايه الجهاز الارادى ده؟؟
    ليه لما بتضايق او بخاف بتزيد عدد ضربات قلبي؟؟
    لما بتكون خايف او في وضع هروب او ليلة الامتحان..ايه اللي بيحصل في جسمي..مش بيبقى على طبيعته اكيد ..





    3-nerve_الاعصاب

    برده هتلاقوا نفسكوا عندكو خلفية عن الموضوع من المرحلة الثانوية_زى فصل الاحساس اللى فى الاحياء _

    بيتكلم عن الاعصاب وتوصيليتها للاشارات الكهربية وانواع الاعصاب


    وشوية تفاصيل زيادة بتوسع بس لو حبيتوه من الاول هتكملوا فيه كويس
    وهو مش كبير عموما ومش رخم
    وهيجاوب على شوية اسئلة عندنا زي
    بتتنقل الكهربية ازاي؟؟
    لو حصل مؤثر مش كافي انه يثير العصب بيحصل ايه؟؟

    ازاي بتحكم في جسمي وحركته؟؟


    4- muscle_العضلات

    ده الفرع اللي لازم يجي بعد النيرف على طول..
    هتلاقوا مشابه ليه في التعريفات وبعض التفاصيل..هيتكلم عن العلاقة بينه وبين الاعصاب وطرق التوصيل بينهم وازاي..

    تتنقل الاشارة الكهربية من المخ للعصب للعضلة وتتم الحركة
    بربط الفرع ده مع الفرع اللي قبله هتلاقوا نفسكوا عرفتوا حجات كتير عن طرق الحركة وتفاصيل بجد هتعجبكوا..
    ازاي انت قاعد دلوقت؟؟
    ازاي بتكتب ؟؟
    ازاي بتقف؟؟
    وانت ماشي عضلات رجلك بتتحرك طب ظهرك مفرود ازاي؟؟



    5-blood_الدم

    ده بقى من اسهل الفروع واجملهم وامتعهم واحلاهم..ممكن اكتب فيه قصايد للصبح..بجد هتحبوه جدا واحلى حاجة فيه انه مهم ..

    دايما مرتبط عندنا المهم بالصعب ده بقى مهم جدا وسهل

    اياكم والتراكم فيه وذاكره من الاول وهتحبوه اكيد
    بيتكلم عن الدم..!!
    ايه توزيعه..تحاليل لسلامته..الكرات الحمراء والبيضاء والصفائح الدموية..تفاصيل عن تكوينهم ووظيفتهم والمشاكل اللي ممكن تكون فيها وتأثيرها العام..
    هتجاوب على شوية اسئلة دايما في دماغنا زي
    يعني ايه جلطة؟؟
    اسبابها؟؟
    يعني ايه نزيف..واسبابه؟؟
    يعني ايه السيولة عن المريض عالية؟؟
    يعني ايه انيميا وهل ليها انواع وايه الفرق بين الانواع دي ..(ده سؤال مهم جدا ومن اهم الاجزاء في الفرع ده)..؟؟

    6-immunity_المناعه

    بيتكلم عن المناعة في الجسم
    ممكن نعتبره تابع للblood

    بسبب اننا في ال BLOOD هندرس كرات الدم البيضاء ودي ليها علاقة بالمناعة ..
    ودور الجهاز المناعي هو تكملة ليها..
    القسم ده بسيط جدا وحلو بس محتاج فهم كويس ومتابعة من الاول ومش سهل يتلم..في ناس كتير بتتجاهله او بتطنشه وفي النهاية بيتزنقوا فيه ومش بيعرفوا يلموه مع انه صغير..
    هتجاوب شوية اسئلة زي
    يعني ايه يبقى في مرض؟؟
    ازاي الجهاز المناعي بيشتغل وخطواته؟؟
    ليه الجسم بيسخن في اصابات البرد وامراض تانية كتير؟؟
    يعني ايه مدةpuss ؟؟
    ايه فصائل الدم واتصنفوا على اي اساس وايه فايدة التصنيف؟؟



    7-circulation_الدوره الدمويه

    ده بقى اكبر فرع واهمهم واكثرا متعة وايثارة وتشويق

    على قد ماهو كبير على قد ما بتحس وانت بتدرسه انك دكتور فعلا

    بتدرس الجهاز الدوري بتوسع ..والقلب والاوعية ..بتاخد تفاصيل كتير هتحبها..هتدرس
    ECG>>رسم القلب..
    هتعرف ازاي القلب بيشتغل لوحده؟؟
    وهترجع لجزء الاتونوميك اللي بيزود حركة القلب او بيقللها
    هتدرس شوية من امراض القلب واسبابها وتأثيرها على الجسم
    الفرع ده فيه المعلومات الاكلينيكية او العملية كتيرة جدا وبيجاوب على اسئلة كتيرة في ذهننا..
    من اهم الحجات اللي هتاخدوها هي الضغط وامراضه والحجات اللي بتنظمه ولو حصل خلل ايه النتيجة وهل في علاج ليه ولا..؟؟



    8- respiration_التنفس

    ده تاني اهم فرع في المنهج بعد الCIR
    برده جميل وشيق وهتحبوه جدا لو بتحبوا طب..معلوماته الكلينيكية كتير وهتحسوا انه بيجاوب عن اسئلة كتير ..

    هتحسوا مع كل معلومة جديدة انك بدأت تدخل المجال ده
    هتحس بمعنى كلمة دكتور..
    كمية المعلومات اللي فيه مش بسيطة ولا قليلة ومش سهلة انك تفهمها
    لازم تركيز ومتابعة ومذاكرة اول بأول
    هتدرس حجات زي ايه مكونات الجهاز التنفسي وظيفة كل جزء
    يعني ايه تنفس؟؟
    ازاي بيتم؟؟
    ايه اللي بيتحكم فيه؟؟
    ايه امراضه؟؟
    في شوية معلومات في النص بتفسرلك حجات زي الزغطة..والتثاؤب..دي اسئلة دايما في ذهننا
    ايه الفرق بينا وبين ناس ساكنة في اماكن مرتفعة ؟؟
    ازاي الاكسجين بيوصل للاعضاء والعوامل المتحكمة في وصوله وطريقة استخدامه..
    وكذلك بالنسبة لثاني اكسيد الكربون..


