جدول مذاكرة

[The Doctor]

بصو بقى انا كل يوم اضيع الوقت و اقول هعوض اخر الاسبوع ،ولا بعوض ولا بنيل
فمن اولها كدة عايزين نعمل مع بعض جدول مذاكرة عشان منتأخرش ،ماشي؟!
ها حد عنده اقتراح نبتدي بأيه؟

[dr_mado815]

انا من رايي انكوا اللي تاخدوه تروحوا تقرؤوه ومش مطلوب منكم اكتر من كده دلوقتي

[هاجر]

انا احسن واحدة تعمل جداول و افشل واحدة تمشي عليها ‎:-d‎

[Dr MuslimGirl]

انا من رائي ان مفيش وقت غير اني اذاكر ال خدته
و ده بالعافيه اصلا

[dr ZMZ]

احسن جدول انكم تطفوا النت

عن تجربة

[Dr.msk]

على فكرة انا بفكر اقولهم عندي في البيت لو شافوني رايح اعد على النت يمنعوني عشان الموضوع ده قرب يقلب معايا بادمان

[هاجر]

عندكو حق و الله
‏
‏:((

[Dr.Medicine]

بالتوفيق يا شباب

شدوا حيلكم

معلش هو الموضوع في الاول بيبقي رخم شوية ....

اهم حاجة دلوقتي زكروا اللي بتخدوه

و نصيحة بجد ما كنتش اعرف قيمتها غير بعد ما ضيعتها
" اليوم اللي بيعدي منك استحاااااااااالة تعوضه "

و ابعدوا عن النت ...علشان موضوع الادمااااااااان ده صعب اوييييي


ربنا يوفقكم

..

[alzheimer]

لو لسه مش قادر تعرف إنت عايز تخلص إيه في قد إيه إتبع الخطوات التالية:

الخطوة الاولى:

حد عدد ساعات معين للمذاكرة كل يوم (تلتزم بهم كانهم ورد يومي لازم تخلصه).
رايي الشخصي أربع ساعات (تضمن كده بإذن الله تجيب إمتياز وإحتمال كبير جدا ترتب على الدفعة).
الأربع ساعات ممكن يقلوا على حسب القدرات

الخطوة الثانية:

حدد مكافأة لنفسك هاتخدها بعد ما تخلص الاربع ساعات ... مثلا هاتفرج على فيلم او هاخش على المنتدى

ملحوظة : أربع ساعات من القراءة المركزة (مجرد قراءة عادية بس مش قراءة الجرائد) كفيلة انها تعدك لمذاركة قبل الإمتحان .. قبل الإمتحان بتبقى فترة عصيبة و فترة إرتباك ... إيه اللي بيفرق؟؟؟ ... اللي بيفرق هو الثبات الإنفعالي، والثبات الإنفعالي ده هو جايزة اللي قرأ طول السنة، واللي لسه هايذاكر لأول مرة قبل الإمتحان هو ده اللي بيرتبك جدا لانه بيقرأ حاجات أول مرة يشوفها

القراءة المركزة مش معناها تنام على الكتاب وإنت فاكر نفسك بتركز وتفهم ... يعني انا رأيي تحدد لنفسك من أربع لست صفحات تقراهم في الساعة مش أقل من كده عشان تحافظ على إيقاع ثابت للمذاكرة وكمان تلاقي نفسك بتنجز وبتقلب صفحات في الكتاب وبتخلصه (بحسبة بسيطة يعني حوالي عشرين - ثلاثين صفحة في اليوم)

حافظ على القراءة المستمرة دون التقيد بالكلية ... إلا لو بتاخد دروس يبقى تمشي بخطة اللي اخده في الدرس أقراه في نفس اليوم تحت أي ظرف ... واخر الإسبوع أخليه للترفيه ولو في وقت زيادة أو عاوز تضمن اعلى فرص في الترتيب يبقى تحافظ على مراجعة سريعة (قراءة عابرة) على اللي ذاكرته طول الإسبوع ... وبعدين تطور الامر لغاية ما يبقى عندك مراجعة إسبوعية ومراجعة أكبر شهرية ... لو عملت كده عقبال ما توصل للإمتحان هاتلاقي نفسك أفلت الكتب تلات أربع مرات .. وهتلاقي المذاكرة سهلة جدا قبل الإمتحان

===========

الخطة السابقة لحد ما هتلاقي نفسك عارف تخلص إيه وفي قد إيه وساعتها هاتعرف تقسم كم صفحة في اليوم وتحدد لنفسك إطار زمني للمذاكرة الاولية والمراجعة

==========


ملحوظة أخيرة .. هذه الخطة إسترشادية قابلة للتعديل على حسب قدرات كل فرد و قدرته على التركيز والثبات

============

إفتكر دايما خير الاعمال ادومها ولو قل ... ولو حصلتلك ظروف قهرية ويومك ضاع إقرأ ولو حتى صفحتين او خمسة عشان ماتقطعش عادة المذاكرة، لو المذكرة تعطلت يوم وماقريتش حاجة خالص اليوم ده ممكن يشد وراه خمسة --- خلي بالك