    9 -biophysics

    ده بقى اخر حاجة ممكن تاخدوها واصغرها وابسطها واسهلها يعني كام ورقة كدة في اخر السنة .

    هتلاقوا حجات متكررة من Respiration وcirculation ..وكدة


    -معلومة مكملة للموضوع بتاع المواد: ان مش كل جزء بيتدرس بانفصال يعني هتلاقوا في الفسيو نازل دكتورين في كل مدرج ده ليه مواعيده وده ليه مواعيده

    مثلا في الاول هتلاقواautonomic ماشي معاه blood
    يعني مش كل فرع تدرسوه بيمشي مستقل بذاته لوحده كدة
    وده بيساعد على التنوع وتقبلك للمعلومات المختلفة ..وبيساعد برده احيانا في التربيط بين الفروع

    اهم حاجة المتابعة المستمرة ومذاكرة المعلومة اول باول

    طب الفهم ولا الحفظ؟؟
    طبعا مافيش حاجة في طب اسمها فهم ولا حفظ
    الاتنين
    وعشان نضمن نتيجة كويسة ومن البداية
    اول ما تاخد الموضوع او جزء معين طريقة مذاكرته ببقى انك بتقراه كله على بعضه و بترجم اللي مش عارفه
    وبعدين بتحفظ نقط اساسية وعناوين وبالتالي الموضوع بيبقى في ذهنك صح




    *ماتخافش هايجي الوقت اللي هتراجع عليه وتذاكر التفاصيل لو مشيت بالطريقة دي من الاول مش هتاخد وقت وهتدي لنفسك فرصة تذاكر باقي المواد وتبقى برده ما اهملتش الفسيولوجي


    نيجي بقى لأحسن الدكاترة في المدرجات :


    دكتورة هدى ( introduction & autonomic )
    دكتورة منى ( Blood & immunity)
    دكتور عبد المنعم ( circulation part 1 )
    دكتورة عفت ( circulation part 1 )
    دكتور مجدي عيسى ( circulation part 2)
    دكتور عمران
    دكتور عاكف
    دكتور محمد حسن

    -بالنسبة للدروس:


    اهم دكاترة بيدوا دروس هما دكتور ناجي ودكتور شريف
    وهتلاقي هم دول اللي الناس غالبا بتذاكر من ملازمهم

    ميزة دكتور شريف انه دايما بيعيد وده بيخلي الطلاب اللي متأخرين او اكتشفوا فجأة ان الوضع بقى صعب وانهم داخلين كلية طب بقالهم كذا شهر ولايفقهوا شئ في الفسيو انهم ياخدوا معاه
    بس الاحسن طبعا اننا نتابع ونذاكر من الاول لسبب بسيط
    ان لما تاخدوا اكتر من حاجتين في نفس الوقت والضغط بيخلوا التحصيل قليل

    اما دكتور ناجي غني عن التعريف وتقدر تسأل اللي اكبر منك
    50 سنة من التميز ومستوى متميز جدا
    وطريقه شرح وفهم على مستوى عالى

    من الاول انتوا اللي بتحددوا قدراتكم على المتابعة في المحاضرات او الدروس هتبقى احسنلكم
    ما تتجهوش للاسهل من الاول..جربوا في الاول وحاولوا وبعدين قرروا
    وفي حاجة كويسة في موضوع الدروس
    انك تقدر تحضر حوالي حصتين او 3 مع الدكتور عشان تشوف اذا كان نظامك ماشي معاه وقادر تستوعب منه ولا لاء وبعدين لو قررت تكمل تدفع



    -الفيز بتاع الكورس:



    دكتور ناجى 950 فى الترم الواحد

    دكتور شريف 500 فى الترم الواحد



    -توزيع الدرجات:

    125 نظرى ..
    40 اعمال سنه..

    30 شفوى ..
    30 شيت عملى ..
    15 شفوى عملى ..
    5درجات غياب
    و5 تانين حسب رئيس القسم كدة ممكن يتضافوا على العملي..

    بالجمع والقسمة والضرب والطرح

    يبقى 250 درجة مجموع كلي للمادة..
    وده معناه انها اكبر مادة مع الاناتومي في الدرجات والكم..ماينفعش تستهتروا بيها اطلاقا..

    -سكشن الفسيو:


    لازم البلطو وكتاب العملي اللي هتستلموه ومعاه الكرت بتاعكوا اللي المعيد بيوقع فيه في نهاية كل سكشن دليل على الحضور..والكارت ده بيجي مع الكتاب..
    بتاخدوا الحجات العملي في السكشن وبيخلوكوا تعملوا شوية حجات زي الضغط مثلا..
    وفي حجات تانية بيعملوها قدامكوا بس زي رسم القلب

    مش مطلوب ادوات منكوا بس ياريت تاخدوا جاونتي احتياطي دايما..
    نيجي بقى لمصادر المذاكرة :

    أولا سواء أخدت درس مع دكتور ناجي أو لأ .. أنصحك تسمع الشرايط بتاعته و لو سمعتها هيكون عندك فرصة انك تمشي مع مذكرات دكتور ناجي و اللي بتتصور من مكتبة العالمية .


    و طبعا في ناس بتحب تذاكر من الكتب .. بس مشكلة الكتب انها ملغبطة شوية .. فممكن تستعوضوا عنها بملازم دكتور شريف اللي بتبقى زي الكتاب بالظبط بس على هيئة نقط.


    و دي تسجيلات دكتور ناجي و ألبرت

    ( copied from www.dof3tna.net)


    Dr. Nagy & Albert : 1st Year



    محاضرات A.N.S





    محاضرات Muscle


    محاضرات Nerve




    New 2009 : blood coagulation,clotting factors


    New 2009 :anti clotting,anti coagulants



    محاضرات Respiration






    محاضرات General Circulation





    محاضرات Vascular






    باس ورد فك الضغط لأي ملف به باسورد هى


    التعديل الأخير تم بواسطة dr ZMZ ; 08-08-2009 الساعة 06:48 PM
    Can't imagine the forum without U .. Kalamntena


  4. #4
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    افتراضي رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    -2- التشريح Anatomy
    ( مشاركة خاصة بـ blue oceanz)


    هي واحدة من المادتين الكبار في السنة الأولى والتانية بكلية طب القصر العيني....


    وهي مقسمة لجزئين..الجزء الأول بالسنة الأولى..والتاني بالسنة التانية...


    الأناتومي يا جماعة بصراحة..مادة شيقة جدااااا..بشهادة كل الطلبة..
    لأنها بتعتمد اوي..على ادراكك الحسي...
    يعني أحلى حاجة انك بتدرس تشريح جسم الانسان وبيتكون من ايه ودي حاجة طبعا محسوسة وملموسة ومرئية.....
    و هو ده اللي بيدي الاناتومي الطابع الشيق بتاعها ويحسسك انك فعلا دكتور..لأن المادة بتتعامل فيها مباشرة مع جسم الانسان..




    نيجي بقى لموضوعات الدراسة في السنة الاولى...


    عندنا خمس كتب...وخمس أجزاء في المنهج...

    Human biology

    او معروفة في الكلية بال basis



    ده جزء بناخده في الاول خالص..كتاب صغير جدا..فيه اساسيات التشريح و كلام شبه عام عن جسم الانسان..مثلا الكلام عن المفاصل وانواعها..العضلات وانواعها..وهكذا..


    الجزء ده سهل جدا..لانه مبسط او نقدر نقول عام..



    Upper limb



    يعني الطرف العلوي..وده بندرس فيه الاطراف العلوية يعني منطقة الذراع والكتف واليد..بكل تفاصيلها التشريحية...
    اللي هي..
    عظام..وعضلات..وأعصاب...وأوعية..وكمان الحاجات الاكلينيكية اللي بتتعلق بتشريح الجزء ده من الجسم...وده بيعتبر أتقل الاجزاء لانه دسم اوي بالمعلومات...



    Thorax



    يعني منطقة الصدر..وفيها بندرس منطقة الصدر بكل محتوياتها وتشريحها..بما فيه القلب والرئتين وحاجات تانية كتييير..
    يعتبر الجزء ده من اخف الاجزاء..رغم احتوائه على معلومات مهمة جدا وغنية جدا..




    Lower limb



    يعني الطرف السفلي...وفيه بندرس الفخذ والرجل والقدم..تشريحيا ..وميزة الجزء ده...انه بيتشرح في الاخر..يعني في الترم التاني...وده بيسهل مراجعته ايام الامتحانات..وهو جزء ممتع...



    Embryology



    يعني علم الاجنة...الجزء ده مقسوم بين سنة اولى وتانية وفي اولى بناخد منه جزء مش كبير...
    بنتكلم فيه عن الجنين وازاي بيتكون وتطورات مراحله الاولى...


    يعتبر الجزء ده ارخم الاجزاء لان مصطلحاته صعبة ولانه بيعاني من اهمال الطلبة شوية لاهتمامهم بالاجزاء المذكورة فوق واللي بتعتبر أساسية...



    توزيعة الدرجات...



    المادة كمجمل...احنا قولنا واحدة من المادتين الكبار يعني اللي عليهم 250 درجة...


    40 درجة نظري نصف العام..
    10 درجات عملي نصف العام..
    125 درجة نظري اخر العام...
    45 درجة عملي اخر العام....
    30 درجة شفوي اخر العام...

    الدكاترة والمحاضرين...



    بينزل في المدرجات حسب كل مجموعة...عدد من الدكاترة...


    زي..د.مدحت...
    د.هدى الاعصر..
    د.المعتصم بالله...
    د.سامح دوس...
    د.ايهاب.
    د. شريف

    وأفضلهم شرحا وتميزا..وكل الناس بتحضرلهم...

    د.مدحت...
    و
    د.ايهاب...


    ومن النقطة دي انتقل بيكم..لدكاترة الدروس...





    وهما نفس الدكتورين دول....


    د.مدحت ..و د.ايهاب..


    وده لتميزهم...وشطارتهم...


    دروس الاناتومي...بالنسبة لد.ايهاب بتبدأ من الصيف..في شهر 8..قبل الدراسة...


    لكبر حجم المنهج...


    وبتبقى في جميع ايام الاسبوع..


    وفلوس الكورس كامل 500 جنيه...غير فلوس المكان اللي هو السنتر...




    في كمان...د.احمد جلال...
    وهو معيد...بس نظرا لشطارته...وتميزه..فيه اقبال عليه من الطلبة اللي بتاخد دروس...

    نيجي بقى لمصادر المذاكرة..



    احنا عندنا خمس كتب للقسم....


    في منها اسلوبه..جيد وممتع..وفي منها يتسم بالحشو...وحشد المعلومات بطريقة غير منظمة ومش مريحة على الاطلاق.......


    في ناس بتحب تذاكر من الكتب...


    وفي ناس بتحب تذاكر من مذكرات الدروس...
    اللي بيعمل مذكرات د.ايهاب..للتبسيط و ادخال اكبر عدد من الصور...لان الاناتومي نقدر نقول علم مرئي...والمذكرات مفيهاش اي اخلال بالمعلومات او انتقاص منها...