إفتكر مالا يدرك كله لا يترك جله ... لو إتزنقت ولقيت نفس مش عارف تخلص حاجة معينة إسال واعرف أهم جزئية فيها إيه والإمتحانات بتسأل فيها إزاي وأذاكر النقاط المهمة وبس
============

إستعين بالله دائما وجدد نيتك وخلصها لوجه الله تعالى

[__DR_DC__]

ألف شكر يا دكتور علي النصايح الرائعة دي

[alzheimer]

العفو ... بس نسيت اقول حاجة مهمة ... العشرين تلاتين صفحة دول بداية ... إعمل حسابك تزودهم بالتدريج كلما إقتربت من الإمتحان ... وطبعا تزويدهم يعني تزويد عدد الساعات

[dr / MIM]

جميل جدا النصائح دى يا الزهايمر ..

افادتنى كتير

ارجوا انى امشى عليها لمدة اسبوع و بعدين اشوف الدنيا ماشية ازاى

[alzheimer]

جميل جدا النصائح دى يا الزهايمر ..

افادتنى كتير

ارجوا انى امشى عليها لمدة اسبوع و بعدين اشوف الدنيا ماشية ازاى

الطلعة الاولى بتبقى صعبة شوية .. بس العجلة بتدور بعد كده

في حاجة نفسي أقولها .. انا بحاول اطبقها على نفسي ودي برضه من خبرة سنين المذاكرة الطويلة
لما تيجي تذاكر نحي مشاعرك على الجانب ... مش هقولك حب اللي بتذاكره، بس أضعف الإيمان كون حيادي تجاه كل المواد، ما تفكرش نفسك وإنت بتذاكر إنك بتحب المادة الفلانية أكتر او بتكره المادة الفلانية ... طبعا لما تحب حاجة ده شيء كويس جدا، بس لا تقارنها بالمواد التانية ... خلي الأصل إن كل المواد مشاعرك تجاها حيادية (بشكل إيجابي، يعني مش حيادى بمعنى مش فارقة معاك ) ... أنا عارف إن ده بيبقى صعب (عند بعض الناس اللي زيي) بس بجد لو نجحت في ده هاتحقق نتائج حلوة قوي إن شاء الله

لو حد جرب اللي بقولوا ده و ونفع معاه ياريت ما ينسانيش في الدعاء :)

[Nettawy]

ألزهايمر نصائحك قيمة جدا جدا جدا
ربنا ينفعنا بيها
ويجعلها في ميزان حسناتك

[alzheimer]

ألزهايمر نصائحك قيمة جدا جدا جدا
ربنا ينفعنا بيها
ويجعلها في ميزان حسناتك

أمين يا رب العالمين

[Nettawy]

وكما قيل "لا يأتي العلم براحة الجسم !"

[dr.mjramahi]

يا جماعة انا بلشت اتدمر نفسيا
يا جماعة الخير أنا متعود دايما في الثانوية العامة ( التوجيهي ) كنت دايما سابق الاساتذة ب10 صفحات لقدام
انا هسا رح اجي عمصر ب 11/11 يعني راح عليي اكتر من شهر انتو بتدرسوا فيه وانا بتسكع عالانترنت
مش عارف كيف رح اعيش مع الواقع

[kalamntena]

ليه بس يا دكتور؟
تدمر نفسيا حتة واحدة؟
كلمة كبيرة شوية
انت بس اسمع الفترة دى الشرايط اللى على الفورم لحد ما تنزل هتلاقيك متأخرتش كتير ولا حاجة
و ربنا معاك
هما الناس بتوع اولى هم كمان لسه ما شدوش حيلهم قوي متقلقش

[هاجر]

اللي مشدوش بعض طلبة الفورم فقط لكن بجد عندنا عيال في الدفعة ماشاء الله عليهم
و مش عايزه افتكرهم عشان محسدهمش غصب عني ‎:d‎
‏
بس صدقني يا دكتور الامور سهلة جدا و هاتيجي و هاتسبق الدكاتره كمان متقلقش بإذن الله - انا عمري ما سبقت المدرسين و لا حتى حصلتهم ‎:dddd‎

[هاجر]

د / الزهايمر .. اول مرة أقرأ نصايحك بتركييز عالي
بجد رائعة جدااااا .. جزاك الله عنا خيرا كثيرا
‏
بس اسمحلي أضيف حاجة .. نحاول نتعود على المذاكرة في الكلية .. مش كل شوية حد يقولي تيجي ناخد لفة أروح قايم و اقعد اضيع في وقتي .. اقعد في مكان هادي و ذاكر بجد و الله جربتها انهارده بإصرار لاقيت نفسي لميت حاجات كتيره في وقت قصير الحمد لله
‏
و متنسوش عامل الوقت عندنا مهم جدااا لازم نقدره و ننظمه و نرتب اولوياتنا صح .. كليتنا محتاجة تنظيم .. هاتنظم جدولك هاتستريح

و بالتوفيق يارب