    د.مدحت بيعتمد على كتاب القسم...




    كيفية المذاكرة بقى...




    الاناتومي...مادة...تفكرك بالاحياء في ثانوية عامة...بس على اوسع بكتييييير...


    90% منها حفظ.... 10% فهم...
    وان كانت النسبة الاولانية تعتمد كتير علي ال10 % فهم..


    والفهم ده..ييجي..باستخدام..ادراكك الحسي والبصري على طول..
    يعني المذاكرة باستخدام الصور..والقواميس...امثال اوكلاند....
    وكمان استخدام الالوان..كل ده بيثبت المعلومات كويس جدا....




    واهم حااااااجة....
    ممنوووووووووع التراكم....
    لأن المادة كبيييرة وتراكم المعلومات يخليها صعبة المذاكرة...


    واحسن سياسة في مذاكرة الاناتومي...


    التكراااااار....والاعادة...كذا مرة...

    نيجي لعملي المادة...





    سكشن المادة...او العملي بتاع الاناتومي..
    بيبقى في مشرحة الكلية...


    مشرحة(أ)...اللي في الدور الارضي..
    او مشرحة (ب)...اللي في الدور تحت الارضي...




    بتكون الدراسة على جثث محفوظة في الفورمالين...


    وبتدرس عليها وتشوف كل اجزاء الجسم اللي بتدرسها نظري...


    و المفروض ان امتحان العملي طبعا بيبقى على الجثث دي...


    كاختبار لقدراتك على التعرف على اجزاء الجسم...
    على جثث مختلفة...



    واجمالا...للكلام عن مادة الاناتومي....هي مادة من اهم المواد واحلاها...بس من اكترهم احتياجا للمتابعة والمذاكرة..

    زي ما قلنا قبل كدة ان الاناتومي مادة بتعتمد على ادراكك الحسي

    لذلك في أطالس كتير جدا للاناتومي

    أفضلهم على الأطلاق أطلس أوكلاند لأنه فيديو و فيه شرح

    و دي لينكات تحميله



    Upper limb













    The Internal Organs




    Lower limb



    Password if required : xpmisho-dvd4arab




    و ييجي بعد أوكلاند على طول اطلس نيتر .. لأن صوره رائعة جدا

    و دي لينكات تحميله



    Upper limb


    Lower limb


    Thorax




    و في أطالس تانية كتير

    و يا ريت تتجولوا كمان في الموضوع ده


    هتلاقوا حاجات تانية
    Can't imagine the forum without U .. Kalamntena


  5. #5
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    افتراضي رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    -3- الكيمياء الحيوية Biochemistry
    ( مشاركة خاصة بالعضو dmd)



    احدى المواد اللى تدرس لطالبى الطب فى الجامعات المصريه
    وتنقسم الى جزئين
    جزء يدرسه طالب الفرقه الاولى
    والجزء الثانى والاخير يتمه طالب الفرقه الثانيه
    احدى المواد اللى تعتمد على الفهم والحفظ معا
    لابد من التركيز على فهمها وعدم محاوله حفظها كما هى
    حتى لا تسبب مشكله للطالب

    الموضوعات التى سيدرسها طالب الفرقه الاولى

    طالب الفرقه الاولى يدرس مواضيع البايو المتعلقه ب

    الكربوهيدرات carbohydrates
    الدهون lipids
    البروتين proteins
    الحامض النووى DNA
    تطبيقات الحامض النووى والهندسه الوراثيه recombinant DNA

    وبعض المواضيع الفرعيه الصغيره

    قسم البايو فى طب القصر العينى
    من افضل الاقسام واكثرها نظاما ودقه وتطورا من الناحيه التكنولوجيه

    توزيعه درجات الماده
    ماده البايو مخصص لها 150 درجه للماده كلها على مدار السنه
    مقسمه كالاتى
    75 درجه امتحان نطرى اخر السنه
    20 درجه امتحان نظرى نصف السنه
    20 درجه شفوى فى اخر السنه
    20 درجات عملى



    باقى ال 15 درجه مقسمه على الغياب وعلى امتحانات فرعيه تعقد خلال السنه

    افضل الدكاتره

    بالنسبه للدكاتره الكويسين فى هذه الماده
    دكتور محمد رشيد بهجت

    افضل دكتور بايو على مستوى جامعات الطب فى مصر_
    يعقد محاضرات اضافيه للطلبه
    ايام الاحد والثلاثاء والخميس
    الساعه السابعه إلا الربع صباحا فى مدرج
    11
    بخلاف دكتور رشيد_

    يوجد دكتوره سمر
    ودكتور حازم
    و دكتور الخشاب

    _مهم اوى انك تحضر لدكتور رشيد وتحضر برده المحاضرات
    العاديه لتحقيق اقصى استفاده _

    اما عن دكاتره الدروس
    فى
    دكتور حازم
    ودكتور الخشاب
    ودكتور عمرو زهره

    مصادر المذاكره

    فى ملازم دكتور حازم
    وورق دكتور عمرو زهره
    وطبعا كتاب القسم
    حسب مين اللى بيعمله
    وان كان دكتور رشيد هو اللى بيعمله
    انا عن نفسى بافضل المذاكره من كتاب القسم بتاع البايو
    وخاصه كتاب بيحتوى على صور واشكال ورسومات توضيحيه .

    كيفيه المذاكره

    طيب كده فاضل ازاى اذاكرها
    واحسن طريقة تذاكر بيها انك تعمل تجميعات للمعادلات والامراض
    والعناوين والتعريفات
    المهمة والمخططات المهمة
    ويفضل كمان انك تحل
    امتحانات السنين اللى فاتت من كتاب الامتحانات

    عملى البايو

    هو عبارة عن تجارب كميائية تجرى للتعرف على محاليل محددة .. و امتحان العملي في الآخر بيكون عبارة عن محلول مجهول .. و عليك تحديده .


    هتحتاج فى العملى بتاع البايو
    البالطو الابيض - ضرووووووري جدا -
    والعملى بيبقى فى السكشن
    المجموعه مقسمه لاعداد صغيره تصل الى 30 طالب

    كما ذكرنا محاضرات دكتور رشيد في غاية الأهمية


    و من المهم جدا ان الواحد يحضرها .. أو يسمعها


    و دي لينكات المحاضرات مسجلة و مرفوعة من قبل العضو d.m.d


    chapter 1
    1


    2









    chapter 2


    2





    chapter 5






    chapter 9

    1







    chapter 12

    1



    2


    3


    chapter 13


    chapter 14


    chapter 15


    chapter 16&17


    التعديل الأخير تم بواسطة dr ZMZ ; 09-08-2009 الساعة 11:50 PM
    Can't imagine the forum without U .. Kalamntena


  6. #6
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    Arrow رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    -3- الهستولوجي HISTOLOGY
    ( مشاركة خاصة بالعضو dmd )


    هو العلم الذي يدرس تركيب الخلايا والأنسجة
    وعلى فكره احنا خدنا اغلب الهستولوجي ده في الاحياء في الدراسة الثانوية

    من خلال دراسه الخلايا ومكوناتها
    هي كل الحكاية اختلاف اللغة
    طيب نظام الماده ده ايه


    توزيع الدرجات

    الماده ده من 150
    درجة
    تقسيمهم ازاي بقه

    75
    درجة نظري في ورقة الامتحان
    15
    شفوي
    5
    درجات لكراسه الرسم
    20
    عملي

    20
    أعمال سنة

    15درجات متنوعه

    وهو توزيع قابل للاختلاف

    حسب رئيس القسم للماده


    الماده دي اول السنة اول ما هتبداها هتكرها وهتبقى مش طايق تفتحها وهتعوز ترمي الكتاب ومتفتحوش تاني ده عادي جدا لان الماده بتعتمد على الحفظ بدرجة كبيره
    بس بعد ما تدرس الاربع المواد هتلاقي ان الهستولوجي هو اسهل ماده
    واحد هيقولي ازاي اسهل ماده
    اقلك يا سيدي

    اولا هو اسهل ماده تتلم يعني لما تتاخر في مزاكرة محاضره او اتنين هتعرف تلمهم بسهولة

    مش معنى كده انك تتاخر فى المذاكره
    بس ما تقلقش لو فاتتك محاضره مش مذاكرها
    لو فاتتك محاضره مش هتعمل مشكله اوي وممكن تعرف تذاكرها لوحدك

    طيب الماده ده هندرسها ازاي
    لما تيجي تذاكرها
    هتهتم بحاجتين
    تذاكر النظري والعملي
    وهأشرح العلمي بعدين عشان مش هتفهموه دلوقتي


    نيجي بقه للمنهج
    ايه محتواه

    اولا
    CYTOLOGY
    ده بيدرس مكونات الخليه وكل حاجه فيها بالتفصيل الممل زي النواة والميتوكندريا وغشاء الخليه ... إلخ هتدرس طولها وعرضها وقطرها ومكانها في الخليه ووظيفتها وكده يعني


    ثانيا
    BASIC TISSUES

    يعني ايه يعني بندرس كل انسجه الجسم الرئيسية وهم اربع انسجه


    EPITHELIAL TISSUE
    اللى هو النسيج الطلائي

    CONNETIVE TISSUE
    اللى هو النسيج الضاموده بيندرج تحته 3 شباتر كمان اللى هم

    cartilage
    الغضروف
    bone
    العظام
    blood
    الدم


    Muscular tissue
    اللى هو النسيج العضلي

    Nervous tissue
    اللى هو النسيج العصبي

    Vascular
    هو ايه دهده شابتر هندرس فيه الاوعية الدموية يعني الشرايين والاورده وكده

    Lympoid الشابتر ده بيدرس الجهاز الليمفاوي اللى بيدي الجسم المناعه زي الطحال والغدد اللمفاوية واللوز وكده
    خلااااااااااص

    كده المحتوى خلص
    طب نتكلم بقه عن الهستولوجي عامه
    العملي بتاع الهستولوجي مهم جدا
    طب بيتكون من ايه العملي ده
    العملي فيه جزئين
    رسومات وشرايح
    ايه الشرايح ده
    الشرايح هي عبارة عن بعض الحاجات اللى هتاخدها زي خلايا الدم مثلا زي الطحال والحاجات كده هتشوفها تحت الميكرسكوبوفي الامتحان بتعدي على حوالى 15 ميكرسكوب مدتك على كل واحد دقيقه والمفروض تتعرف على الشريحه والصبغه اللى مصبوغ بيه الحاجه اللى تحت الشريحه
    الصبغات ده حكايتها سهله وهنتكلم عنها قدام شويه
    طيب والرسومات

    الرسومات هي رسمة لكل حاجه بتاخدها وهي امرها سهل
    بس فيه نوعين من الرسومات

    E.M
    اللى هي بالمكرسكوب الالكتروني وده بتترسم بالقلم الرصاص

    L.M
    اللى هي بالمكرسكوب الضوئي ودي بنولنها اما بالاحمر والازرق وده عشان بنصبغها بصبغه اسمها H & E ده اختصار وهتعرفه بعدين واما بالبني بقه او الوان تانيه حسب الصبغة ودي هتعرفها لما تبدا دراسه ومش مجال لذكرها دلوقتيطيب كده خلصنا تقريبا استعراض للمنهج

    ملاحظات مهمة عند مذاكره الهستولوجي


    1 /
    تقرا الجزء اللى هتذاكره الاول بتركيز وتركز على العنواين الرئيسية والاساسيات وتعرفها كده بتكون خدت 80 % من االدرجة وبعد كده تبدا تتفحص وتقرا بالراحه بقه

    2 /
    الطول والعرض والقطر اللى هي DIMENSIONS مش مهمة اوي بس فيه حاجات هيركزوا عليها اوي المفروض تبقى عارفها دايما

    3 /
    كل ما تخلص شابتر حاول تربط اجزاءه ببعض وتعملها زي خريطه في دماغك كده ده هيساعدك

    4 /
    لما تذاكر الخلايا حاول تعرف كل خليه السيتوبلازم بتاعها حمضي ولا قاعدي

    5 /
    حل الاختياات اللى هي M.C.Q مهم جدا وهيفيدك كتير وهيثبتلك المعلومة

    6 /
    المراجعه باستمرار مطلوبه في الهستولوجي لانه بيعتمد على الحفظ وسهل يتنسي

    7 /
    ترسم بإيدك كل حاجه بتذاكرها وده هيسهل عليك جدا

    8 /
    وانت بتذاكر هات ورقة فاضيه واكتب فيها الكلمات الرئيسية

    9 /
    اعمل مقارنات كتير للخلايا في جداول ده هيسهل عليك ويخليك تحفظ بسهولة

    10 /
    حب اللى انت بتذاكره واوعى تغصب على نفسك

    افضل الدكاتره فى الهستولوجى
    سواء فى المدرجات او فى الدروس
    هما اتنين
    دكتوره جيهان ابو الفتوح
    ودكتوره داليا المراكبى
    الاتنين مستوى رائع جدا

    و إن شاء الله هنرفع محاضراتهم قريب

    آخر حاجة بقى يا ريت تتجولوا في الموضوع ده

    http://www.kasralainy.com/forum/showthread.php?t=8818

    Can't imagine the forum without U .. Kalamntena


  7. #7
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    افتراضي رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    الامتحانات

    ( مشاركة خاصة بالعضوة blue oceanz )
    الامتحانات في الكلية يا جماعة 3 أنواع...

    نظري..وشفوي...وعملي...

    <<< الامتحانات النظرية >>>


    تعتبر الامتحانات النظرية في الكلية هي الامتحانات الأساسية اللي بتلم المنهج كله
    مذاكرة وأسئلة....وطبعا هي اتقل الامتحانات واكترها احتياجا للجهد والوقت كمان..

    بتقام الامتحانات النظري اخر السنة في اواخر شهر 5
    وبتعقد في قاعة الامتحانات...وبتبقى طبعا لكل الدفعة في نفس اليوم يعني مفيش اي تقسيم لمجموعات...

    نتكلم بقى عن الامتحان النظري بالنسبة لكل مادة...


    الفسيولوجي...Physiology

    درجته : 125

    ورقتين ...ورقة اختيارات متعددة m.c.q. عليها 75 درجة..

    وورقة أسئلة مقالية essay questions عليها 50 درجة...

    طبعا الأسئلة المقالية عامة في أي امتحان بتبقى محتاجة كتااااااابة كتير ولازم تراعي ان الوقت مياخدكش...وبرضه تراعي انك تكتب كل اللي تعرفه ومتنقصش حاجة في المعلومة...

    الهستولوجي...Histology

    درجته : 75 درجة

    برضه ورقتين...ورقة m.c.q. و true or false عليها 25 درجة

    وورقة ال essay و امتحان الهستولوجي بالذات بيبقى فيه رسومات..يعني بيبقى عندك انك ترسم في الامتحان رسمة او اتنين من اللي بنرسمهم طول السنة في السكاشن.....عليها 50 درجة..

    امتحان الهستولوجي معروف انه من اطول الامتحانات واكتر احتياجا للكتابة الكتير..

    البيو...Biochemistry

    درجته:75 درجة

    برضه ورقتين...ورقة ال m.c.q. عليها 25 درجة

    و ورقة ال essay عليها 50 درجة...


    أسئلة البيو بالذات بتبقى متوزعة عالمنهج كله لأن منهج البيو وان كان كبير فهو لا يزال أصغر المواد منهجا....وبالتالي الأسئلة بتكون مستوعبة المنهج كله وبيكتر في الامتحان أسئلة enumerate و أسئلة اجابتها قصيرة...

    التشريح....Anatomy

    درجته : 125

    ورقة واحدة فيها الأسئلة ال essay عليها 60 درجة...

    وفيها الأسئلة بتاعة ال m.c.q.
    fill in the blanks
    matching
    problem solving

    ودول بيبقى عليهم 65 درجة....

    وبيبقى ليهم كتاب مخصوص بينزل وقت الامتحانات فيه تدريب كتير على النوعية دي من الأسئلة..وطبعا الكتاب مهم لأنه كتاب القسم....

    مدة الامتحان النظري في كل المواااد 3 ساعات...


    وبكده خلصنا الكلام عن الامتحانات النظري....
    Can't imagine the forum without U .. Kalamntena


  8. #8
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    افتراضي رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    <<<الامتحانات العملية>>>
    ( مشاركة خاصة بالعضوة blue oceanz )

    الامتحان العملي....في كل المواد بيبقى في اخر
    السنة...

    ماعدا الاناتومي بيبقى فيه نص السنة امتحان عملي مع اعمال السنة..
    وبرضه بيبقى فيه في اخر السنة....يعني امتحانين اناتومي عملي..

    وباقي المواد امتحان واحد اخر السنة...




    بالنسبة لكل مادة...





    1-الفسيولوجي...



    امتحان العملي بتبقى درجاته متوزعة على امتحانين...

    واحد اسمه امتحان ال
    sheet


    يعني النظري بتاع العملي....


    يعني ايييييييه....؟؟؟

    يعني التجارب والتطبيقات اللي بناخدها في السكاشن..
    بيبقى ليها شرح صغير او اشارة ليها في الكتاب النظري
    الشرح ده بقى بيتذاكر قبل امتحان ال
    Sheet





    و امتحان تاني اللي هو
    العملي الفعلي اللي بنمتحنه في السكاشن...


    و ده اللي بنذاكرله الكتاب العملي نفسه والتجارب....


    نيجي لامتحان ال
    sheet



    بيبقى معظمه مسائل وأسئلة نظري...وأسئلة اكلينيكة شوية ...
    يعني هو مش امتحان نظري نظري ودش وكتابة ...
    لا هو بس بيختبر مهاراتك الاكلينيكة بخصوص اللي خدته في العملي بس
    بالكتابة.....
    الامتحان ده بيبقى في قاعة الامتحانات...



    الامتحان العملي بقى اللي في السكاشن...

    بيبقى عندك مرحلتين في الامتحان....


    أول مرحلة...

    بتبقى5 محطات او
    stations


    لتجارب انت بتسجل بس القراية بتاعتها...وطبعا التجارب دي انت بتكون مذاكرها...

    بس في الامتحان انت مطلوب منك تسجل قرايتها وتحسب شوية حاجات بتطلب منك..

    دي التجارب اللي بنقول عليها مش مطلوبة ..يعني مش مطلوب انك تعملها بنفسك..
    يعني تذاكرها وتتسئل فيها بالطريقة المذكورة...


    مدة الامتحان
    : الامتحان ده بيبقى مثلا معطى ليه من 5 الي 7 دقائق..

    يدوبك تسجل القراية بتاعة التجربة...لأنه فعلا امتحان سريع...نقدر نقول لكل محطة

    من دقيقة ل دقيقة ونص...




    تاني مرحلة....

    بتبقى تجربة عملية مطلوب منك تعملها... من ضمن 4 او 5 تجارب معروف انهم
    مطلوبين و واقف عليك دكتور في المادة بيسألك عليها..
    يعني يقولك مثلا ايه الخطوات...؟؟؟؟ طيب بنستخدم كذا ليه....؟؟ وهكذا...

    مدة الامتحان :
    متروكة طبعا ليك لحد متخلص تنفيذ التجربة ويخلص الدكتور أسئلته

    يعني المدة غير محددة...



    ده كده امتحان العملي الفسيولوجي خلص....وهو..يعتبر من فعلا من الامتحانات المهمة











    2-البيو....




    امتحان البيو العملي امتحااااان سهل جدااااااا....أبسط الامتحانات العملي..


    بيبقى امتحان عملي في معامل القسم...

    بتدخل الامتحانات..عندك عينتين من المحاليل..او ال
    unknown solutions



    عليك تعرفهم وتحددهم هما ايه من ضمن المحاليل اللي درستها طوال السنة...

    وده باختبارات معينة بتعملها وليها ترتيب معين..

    الترتيب ده اسمه
    scheme



    المفروض بنبقى حافظينه..كويس..عشان لما ندخل الامتحان..

    نبقى عارفين ترتيب الاختبارات وايه الاول وكده...

    الامتحان العملي البيو فعلا امتحان سهل وبسيط...ومذاكرته تكاد تكون معدومة..
    هو بس محتاج انك تعمل ال
    scheme ده كتير في السكاشن..
    وتكون متدرب عليه كذا مرة...




    مدة الامتحان : بتبقى لمدة ساعة واحدة من بدء الامتحان الطالب مش بياخد اكتر من ربع او نص ساعة فيه بس يعني الوقت بيبقى كبير جدا مقارنة بالامتحانات التانية







    3-الهستولوجي....




    امتحان الهستولوجي العملي بيكون في معامل الهستولوجي...
    بيتقسم برضه مرحلتين..

    على حسب نوعيات الشرائح...
    slides


    سواء
    projector slides


    أو
    microscopic slides



    أول مرحلة...

    امتحان ال
    projector slides



    وده بتدخل معمل من المعامل وبيعرضلك عشر صور على ال
    projector



    عليك انك تتعرف عليهم وتقول هما ايه بالظبط..وطبعا الصور دي بتبقى
    من كتاب ال
    atlas اللي بنستلمه مع كتب القسم...
    يعني بتبقى صور معروفة بالنسبة لنا وحاااافظينها لاننا اتعودنا عليها كتير
    في السكاشن....
    وبعد العشر صور ..ممكن يتعرضلك او لأ حسب رغبة رئيسة او رئيس القسم
    صور projector بس خارجية..يعني من على النت....

    طبعا هتقول واحنا هنعرفها ازاااااااااااي؟؟؟؟؟؟؟؟

    ومن السؤال تيجي الاجابة..
    ان انت اصلا لازم تتعرف عليها لوحدك من غير سابق رؤية ليها
    وده من خلال خصائص الخلية او النسيج اللي بيتعرضلك انك بتبقى حافظ شكله ازاي
    وانك تقدر تتعرف عليه حتى لو من صور مختلفة او خارجية زي صور النت...

    وبيبقى على صور النت دي..بعض الاسئلة النظرية الخفيفة اللي اجابتها كلمة او اتنين




    مدة الامتحان :
    الامتحان بيبقى ليه توقيت معين يعني كل صورة ليها دقيقة او اقل..

    اول متخلص بيقول الممتحن next وبيحول عالصورة اللي بعدها..

    لكن صور النت مثلا بيسيبولها وقت اكتر...






    تاني مرحلة...

    امتحان ال
    microscopic slides



    وده بتدخل في معمل تاني بعد متخلص المعمل الاولاني بتاع ال
    projector



    و بيبقى قدامك 30 ميكروسكوب...بتعدي انت على 15 بس..
    وتتعرف على الشرائح الزجاجية اللي محطوطة تحتيه....

    وطبعا الشرائح دي برضه بتبقى متدرب عليها في المعمل وشايفها كذا مرة..


    مدة الامتحان :
    امتحان الميكروسكوبات بيكون امتحان سريع اوي..

    يعني بتقف عالميكروسكوب مثلا اقل من دقيقة ..وبرضه بعدها بيقول الممتحنMove



    وتروح على اللي بعديه وهكذا...بس الموضوع مش مشكلة ابدا لانك بتكون عارف

    الشرائح و بتتعرف عليها بسرعة ومش بتاخد وقت...


    كده يبقى امتحان الهستولوجي العملي خلص...بمرحلتيه..





    4-التشريح...




    امتحان الاناتومي العملي يعتبر من اكتر الامتحانات اللي بيستعدلها طالب طب اوي..

    لانه فعلا من اكتر الامتحانات اللي محتاج هدوء الأعصاب...

    اولا بيسموه
    spotting


    لأنه فيه بيختبروا قدرة الطالب على التعرف على أجزاء الجسم وأساميها..


    ثانيا بيتكرر مرتين مرة نص السنة ومرة في اخر السنة...

    ندخل بقى في تفاصيل الامتحان..

    الامتحان طبعا في مشرحة الكلية...


    بيبقى عبارة عن صور معروضة على شاشة .. بيبقوا 10 صور في امتحان الترم الأول و حوالي 22 صورة في امتحان الترم التاني.

    المطلوب منك انك تتعرف على جزء في الصورة يعني مثلا شريان أو عصب أو عضلة و بعدين بيبقى عليه سؤالين أو تلاتة.

    و النوع ده من امتحانات العملي جديد .. يعني لسة مطبق السنة اللي فاتت .. لكنه أسهل من النظام القديم اللي كان على جثث .

    و في الغالب رئيس القسم بينزل كتاب للصور اللي ممكن تيجي في الامتحان .


    وبكده خلصنا الكلام عن الامتحانات العملية...



    Can't imagine the forum without U .. Kalamntena


  9. #9
    تاريخ التسجيل
    Jun 2009
    الدولة
    مدرسة الحياه
    المشاركات
    2,817
    معدل تقييم المستوى
    10

    Arrow رد: دليلك للفرقة الأولى .... كل ما تحتاج معرفته عزيزى طالب سنة أولى طب القصر العينى

    <<<الامتحانات الشفوية>>>

    و دي بتكون آخر امتحانات و بتبدأ على أول شهر 6 و بتاخد حوالي 3 أسابيع .

    بيتم تقسيم الدفعة على 8 مجموعات كل أربع مجموعات بيمتحنوا في نفس الأيام .. كل مجموعة بتمتحن مادة .. و طبعا ملهاش ترتيب معين .

    أهم حاجة في امتحان الشفوي هي هدوووووء الأعصااااااب .. يعني لازم تكونوا ريلااااااااااكس جدا .. لان التوتر بينسيك حتى اللي انت مذاكره .

    و طبعا انت مش محتاج تذاكر المنهج تاني زي ما ذاكرته للنظري .. لانك ببساطة مش هتلحق .. لكن انت مطالب انك يبقى عندك فكرة عن كل حاجة .. حتى لو كنت ناسي التفاصيل .. لأنك في الغالب مش بتتسأل فيها .

    و مش بتحتاج في امتحان الشفوي غير الكارنيه .. و قلم .

    و نتكلم بقى عن كل مادة لوحدها

    1-الفسيولوجي...

    امتحان شفوي الفسيولوجي بيكون في غرف الدكاترة

    و زي ما عرفنا بيكون عليه 30 درجة .

    بتدخل على لجنتين كل لجنة عليها 15 درجة .. في الغالب يا إما بتكون لوحدك او معاك طالب تاني بيتسأل مع الدكتور التاني .

    2-الأناتومي ...

    بيكون في المشرحة

    و عليه 30 درجة و برضه مقسمين على لجنتين واحدة upper و thorax و واحدة lower

    في البداية الدكتور بيديك عضمة تتعرف عليها و بعدين بيتدي يسألك .. عشان كدة مذاكرة الـbones مهمة جداااااااا لامتحان الشفوي .

    3-الهستولوجي ..

    الامتحان بيكون في لابات العملي .

    عليه 15 درجة .. و بيكون مع دكتور واحد
    و في كمان 5 درجات على كراسة الرسم اللي بيشوفها الدكتور .

    النظام السنادي كان عبارة عن عدد من الكروت موضوعة امام الدكتور .. كل كارت بيمثل شابتر

    انت بتختار 3 كروت .. و كل كارت بيبقى فيه حوالي 3 اسئلة .. و احسن حاجة في النظام ده هو انه بيضمنلك عدم تعنت الدكاترة في الأسئلة .

    و بشكل عام امتحان شفوي الهستو من أسهل الامتحانات .


    4-البايو ..

    الامتحان بيكون في معمل البايو

    عليه 20 درجة .. مع دكتور واحد

    في الغالب الامتحان بيبقى سهل جدا .. الا لو دخلت لدكتور رشيد .. هو طيب بس بيسأل كتير .. و بيحب الطالب اللي قدامه يكون فاهم .

    و أنصحكم تشوفوا الموضوع ده

    http://www.kasralainy.com/forum/showthread.php?t=8071

    هتلاقوا فيه أسئلة و نصايح كتير
    Can't imagine the forum without U .. Kalamntena


معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

المواضيع المتشابهه

  1. مشاركات: 3
    آخر مشاركة: 27-08-2009, 04:48 PM
  2. مشاركات: 6
    آخر مشاركة: 24-07-2009, 11:50 PM
  3. مشاركات: 3
    آخر مشاركة: 22-06-2009, 05:03 PM

الكلمات الدلالية لهذا الموضوع

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •